ᒐᓂᓯᔅ 49
49
ᒐᑭᑉ ᒪᔅᑕᔾ ᑲ ᐃᔨᒪᐊᑦ ᐅᑯᓴ
1ᐊᑯ ᒐᑭᑉ ᐛᓴᒪᑦ ᐅᑯᓴ ᒐᒋ ᓂᑐᐛᐱᒥᑯᑦ, ᐃᔅᐱ ᑕᑯᓯᓂᔨᒋ ᐊᑯ ᐊᑕᑦ, “ᐛᔅᑲᑲᐳᔅᑐᐅᒄ ᑭᔭ ᒋᑭ ᐎᑎᒪᑎᓇᐛᐤ ᒐ ᐃᓯᓇᑯᓯᔭᒄ ᐊᓐᑕ ᓂᑲᓄᒡ᙮
2ᐸᑐᑕᒄ ᑭᔭ ᓂᑐᑎᒧᒄ ᒐᒂᓐ,
ᓂᔾ ᒍᑕᐎᐛᐤ ᐃᔅᕋᐃᓪ, ᒐ ᐃᓯ ᐎᑎᒪᑎᑯᒡ:
3ᕈᐱᓐ, ᓂᓂᔅᑎᒧᓴᓐ,
ᒋᔾ ᐅ ᓂᒥᔅᑯᓯᐅᓐ ᑭᔭ ᓂᔅᑎᒻ ᐅᑯᓯᒪᐤ ᑲᒋᓴᐸᐎᔭᓐ,
ᑲ ᒋᔅᑕᔨᒧᑦ ᑭᔭ ᒪᐅᒡ ᑲ ᓱᒋᓯᑦ ᒥᓯᐛ ᓂᑯᓯᒡ᙮
4ᐛᔅ ᒧᔭᒻ ᐊᑲ ᒋᑲᐛᑕᔨᑕᒂᒡ ᐊ ᐃᔅᒋᐸᒡ ᒂᑕᔨᑕᑯᓯᔨᓐ,
ᒥᒄ ᓇᒪ ᓴᔅ ᒋᑭ ᒋ ᒥᔅᑎ ᐃᔅᐱᑕᔨᑕᑯᓯᓐ,
ᐛᔅ ᔅᒋ ᐎᐸᒪᐤ ᓂᐅ ᑭᔭ ᔅᒋ ᐅᓂᑐᑕᓐ ᓂᓂᐸᐅᓂᒡ᙮
5ᓯᒥᐅᓐ ᑭᔭ ᓕᐸᐃ, ᐅᓂᑐᑎᒧᐅᓂᒡ ᒋ ᐎᐧᑲᓂᓯᑕᑐᓇᐛᐤ᙮
ᒋᓂᑐᐱᔪᐅ-ᒧᐧᑯᒪᓄᐛᐛ ᒋᑦ ᐊᐱᒋᑕᓇᐛᐤ ᒐᒋ ᐊᒂᑎᓯᔭᒄ᙮
6ᓇᒪ ᓂᑭ ᑐᑕᓐ ᐛᒋᒪᐛᐃᒥᔭᑯ ᐛᔅ ᒋᒋᔄᐳᓄᐛᒡ
ᔅᒋ ᓂᐸᐛᐅᒡ ᐃᔪᒡ ᑭᔭ ᓴᒐᐃᔾ ᒋ ᐃᑐᑐᐛᐛᐅᒡ ᒐᒋ ᒪᔅᒋᒡ ᐊᐛᓯᓯᒡ᙮
7ᒋᓴᒪᓂᑐᐤ ᐅᑦ ᐊᓏᔨᒋᒐᐅᓐ ᒋᑭ ᐱᑎᔅᑕᐅᑯᐛᓇᐛᐤ,
ᐅᓴᒻ ᐊᒂᑎᓯᒥᑭᓐ ᒋᒋᔄᓱᐅᓄᐛᐤ ᑭᔭ ᒋᒋᐛ ᒥᔅᑯᐛᐤ ᒋᑦ ᐊᐧᑯᔪᐛᓱᐅᓄᐛᐤ᙮
ᓂᑭ ᑕᑎᐸᓇᔭᐅᒡ ᒋᑦ ᐊᓂᔅᑯᑕᐸᓄᐛᐅᒡ ᐊᓐᑕ ᐃᔅᕋᐃᓪ ᐊᔅᒋᒡ᙮
ᓂᑭ ᐛᓯᔄᐛᔭᑎᓴᐛᐅᒡ ᐊᓐᑕ ᐃᔅᕋᐃᓪ ᐊᔅᒋᒡ᙮
