ᓗᒃ 19
19
ᒋᓴᔅ ᑭᔭ ᓴᑭᔭᔅ
Luke 19.1-10 (Proper-26 Year C)
1ᒋᓴᔅ ᒋ ᐅᑎᑎᒻ ᐅᑕᓇᔪᐤ ᒐᕆᑯᐤ ᐊ ᐃᓯᓂᐧᑲᑕᔨᒡ, ᒂ ᐱᒐᑦ ᐊᓐᑕ᙮ 2ᒋ ᑕᐤ ᒪᒃ ᓇᐸᐤ ᐊᓐᑕ ᐅᑕᓇᒡ, ᓴᑭᔭᔅ ᐊ ᐃᓯᓂᐧᑲᓱᑦ᙮ ᒋ ᓂᑲᓂᔅᑯᐛᐤ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᔨᒋ᙮ ᓇᔅᒡ ᒪᒃ ᒋ ᐛᔪᑎᓯᐤ ᐅ ᓇᐸᐤ᙮ 3ᒋ ᐎ ᐛᐱᒪᐤ ᒪᒃ ᐊᐛᔪᐛ ᐊᓂᔭ ᒋᓴᔅ ᑲ ᐃᓯᓂᐧᑲᓱᔨᒋ᙮ ᒥᒄ ᒪᒃ ᒋ ᑕᐧᑯᑲᐳᐤ ᐊᑯ ᓇᒪ ᐅᒋ ᐛᐱᒪᐤ, ᑭᔭ ᒋ ᒥᒐᑎᔪᐛ ᐊᐛᔪᐛ ᐊ ᐊᑯᔅᑲᑯᑦ᙮ 4ᐊᑯ ᒂ ᓂᑲᓂᐸᑕᑦ ᒂ ᓴᑭᒋᐛᑦ ᒥᔅᑎᒂ, ᒐᒋ ᐛᐱᒪᑦ ᒋᓴᓴ ᐃᔅᐱ ᐱᒧᑕᔨᒐ᙮
5ᐃᔅᐱ ᒪᒃ ᒋᓴᔅ ᐛᑎᑕᑦ ᐊᓂᔭ ᒥᔅᑎᒂ ᒋ ᑎᔅᑎᓴᐳᐤ ᒂ ᐃᑕᑦ ᐊᓂᔭ ᓴᑭᔭᓴ, “ᒋᐱᔾ ᐸᒋ ᓂᑎᒋᐛ ᓴᑭᔭᔅ, ᐊ ᑕᔨᓐ ᓂᑭ ᑕᓐ ᐊᓄᒡ ᒐ ᒋᓯᑲᒡ᙮” 6ᓴᑭᔭᔅ ᒪᒃ ᑎᐛᒡ ᒋ ᐊᑎ ᓂᑎᒋᐛᐸᑕᐤ ᐊ ᒥᔽᔨᑕᐧᒃ ᒐ ᐱᑎᑲᐊᑦ ᒋᓴᓴ᙮ ᓇᔅᒡ ᒋ ᒥᔽᔨᑎᒻ ᐊ ᐃᑐᑕᐊᑦ ᐊᓐᑕ ᐎᒋᒡ᙮
7ᒥᓯᐛ ᒪᒃ ᐊᓐᒡ ᐃᔪᒡ ᑲ ᐛᐱᒪᒡ ᒋᓴᓴ ᐊ ᐱᑎᑲᐃᑯᔨᒋ ᓴᑭᔭᓴ ᒪᒪᒡ ᒋ ᐃᑕᐅᒡ ᐊ ᐃᔅᒋᔄᒡ, “ᐅ ᓇᐸᐤ ᐊ ᐃᑐᑕᑦ ᐊᓐᑕ ᐅᒥᒋᑥᐛ ᐎᒋᔨᒡ᙮”
