ᒐᓂᓯᔅ 48
48
ᒍᓯᑉ ᒧᐱᔅᑐᐛᐤ ᒐᑭᐸ
1ᓇᓇᒐ, ᐃᔅᐱ ᒍᓯᑉ ᑲ ᐃᑕᑦ ᐊᓐᑕ ᒥᔅᑎᐅᑕᓇᒡ, ᒋ ᐎᑎᒧᐛᑭᓄᐤ ᐃᔭᐧᑯᓯᔨᒋ ᐅᑕᐎᔭ ᐊᓐᑕ ᑯᓯᓐ ᑲ ᑕᔨᒋ, ᐊᑯ ᒍᓯᑉ ᓇᑐᐛᐱᒪᑦ ᐅᑕᐎᔭ, ᐊ ᓂᓯᔨᒋ ᐅᑯᓴ, ᒪᓇᓴᔨᒋ ᑭᔭ ᐃᑉᕋᐃᒪ ᒋ ᐎᒐᐛᐤ᙮ 2ᐃᔅᐱ ᐛᑎᒧᐛᑭᓄᐅᑦ ᒐᑭᑉ ᓂᔭᒋᐛᐱᒥᑯᑦ ᐅᑯᓴ ᒍᓯᐸ, ᒋᒋᐛ ᒋ ᐅᔅᑯᐎᐤ ᒥᒄ ᒐᒋ ᓴᒥᑎᐱᑦ ᐅᓂᐸᐅᓂᒡ᙮
3ᒋ ᐛᒋᔭᒪᐤ ᒐᑭᑉ ᒍᓯᐸ ᑭᔭ ᒂ ᐃᑕᑦ, “ᓂᒋ ᓄᑯᓯᔅᑕᒄ ᒥᓯᐛ ᐊᓯ ᓱᐧᑲᑎᓯᑦ ᒋᓴᒪᓂᑐᐤ ᐊᓐᑕ ᓗᔅ ᑲᐃᓇᓐ ᐊᔅᒋᒡ, ᑭᔭ ᐊᑯᑕ ᑲ ᒥᔨᑦ ᐅᓱᐛᔨᒋᒐᐅᓐ᙮ 4ᑭᔭ ᓂᒋ ᐃᑎᒄ, ‘ᒥᒐᑦ ᐊᐛᓯᒡ ᒋᑭ ᒥᔨᑎᓐ, ᐊᑯ ᒪᒃ ᒐ ᒥᒐᑐᔅᑲᓇᓯᒡ ᒋᑦ ᐊᓂᔅᑯᑕᐸᓐᒡ; ᓂᑭ ᒥᔭᐅᒡ ᒋᑦ ᐊᓂᔅᑯᑕᐸᓐᒡ ᐅᔭ ᑲᐃᓇᓐ ᐊᔅᒋᔪᐤ ᒧᔅ ᑲᒋᒡ ᐎᔨᐛᐤ ᒐᒋ ᑎᐱᔨᐛᐅᓯᒡ᙮’
5ᐊᓐᒡ ᓂᓱ ᒋᑯᓯᒡ, ᐃᒋᑉᑎᒡ ᑲ ᐃᔪᐅᒡ ᐊᒺᔭ ᐅᒋ ᑎᑯᓯᓂᔭᓐ ᐅᑕ, ᓂᔾ ᑎᐱᔨᐛ ᓂᑦ ᐊᐛᓯᒥᒡ ᓂᑦ ᐃᓯ ᐅᑎᓇᐅᒡ ᒧᔭᒻ ᓂᑯᓯᒡ ᕈᐱᓐ ᑭᔭ ᓯᒥᐅᓐ᙮ 6ᑕᑥᐛ ᑯᑎᑭᒡ ᒋᑯᓯᒡ, ᒋᔾ ᒋᑭ ᑎᐸᔨᒪᐅᒡ, ᒥᒄ ᐊᓂᔅᒐ ᐅᑎᐸᔨᑎᒧᐅᓄᐛᐛ ᐃᑉᕋᐃᒪ ᑭᔭ ᒪᓇᓴᔨᒋ ᒋᑭ ᐅᒋᐱᔪᐛ᙮ 7ᒋᑲᐎᔾ ᕋᐃᒍᓪ ᐅ ᐛᒋ ᐃᑐᑎᒪᓐ ᐃᔅᐱ ᐸᑕᓐ ᑲ ᐅᒋ ᒋᐛᔭᓐ, ᑲᐃᓇᓐ ᐊᔅᒋᒡ ᒋ ᐳᓂᐱᒪᑎᓯᐤ᙮ ᒋᒋᐛ ᓂᒋ ᓇᐧᑲᑕᔨᑕᓐ᙮ ᑲ ᐸᓱᐛᐸᑎᒪᒡ ᐃᑉᕋᑦ, ᒥᒋᒪ ᐸᑦᓕᔭᒻ, ᒂ ᐳᓂᐱᒪᑎᓯᑦ᙮ ᐅᐱᒪᔅᑭᓇᒡ ᓂᒋ ᓇᐃᐧᑯᐛᐤ᙮”
8ᒋᒋᐛ ᒋ ᒋᓴᐃᔪᐤ ᒐᑭᑉ ᑭᔭ ᒐᑲᑦ ᓇᒪ ᐅᒋ ᐛᐸᑎᒻ, ᓇᒪ ᐅᒋ ᓂᔅᑐᐛᐱᒪᐤ ᐊ ᓂᓯᔨᒋ ᒍᓯᐸ ᐅᑯᓯᔪᐛ, ᐊᑯ ᑭᔭ ᑲ ᑯᒂᒋᒪᑦ ᒍᓯᐸ, “ᐊᐛᓐᒋ ᐅᒡ ᐊᐛᓯᒡ ?”
