ᒠᓐ 12
12
ᒋᓴᔅ ᑲ ᑐᒥᓯᑕᓇᑭᓄᐅᑦ ᐊᓐᑕ ᐸᑕᓂᒡ
ᒪᑎᔪᐤ 26.6-13; ᒪᕐᒃ 14.3-9
John 12.1-8 (Lent-5 Year C)
1ᐊᓱᑕᒡ ᑕᑐᐤ ᒋᓯᑲᐛ ᒋ ᐃᔅᐱᓯᓇᑯᓂᔪᐤ ᐎᒪᔅᑲᒐᐅ-ᒥᑯᓴᐅᓂᔪᐤ, ᒋᓴᔅ ᑲ ᑎᑯᓯᐧᒃ ᐊᓐᑕ ᐸᑕᓂᒡ ᐊᓐᑕ ᓚᓴᕋᓴ ᐎᒋᔨᒡ᙮ ᐊᑯᑕ ᐅᔭ ᑲ ᐅᓂᔅᑲᓇᑦ ᓂᐳᐅᓂᒡ ᐅᒡ᙮ 2ᒋ ᒥᑯᓴᐊᑭᓄᐤ ᒪᒃ ᒋᓴᔅ ᐊᓐᑕ, ᒪᕐᑕ ᒋ ᐎᒋᐃᐛᐤ ᐊ ᒪᑎᓄᐛᓄᐎᒡ, ᐊᑯ ᓚᓴᕋᔅ ᒂ ᐎᑎᐱᒪᑦ ᒋᓴᔅ ᐊᓐᑕ ᒥᒋᓱᐛᑭᓇᑎᑯᒡ᙮ 3ᒪᕆ ᒋ ᐅᒋ ᐅᑎᓂᒻ ᐳᑕᔪᐤ, ᐊ ᐱᒋᑎᓂᔨᒡ ᐊᓐᑕ ᑲ ᐎᒋᒪᑯᓯᔨᒡ ᑐᒥᓂᑭᓂᔪᐤ ᓇᔅᒡ ᐊ ᓱᓇᔭᐎᔨᒡ᙮ ᑲ ᑯᑎᐱᓂᒺᑦ ᐊᓐᑕ ᒋᓴᓴ ᐅᓯᑎᔨᒡ, ᐊᑯ ᒂ ᐸᒂᓯᑕᓇᑦ ᐅᐱᔎᐅᓇ ᐊ ᐊᐱᒋᑕᑦ᙮ ᒥᓯᐛ ᒪᒃ ᐊᓐᑕ ᐱᑎᑭᒥᒡ ᐊᓂᔭ ᒥᒋᐛᐱᔪᐤ ᒋ ᒥᔭᑯᓂᔪᐤ ᐊᓂᔭ ᑲ ᐎᒋᒪᑯᓂᔨᒡ᙮
4ᒍᑎᔅ ᐃᔅᑲᕆᔭᑦ ᒪᒃ, ᐸᐃᒄ ᐊᓂᔭ ᒋᓴᔅ ᐅᒋᔅᒋᓄᐊᒧᐛᑭᓇ, ᐊᓂᔭ ᒐ ᐎᔭᓯᐱᔅᑎᓂᑯᑦ, ᒋ ᐃᔅᒋᔄᐤ, 5“ᓂᔅᑐ ᒥᑕᓯᒥᑎᓄᐤ ᒋᐸ ᐃᑎᒋᑕᑭᓄᐤ ᒋ ᐊᑕᐛᓄᑯᐱᓇ ᐊᓐ ᑲᐎᒋᒪᒂᒡ᙮ ᐊᑯ ᐊᓐ ᓱᓇᔭᐤ ᑲ ᒋᔅᑎᒪᑎᓯᒡ ᒋᐸ ᒥᔭᑭᓄᐎᐱᓐᒡ᙮” 6ᓇᒪᔭᔪᐤ ᐊ ᒋᔅᑎᒪᒐᔨᒪᑦ ᐊᓂᔭ ᑲ ᒋᔅᑎᒪᑎᓯᔨᒋ ᐊᓂᔭ ᐛᒋ ᐃᔅᒋᔄᑦ, ᐎᔾ ᒋ ᐎ ᐅᑎᓂᒪᓱᐤ ᐊᓂᔭ ᓱᓇᔭᔪᐤ ᐛᔅ ᐊᐅᑯᓐ ᑲᒋ ᐃᑎᑦ ᒪᓐ ᐊᑎ ᐎᔾ ᐊᒋ ᓂᓇᑭᑐᐛᔨᑕᐧᒃ ᐊᓂᔭ ᓱᓇᔭᔪᐤ ᑲᒋ ᒥᔭᑭᓄᔨᒋ ᒋᓴᓴ ᑭᔭ ᐅᒋᔅᒋᓄᐊᒧᐛᑭᓂᔪᐛ᙮