8ᓴᑭᔭᔅ ᒪᒃ ᒋ ᐱᓯᑯᐤ ᐊᑯ ᒂ ᐃᑕᑦ ᐅᑎᐸᔨᒋᒐᐛ, “ᓂᑐᑐᐎ ᒪ ᐅᑎᐸᔨᒋᒐᐤ᙮ ᐊᐱᑐᐤ ᓂᑭ ᒥᔭᐅᒡ ᐊᔅᐱᔅ ᑭᓄᐛᔨᑎᒪᓐ ᒐᒂᓐ ᐊᓐᒡ ᑲ ᒋᔅᑎᒪᑎᓯᒡ᙮ ᑲ ᒋᒧᑎᒧᐛᐅᒐ ᐊᐛᓐ ᐊᑐᐎᔅ ᓇᐛᐤ ᓂᑭ ᑕᐱᒥᔭᐤ᙮”
9ᒋᓴᔅ ᒪᒃ ᒋ ᐃᑕᐤ, “ᐊᓄᒡ ᐅ ᒐᓯᑲᒡ ᒥᓯᐛ ᐃᔪᒡ ᑲ ᐎᒋᒡ ᐅᑕ ᒋᒋᒡ ᐱᒪᒋᐊᑭᓄᐅᒡ᙮ ᒋᔾ ᒪᒃ ᓴᑭᔭᔅ ᑭᔭ ᒋᔾ ᒋᑦ ᐃᑎᔅᑲᓇᓯᓐ ᐊᓐᑕ ᐊᑉᕋᐊᒻ ᐊ ᑕᑦ᙮ 10ᐃᔪᐤ ᐅᑯᓯᓴᓐ ᒋ ᐸᒋ ᑎᑯᓯᓐ ᒐᒋ ᓇᓂᑐᐛᐱᒪᑦ ᑭᔭ ᒐᒋ ᐱᒪᒋᐊᑦ ᐊᓂᔭᔪᐛ ᐃᔪᐛ ᑲ ᐅᓂᓯᓂᔨᒋ᙮”
ᓱᓇᔭᐤ ᑲ ᒥᔨᐛᓄᐅᒡ ᑎᐸᒋᒧᐅᓐ
ᒪᑎᔪᐤ 25.14-30
11ᐊᔭᔅᒃ ᒪᒃ ᒋ ᐊᑎ ᐸᓱᐛᐸᑎᒧᒡ ᒋᕈᓯᓕᒥᔪᐤ ᐊᓐᒡ ᐃᔪᒡ ᐊ ᓇᓴᐛᒡ ᒋᓴᓴ᙮ ᐊᓂᔭ ᒪᒃ ᑕᓐ ᑲ ᐃᓯ ᐛᐎᑎᒪᑯᒡ ᒋᓴᓴ ᒋ ᐃᑕᔨᑎᒧᒡ ᑕᑈ ᓴᔅ ᑎᐛᒡ ᒐ ᓄᑯᓂᔨᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮ ᐊᑯ ᒪᒃ ᒋᓴᔅ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᑲ ᐎᑎᒧᐛᑦ ᒪᒂᒡ ᐊ ᐊᑎ ᐱᒧᑕᒡ᙮ ᒋ ᐃᔅᒋᔄᐤ ᒪᒃ, 12“ᓇᐸᐤ ᓇᔅᒡ ᐊ ᒋᔅᑕᔨᑕᑯᓯᑦ, ᒋ ᐃᑐᑕᐤ ᐊᓐᑕ ᐛᔪᐤ ᐊᔅᒋᒡ ᒐᒋ ᒋᓴᐅᒋᒪᐅᐊᑭᓄᐅᑦ ᑭᔭ ᒥᓐ ᑲᐤ ᑲ ᐸᒋ ᒋᐛᑦ᙮ 13ᒥᒄ ᒪᒃ ᐊᔅᒄ ᐊᑲ ᐅᒋ ᔅᑐᑕᑦ ᒋ ᐎᓴᒪᐤ ᐸᐃᑯᔪᐤ ᐊᓂᔭ ᐅᑦ ᐊᐱᒋᐊᑭᓇ ᐸᐸᐃᒄ ᒂ ᒥᔭᑦ ᓱᓇᔭᔪᐤ ᐊᑯ ᒂ ᐃᑕᑦ, ‘ᑕᐧᑯᒡ ᐎ ᐅᓯᑕᒄ ᓱᓇᔭᐤ ᐅ ᐅᒋ ᓱᓇᔭᐤ ᒐ ᐃᔅᐱᔅ ᐊᑲ ᑕᔭᓐ᙮’