8ᒍᑕ, ᒋ ᓴᐧᒋᐊᐅᒡ ᒥᓯᐛ ᑲ ᐛᐧᑲᑎᔅᒡ᙮
ᐊᑯ ᑭᔭ ᒐ ᒪᒥᒋᒥᔅᒡ ᑭᔭ ᒐ ᓄᐛᒋᔅᑕᔅᒡ ᒋᐧᑲᓂᓯᒡ᙮
9ᒍᑕ ᓂᑯᓴ, ᒋ ᓱᐧᑲᑎᓯᓐ ᒧᔭᒻ ᒥᓯᐱᓱᐤ᙮
ᐊᐛᓯᓯᒡ ᐅᐎᔭᓱᐛᐤ ᔅᒋ ᐅᒋ ᐱᒥᓂᑯᐅᓐ,
ᒧᔭᒻ ᒥᓯᐱᓱᐤ ᒋ ᐱᑎᐱᓐ ᑭᔭ ᒋ ᐱᒥᓯᓐ,
ᓇᒪ ᐊᐛᓐ ᑯᒂᑕᔨᑎᒻ ᒐᒋ ᐅᐧᑲᐊᑦ᙮
10ᑎᐸᔨᒋᒐᐤ ᓯᔅᑲᐅᓐ ᓇᓂᑎᒻ ᒋᑭ ᑎᑯᓐ ᐊᓐᑕ ᐊ ᑕᒡ ᐊ ᐸᐃᑯᔅᑲᓇᓯᔨᓐ,
ᑭᔭ ᒋᑦ ᐊᓂᔅᑯᑕᐸᓐᒡ ᓇᓂᑎᒻ ᒋᑭ ᑕᐧᑯᓂᒧᒡ ᑎᐸᔨᒋᒐᐤ ᓯᔅᑲᐅᓂᔪᐤ ᐅᑎᒋᐛᐛᒡ,
ᐸᑎᒪ ᒋ ᑎᑯᓯᒐ ᐊᓐ ᒋᒋᐛ ᑕᐱᔨᐛᐅᓯᑦ ᓯᔅᑲᐅᓂᔪᐤ ᑭᔭ ᐎᔾ ᒐ ᓂᓇᐃᑕᑯᑦ ᐃᔪᐛ ᒥᓯᐛ ᐊᔅᐱᑎᔅᑭᒥᑲᔨᒡ᙮
11ᒋᑭ ᒪᐱᑯᑕᐤ ᑲᓂᐧᑲᑎᓯᑦ ᒋᑲᐸᐃᑭᔎᒻ ᓱᒥᓇᑎᑯᒡ,
ᑭᔭ ᐅᑦ ᐊᐛᓯᒥᓴ ᑲᓂᐧᑲᑎᓯᑦ ᒋᑲᐸᐃᑭᔎᒻ ᐊᓐᑕ ᒥᐧᑯᓱᒥᓇᑎᑯᒡ᙮
ᐃᔭᐱᒡ ᑲ ᒥᒂᑭᒥᒡ ᒋᑭ ᒋᔅᑕᐸᐅᑕᓐ ᒋᑦ ᐊᐱᒋᑕᐅᓇ,
ᒋᑦ ᐊᑯᑉ ᐊᓐᑕ ᐊ ᒥᒂᑭᒥᒋ ᒥᓂᓴ ᒋᑭ ᒋᔅᑕᐸᐅᑕᓐ᙮
12ᒋᑭ ᒥᒂᐛ ᒋᔅᒋᓯᒂ ᑲ ᒥᒂᑭᒥᒡ ᐊ ᒥᓂᔨᓐ,
ᑭᔭ ᒋᑭ ᐛᐸᐛ ᒋᐱᑕ ᐊ ᒥᓂᔨᓐ ᒋᒋᓇᐳᐃᒡ᙮
13ᓴᐳᓕᓐ, ᓇᓯᐸᑎᒥᒡ ᐎᓂᐸᑯᒡ ᒋᑭ ᐎᒋᓐ,
ᑲᐸᒪᔅᑎᒋ ᐅᐤᑕ ᐊᑯᑕ ᓯᓱᒡ ᒐ ᑎᐱᓄᐛᓯᑯᒧᒋ,
ᑭᔭ ᓴᐃᑐᓐ ᐃᔅᐱᔅ ᒋᑭ ᐅᑦ ᐊᔅᒋᓐ᙮
14ᐃᓴᑲᕐ, ᒧᔭᒻ ᐊ ᓱᒋᓯᑦ ᑲᓂᐧᑲᑎᓯᑦ ᑲᐸᐃᑭᔎᐤ ᒂ ᐃᑕᔨᑕᑯᓯᔨᓐ,
ᒋ ᐎᒋᓐ ᐊᓐᑕ ᐊᑲ ᑎᐱᔨᐛᐅᓯᓇᓄᐅᒡ ᐊᔅᒋᔾ ᑎᔅᑐᐎᒡ ᐅᑕᓇᐛ᙮
15ᔅᒋ ᐛᐸᑕᓐ ᐊ ᒥᔽᒡ ᐊᔽᐳᐅᓐ ᑭᔭ ᐊ ᒥᔽᔨᑕᒂᒡ ᐊᔅᒋᔾ,
ᐊᑯ ᑭᔭ ᑲ ᓄᐛᑲᐳᔅᑎᒥᓐ ᑯᓯᑯᒪᒋᐅᓐ ᑭᔭ ᒂ ᐱᔅᑎᓂᑎᓱᔨᓐ ᒐᒋ ᒥᔅᑎ ᐊᑐᔅᑲᐃᑯᔨᓐ᙮
16ᑕᐊᓐ, ᒋᔾ ᒋᑭ ᑎᐸᔨᒪᐅᒡ ᒋᑦ ᐃᔨᒥᒡ ᒧᔭᒻ ᐸᐃᒄ ᐃᔅᕋᐃᓪ ᐊ ᐃᑎᔅᑲᓇᓯᒡ᙮
17ᒧᔭᒻ ᒋᓇᐱᒄ ᐊ ᑕᑦ ᐊᓐᑕ ᒪᔅᑭᓇᒡ ᒋᑭ ᐃᑕᔨᑕᑯᓯᓐ,
ᐊ ᒥᒋᓂᑐᐧᑯᐅᓄᐅᑦ ᒋᓇᐱᒄ ᐊ ᑕᑦ ᐅᐱᒪ ᐱᒧᑕᔅᑭᓇᒡ ᐊ ᒪᒂᑎᒺᑦ ᑲᐸᐃᑭᔎᐛ ᐅᓯᑎᔪᐤ,
ᐊᑯ ᒪᒃ ᒐᒋ ᐊᒥᐱᔨᒋ ᐊᐛᔪᐛ ᑲ ᐳᓯᔨᒋ᙮”
18ᐊᑯ ᒐᑭᑉ ᑎᔭᑈᑦ,
“ᓂᑦ ᐊᔅᐸᔨᒧᑐᑕᓐ ᒋᐱᒪᒋᐃᐛᐅᓐ ᐅ ᑕᐸᔨᒋᒐᔨᓐ᙮”
19“ᐊᑯ ᒋᔾ ᑲᑦ, ᐊ ᒥᒐᑎᒡ ᑲᓂᑕᐅᒋᒧᑎᒡ ᒋᑭ ᒥᔅᑎᒪᓯᐧᑲᑯᒡ,
ᒥᒄ ᒋᑭ ᓴᐧᑯᒋᐊᐅᒡ ᑭᔭ ᒋᑭ ᒋᑕᒧᒐᓐ᙮
20ᐊᓱᕐ, ᒋᑭ ᒥᔅᑎ ᓂᑕᐅᒋᓐ ᒥᒋᒻ ᒋᑦ ᐊᔅᒋᒡ,
ᑭᔭ ᒋᓴᐅᒋᒪᐅᒡ ᒋᑭ ᐅᑎᓂᒺᐅᒡ ᐊ ᒥᔽᔨᒡ ᒥᒋᒥᔪᐤ᙮
21ᓇᑉᑕᓕ, ᒧᔭᒻ ᓄᓴᑎᐧᒄ ᒋᑦ ᐃᑕᔨᑕᑯᓯᓐ ᐊ ᐱᐸᒥᐸᑕᑦ ᐊᑲ ᒋᐱᔅᑲᑯᑦ ᒐᒂᓂᔪᐤ,
ᑭᔭ ᐊ ᑭᓄᐛᔨᒪᑦ ᐊ ᒥᔪᓯᓯᔨᒋ ᐊᑎᐧᑯᓴ᙮
22ᒍᓯᑉ, ᒧᔭᒻ ᑲᓂᐧᑲᑎᓯᑦ ᑲᐸᐃᑭᔎᐤ ᒋᑦ ᐃᑕᔨᑕᑯᓯᓐ,
ᑲᓂᐧᑲᑎᓯᑦ ᑲᐸᐃᑭᔎᐤ ᐊ ᑕᑦ ᐅᐱᒪ ᒧᔅᒋᒍᐅᓂᐸᑯᒡ ᐊᓐᑕ ᐅᐱᒪᔭᐛᒡ᙮
23ᑲ ᐛᐧᑲᑎᔅᒡ ᐊᒂᑎᓯᐅᓂᒡ ᔅᒋ ᒪᓯᐧᑲᑯᒡ,
ᑭᔭ ᒋ ᓇᓴᐅᑯᒡ ᐊ ᑕᑯᓇᒡ ᐅᑦ ᐊᒐᐱᐛᐛ ᑭᔭ ᐅᑭᔅᑯᐛᐛ᙮
24ᒥᒄ ᔅᑎᒋᔾ ᐊᓐᑕ ᑎᔭᑯᓂᑦ ᐊᒐᐱᔾ ᓇᒪ ᓂᓇᒥᐱᔪᐤ᙮
ᒥᔅᑯᐎᑕᑭᓄᐛ ᒋᔅᐱᑐᓇ ᑭᔭ ᔅᑎᒋᔭ ᐅᓱᐧᑲᑎᓯᐅᓂᒡ ᐅᒡ ᒥᓯᐛ ᐊᓯ ᓱᐧᑲᑎᓯᔨᒋ ᒐᑭᑉ ᐅᒋᓴᒪᓂᑐᒪ,
ᐊᓐ ᐃᔭᐱᒡ ᐊᓯᓂᐧᑲᑕᑭᓄᐅᑦ ᒪᔭᑕᓂᓯᐅ-ᐃᔪᐤ ᑭᔭ ᐃᔅᕋᐃᓪ ᐅᒋᔅᑕᐱᔅᑯᒪ᙮
25ᐊᐅᑯᓐ ᐊᓐ ᐊᔭᒥᐊᔅᑐᐅᒃ ᒋᓴᒪᓂᑐᐤ ᒐ ᐛᐎᒋᐃᔅᒃ᙮
ᒥᓯᐛ ᐊᓯ ᓱᐧᑲᑎᓯᑦ ᒋᓴᒪᓂᑐᐤ ᐊᓐ ᒐ ᓱᐛᔨᒥᔅᒃ,
ᒐ ᒥᔨᔅᒃ ᓱᐛᔨᒋᒐᐅᓇ ᒋᒋᒋᓯᑯᒡ ᐅᒡ,
ᓂᐱᔪᐤ ᒧᔅᒋᒍᐅᓇᐳᒡ ᐅᒡ ᐊᓐᑕ ᑕᒥᔅᑭᒥᑲᒡ ᐅᒡ,
ᑭᔭ ᓱᐛᔨᒋᒐᐅᓇ ᒐᒋ ᒥᒐᑎᒡ ᒋᒥᒋᑎᐧᑯᒥᒡ ᑭᔭ ᒋᑦ ᐊᐛᓯᒥᒡ᙮
26ᓱᐛᔨᒋᒐᐅᓇ ᓄᑕᐎᒡ ᑲ ᒥᔨᒡ ᐊᑎᑐᐤ ᒥᓴᐛ
ᐃᔅᐱᔅ ᐊᓂᔭ ᑲ ᐅᑎᓂᒪᒄ ᐊ ᒥᔽᒋ ᒐᒂᔪᐛ ᐊᓐᑕ ᑲᒋᒡ ᐱᔅᑯᑎᓇᐛ᙮
ᑭᒪ ᒋᓴᒪᓂᑐᐤ ᒥᔭᑦ ᒍᓯᐸ ᐅᔭ ᓱᐛᔨᒋᒐᐅᓇ, ᐊᓐ ᓇᑲᓂᔅᑯᐛᑦ ᐎᐧᑲᓂᓴ᙮
27ᐱᓐᒐᐱᓐ, ᒧᔭᒻ ᐊᒂᑎᓯᑦ ᒥᐃᐧᑭᓐ ᒂ ᐃᑕᔨᑕᑯᓯᔨᓐ,
ᒋ ᓂᓱᐅᓇᒋᐊᐅᒡ ᑲ ᐛᐧᑲᑎᔅᒡ ᒋᔭᒋᓴᐸᔭᒋ ᑭᔭ ᐛᑕᑯᓯᔨᒋ᙮”