7ᒥᒄ ᒪᒃ ᒍᑎᔅ ᒋ ᐃᑎᑯᐤ ᒋᓴᓴ, “ᐊᑲᐎᔾ ᐱᒪᐃᒻ, ᐛᔅ ᐊᓂᔭ ᑲ ᐃᑐᑕᐧᒃ ᒧᔭᒻ ᐊ ᐊᔭᔅᑯᐎᐧᑯᐅᑦ ᒐᒋ ᓇᐃᐧᑲᑯᐅᒡ ᐊᐅᑯᓐ ᐊ ᐃᓯᓇᑯᓂᔨᒡ᙮ 8ᒧᔅ ᒋᑭ ᑕᐅᒡ ᑲ ᒋᔅᑎᒪᑎᓯᒡ ᐅᑕ ᐊ ᑕᔭᒄ, ᓂᔾ ᒪᒃ ᓇᒪ ᒧᔅ ᓂᑭ ᐅᒋ ᑕᓐ ᐅᑕ ᐊ ᑕᔭᒄ᙮”
ᐊᓐᒡ ᑲ ᓂᑲᓂᔅᑯᐛᒡ ᒍᐤ ᐃᔪᐛ ᑲ ᐃᔭᔨᒺᐛᐃᑯᒡ ᒐᒋ ᓂᐸᐊᒡ ᓚᓴᕋᓴ
9ᒥᒐᑦ ᒪᒃ ᐊᓐᒡ ᒍᐤ ᐃᔪᒡ ᒋ ᐸᑎᒧᒡ ᐊᓐᑕ ᐸᑕᓂᒡ ᐊᒋ ᑕᔨᒋ ᒋᓴᓴ, ᐊᑯ ᒂ ᐃᑐᑕᒡ ᐊᓐᑕ ᒐᒋ ᓂᑐᐛᐱᒪᒡ ᑭᔭ ᐊᓂᔭᔪᐛ ᓚᓴᕋᓴ ᒋ ᐎ ᐛᐱᒪᐅᒡ, ᐊᓂᔭᔪᐛ ᒋᓴᓴ ᑲ ᐅᓂᔅᑲᓇᔨᒋ ᓂᐳᐅᓂᒡ ᐅᒡ᙮ 10ᒋ ᐛᑕᔨᑎᒧᒡ ᒪᒃ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓂᔭᔪᐛ ᓚᓴᕋᓴ ᒐᒋ ᓂᐸᐊᒡ᙮ 11ᐛᔅ ᐊᓂᔭᔪᐛ ᓚᓴᕋᓴ ᐅᒋ ᐊᐅᒄ ᐛᒋ ᓂᑭᑎᑯᒡ ᒥᒐᑦ ᒍᐤ ᐃᔪᐛ ᑭᔭ ᒋᓴᓴ ᐊᔪᑯᓐ ᑲ ᑕᑈᔭᔨᒪᔨᒋ᙮
ᐃᔪᒡ ᒋᕈᓯᓕᒥᒡ ᑲ ᑕᒡ ᑲ ᒪᒥᒋᒪᒡ ᒋᓴᓴ ᑲ ᑎᑯᓯᓂᔨᒋ
ᒪᑎᔪᐤ 21.1-11; ᒪᕐᒃ 11.1-11; ᓗᒃ 19.28-40
12ᒥᓐ ᐎᔭᐱᓂᔨᒡ ᒥᒐᑦ ᐊᓐᒡ ᑲ ᑎᑯᓯᒡ ᐊᓐᑕ ᐊ ᒥᑯᓴᓄᐎᒡ ᒋ ᐸᑎᒧᒡ ᒋᓴᓴ ᒐ ᑎᑯᓯᓂᔨᒋ ᒋᕈᓯᓕᒥᒡ᙮ 13ᐊᑯ ᒂ ᓇᑥᓇᒡ ᓂᐱᓯᔭᑎᒂ ᑲ ᐊᑎ ᐎᐎᒡ ᐊᓐᑕ ᒋᕈᓯᓕᒥᒡ ᒐᒋ ᓂᒋᐊᒡ, ᐅᔭ ᐊ ᐃᔅᒋᔄᒡ ᐊ ᒋᔄᐛᒡ,