14ᐊᓂᔭᔪᐛ ᒪᒃ ᐃᔪᐛ ᑲ ᐅᒋᒪᐧᑲᑐᐛᑦ ᒋ ᐛᐧᑲᑎᑯᐤ᙮ ᐃᔅᐱ ᑲ ᔅᑐᑕᑦ, ᐊᓂᔭ ᐅᑦ ᐃᔨᒪ ᒋ ᐃᑎᓴᐛᔪᐛ ᐊᐛᔪᐛ ᒐᒋ ᐳᑯᓄᒥᑯᑦ ᐊᓐᑕ ᐊᓂᔭ ᒐ ᐃᑐᑕᑦ ᒐᒋ ᐃᔅᒋᔄᔨᒋ ᐊᑲ ᓂᑐᐛᔨᒥᑯᑦ ᒐᒋ ᒋᓴᐅᒋᒪᐅᐊᑭᓄᐅᑦ᙮”
15“ᒥᒄ ᒪᒃ ᐃᔭᐱᒡ ᒋ ᒋᓴᐅᒋᒪᐅᐊᑭᓄᐤ ᐊᑯ ᒥᓐ ᑲᐤ ᑲ ᒋᐛᑦ᙮ ᐊᑯ ᒂ ᐎᓴᒪᑦ ᐊᓂᔭ ᐅᑦ ᐊᐱᒋᐊᑭᓇ ᐊ ᓂᑐ ᒋᔅᒐᔨᒪᑦ ᑕᓐ ᑲ ᐃᔅᐱᔅ ᐅᓯᑕᔨᒋ ᐊᓂᔭ ᓱᓇᔭᔪᐤ ᑲ ᒥᔭᑦ᙮”
16“ᐊᓐ ᓂᔅᑎᒻ ᑲ ᑎᑯᓯᐧᒃ ᓇᐸᐤ ᒋ ᐃᑕᐤ, ‘ᓄᒋᒪᒻ, ᐸᐃᒄ ᔅᒋ ᐸᒋ ᒥᔨᓐ ᓱᓇᔭᐱᔅᒄ ᑭᔭ ᐸᐃᑯᔪᐤ ᓱᓇᔭᐱᔅᑯᒡ ᓂᒋ ᐅᓯᐊᐅᒡ ᐊᓐᑕ ᐅᒡ᙮’ ”
17“ ‘ᒋ ᒥᔪᑐᑕᓐ, ᒋ ᒥᔪ ᐊᑐᔅᒐᓐ,’ ᒋ ᐃᑎᑯᐤ ᐅᒋᒪᒪ᙮ ‘ᐊᒋ ᓄᑯᑕᔨᓐ ᐊ ᑕᑈᐅᒐᔨᑕᑯᓯᔨᓐ ᑯᐃᔅᒄ ᒐᒋ ᐃᓯ ᐊᑐᔅᒐᔅᑎᒥᓐ ᒐᒂᓐ ᐊ ᐊᐱᓴᓯᒡ ᒥᔅᑯᒡ ᒋᑭ ᒥᔨᑯᓐ ᐸᐃᑯᔪᐤ ᐅᑕᓇᐛ ᒐᒋ ᓂᑲᓂᔅᑭᒥᓐ᙮’ ”
18“ᒥᓐ ᑯᑎᒃ ᑲ ᑎᑯᓯᐧᒃ ᒂ ᐃᔅᒋᔄᑦ, ‘ᓄᒋᒪᒻ, ᔅᒋ ᐸᒋ ᒥᔨᓐ ᐸᐃᒄ ᓱᓇᔭᐱᔅᒄ ᑭᔭ ᐱᑕᑕᒡ ᓱᓇᔭᐱᔅᑯᒡ ᐊ ᐅᓯᐃᒂᐤ᙮’ ”
19“ᒋ ᐃᑎᑯᐤ ᒪᒃ ᐊᓂᔭ ᐅᒋᒪᐛ, ‘ᒋᑭ ᐅᒋᒪᐅᓐ ᐱᑕᑕᒡ ᐅᑕᓇᐛ᙮’ ”