9ᐊᑯ ᒍᓯᑉ ᐊᑕᑦ ᐅᑕᐎᔭ, “ᐊᐅᑯᓐᒡ ᐅᒡ ᓂᑯᓯᒡ ᐊᓂᔭ ᑲ ᒥᔨᑦ ᒋᓴᒪᓂᑐᐤ ᐅᑕ ᐃᒋᑉᑎᒡ᙮” ᐊᑯ ᒐᑭᑉ ᐃᑕᐤ, “ᐸᓱᐅᒡ ᐅᑕ ᐊᑯ ᒪᒃ ᒐ ᒥᔨᒂᐤ ᓂᓱᐛᔨᒋᒐᐅᓂᔪᐤ᙮”
10ᓇᒪ ᐅᒋ ᓂᔅᑐᐛᐱᒪᐤ ᒐᑭᑉ ᓇᐸᓴ ᐛᔅ ᐊ ᒋᓴᐃᔪᑦ ᑭᔭ ᓇᒪ ᓱᒃ ᐅᒋ ᒥᔪᐛᐸᑎᒻ, ᐊᑯ ᒍᓯᑉ ᑲ ᐃᑐᑐᐛᑦ ᐅᑕᐎᔭ ᐅᑯᓴ, ᐊᑯ ᐎᔭᐛᒋᓇᔨᒋ ᑭᔭ ᓴᐛᔨᒪᔨᒋ᙮
11ᒐᑭᑉ ᒂ ᐃᑕᑦ ᒍᓯᐸ, “ᓇᒪ ᓂ ᐅᒋ ᐸᓱᐛᔨᑕᓐ ᒥᓐ ᒐᒋ ᐛᐱᒥᑕᓐ, ᑭᔭ ᐊᓄᒡ ᒋᓴᒪᓂᑐᐤ ᓂᒋ ᓇᐃᒥᒄ ᒐᒋ ᐛᐱᒥᑎᑯᒡ ᑕᐱᔅᑯᓐ ᒋᔾ ᑭᔭ ᒋᑦ ᐊᐛᓯᒪᒡ᙮”
12ᐊᑯ ᒍᓯᑉ ᑲ ᑐᑐᐛᑦ ᐅᑯᓴ ᒐᒋ ᐱᑲᔨᒋ ᑲ ᑕᐧᑯᓇᑭᓄᔨᒋ ᑭᔭ ᓇᐱᔅᑯᐱᑦ᙮ 13ᐊᑯ ᒍᓯᑉ ᒥᓐ ᐊ ᐃᑐᑐᐛᑦ ᐅᑕᐎᔭ ᐅᑯᓴ, ᐅᓂᔅᐸᒋᐅᓂᔨᒡ ᐃᑕᒐ ᐊᑯᑕ ᐊᔭᑦ ᐃᑉᕋᐃᒪ, ᐊᑯ ᒪᓇᓴᔨᒋ ᐅᒥᔪᓂᔨᒡ ᐃᑕᒐ᙮ 14ᒥᒄ ᐊᒺᔭ ᒐᑭᑉ ᒥᔨᐛᑦ ᐅᓱᐛᔨᒋᒐᐅᓐ, ᒋ ᐱᒥᑎᓂᒻ ᐅᔅᐱᑐᓇ, ᐅᒥᔪᐅᓂᒡ ᐃᑕᒐ ᐛᒋ ᓯᑐᔎᓇᑦ ᐃᑉᕋᐃᒪ, ᐊᑎᓱᐧᒄ ᐊᐛᓯᐎᔨᒋ ᑭᔭ ᐅᓂᔅᐸᒋᐅᓂᒡ ᐃᑕᒐ ᐛᒋ ᓯᑐᔎᓇᑦ ᒪᓇᓴᔨᒋ, ᐊᓂᔭ ᒐᓴᐃᔪᔨᒋ᙮
15ᐊᑯ ᒂ ᒥᔭᑦ ᐅᓱᐛᔨᒋᒐᐅᓐ ᒐᑭᐸ ᑭᔭ ᐅᑯᓯᔪᐛ ᐊ ᐃᔅᒋᔄᑦ,