“ᒪᒥᒋᒪᑕᐤ ᒋᓴᒪᓂᑐᐤ, ᓱᐛᔨᑕᑯᓱᐤ ᐊᓐ ᒋᓴᒪᓂᑐᐛ ᑲ ᐸᒋ ᐃᑎᓴᐅᑯᑦ, ᐃᔅᕋᐃᓪ ᐃᔪᒡ ᐅᒋᓴᐅᒋᒪᒧᐛᐛ᙮”
14ᒋᓴᔅ ᒪᒃ ᒋ ᑕᑎᐳᐤ ᐅᐧᑲᓇ ᒧᔭᒻ ᐊ ᐊᐱᓯᓯᔨᒋ ᑲᐸᐃᑭᔎᐛ ᑲ ᐃᓯᓇᑯᓯᔨᒋ, ᐊᒋ ᒥᔅᑯᐛᑯᐱᓇ᙮ ᐊᐅᒄ ᐅᔭ ᑲ ᐃᑎᑦ ᒧᔭᒻ ᑕᓐ ᑲ ᐃᑎᔅᑕᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᑎᑯᐱᓇ᙮ ᒋ ᐃᑎᔅᑕᔪᐤ,
15ᐊᑲᐎᔾ ᑯᔅᑕᒋᒄ ᒋᔨᐛᐤ ᓴᐃᔭᓐ ᑲ ᐅᒋᔭᒄ ᐛᔅ ᒋᒋᓴᐅᒋᒪᒧᐛᐤ ᑎᑯᓯᓄᐤ ᐊ ᑕᑎᐱᑦ ᐅᐧᑲᓂᓴ ᒧᔭᒻ ᐊ ᐊᐱᓯᓯᔨᒋ ᑲᐸᐃᑭᔎᐛ ᑲ ᐃᓯᓇᑯᓯᔨᒋ᙮
16ᐊᓐᑕ ᒪᒃ ᐊᓂᔭ ᒪᒂᒡ ᓇᒪ ᐅᒋ ᓂᔅᑐᑎᒥᔪᐛ ᐅᒋᔅᒋᓄᐊᒧᐛᑭᓇ ᐊᓂᔭ ᑕᓐ ᑲ ᐃᔅᐱᔨᒡ ᓴᔅ ᐊᓐᑕ ᓂᑲᓐ ᐊᒋ ᐎᑕᑭᓄᐎᑯᐱᓇ ᒐ ᑎᐱᐱᔨᒡ ᐅᔭ᙮ ᐸᑎᒪ ᒪᒃ ᐃᔅᐱ ᑲ ᐅᓂᔅᑲᓇᑭᓄᔨᒋ ᓂᐳᐅᓂᒡ ᐅᒡ ᑭᔭ ᒋᒋᒋᓯᑯᒡ ᑲ ᐃᓯ ᐅᑎᓇᑭᓄᔨᒋ ᐊᑯ ᒂ ᒋᔅᒋᓯᒡ ᑕᓐ ᑲ ᐃᓯ ᓂᑲᓐ ᐊᔨᒧᒪᑭᓄᐎᒋ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᔅᐱᔨᑯᐱᓇ᙮
17ᐊᓐᒡ ᒪᒃ ᐊᐛᓐᒋ ᑲ ᑕᒡ ᐊᓐᑕ ᒋᓴᔅ ᑲ ᑕᑈᑕᔨᒋ ᓚᓴᕋᓴ ᒐᒋ ᐸᒋ ᐎᐎᔨᒋ ᐊᓐᑕ ᐅᒋ ᑲ ᐱᒥᓯᒪᑭᓄᔨᒋ ᑭᔭ ᑲ ᐅᓂᔅᑲᔨᒋ ᓂᐳᐅᓂᒡ ᐅᒡ, ᒋ ᐎᑎᒧᒡ ᐊᓐᑕ ᒋᕈᓯᓕᒥᒡ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ᙮ 18ᐊᐅᒄ ᒪᒃ ᐊᓂᔭ ᐛᒋ ᓂᒋᐊᒡ ᒋᓴᓴ ᒥᒐᑦ ᐊᐛᓐᒋ ᐃᔅᐱ ᑕᑯᓯᓂᔨᒋ ᐊᓐᑕ ᒋᕈᓯᓕᒥᒡ, ᐊᓂᔭ ᐊᒋ ᐸᑕᒡ ᑕᓐ ᑲ ᐃᓯ ᒪᒥᔅᑲᒡ ᑎᔨᒋ᙮ 19ᐊᑯ ᐊᓐᒡ ᐸᕆᓯᔨᒡ ᑲ ᐃᔅᒋᔄᒡ, “ᓇᒪ ᔅᒋ ᐃᑐᑐᐛᓄᐤ ᒐ ᐊᑲ ᒋ ᓇᓴᐅᑯᑦ ᐊᐛᔪᐛ, ᑭᓄᐛᐱᒪᒄ ᒪ, ᒥᓯᐛ ᐊᐛᔪᐛ ᐎᔾ ᓇᓴᐅᑯᐤ᙮”
ᑯᕆᒃ ᐊ ᐃᑎᔅᑲᓇᓯᒡ ᐊᐛᓐᒋ ᑲ ᐎ ᐛᐱᒪᒡ ᒋᓴᓴ
John 12.20-33 (Lent-5 Year B)
20ᒋ ᐎᒐᒐᐅᒡ ᒪᒃ ᑯᕆᒃ ᐃᔪᒡ ᐊ ᐃᑐᑕᓄᐎᒡ ᐊᓐᑕ ᒋᕈᓯᓕᒥᒡ ᐊ ᐊᔭᒥᐊᔅᑐᐛᑭᓄᔨᒋ ᒋᓴᒪᓂᑐᐛ ᒪᒂᒡ ᐊᓂᔭ ᑲᒋ ᐊᔭᒥᐊᐤ ᒥᑯᓴᓄᐎᒡ᙮ 21ᐊᐅᑯᓐᒡ ᒪᒃ ᐅᒡ ᑲ ᐸᒋ ᓂᑐᐛᐱᒪᒡ ᐱᓕᐸ, ᐊᓂᔭ ᐊᓐᑕ ᐸᑦᓴᐃᑕ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᑲ ᐅᒋᔨᒋ ᐊᓐᑕ ᑲᓕᓕ ᐊᔅᒋᒡ ᑲ ᑎᑯᓂᔨᒡ, ᐊᑯ ᒂ ᐃᑕᒡ, “ᓂ ᐎ ᐛᐱᒪᓇᓐ ᒋᓴᔅ᙮”
22ᐱᓕᑉ ᒪᒃ ᒋ ᐎᑎᒧᐛᐤ ᐊᓐᑎᕈᐛ ᐊᑯ ᑕᐱᔅᑯᓐ ᑲ ᐎᑎᒧᐛᒡ ᒋᓴᓴ ᐊ ᐎ ᐛᐱᒥᑯᔨᒋ ᐊᓂᔭᔪᐛ ᑯᕆᒃ ᐃᔪᐛ᙮
23ᐊᑯ ᒋᓴᔅ ᒂ ᐃᑕᑦ, “ᓴᔅ ᐅᑎᒋᐱᔪᐤ ᒋᓴᒪᓂᑐᐤ ᒐᒋ ᐛᐸᑎᔨᐛᑦ ᐊ ᒋᔅᑕᔨᑕᑯᓯᔨᒋ ᐃᔪᐤ ᐅᑯᓯᓴᓇ᙮ 24ᑯᐃᔅᒄ ᒋ ᐎᑎᒪᑎᓇᐛᐤ ᒧᔭᒻ ᐊᑲ ᐊᓐᑕ ᐊᔅᒋᒡ ᐊᔅᑕᑭᓄᒐ ᐸᐃᑯᒥᓐ ᓂᑕᐅᒋᑕᑭᓐ ᓇᒪ ᒋᑭ ᐅᒋ ᓂᑕᐅᒋᓐ ᒥᒄ ᒪᒃ ᐊᔅᑕᑭᓄᒐ ᐊᓐᑕ ᐊᔅᒋᒡ ᐊᑎ ᓂᐱᒥᑲᒐ ᒪᒃ ᐊᑯᑕ ᒐ ᐅᒋ ᓂᑕᐅᒋᒋ ᒥᒐᑦ ᓂᑕᐅᒋᑕᑭᓇ᙮ 25ᐊᓐ ᐊᐛᓐ ᑲ ᓴᒋᑕᑦ ᐅᐱᒪᑎᓯᐅᓐ ᒋᑭ ᐅᓂᑕᐤ᙮ ᐊᓐ ᐊᐛᓐ ᑲ ᐛᐧᑲᑕᐧᒃ ᐅᐱᒪᑎᓯᐅᓐ ᐅᑕ ᐊᔅᒋᒡ ᑲᒋᒡ ᐱᒪᑎᓯᐅᓂᔪᐤ ᒋᑭ ᐊᔭᐤ᙮ 26ᐊᓐ ᒪᒃ ᐊᐛᓐ ᓂᔾ ᑲ ᐊᑐᔅᑯᐅᑦ ᓂᑭ ᐸᒋ ᓇᓴᐅᒄ᙮ ᐊᑯ ᒪᒃ ᒐ ᑕᑦ ᓂᑦ ᐊᐱᒋᐊᑭᓐ ᐊᓐᑕ ᒐ ᐊᑎ ᐃᑕᐅᒡ᙮ ᒋᑭ ᒋᔅᑕᔨᒥᑯᐤ ᓄᑕᐎᔭ ᐊᓐ ᐊᐛᓐ ᒐ ᐊᑐᔅᑯᐅᒂ᙮”
ᒋᓴᔅ ᓂᑲᓐ ᑲ ᐎᑕᐧᒃ ᒐ ᓂᐱᑦ
27“ᓇᔅᒡ ᒥᓯᒪᔨᑎᒻ ᓂᑦ ᐊᒐᐧᒄ, ᑕᓐ ᒪᒃ ᒐᒋ ᐃᑎᒃ ᓄᑕᐎᔾ᙮ ᓂᑭ ᐃᑕᐤ ᐊ, ᓄᑕ, ᐊᑲᐎᔾ ᐸᒋ ᐱᔅᑎᓂᒧᐎ ᒐᒋ ᓂᓇᐧᑲᑕᔨᒧᔭᓐ ? ᓇᒪ, ᓇᒪ ᓂᑭ ᐅᒋ ᐃᑕᐤ ᐅᔭ ᐛᔅ ᐊᐅᑯᓐ ᐛᒋ ᑎᑯᓯᓂᔭᓐ ᐅᑕ ᐊᔅᒋᒡ ᒐᒋ ᓂᓇᐧᑲᑕᔨᒧᔭᓐ᙮” 28ᐃᔭᐱᒡ ᓂᑭ ᐃᑕᐤ, “ᓄᑕ, ᒥᒄ ᐊᓐᑕ ᒐᒋ ᐅᒋ ᒋᔅᑕᔨᑕᑯᓯᔨᓐ, ᐊᐅᑯᓐ ᐛ ᐃᓯ ᐃᑐᑎᒪᓐ !”
ᐊᑯ ᒂ ᐅᒋ ᐸᑕᑯᓂᔨᒡ ᒋᓴᒪᓂᑐᐤ ᐅᐸᑕᑯᓱᐅᓐ ᐊᓐᑕ ᒋᒋᒋᓯᑯᒡ ᐅᒡ ᐊ ᐃᔅᒋᔄᑦ, “ᓴᔅ ᓂᒋ ᒋᔅᑕᔨᑕᑯᑕᓐ ᓂᑦ ᐃᓯᓂᐧᑲᓱᐅᓐ ᒥᓐ ᒪᒃ ᐃᔭᐱᒡ ᐊᐅᑯᓐ ᒐ ᐃᑐᑎᒪᓐ᙮”
29ᐊᓐᒡ ᒪᒃ ᐊᐛᓐᒋ ᑲ ᓂᐳᐅᒡ ᐊᓐᑕ ᒋ ᐸᑎᒧᒡ ᐊᓂᔭ ᐸᑕᑯᓱᐅᓂᔪᐤ ᐊᑯ ᒂ ᐃᔅᒋᔄᒡ, “ᓂᒥᔅᒍᐅᒡ ᐸᑕᑯᓱᐅᒡ᙮” ᐊᑯ ᑯᑎᑭᒡ ᒂ ᐃᔅᒋᔄᒡ, “ᐊᓐᒋᓇ ᒋ ᐃᔨᒥᐃᑯᐤ᙮”