28ᐊᐅᑯᓐᒡ ᐅᒡ ᐃᔅᕋᐃᓪ ᓂᓱᓴᑉ ᑲ ᐃᑎᔅᑲᓂᓯᒡ ᑭᔭ ᐊᐅᑯᔪᐤ ᐅᔭ ᒐᑭᑉ ᑲ ᐃᓯ ᐃᔨᒪᐊᑦ ᑲ ᓂᓱᓴᐳᔨᒋ ᐅᑯᓴ ᑭᔭ ᑲ ᐛᒋᔭᒪᑦ᙮ ᒥᓯᐛ ᐊᑎ ᐸᐸᐃᑯᓯᔨᒋ ᐅᑯᓴ ᒋ ᒥᔭᐤ ᒥᔪᐃᔨᒧᐅᓂᔪᐤ᙮
ᑲ ᐳᓂᐱᒪᑎᓯᑦ ᒐᑭᑉ
29ᒋ ᒋᔅᒐᔨᑎᒻ ᒐᑭᑉ ᓴᔅ ᐱᔭᓱᓇᑯᓂᔨᒡ ᒐ ᐳᓂᐱᒪᑎᓯᑦ ᐊᑯ ᑲ ᐃᑎᓱᒪᑦ ᐅᑯᓴ, “ᑲᐃᓇᓐ ᐊᔅᒋᒡ ᒐ ᐃᑐᑕᔭᒄ ᓂᔪᐤ ᑭᔭ ᒐ ᓇᐃᐧᑯᐅᔭᒄ ᐊᓐᑕ ᐛᑎᑯᒡ ᐊᓐᑕ ᓂᑦ ᐊᓂᔅᑯᑕᐸᓐᒡ ᓂᔭᐃᐧᑯᐛᑭᓄᐎᒡ᙮ 30ᒪᒃᐱᓚ ᓂᑕᐅᒋᑕᑭᓂᒡ ᑎᑯᓐ ᐅ ᐛᑎᒄ, ᐛᐱᓄᑕᒡ ᒪᒻᕋ ᐃᑕᒐ ᐊᓐᑕ ᑲᐃᓇᓐ᙮ ᐊᑉᕋᐊᒻ ᐅᔭ ᒋ ᐃᔭᐤ ᑕᐱᔅᑯᓐ ᐛᑎᑯᔪᐤ ᑭᔭ ᓂᑕᐅᒋᑕᑭᓂᔪᐤ ᐃᑉᕋᓇ ᐊᑦ ᐃᔪᐛ ᐅᒡ, ᐎᔾ ᑎᐱᔨᐛ ᒐᒋ ᑎᐱᔨᐛᐅᓯᑦ᙮ 31ᐊᑯᑕ ᐊᑉᕋᐊᒻ ᑭᔭ ᐎᐛ ᓴᕋᔨᒋ ᑲ ᓇᐃᐧᑯᐛᑭᓄᐎᒡ, ᐊᑯᑕ ᑭᔭ ᑲ ᓇᐃᐧᑯᐛᒡ ᐊᐃᓯᑲ ᑭᔭ ᐎᐎᐛ ᕋᐸᑲᔨᒋ᙮ ᐊᑯᑕ ᑭᔭ ᑲ ᓇᐃᐧᑯᐅᒄ ᓂᐅ ᓕᐊ᙮ 32ᐊᑦ ᐃᔪᐛ ᒋ ᐅᒋ ᐃᔭᐤ ᐊᑉᕋᐊᒻ ᐊᓂᔭ ᓂᑕᐅᒋᑕᑭᓂᔪᐤ ᑭᔭ ᐛᑎᑯᔪᐤ᙮”
33ᑲᒋ ᐃᔨᒪᐊᑦ ᒐᑭᑉ ᐅᑯᓴ, ᒂ ᐱᒥᓯᒃ ᐊᓐᑕ ᐅᓂᐸᐅᓂᒡ ᑭᔭ ᒂ ᐳᓂᐱᒪᑎᓯᑦ᙮
Currently Selected:
ᒐᓂᓯᔅ 49: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
