ᒠᓐ 13
13
ᒋᓴᔅ ᑲ ᒋᔅᑕᐸᐅᑕᐛᑦ ᐅᒋᔅᒋᓄᐊᒧᐛᑭᓇ ᐅᓯᑎᔪᐛ
1ᐊᔅᒄ ᐊᑲ ᐅᒋ ᐅᑎᒋᐱᔨᒡ ᐎᒪᔅᑲᒐᐅ-ᒥᑯᓴᐅᓂᔪᐤ, ᓴᔅ ᒋ ᒋᔅᒐᔨᑎᒻ ᒋᓴᔅ ᐊ ᐅᑎᒋᐱᔨᒡ ᒐ ᓂᑭᑕᐧᒃ ᐅᔭ ᐊᔅᒋᔪᐤ ᑭᔭ ᒐ ᓂᑐᐛᐱᒪᑦ ᐅᑕᐎᒪᐛ᙮ ᒧᔅ ᒋ ᓴᒋᐊᐤ ᒥᓯᐛ ᐊᓂᔭ ᑲ ᑕᑈᔭᔨᒥᑯᑦ ᐅᑕ ᐊᔅᒋᒡ ᑲ ᑕᔨᒋ ᑭᔭ ᒐ ᐅᑎᒋᐱᔨᒡ ᒐᒋ ᐛᐸᑎᔭᑦ ᑕᓐ ᐊᔅᐱᔅ ᓴᒋᐊᑦ᙮
2ᒪᒂᒡ ᒪᒃ ᒋ ᐅᑕᑯᓯᐅᒥᒋᓱᐅᒡ ᒋᓴᔅ ᑭᔭ ᐅᒋᔅᒋᓄᐊᒧᐛᑭᓇ᙮ ᐸᐃᒄ ᒪᒃ ᐊᓐ ᒋᔅᒋᓄᐊᒧᐛᑭᓐ ᒍᑎᔅ ᑲ ᐃᓯᓂᐧᑲᓱᑦ, ᓴᐃᒥᓐ ᐃᔅᑲᕆᔭᑦ ᐅᑯᓴ, ᓴᔅ ᐊᓐᑕ ᒋ ᐃᑐᑕᑯ ᒥᒋᒥᓂᑐᐛ ᒐᒋ ᐃᑕᔨᑕᐧᒃ ᒐᒋ ᐎᔭᓯᐱᔅᑎᓇᑦ ᒋᓴᓴ ᐊᓂᔭ ᒐ ᑎᐱᔅᑲᔨᒡ᙮ 3ᒋᓴᔅ ᒋ ᒋᔅᒐᔨᑎᒻ ᐅᑕᐎᒪᐛ ᐊᒋ ᒥᔨᑯᑦ ᓱᐧᑲᑎᓯᐅᓂᔪᐤ ᒥᓯᐛ ᒐᒂᔪᐤ ᒐᒋ ᐃᑐᑕᐧᒃ, ᑭᔭ ᒋ ᒋᔅᒐᔨᑎᒻ ᒋᓴᒪᓂᑐᐛ ᐊ ᑕᔨᒋ ᐊ ᐅᒋᑦ ᑭᔭ ᒥᓐ ᑲᐤ ᐊᓐᑕ ᒋᓴᒪᓂᑐᐛ ᐊ ᑕᔨᒋ ᒐ ᐃᑐᑕᑦ᙮ 4ᐊᑯ ᒂ ᐱᓯᑯᑦ ᐊᓐᑕ ᒥᒋᓱᐛᑭᓇᑎᑯᒡ ᐅᒋ, ᒂ ᒥᓇᐧᒃ ᐊᓂᔭ ᐅᑦ ᐊᑯᑉ ᐅᔅᒡ ᑲ ᒋᔅᑲᐧᒃ ᒂ ᐅᑎᓇᐧᒃ ᑲᓯᒂᐅᓂᔪᐤ ᑲ ᐱᒂᑕᐛᒐᑦ᙮ 5ᒂ ᑯᑎᐱᓇᐧᒃ ᓂᐱᔪᐤ ᐛᐸᑲᐎᐅᓱᔭᑭᓂᒡ ᐊᑯ ᒂ ᒋᔅᑕᐸᐅᒋᓯᑕᓇᑦ ᐅᒋᔅᒋᓄᐊᒧᐛᑭᓇ ᑭᔭ ᒂ ᐸᒂᐊᒺᑦ ᐅᓯᑎᔪᐛ ᐊᓂᔭ ᑲᓯᒂᓂᔪᐤ ᑲ ᐱᒂᑕᐛᒐᑦ ᐊ ᐊᐱᒋᐊᑦ᙮
6ᒋ ᓇᑕᐤ ᓴᐃᒥᓐ ᐱᑕᕋ ᐊᑯ ᒂ ᐃᑎᑯᑦ, “ᐅᑎᐸᔨᒋᒐᐤ, ᒋᑭ ᒋᔅᑕᐸᐅᒋᓯᑕᓐ ᐊ ?”