30ᒋᓴᓴ ᒪᒃ ᒋ ᐃᑎᑯᐅᒡ, “ᒋᔨᐛᐤ ᐛᒋ ᐸᑕᒂᒡ ᐅ ᐸᑕᑯᓱᐅᓐ, ᓇᒪᐎᔾ ᓂᔾ᙮ 31ᐊᓄᒡ ᐅᑎᒋᐱᔪᐤ ᒐᒋ ᑎᐸᔅᑯᓇᑭᓄᐎᒡ ᐊᐛᓐᒋ ᐅᑕ ᐊᔅᒋᒡ ᑲ ᑕᒡ ᑭᔭ ᐊᓄᒡ ᐊᑯ ᐛᑎᒋᐱᔨᒡ ᒐᒋ ᐃᔅᐱᓯᐊᑭᓄᐅᑦ ᒥᒋᒥᓂᑐᐤ, ᐊᓐ ᑲ ᑎᐸᔨᒐᑦ ᐅᑕ ᐊᔅᒋᒡ᙮ 32ᐃᔅᐱ ᐅᐱᓂᑯᐅᔭᓇ ᐅᑕ ᐊᔅᒋᒡ ᐅᒋ, ᒥᓯᐛ ᐊᐛᓐ ᓂᑭ ᐃᑐᑐᐛᐤ ᒐᒋ ᐸᒋ ᓇᓯᑦ,” ᒋ ᐃᔅᒋᔄᐤ ᒋᓴᔅ᙮ 33ᐅᔭ ᒪᒃ ᑲ ᐃᔅᒋᔄᑦ ᒋ ᐎᑎᒻ ᑕᓐ ᒐ ᐃᓯ ᓂᐸᐊᑭᓄᐅᑦ ᒋᐱᔭᑎᑯᒡ ᒐ ᐅᐸᔎᐛᑭᓄᐅᑦ᙮
34ᐊᑯ ᐊᓐᒡ ᐊᐛᓐᒋ ᑲ ᑕᒡ ᐊᓐᑕ ᒋ ᐃᓯ ᐎᑎᒧᐊᐅᒡ ᐊ ᐃᑕᒡ, “ᓂ ᐎᑎᒪᑯᐅᓇᓐ ᐊᓐᑕ ᓂᐎᓱᐛᐅᓇᒡ ᙭ ᑲᒋᒡ ᒐ ᐱᒪᑎᓯᑦ᙮ ᒐᒂᓐ ᒪᒃ ᐛᒋ ᐃᔅᒋᔄᔨᓐ, ᐃᔪᐤ ᐅᑯᓯᓴᓐ ᒐ ᓂᐸᐊᑭᓄᐅᑦ ? ᐊᐛᓐ ᐊᓐ ᐃᔪᐤ ᐅᑯᓯᓴᓐ ᑲ ᐃᓯᓂᐧᑲᑕᑭᓄᐅᑦ ?”
35ᒋᓴᔅ ᒂ ᐃᑕᑦ, “ᐛᐃᐱᔅᒋᔅ ᒥᓐ ᒋᑭ ᑎᑯᓐ ᐛᔅᑕᐅᓐ ᐅᑕ ᐊ ᑕᔭᒄ᙮ ᓱᒃ ᒪᒃ ᐱᒧᑕᒄ ᐊᔅᒄ ᐊ ᐊᔭᔭᒄ ᐛᔅᑕᐅᓐ ᑭᔭ ᓇᒪ ᐅᓂᑎᐱᔅᒋᓯᐅᓂᒡ ᒋᑭ ᐅᒋ ᑕᓇᐛᐤ᙮ ᐊᐛᓐ ᐊ ᐱᒧᑕᑦ ᐊᓐᑕ ᐅᓂᑎᐱᔅᒋᓯᐅᓂᒡ ᓇᒪ ᒋᔅᒐᔨᑎᒻ ᑕᓐᑕ ᐊ ᐃᑐᑕᑦ᙮ 36ᑕᑈᐅᒐᔨᒪᐧᒄ ᐊᓐ ᐊᐛᓐ ᑲ ᒥᔨᐛᑦ ᐛᔅᑕᐅᓂᔪᐤ ᐊᔅᒄ ᐊ ᑕᑦ ᐅᑕ ᐊ ᑕᔭᒄ, ᑭᔭ ᐊᓐᑕ ᐛᔅᑕᐅᓂᒡ ᒐ ᑕᔭᒄ᙮” ᐅᔭ ᒪᒃ ᑲ ᐃᔅᒋᔄᑦ ᒋᓴᔅ ᐊᑯ ᒂ ᓂᑭᑕᑦ, ᐊᓐᑕ ᒐ ᐊᑲ ᐅᒋ ᒥᔅᑲᑯᑦ ᐊᑯᑕ ᑲ ᑕᑦ᙮
ᒍᐤ ᐃᔪᒡ ᐊᑲ ᐎ ᑕᑈᔭᔨᒪᒡ ᒋᓴᓴ