“ᐅ ᒋᓴᒪᓂᑐᐤ ᒋᔾ ᐅ ᓂᒧᓱᒻ ᐊᑉᕋᐊᒻ ᑭᔭ ᓄᑕᐎᔾ ᐊᐃᓯᒃ ᑲ ᐊᔭᒥᐊᔅᑐᐛᒡ,
ᒋᔾ ᐅ ᒋᓴᒪᓂᑐᐤ ᑲ ᐸᒋ ᒥᔪ ᑭᓄᐛᔨᒥᔨᓐ ᒥᓯᐛ ᑕᑐᐤ ᒋᓯᑲᐛ ᑲ ᐃᔅᐱᔅ ᐱᒪᑎᓯᔭᓐ᙮
16ᒋᔾ ᐅ ᐃᔭᐱᒡ ᐊᓐᒋᓐ ᐊᓐ ᑲ ᐱᐧᑯᒋᐃᑦ ᒥᓯᐛ ᐊ ᐃᓯᓇᑯᓂᔨᒡ ᑲ ᒪᔭᑎᓂᔨᒡ ᐅᒡ,
ᒋᓴᒪᓂᑐᐤ, ᓱᐛᔨᑕᑯᔨᒡ ᐅᒡ ᑲᓂᓯᒡ ᓇᐸᓯᒡ᙮
ᑭᒪ ᐃᔪᒡ ᒋᔅᒋᑕᒡ ᓂᑦ ᐃᓯᓂᐧᑲᓱᐅᓂᔪᐤ ᑭᔭ ᐅᑦ ᐃᓯᓂᐧᑲᓱᐅᓂᔪᐛ ᓄᑕᐎᔭ ᐊᐃᓯᑲ ᑭᔭ ᓂᒧᓱᒪ ᐊᑉᕋᐊᒪ ᐅᔭ ᓇᐸᓴ ᐅᒡ᙮
ᑭᒪ ᐅᒡ ᓇᐸᓯᒡ ᒥᒐᑎᔨᒋ ᐅᑦ ᐊᓂᔅᑯᑕᐸᓄᐛᐛ᙮”
17ᓇᒪ ᐅᒋ ᒥᔽᔨᑎᒻ ᒍᓯᑉ ᐎᔭᐱᒪᑦ ᐅᑕᐎᔭ ᐅᒥᔪᓂᔨᒡ ᐃᑕᒐ ᐊ ᐅᒋ ᓯᑐᔎᓇᔨᒋ ᐃᑉᕋᐃᒪ; ᐊᑯ ᐛᐎᐅᑎᓂᒺᑦ ᐅᑕᐎᔭ ᐅᑎᒋᔪᐤ ᐃᑉᕋᐃᒪ ᐅᔅᑎᒂᓂᔨᒡ ᐅᒡ ᑭᔭ ᒪᓇᓴᔨᒋ ᐅᔅᑎᒂᓂᔨᒡ ᒐᒋ ᐊᔅᑕᐛᑦ᙮ 18ᐊᑯ ᐊᑕᑦ ᐅᑕᐎᔭ, “ᐊᑲ ᐊᓐᑕ ᐃᓯ ᑐᑕ, ᓄᑕ᙮ ᒋᒥᔪᐅᓂᒡ ᑭᑕᐛ ᐊᐅᑯᓐ ᓂᔅᑎᒧᓴᓐ, ᒋᒥᔪᐅᓂᒡ ᐃᑕᒐ ᐅᒋ ᓯᑐᔎᓐ᙮”
19ᒥᒄ ᓇᒪ ᐅᒋ ᐎᔭᒋᐱᑕᔪᐛ ᐅᑕᐎᔭ ᐅᑎᒋᔪᐤ ᐊ ᐃᑎᑯᑦ, “ᓂ ᒋᔅᒐᔨᒪᐤ ᑕᓐ ᐅᔅᑭᒡ ᑲ ᐃᔪᑦ ᒋᑯᔅ, ᓂᑯᓴ᙮ ᒪᓇᓴ, ᐊᓐ ᐅᔅᑭᒡ ᑲ ᐃᔪᑦ, ᒋᑭ ᓱᐧᑲᑎᓯᐤ ᑭᔭ ᐅᑦ ᐊᓂᔅᑯᑕᐸᓇ ᒋᑭ ᒥᒐᑦ ᐃᑎᔅᑲᓇᓯᔨᐛ᙮ ᒥᒄ ᐃᑉᕋᐃᒻ ᐊᑎᑐᐤ ᒋᑭ ᓱᐧᑲᑎᓯᐤ ᐃᔅᐱᔅ ᒪᓇᓴᔨᒋ, ᑭᔭ ᐅᑦ ᐊᓂᔅᑯᑕᐸᓇ ᒋᒋᐛ ᒋᑭ ᒥᒐᑎᔨᐛ ᐊᑯ ᒐ ᒥᒐᑦ ᐃᑎᔅᑲᓇᓯᔨᒋ᙮” 20ᐊᑯ ᐊᓂᔭ ᒋᓯᑯᔪᐤ, ᒐᑭᑉ ᒂ ᒥᔭᑦ ᐅᓱᐛᔨᒋᒐᐅᓐ ᑭᔭ ᒂ ᐃᔅᒋᔄᑦ,
“ᐃᔅᕋᐃᓪ ᐃᔪᒡ ᒋᑭ ᐊᐱᒋᑕᐅᒡ ᒋᑦ ᐃᓯᓂᐧᑲᓱᓄᐛᐛ ᐃᔅᐱ ᐎᑕᑥᐛ ᓱᐛᔨᒋᒐᐅᓂᔪᐤ᙮ ᐊᑯ ᒐ ᐃᔅᒋᔄᒡ,
‘ᑭᒪ ᒋᓴᒪᓂᑐᐤ ᒥᔪᐱᔨᑕᒄ ᒧᔭᒻ ᐃᑉᕋᐃᒪ ᑭᔭ ᒪᓇᓴᔨᒋ᙮’ ”
ᐊᑯ ᒐᑭᑉ ᐃᑉᕋᐃᒪ ᓂᔅᑎᒻ ᐊᑎᔭᑦ ᐃᔅᐱᔅ ᒪᓇᓴᔨᒋ᙮
21ᐊᑯ ᒐᑭᑉ ᐊᑕᑦ ᒍᓯᐸ, “ᒋ ᐛᐸᑕᓐ ᒐ ᐊᑲ ᓇᐅᔅ ᓴᔅ ᐱᒪᑎᓯᔭᓐ, ᒥᒄ ᒋᓴᒪᓂᑐᐤ ᒋᑭ ᒥᔪ ᑭᓄᐛᔨᒥᑯᐛᐤ ᑭᔭ ᑲᐤ ᒋᑭ ᐃᓯ ᒋᔅᒋᓄᑕᐃᑯᐛᐤ ᐊᓐᑕ ᐊᔅᒋᔪᐤ ᑲ ᐊᓱᑎᒧᐛᑦ ᒋᑦ ᐊᓂᔅᑯᑕᐸᓄᐛᐛ᙮ 22ᐊᑎᑐᐤ ᒋᑭ ᒥᔨᑎᓐ ᐊᔅᒋᔾ ᐃᔅᐱᔅ ᒋᐧᑲᓂᓯᒡ, ᓴᑭᒻ ᐊ ᒥᔽᒡ ᐊᔅᒋᔾ ᒋᔾ ᒋᑭ ᒥᔨᑎᓐ ᐊᒧᕆ ᐃᔪᒡ ᑲ ᐅᒋ ᒪᑯᓂᒪᓐ ᓂᑦ ᐊᒐᐱᔾ ᑭᔭ ᓂᑭᔅᑯᒡ ᑲ ᐊᐱᒋᐃᒂᐤ᙮”
Currently Selected:
ᒐᓂᓯᔅ 48: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