20“ᐊᑯ ᒥᓐ ᑯᑎᒃ ᐊᐱᒋᐊᑭᓐ ᒂ ᑎᑯᓯᐧᒃ ᐊᑯ ᒂ ᐃᔅᒋᔄᑦ, ‘ᒪᐅ ᒋᓱᓇᔭᐱᔅᑯᒻ, ᓂᒋ ᒪᑯᐱᑕᐤ ᐱᒍᐎᔭᓂᒡ᙮ 21ᔅᒋ ᑯᔅᑎᑎᓐ ᐛᔅ ᐊᓐ, ᐅᓴᒻ ᒋ ᒥᒋᑥᓐ᙮ ᒋ ᐅᑎᓇᓐ ᒐᒂᓐ ᐊ ᐊᑲ ᑎᐸᔨᑎᒥᓐ ᑭᔭ ᒋ ᒪᒧᓴᒋᓇᓐ ᓂᑕᐅᒋᑕᑭᓇ ᐊᑲ ᒋᔾ ᐅᒋ ᓂᑕᐅᒋᑕᔨᓐ᙮’ ”
22“ᐊᑯ ᐊᓂᔭ ᐅᒋᒪᒪ ᒋ ᐃᑎᑯᐤ, ‘ᒋᔾ ᑲ ᒥᒋᑯᐸᓇᐎᔨᓐ, ᓂᑭ ᐊᐱᒋᑕᓐ ᐊᓐ ᑲ ᐃᔅᒋᔄᔨᓐ ᐊ ᓂᓱᐅᓇᒋᒥᑕᓐ᙮ ᒋᑦ ᐃᑕᔨᒥᓐ ᐊ ᒥᒋᑥᔭᓐ, ᐊ ᐅᑎᓂᒪᓐ ᒐᒂᓐ ᐊᑲ ᑎᐸᔨᑎᒪᓐ ᑭᔭ ᐊ ᒪᒧᓴᒋᓂᒪᓐ ᒐᒂᓐ ᐊᑲ ᓂᔾ ᐅᒋ ᓂᑕᐅᒋᑕᔭᓐ ? 23ᐊ ᐃᑕᔨᒧᐅᓇ ᒪᒃ ᐅ ᐊ ᐃᑕᔨᑕᑯᓯᔭᓐ, ᒐᒂᓐ ᐛᒋ ᐊᑲ ᐅᒋ ᐊᔅᑕᔨᓐ ᓂᓱᓇᔭᓂᒻ ᐊᓐᑕ ᓱᓇᔭᐅᒋᐛᐱᒡ ᒐᒋ ᐅᓯᑕᐱᔨᒡ ? ᐊᑯ ᒪᒃ ᐊᓄᒡ ᑕᑯᓯᓂᔭᓐ ᓂᐸ ᒥᔅᑲᓐ ᑕᓐ ᑲ ᐃᔅᐱᔅ ᐅᓯᑕᐱᔨᒂ᙮’ ”
24“ᐊᑯ ᒂ ᐃᑕᑦ ᐊᓂᔭ ᑯᑎᑲ ᐊᓐᑕ ᑲ ᓇᓂᐳᔨᒋ, ‘ᐅ ᓱᓇᔭᐱᔅᒄ ᒥᔭᐧᒄ ᐊᓐ ᐊᐱᒋᐊᑭᓐ ᑲ ᐸᐃᑯᔪᐛᓯᔨᒋ ᓱᓇᔭᐱᔎ᙮’ ”
25“ᒋ ᐃᑕᐅᒡ ᒪᒃ ᐅᒋᒪᒧᐛᐛ, ‘ᓴᔅ ᐸᐃᑯᔪᐛᓯᔪᐛ ᐎᔾ ᐊ ᐊᔭᐛᑦ᙮’ ”
26“ᐊᑯ ᐊᓐ ᐅᒋᒪᐤ ᒂ ᐃᔅᒋᔄᑦ, ‘ᒋᑦ ᐃᑎᓇᐛᐤ ᒪᒃ ᓂᔾ, ᒥᓯᐛ ᐊᐛᓐ ᑲ ᐅᓯᑕᑦ ᒐᒂᔪᐤ ᐊᑐᐎᔅ ᒋᑭ ᑎᑯᓂᔪᐤ ᒐ ᐃᓯ ᒥᔭᑭᓄᐅᑦ᙮ ᐊᑯ ᐊᓐ ᐊᐛᓐ ᐊᑲ ᓇᔅᒡ ᑲ ᐊᔭᑦ ᒐᒂᔪᐤ ᐛᐛᒡ ᐊᓂᔭ ᑕᓐ ᐊ ᐃᓯ ᐊᐱᓯᔅ ᐊᔭᑦ ᒋᑭ ᐅᑎᓇᑭᓄᐅᔪᐤ᙮ 27ᐊᑯ ᒪᒃ ᐸᓱᐛᐧᑯᒡ ᐊᓐᒡ ᑲ ᐛᐧᑲᓯᒡ ᐊᓐᒡ ᐊᑲ ᓂᑐᐛᔨᒥᒡ ᒐᒋ ᒋᓴᐅᒋᒪᐅᒡ, ᒐᒋ ᓂᐸᐊᑭᓄᐅᒡ ᐅᑕ ᐊ ᑕᐅᒡ᙮’ ” ᐊᔪᐅᒄ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒋᓴᔅ ᑲ ᐎᑕᐧᒃ ᒪᒂᒡ ᐊ ᐊᑎ ᐱᒧᑕᒡ ᒋᕈᓯᓕᒥᒡ ᐃᔅ᙮
ᒋᓴᔅ ᑲ ᐱᒐᑦ ᒋᕈᓯᓕᒥᒡ
ᒪᑎᔪᐤ 21.1-11; ᒪᕐᒃ 11.1-11; ᒠᓐ 12.12-19
Luke 19.28-40 (Palm Sunday Year C)
28ᐃᔅᐱ ᒪᒃ ᒋᓴᔅ ᑲᒋ ᑎᐸᒋᒧᑦ, ᐊᑯ ᒋᕈᓯᓕᒥᒡ ᒂ ᐃᑐᑕᒡ, ᐊ ᐊᑎ ᓂᑲᓄᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ ᐊ ᑕᔨᒋ᙮ 29ᐃᔅᐱ ᒪᒃ ᐱᔭᓱᐛᐸᑕᒡ ᐊᓂᔭᔪᐛ ᐅᑕᓇᐛ ᐸᑦᐸᐃᒡ ᑭᔭ ᐸᑕᓂ ᑲ ᐃᓯᓂᐧᑲᑕᔨᒋ ᐊᓐᑕ ᐱᔅᑯᑎᓇᔪᐤ ᐊᓕᐱᔅ ᑲ ᐃᓯᓂᐧᑲᑕᔨᒡ ᑲ ᑎᑯᓂᔨᒡ ᐊᑯ ᑲ ᓂᑲᓂᑎᓴᐛᑦ ᓂᓱ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, 30“ᓇᑕ ᐃᑐᑕᒄ ᐊᓇ ᐅᑕᓇᐤ᙮ ᑎᑯᓯᓂᔭᒂ ᓇᑕ ᒋᑭ ᐛᐱᒪᐛᐤ ᐅᐧᑲᓂᔅ ᒧᔭᒻ ᐊ ᐊᐱᓯᓯᑦ ᑲᐸᐃᑭᔎᐤ ᑲ ᐃᓯᓇᑯᓯᑦ, ᐊᑲ ᓂᑕ ᐊᔅᒄ ᐅᒋ ᑕᑎᐱᔨᒋ ᐊᐛᔪᐛ ᐅᔅᐱᔅᑯᓂᒡ᙮ ᒐ ᐊᐱᐧᑯᓇᒄ ᐊᑯ ᒐ ᐸᓱᐛᒄ ᐅᑕ᙮ 31ᑯᒂᒋᒥᑯᑕᒂ ᐊᐛᓐ ᒐᒂᔪᐤ ᐛᒋ ᐊᐱᐧᑯᓂᒪᑯ ᐊᑯ ᒐ ᐃᑕᒄ, ‘ᐅᑎᐸᔨᒋᒐᐤ ᓂᑐᐛᔨᒪᐤ᙮’ ”