7ᒋᓴᔅ ᒂ ᐃᑕᑦ, “ᓇᒪ ᒋ ᓂᔅᑐᑕᓐ ᐊᓄᒡ ᑕᓐ ᐊ ᐃᑎᔭᓐ, ᒥᒄ ᒪᒃ ᐊᔅᒄ ᒋᑭ ᓂᔅᑐᑕᓐ᙮”
8ᐊᑯ ᐱᑕᕐ ᒂ ᐃᓯ ᐎᑎᒧᐛᑦ ᐊ ᐃᑕᑦ, “ᓇᒪ ᓂᑕ ᒋᑭ ᐅᒋ ᒋᔅᑕᐸᐅᑕᓐ ᓂᓯᑕ᙮” ᒋ ᐃᑎᑯᐤ ᒪᒃ ᒋᓴᓴ, “ᐊᑲ ᒋᔅᑕᐸᐅᑕᔭᓇ ᒋᓯᑕ ᓇᒪ ᒋᑭ ᐅᒋ ᐅᒋᔅᒋᓄᐊᒧᐛᑭᓂᑐᑕᑎᓐ᙮”
9ᓴᐃᒥᓐ ᐱᑕᕐ ᒂ ᐃᑕᑦ, “ᐅᑎᐸᔨᒋᒐᐤ, ᐊᑲᐎᔾ ᒪ ᒥᒄ ᓂᓯᑕ ᒋᔅᑕᐸᐅᑕ, ᒋᔅᑕᐸᐅᑕ ᑭᔭ ᓂᔅᑎᒂᓐ ᑭᔭ ᓂᑎᒋᔭ᙮”
10ᒋᓴᔅ ᒂ ᐃᑕᑦ, “ᐊᐛᓐ ᓴᔅ ᐊᒋ ᐱᑲᓯᒧᑦ ᓇᒪ ᓂᑐᐛᔨᑎᒻ ᒥᓐ ᒐᒋ ᐱᑲᓯᒧᑦ ᒥᒄ ᐅᓯᑕ ᒋᐸ ᒋᔅᑕᐸᐅᑕᑭᓄᐅᔪᐛ᙮ ᒥᓯᐛ ᒪᒃ ᐊ ᑎᓯᔭᒄ ᓴᔅ ᒋ ᐸᔭᒋᓯᓇᐛᐤ, ᒥᒄ ᐸᐃᒄ ᐊᓐᑕ ᐊ ᑎᓯᔭᒄ ᓇᒪ ᐸᔭᒋᓯᔪᐤ᙮” 11ᓴᔅ ᒋ ᒋᔅᒐᔨᑎᒻ ᒋᓴᔅ ᑕᓐ ᐊᓂᔭᔪᐛ ᐊᓂᔭ ᒐ ᐎᔭᓯᐱᔅᑎᓂᑯᑦ ᐛᒋ ᐃᔅᒋᔄᑦ ᐅᔭ᙮ ᓴᔅ ᒥᓯᐛ ᒋ ᐸᔭᒋᓯᓇᐛᐤ “ᒥᒄ ᐸᐃᒄ ᐊᓐᑕ ᐊ ᑎᓯᔭᒄ ᓇᒪ ᐸᔭᒋᓯᔪᐤ᙮”
12ᐃᔅᐱ ᒪᒃ ᑲ ᒋᔅᑕᐸᐅᒋᓯᑕᓇᑦ, ᐊᑯ ᒥᓐ ᑲ ᐳᔅᑎᔅᑲᐧᒃ ᐊᓂᔭ ᐅᑦ ᐊᑯᑉ ᑲ ᒥᓇᐧᒃ ᐊᑯ ᒥᓐ ᑲ ᐛᐛᔨᐱᑦ᙮ ᒂ ᑯᒂᒋᒪᑦ ᐊ ᐃᑕᑦ, “ᒋ ᒋᔅᒐᔨᑕᓇᐛᐤ ᐊ ᒐᒂᓐ ᐛᒋ ᐃᑐᑕᑎᑯᒡ ᐅ ? 