37ᐊᑎ ᒪᒃ ᒥᒐᑥᐤ ᓇᔅᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ ᐊᒋ ᐃᑐᑕᐧᒃ ᐊᓐᑕ ᒍᐤ ᐊ ᑕᔨᒋ ᐃᔭᐱᒡ ᓇᒪ ᐅᒋ ᐎ ᑕᑈᔭᔨᒥᑯᐤ ᐎᔾ ᐊ ᐊᐎᑦ ᙭᙮ 38ᐊᐅᑯᓐ ᑕᑈ ᑲ ᐃᔅᐱᔨᒡ ᑕᓐ ᑲ ᐃᓯ ᓂᑲᓐ ᐎᑎᒧᑯᐱᓇ ᐊᓂᔭᐧᑲ ᐅᒋᔅᒋᐛᐃᒐᓱᐤ ᐊᐃᓴᔭ ᐊᒋ ᐃᔅᒋᔄᑯᐱᓇ,
ᐅᑎᐸᔨᒋᒐᐤ, ᐊᐛᓐ ᑎᔭᑈᑐᐎᔨᒥᑦ ᑕᓐ ᑲ ᐃᓯ ᐎᑎᒪᒡ ? ᐊᐛᔪᐛ ᑲ ᐛᐸᑎᔭᑦ ᐅᑎᐸᔨᒋᒐᐤ ᐅᓱᐧᑲᑎᓯᐅᓐ ?
39ᐊᓂᔭ ᒪᒃ ᐊᐃᓴᔭ ᒋ ᓂᑲᓐ ᐎᑎᒧᑯᐱᓐ ᒐᒂᔪᐤ ᒐ ᐅᒋ ᐊᑲ ᑕᑈᑎᒥᔨᒋ ᐊᒋ ᐃᔅᒋᔄᑯᐱᓇ,
40ᒋᓴᒪᓂᑐᐛ ᒋ ᐃᑐᑕᑯᐅᒡ ᒐ ᐊᑲ ᒋ ᐛᐸᑕᒡ ᑭᔭ ᒐ ᐊᑲ ᒋ ᓂᔅᑐᑕᒡ, ᑭᔭ ᓇᒪ ᐛᐸᑎᒧᒡ ᑭᔭ ᓇᒪ ᓂᔅᑐᑎᒧᒡ᙮
ᓇᒪ ᒪᒃ ᓂ ᐎ ᐸᒋ ᓂᑐᐛᐱᒥᑯᒡ ᒐᒋ ᒥᓏᒋᐃᒂᐤ, ᐃᑕᐤ ᒋᓴᒪᓂᑐᐤ᙮
41ᐊᐃᓴᔭ ᒋ ᐃᑕᐤ ᐅᔭ ᐛᔅ ᒋ ᐛᐸᑎᒺᐤ ᒋᓴᓴ ᐅᒋᔅᑕᔨᑕᑯᓱᐅᓂᔪᐤ, ᑭᔭ ᑲ ᐊᔨᒧᒪᑦ᙮
42ᒥᒐᑦ ᒪᒃ ᐃᔭᐱᒡ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋ ᑕᑈᔭᔨᒪᐅᒡ ᒋᓴᓴ ᒥᒄ ᒪᒃ ᓇᒪ ᐅᒋ ᐊᔨᒧᑎᒧᒡ ᐊᓐᑕ ᐊ ᐸᑐᐛᑭᓄᐎᒡ ᐛᔅ ᒋ ᑯᔅᑕᐅᒡ ᐊᓂᔭ ᐸᕆᓯᐊ ᑭᔭ ᓇᒪ ᐅᒋ ᓂᑐᐛᔨᑎᒧᒡ ᒋᒋᐛ ᒐᒋ ᐎᐎᑎᓴᐛᑭᓄᐎᒡ ᐊᓐᑕ ᐅᑦ ᐊᔭᒥᐊᐅᒋᐛᐳᐛᒡ᙮ 43ᐛᔅ ᐃᐛᒃ ᒋ ᐃᑕᔨᒪᐅᒡ ᐃᔪᐛ ᒐᒋ ᓇᐊᔨᑎᒪᐊᒡ ᐃᔅᐱᔅ ᐎᔾ ᒋᓴᒪᓂᑐᐛ ᒐᒋ ᓇᐊᔨᑎᒪᐊᒡ᙮
ᑕᓐ ᐊ ᐃᓯ ᑎᐸᔅᑯᓂᑯᑦ ᐊᐛᓐ ᒋᓴᓴ ᐅᑦ ᐃᔨᒧᐅᓂᔪᐤ