32ᐊᑯ ᒪᒃ ᒂ ᐃᑐᑕᒡ ᐊᓐᑕ ᐅᑕᓇᒡ᙮ ᒥᓯᐛ ᒪᒃ ᐊᐅᑯᓐ ᑲ ᐃᔅᐱᔨᒡ ᑕᓐ ᑲ ᐃᑎᑯᒡ ᒋᓴᓴ᙮ 33ᒪᒂᒡ ᒪᒃ ᐊ ᐊᐱᐧᑯᓇᒡ ᐊᓂᔭ ᐅᐧᑲᓂᓴ ᒧᔭᒻ ᑲᐸᐃᑭᔎᐤ ᐊ ᐃᓯᓇᑯᓯᔨᒋ, ᐊᓂᔭ ᑲ ᑎᐸᔨᒪᔨᒋ ᐊᓂᔭ ᐅᐧᑲᓇ ᒋ ᐃᑎᑯᐅᒡ, “ᒐᒂᓐ ᐛᒋ ᐊᐱᐧᑯᓇᒄ ᐊᓐ ?”
34“ᐅᑎᐸᔨᒋᒐᐤ ᓂᑐᐛᔨᒪᐤ,” ᒋ ᐃᑕᐅᒡ᙮
35ᐊᑯ ᒋᓴᓴ ᐊ ᑕᔨᒋ ᒂ ᐃᑐᑕᐊᒡ᙮ ᐊᑯ ᒂ ᐊᑯᓇᐛᒡ ᐅᔅᐱᔅᑯᓂᔨᒡ ᐊᓂᔭ ᐅᐧᑲᓂᓴ ᐅᑦ ᐊᑯᐳᐛᐛ ᐊ ᐊᐱᒋᑕᒡ ᐊᑯ ᒂ ᐎᒋᐊᒡ ᒋᓴᓴ ᐊ ᑕᑕᐃᓱᔨᒋ ᐊᓐᑕ᙮ 36ᐃᔅᐱ ᒪᒃ ᐸᒧᑕᐃᑯᑦ ᒋᓴᔅ ᑭᔭ ᐊᓂᔭ ᐅᐧᑲᓂᓴ ᒋ ᓴᑥᑭᔅᑕᐅᒡ ᐊᓐᒡ ᐃᔪᒡ ᐅᑦ ᐊᑯᐳᐛᐛ ᐊᓐᑕ ᒐ ᐱᒧᑕᐃᑯᔨᒋ ᒋᓴᓴ ᐊᓂᔭ ᐅᐧᑲᓂᓴ᙮
37ᐃᔅᐱ ᒪᒃ ᐱᔭᓱᐛᐸᑕᐧᒃ ᒋᕈᓯᓕᒥᔪᐤ ᒋᓴᔅ, ᐊ ᐊᑎ ᓂᑎᒋᐛᒡ ᐊᓂᔭ ᐱᔅᑯᑎᓇᔪᐤ ᐊᓕᐱᔅ ᑲ ᐃᓯᓂᐧᑲᑕᔨᒡ ᒪᔅᑭᓇᒡ ᐊ ᐱᒧᑕᒡ, ᒥᓯᐛ ᐊᓂᔭ ᐊᐛᔪᐛ ᑲ ᓇᓴᐅᑯᑦ ᒋ ᐅᒋ ᒪᒥᒋᒪᐅᒡ ᒋᓴᒪᓂᑐᐛ ᐊ ᒋᔄᐛᒡ ᑭᔭ ᐊ ᒧᒋᒐᔨᑎᒥᐃᑯᒡ ᒥᓯᐛ ᐊᓂᔭ ᑕᓐ ᑲ ᐃᓯ ᐛᐸᑕᒡ ᒋᓴᓴ ᐊ ᒪᒥᔅᑲᒡ ᐃᑎᔨᒋ᙮ 38ᐊᐅᒄ ᒪᒃ ᐅᔭ ᑲ ᐃᔅᒋᔄᒡ ᐊ ᒪᒥᒋᒪᒡ ᒋᓴᒪᓂᑐᐛ,
“ᓱᐛᔨᑕᑯᓱᐤ ᐅ ᒋᓴᐅᒋᒪᐤ ᑲ ᐸᒋ ᐃᑎᓴᐅᑯᑦ ᐅᑎᐸᔨᒋᒐᐛ, ᒐᒋ ᐃᑐᑕᐧᒃ ᐊᓂᔭ ᑲ ᐃᑎᓱᒪᑭᓄᐅᑦ᙮