13ᒋᔅᑯᑎᒪᒐᓱᐤ ᑭᔭ ᐅᑎᐸᔨᒋᒐᐤ ᒋᑦ ᐃᓯᓂᐧᑲᓯᓇᐛᐤ, ᐊᐅᑯᓐ ᒪᒃ ᑕᑈ ᓂᐸ ᐃᓯᓂᐧᑲᑎᑯᐅᓐ ᐛᔅ ᑕᑈ ᐊᐅᒄ ᓂᔾ ᐊ ᐊᐎᔭᓐ᙮ 14ᓂᔾ ᐊᐅᒄ ᒋᑎᐸᔨᒋᒐᓯᒧᐛᐤ ᑭᔭ ᒋ ᒋᔅᑯᑎᒪᒐᓯᒧᐛᐤ, ᐃᔭᐱᒡ ᒪᒃ ᓂᔾ ᔅᒋ ᒋᔅᑕᐸᐅᒋᓯᑕᓂᑎᓇᐛᐤ᙮ ᑭᔭ ᒋᔨᐛᐤ ᒪᒃ ᒋᐸ ᒋᔅᑕᐸᐅᒋᓯᑕᓂᑐᓇᐛᐤ᙮ 15ᔅᒋ ᐛᐸᑎᔨᑎᓇᐛᐤ ᑕᓐ ᒐᒋ ᐃᓯ ᒋᔅᒋᓄᐛᐱᒥᔭᒄ ᐊᓐ ᑕᓐ ᑲ ᐃᑐᑕᑎᑯᒡ᙮ 16ᑯᐃᔅᒄ ᒋ ᐎᑎᒪᑎᓇᐛᐤ, ᐊᐱᒋᐊᑭᓐ ᓇᒪ ᐎᔾ ᐅᔅᑕ ᐃᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐅᒋᒪᒪ ᑭᔭ ᐊᐛᓐ ᑲ ᒋᑎᓴᐛᑭᓄᐅᑦ ᒐᒋ ᐛᐎᑕᐧᒃ ᒐᒂᔪᐤ ᓇᒪ ᐎᔾ ᐅᔅᑕ ᐃᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐊᓂᔭᔪᐛ ᑲᒋ ᒋᑎᓴᐅᑯᑦ᙮ 17ᓂᔅᑐᑎᒪᒂ ᒪᒃ ᐅᔭ ᒐᒂᔪᐛ ᑭᔭ ᐃᑐᑎᒪᒂ ᒋᑭ ᓱᐛᔨᒥᑯᐅᓇᐛᐤ᙮”
18“ᓇᒪ ᒪᒃ ᒥᓯᐛ ᒋᑦ ᐊᔨᒧᒥᑎᓇᐛᐤ, ᓂ ᒥᔪ ᒋᔅᒐᔨᒪᐅᒡ ᐊᓐᒡ ᓂᔾ ᑲ ᐅᑎᓂᒂᐤ᙮ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ,
ᐊᓐ ᓇᐸᐤ ᑲ ᐎᒋᒥᒋᓱᒥᑦ ᓂᑭ ᐎᔭᓯᐱᔅᑎᓂᒄ᙮ ᐊᐅᑯᓐ ᒪᒃ ᐅ ᓴᔅ ᐎᐱᒡ ᒋᐸ ᐃᔅᐱᔪᐤ᙮
19ᐊᐅᑯᓐ ᒪᒃ ᐅ ᐊ ᐃᑎᑎᑯᒡ ᐊᔅᒄ ᐊᑲ ᐃᔅᐱᔨᒡ, ᑭᔭ ᐃᔅᐱ ᑕᑈ ᐃᔅᐱᔨᒐ, ᐊᑯ ᒐ ᑕᑈᑎᒪᒄ ᓂᔾ ᐊᐅᒄ ᑕᑈ ᐊ ᐊᐎᔭᓐ᙮ 20ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐ ᐊᐛᓐ ᒐ ᐱᓯᒋᐊᒂ ᐊᓂᔭ ᐊᐛᔪᐛ ᒐ ᐃᑎᓴᐅᒥᒋ ᓂᐱᓯᒋᐃᒄ ᑭᔭ ᓂᔾ᙮ ᐊᓐ ᒪᒃ ᐊᐛᓐ ᑲ ᐱᓯᒋᐃᑦ ᐱᓯᒋᐊᐤ ᐊᓂᔭ ᐊᐛᔪᐛ ᑲ ᐸᒋ ᐃᑎᓴᐅᔨᒋ᙮”
ᒋᓴᔅ ᑲ ᓂᑲᓐ ᑲ ᐎᑕᐧᒃ ᒐ ᐎᔭᓯᐱᔅᑎᓇᑭᓄᐅᑦ
ᒪᑎᔪᐤ 26.20-25; ᒪᕐᒃ 14.17-21; ᓗᒃ 22.21-23
21ᐃᔅᐱ ᒋᓴᔅ ᑲ ᐃᔅᒋᔄᑦ ᐅᔭ, ᓇᔅᒡ ᒋ ᒥᓯᒥᑕᐊᐤ ᐊᑯ ᑯᐃᔅᒄ ᒂ ᐎᑎᒧᐛᑦ ᐊ ᐃᑕᑦ, “ᑕᑈ ᒋᑦ ᐃᑎᓇᐛᐤ, ᐸᐃᒄ ᐅᑕ ᐊ ᑎᓯᔭᒄ ᓂᑭ ᐎᔭᓯᐱᔅᑎᓂᒄ᙮”
22ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᑭᓄᐛᐱᒥᑐᒡ ᓇᔅᒡ ᐊ ᑯᔅᑯᐱᔨᒡ ᑭᔭ ᐊ ᐛᐛᓇᔨᑕᒡ, ᐊᑲ ᒋᔅᒐᔨᑕᒡ ᐊᐛᔪᐛ ᐊᓂᔭ ᑲ ᐊᔨᒧᒪᑭᓄᔨᒋ᙮ 23ᐊᓐ ᒪᒃ ᐸᐃᒄ ᒋᔅᒋᓄᐊᒧᐛᑭᓐ, ᐊᓂᔭ ᒋᓴᔅ ᓇᔅᒡ ᑲ ᓴᒋᐊᑦ, ᐅᐱᒪ ᐊᓐᑕ ᐊ ᑕᑦ ᒋ ᐊᐱᔪᐛ᙮ 24ᓴᐃᒥᓐ ᐱᑕᕐ ᒂ ᓇᒥᔅᑯᐛᔨᔅᑐᐛᑦ ᐊᓂᔭ ᒋᔅᒋᓄᐊᒧᐛᑭᓇ ᒂ ᐃᑕᑦ ᒐᒋ ᑯᒂᒋᒪᔨᒋ ᐊᐛᔪᐛ ᐊᓂᔭ ᑲ ᐊᔨᒧᒪᔨᒋ᙮
25ᐊᑯ ᐊᓐ ᒋᔅᒋᓄᐊᒧᐛᑭᓐ ᒋᓴᓴ ᐊ ᑕᔨᒋ ᒂ ᐃᔅᐱᔪᐅᑦ ᐊᑯ ᒂ ᐃᑕᑦ, “ᐅᑎᐸᔨᒋᒐᐤ, ᐊᐛᓐ ᐊᓐ ᑲ ᐊᔨᒧᒥᑦ ?”
26ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓂᑭ ᑯᒋᒪᐤ ᐅ ᐸᒂᓯᑭᓐ ᐊᓐᑕ ᒥᓂᒂᑭᓂᒡ ᐊᑯ ᒐ ᒥᔨᒃ ᐊᓐ ᐊᐛᓐ᙮” ᒂ ᐊᑯᒋᒪᑦ ᐊᓂᔭ ᐸᒂᓯᑭᓇ ᐊᑯ ᒂ ᒥᔭᑦ ᐊᓂᔭ ᒍᑎᓴ, ᓴᐃᒥᓐ ᐃᔅᑲᕆᔭᑕ ᐅᑯᓯᔪᐛ᙮ 27ᒍᑎᔅ ᐛᑎᓇᑦ ᐊᓂᔭ ᐸᒂᓯᑭᓇ ᑲ ᒥᔨᑯᑦ ᒋᓴᓴ, ᐊᑯ ᑎᐛᒡ ᑲ ᐊᑎ ᐱᒋᔅᑲᑯᑦ ᒥᒋᒥᓂᑐᐛ᙮ ᐊᑯ ᒋᓴᓴ ᒂ ᐃᑎᑯᑦ, “ᒋᐱᔾ ᑐᑕ ᐊᓐ ᑕᓐ ᒋᐸ ᑐᑕᓐ᙮” 28ᓇᒪ ᒪᒃ ᐛᐛᒡ ᐸᐃᒄ ᐅᒋ ᓂᔅᑐᑎᒧᒡ ᐊᓐᒡ ᒋᔅᒋᓄᐊᒧᐛᑭᓐᒡ ᒐᒂᔪᐤ ᐊᓂᔭ ᐛᒋ ᐃᑕᑭᓄᔨᒋ᙮ 29ᒋ ᐃᑕᔨᑎᒧᒡ ᐊ ᐃᑕᑭᓄᔨᒋ ᒐᒋ ᐅᑎᓂᒥᔨᒋ ᒥᑯᓴᓂᔪᐤ ᒪᒃ ᒐᒋ ᐅᑎᓂᒺᔨᒋ ᒐᒂᔪᐤ ᐊᓂᔭ ᑲ ᒋᔅᑎᒪᑎᓯᔨᒋ, ᐛᔅ ᐎᔾ ᒍᑎᔅ ᒋ ᓂᓇᑭᑐᐛᔨᑎᒻ ᐊᓂᔭ ᓱᓇᔭᐅᑎᔪᐤ᙮
30ᐃᔅᐱ ᒪᒃ ᒍᑎᔅ ᑲ ᐅᑎᓇᑦ ᐊᓂᔭ ᐸᒂᓯᑭᓇ ᑎᐛᒡ ᒋ ᐊᑎ ᐎᐎᔪᐤ, ᒋ ᑎᐱᔅᑲᔪᐤ ᒪᒃ᙮
ᑲ ᐅᔅᑲᒡ ᐃᑎᓱᐛᐅᓐ
John 13.31-35 (Easter-5 Year C)
31ᐃᔅᐱ ᒪᒃ ᑲ ᐎᐎᑦ ᒍᑎᔅ, ᒋᓴᔅ ᒋ ᐃᑕᐤ, “ᐊᓄᒡ ᐊᐅᒄ ᐃᔪᐤ ᐅᑯᓯᓴᓇ ᒐᔅᑕᔨᑕᑯᐊᑭᓄᔨᒋ ᐊᑯ ᑭᔭ ᒋᓴᒪᓂᑐᐤ ᒐᔅᑕᔨᑕᑯᐊᑭᓄᐅᑦ ᐃᔪᐤ ᐅᑯᓯᓴᓇ ᐅᒡ᙮ 32ᐊᑯ ᒪᒃ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ ᐊ ᓄᑯᑕᑭᓄᔨᒡ ᐅᑯᓯᓯᒪᐛ ᐊ ᑕᔨᒋ ᐅᒋ, ᐊᑯ ᐎᔾ ᒋᓴᒪᓂᑐᐤ ᒐ ᐛᐸᑎᔭᑦ ᐃᔪᐛ ᑕᓐ ᐊᔅᐱᔅ ᒋᔅᑕᔨᑕᑯᓯᔨᒋ ᐅᑯᓯᓯᒪᐛ᙮”
33“ᓂᑦ ᐊᐛᓯᒥᑎᒄ, ᓴᔅ ᓇᒪ ᓇᐅᔅ ᓂᑭ ᐅᒋ ᑕᓐ ᐅᑕ ᐊ ᑕᔭᒄ᙮ ᒋᑭ ᐸᒋ ᓇᓂᑐᐛᐱᒥᓇᐛᐤ, ᒥᒄ ᒪᒃ ᒋᑭ ᐎᑎᒪᑎᓇᐛᐤ ᑕᓐ ᑲ ᐃᓯ ᐎᑎᒧᐅᒂᐤ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ, ᓇᒪ ᒋᑭ ᒋ ᐃᑐᑕᓇᐛᐤ ᐊᓐᑕ ᒐ ᐃᑐᑕᔭᓐ᙮”
34“ᐊ ᐅᔅᑲᒡ ᐃᑎᓱᐛᐅᓐ ᒋ ᒥᔨᑎᓇᐛᐤ ᐊᐅᒄ ᐅ ᒐᒋ ᓴᒋᐃᑐᔭᒄ᙮ ᒧᔭᒻ ᑕᓐ ᐊᔅᐱᔅ ᓴᒋᐃᑎᑯᒡ ᐊᐅᑯᓐ ᒋᐸ ᐃᔅᐱᔅ ᓴᒋᐃᑐᓇᐛᐤ᙮ 35ᓴᒋᐃᑐᔭᒂ ᒪᒃ ᐊᑯᑕ ᒐ ᐅᒋ ᒋᔅᒐᔨᒥᑯᐅᔭᒄ ᐊ ᐅᒋᔅᒋᓄᐊᒧᐛᑭᓂᑐᑕᑎᑯᒡ᙮”
ᒋᓴᔅ ᓂᑲᓐ ᑲ ᐎᑕᐧᒃ ᐱᑕᕋ ᒐ ᐃᔅᒋᔄᔨᒋ ᐊᑲ ᒋᔅᒐᔨᒥᑯᑦ
ᒪᑎᔪᐤ 26.31-35; ᒪᕐᒃ 14.27-31; ᓗᒃ 22.31-34
36ᓴᐃᒥᓐ ᐱᑕᕐ ᒋ ᑯᒂᒋᒪᐤ ᐊ ᐃᑕᑦ, “ᐅᑎᐸᔨᒋᒐᐤ, ᑕᓐᑕ ᒐ ᐃᑐᑕᔨᓐ ?” ᒋᓴᔅ ᒂ ᐃᑕᑦ, “ᓇᒪ ᒋᑭ ᒋ ᐎᒐᐅᓐ ᐊᓐᑕ ᒐ ᐃᑐᑕᔭᓐ, ᐊᔅᒄ ᐊᓐᑕ ᐸᑎᒪ ᐊᑯ ᒐᒋ ᐎᒐᐎᔨᓐ᙮”
37ᐱᑕᕐ ᒥᓐ ᒂ ᑯᒂᒋᒪᑦ ᐊ ᐃᑕᑦ, “ᐅᑎᐸᔨᒋᒐᐤ, ᒐᒂᓐ ᒐ ᐅᒋ ᐊᑲ ᒋ ᐎᒐᐅᑕᓐ ᐊᓄᒡ ? ᓇᒪ ᓂᑭ ᐅᒋ ᐳᓂᓐ ᐊ ᓇᓴᐅᑕᓐ ᐊᑎ ᐎ ᓂᐸᐃᑯᐅᔭᓇ᙮”
38ᒋᓴᔅ ᒂ ᐃᑕᑦ, “ᑕᑈ ᐊ ᓴᔅ ᒋᑦ ᐊᔭᔅᑯᐎᓐ ᒐᒋ ᐱᔅᑎᓂᒥᓐ ᒋᐱᒪᑎᓯᐅᓐ ᓂᔾ ᐅᒡ ? ᑕᑈ ᒋᑦ ᐃᑎᓐ, ᐊᔅᒄ ᐊᑲ ᐛᐛᒡ ᐸᑕᑯᓯᑦ ᓇᐸ ᐱᑲᒂᓐ, ᓴᔅ ᓂᔍᐤ ᒋᑭ ᑭᑭᒋᔭᓐ ᐊ ᐃᔅᒋᔄᔨᓐ ᐊᑲ ᒋᔅᒐᔨᒥᔨᓐ᙮”
Currently Selected:
ᒠᓐ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