44ᒋᓴᔅ ᒪᒃ ᒋ ᐃᔅᒋᔄᐤ ᐊ ᒋᔄᐛᑦ, “ᐊᐛᓐ ᑎᔭᑈᔭᔨᒥᒂ ᓇᒪ ᒥᒄ ᓂᔾ ᓂ ᐸᒋ ᑕᑈᐅᔭᔨᒥᒄ ᑭᔭ ᑕᑈᔭᔨᒪᐤ ᐊᓂᔭᔪᐛ ᑲ ᐸᒋ ᐃᑎᓴᐅᔨᒋ᙮ 45ᐊᓐ ᐊᐛᓐ ᑲ ᐸᒋ ᐛᐱᒥᑦ, ᐛᐱᒪᐤ ᑭᔭ ᐊᓂᔭᔪᐛ ᑲ ᐸᒋ ᐃᑎᓴᐅᔨᒋ᙮ 46ᓂᒋ ᑎᑯᓯᓐ ᐅᑕ ᐊᔅᒋᒡ ᒐᒋ ᒥᔨᐛᔭᓐ ᐛᔅᑕᐅᓐ᙮ ᐊᑯ ᒪᒃ ᐊᓐ ᐊᐛᓐ ᒐ ᐸᒋ ᑕᑈᔭᔨᒥᒂ ᓇᒪ ᒋᑭ ᐅᒋ ᑕᐤ ᐊᓐᑕ ᐅᓂᑎᐱᔅᑲᐅᓂᒡ᙮”
47“ᐊᓐ ᐊᐛᓐ ᐱᔭᑎᒧᒂ ᑕᓐ ᑲ ᐃᓯ ᐎᑎᒪᓐ ᐊᑲ ᒪᒃ ᓂᓇᐃᑎᒧᒂ, ᓇᒪ ᓂ ᑎᐸᔅᑯᓇᐤ᙮ ᓂᒋ ᑎᑯᓯᓐ ᐅᑕ ᐊᔅᒋᒡ ᓇᒪᔭᐤ ᒐᒋ ᑎᐸᔅᑯᓂᒐᔭᓐ ᒪᒃ ᓂᒋ ᑎᑯᓯᓐ ᒐᒋ ᐱᒪᒋᐃᐛᔭᓐ᙮ 48ᐊᓐ ᐊᐛᓐ ᔭᑐᐛᔨᒥᒂ, ᑭᔭ ᐊᑲ ᓂᓇᐃᑎᒧᒂ ᓂᒥᔽᒋᒧᐅᓂᔪᐤ, ᒋᑭ ᑎᐸᔅᑯᓇᑭᓄᐤ᙮ ᐊᓂᔭ ᐅᒋ ᑕᓐ ᑲ ᐃᔅᒋᔄᔭᓐ ᐊᔪᐅᒄ ᐊᓂᔭ ᒐ ᐅᒋ ᑎᐸᔅᑯᓇᑭᓄᐅᑦ ᒪᔅᑕᔾ ᒋᓯᑲᔨᒐ᙮ 49ᓇᒪ ᒥᒄ ᓂᔾ ᐊ ᐃᑕᔨᑎᒪᓐ ᓂ ᐅᒋ ᐃᓯ ᐃᔨᒥᓐ᙮ ᐊᓐ ᐅᑕᐎᒪᐤ ᑲ ᐸᒋ ᐃᑎᓴᐅᑦ ᐎᔾ ᓂᒋ ᐎᑎᒪᒄ ᑕᓐ ᒐ ᐃᔅᒋᔄᐅᒡ ᐊᐅᑯᓐ ᒪᒃ ᒥᒄ ᑲ ᐃᓯ ᐎᑎᒪᓐ᙮ 50ᓂ ᒋᔅᒐᔨᑎᒺᓐ ᒪᒃ ᐎᔾ ᐅᑦ ᐃᑎᓱᐛᐅᓐ ᒋᑭ ᐃᑐᑕᑯᐛᓇᐛᐤ ᒐᒋ ᐊᔭᔭᒄ ᑲᒋᒡ ᐱᒪᑎᓯᐅᓐ᙮ ᑕᓐ ᐊ ᐃᓯ ᒥᔨᑦ ᒐᒋ ᐃᑎᑎᑯᒡ ᐊᐅᑯᓐ ᐊ ᐃᓯ ᐎᑎᒪᓐ᙮”
Currently Selected:
ᒠᓐ 12: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