ᑎᑯᓐ ᒋᔭᒪᔨᑎᒧᐅᓐ ᒋᒋᒋᓯᑯᒡ᙮ ᑭᔭ ᒋᑭ ᒪᒥᒋᒪᑭᓄᐤ ᒋᓴᒪᓂᑐᐤ ᒪᐅᒡ ᑲ ᒋᔅᑕᔨᑕᑯᓯᑦ᙮”
39ᐱᔅᒐ ᒪᒃ ᐸᕆᓯᔨᒡ ᐊᓐᑕ ᑲ ᑕᒡ ᒋ ᐃᑕᐅᒡ ᐊᓂᔭ ᒋᓴᓴ, “ᒋᔅᑯᑎᒪᒐᓱᐤ, ᒋᑕᐊᒧᐅᒡ ᒪ ᐅᒡ ᒋᒋᔅᒋᓄᐊᒧᐛᑭᓐᒡ᙮ ᐃᓯᒡ ᒐᒋ ᒋᒺᒡ᙮”
40ᒋᓴᔅ ᒋ ᐃᑕᐤ, “ᒋ ᐎᑎᒪᑎᓇᐛᐤ, ᒋᒺᑥᐛ ᐅᒡ ᐃᔪᒡ, ᒋᐸ ᒋ ᐃᓯᓇᑯᓐ ᐅᒡ ᐊᓯᓂᔨᒡ ᒐᒋ ᒪᒥᒋᒥᒡ᙮”
ᒋᓴᔅ ᒋ ᒪᑎᒻ ᒋᕈᓯᓕᒥᔪᐤ
41ᐊᔭᔅᒃ ᒪᒃ ᒋ ᐊᑎ ᐸᓱᐛᐸᑎᒻ ᒋᓴᔅ ᒋᕈᓯᓕᒥᔪᐤ, ᐃᔅᐱ ᒪᒃ ᐎᔭᐸᑕᐧᒃ ᒋ ᒪᑎᒻ᙮ 42ᐊᑯ ᐅᔭ ᑲ ᐃᑕᑦ ᐊᓂᔭ ᐃᔪᐛ ᐊᓐᑕ ᑲ ᐅᒋᔨᒋ ᒋᕈᓯᓕᒥᒡ, “ᑭᒪ ᒋᔅᒐᔨᑎᒪᒄ ᑕᓐᑕ ᒐᒋ ᐅᒋ ᐊᔭᐛᑯᐱᓇ ᒋᔭᒪᔨᑎᒧᐅᓐ᙮ ᒥᒄ ᒪᒃ ᓇᒪ ᓇᔅᒡ ᒋ ᓂᔅᑐᑕᓇᐛᐤ᙮ 43ᒋᑭ ᐅᑎᒋᐱᔪᐤ ᐊᓐᒡ ᑲ ᐛᐧᑲᑎᑕᑯᒡ ᒐ ᒋᐸᐅᑕᑯᒡ ᐊᓐᑕ ᐊᓐ ᐅᑕᓇᐤ ᑲ ᑕᔭᒄ, ᒋᑭ ᒋᐱᑲᐳᔅᑕᑯᐛᐅᒡ ᒐ ᐊᑲ ᒋ ᐎᐎᔭᒄ᙮ 44ᒥᓯᐛ ᐊᐛᓐ ᐊᓐᑕ ᒋᐅᑕᓇᒧᐛᒡ ᒋᑭ ᓂᓱᐅᓇᒋᐊᑭᓄᐤ ᑭᔭ ᐊᓐ ᒋᐅᑕᓇᒧᐛᐤ ᒋᑭ ᓂᓱᐅᓇᒋᑕᑭᓄᐤ᙮ ᓇᒪ ᐛᒋ ᐸᐃᒄ ᐊᓯᓂᔾ ᒧᔭᒻ ᒋᑭ ᐅᒋ ᐃᑎᒧᐤ ᐊᓐᑕ ᒋᒋᐛᐛᒡ᙮ ᐛᔅ ᓇᒪ ᒋ ᐅᒋ ᒧᓯᑕᓇᐛᐤ ᐊᓐᑕ ᑲ ᐅᑎᒋᔨᐱᒂ ᒋᓴᒪᓂᑐᐤ ᑲ ᐎ ᐱᒪᒋᐃᑕᒄ᙮”
ᒋᓴᔅ ᑲ ᐎᐛᐱᓇᑦ ᑲ ᐊᑕᐛᔨᒋ ᐊᔭᒥᐊᐅᒋᐛᐱᒡ
ᒪᑎᔪᐤ 21.12-17; ᒪᕐᒃ 11.15-19; ᒠᓐ 2.13-22
45ᒋᓴᔅ ᒪᒃ ᒋ ᐱᒐᐤ ᒋᓴᐊᔭᒥᐊᐅᒋᐛᐱᒡ, ᒂ ᐊᑎ ᐛᐎᐎᑎᓴᐛᑦ ᐊᓂᔭ ᑲ ᐊᑕᐛᔨᒋ ᑭᔭ ᐊᓂᔭᔪᐛ ᑲ ᐅᑎᓂᒐᔨᒋ ᐊᓐᑕ ᐱᑎᑭᒥᒡ ᑲ ᑕᔨᒋ᙮ 46ᐊᑯ ᒂ ᐃᑕᑦ, “ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᒋ ᐃᔅᒋᔄᒂ ᒋᓴᒪᓂᑐᐤ,
ᓂᒡ ᐊ ᐊᔭᒥᐊᓄᐅᒡ ᒋᑭ ᐃᑕᐱᑎᓐ᙮
ᒥᒄ ᒪᒃ ᒧᔭᒻ ᑲᒋᒧᑎᒡ ᐅᐛᑎᑯᐛᐤ ᐊᐅᒄ ᐊ ᐃᓯᓇᑯᑕᔭᒄ᙮”
47ᐊᓯᑯᒻ ᒋᓯᑲᐛ ᒪᒃ ᒋ ᒋᔅᑯᑎᒪᒐᐤ ᒋᓴᔅ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ ᐊᓂᔭᔪᐛ ᒪᒃ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᑲ ᒋᔅᑯᑎᒪᒐᔨᒋ ᐎᓱᐛᐅᓂᔪᐤ ᑭᔭ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐃᔪᐛ ᒋ ᐎ ᓂᐸᐃᑯᐤ᙮ 48ᒥᒄ ᒪᒃ ᓇᒪ ᐅᒋ ᒋᔅᒐᔨᑎᒧᒡ ᑕᓐ ᒐ ᐃᑎᒡ ᒐᒋ ᓂᐸᐊᒡ ᐛᔅ ᒥᓯᐛ ᐊᓂᔭ ᐃᔪᐛ ᓇᔅᒡ ᐃᔭᒂ ᒋ ᓂᑐᑐᐛᔪᐛ ᒥᓯᐛ ᐊᒋ ᐎ ᐸᑎᒥᔨᒋ ᑕᓐ ᐊ ᐃᔅᒋᔄᔨᒋ ᒋᓴᓴ᙮
Currently Selected:
ᓗᒃ 19: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
