ᒐᓂᓯᔅ 46
46
ᒐᑭᑉ ᐃᒋᑉᑎᒡ ᐃᔅ ᐊᑐᒐᐤ
1ᐊᑯ ᒐᑭᑉ ᑕᒪᒋᓇᐧᒃ ᒥᓯᐛ ᑲ ᑎᐱᔨᐛᐅᓯᑦ ᐃᒋᑉᑎᒡ ᐊᑐᑕᑦ ᑭᔭ ᐃᔅᐱ ᐛᑎᑕᐧᒃ ᐱᕐ-ᓯᐸ ᐊᑯᑕ ᑲ ᒥᑐᔅᑕᐊᒧᒪᑦ ᐅᑕᐎᔭ ᐊᐃᓯᑲ ᐅᒋᓴᒪᓂᑐᒥᔪᐛ᙮
2ᒋᓴᒪᓂᑐᐛ ᒋ ᐃᔨᒥᑯᐤ ᐅᐳᐛᒧᐅᓂᒡ ᑕᐱᔅᑲᔨᒡ ᐊ ᐃᑎᑯᑦ, “ᒐᑭᑉ, ᒐᑭᑉ᙮”
ᒐᑭᑉ ᐊᑕᑦ, “ᒪᐅᑕ ᐊ ᑕᔭᓐ᙮”
3ᒋᓴᒪᓂᑐᐛ ᐃᑎᑯᐤ, “ᓂᔾ ᐅ ᒋᓴᒪᓂᑐᐤ, ᒍᑕᐎᔾ ᐅᒋᓴᒪᓂᑐᒪ, ᐊᑲ ᑯᔅᑕᒋ ᒐᒋ ᐃᑐᑕᔨᓐ ᐃᒋᑉᑎᒡ, ᐛᔅ ᐊᑯᑕ ᒐ ᐃᑐᑎᒪᑕᓐ ᒐᒋ ᓱᐧᑲᑎᓯᐤ ᒥᒐᑐᔅᑲᓇᓯᔨᓐ᙮ 4ᒋᑭ ᐎᒐᐅᑎᓐ ᐃᑐᑕᔨᓇ ᐃᒋᑉᑎᒡ ᑭᔭ ᑲᐤ ᓂᑭ ᐸᓱᐛᐅᒡ ᒋᑦ ᐊᓂᔅᑯᑕᐸᓐᒡ ᐅᑕ ᐊᔅᒋᒡ᙮ ᐳᓂᐱᒪᑎᓯᔨᓇ ᒋᑯᔅ ᒍᓯᑉ ᒋᑭ ᑕᐤ ᐊᑕᐅᑦ᙮”
5ᐊᑯ ᒐᑭᑉ ᓇᑭᑕᐧᒃ ᐱᕐ-ᓯᐸ ᑭᔭ ᐃᒋᑉᑎᒡ ᐊᑐᑕᑦ᙮ ᑲᑎᑎᐱᔨᒋ ᐅᑕᐸᓇᔎ ᐃᒋᑉᑎᒡ ᒋᓴᐅᒋᒪᐛ ᑲ ᐃᑎᓴᐊᒪᑯᑦ ᐊᑯᑕ ᑎᔭᑯᓴᐃᑯᑦ ᐅᑯᓴ, ᐊᓯᒡ ᐅᑦ ᐊᐛᓯᒥᔪᐛ, ᑭᔭ ᐎᐎᐛ᙮ 6ᐃᔭᐱᒡ ᐅᑦ ᐊᐛᓯᓯᒧᐛᐛ ᑭᔭ ᒥᓯᐛ ᐅᑎᐸᔨᑎᒧᐅᓄᐛᐛ ᑲᐃᓇᓐ ᐊᔅᒋᒡ ᑲ ᐅᑎᓇᒡ ᒋ ᔅᑐᑕᐅᒡ ᑭᔭ ᐃᒋᑉᑎᒡ ᐊᑐᑕᒡ᙮ ᒥᓯᐛ ᐅᑦ ᐊᓂᔅᑯᑕᐸᓇ ᒋ ᔅᑐᑕᐊᐤ ᒐᑭᑉ: 7ᐅᑯᓴ, ᐅᑕᓂᓴ, ᐅᓯᒥᓴ᙮
8ᐊᐅᑯᔪᐛ ᑲ ᐃᓯᓂᐧᑲᑕᑭᓄᔨᒋ ᒐᑭᑉ ᐅᑦ ᐊᓂᔅᑯᑕᐸᓇ ᐃᒋᑉᑎᒡ ᑲ ᐎᒐᐅᑯᑦ:
ᒐᓴᐃᔪᔨᒋ ᐅᑯᓴ ᕈᐱᓐ᙮
9ᑭᔭ ᕈᐱᓐ ᐅᑯᓴ: ᐊᓇᒃ, ᐸᓗ, ᐊᔅᕈᓐ, ᑭᔭ ᑲᕐᒥ᙮
10ᓯᒥᐅᓐ ᑭᔭ ᐅᑯᓴ: ᔭᒧᐃᓪ, ᔭᒥᓐ, ᐅᐊᑦ, ᔭᑭᓐ, ᓱᐊᕐ, ᑭᔭ ᓴᐅᓪ, ᑲᐃᓇᓐ ᐃᔎᐤ ᐅᑯᓴ᙮
11ᓕᐸᐃ ᑭᔭ ᐅᑯᓴ: ᑭᕐᓴᓐ, ᑯᐊᑦ ᑭᔭ ᒪᕋᕆ᙮
12ᒍᑕ ᑭᔭ ᐅᑯᓴ: ᐅᕐ, ᐅᓇᓐ, ᓯᓚ, ᐸᕋᔅ ᑭᔭ ᓯᕋ, (ᒥᒄ ᐅᕐ ᑭᔭ ᐅᓇᓐ ᑲᐃᓇᓐ ᐊᔅᒋᒡ ᒋ ᐳᓂᐱᒪᑎᓯᐅᒡ) ᐸᕋᔅ ᒋ ᐅᑯᓯᐤ ᐊᔅᕈᓇ ᑭᔭ ᐊᒧᓚ᙮
13ᐃᓴᑲᕐ ᑭᔭ ᐅᑯᓴ: ᑐᓚ, ᐳᐊ, ᒐᓱᑉ ᑭᔭ ᓯᒻᕈᓐ᙮
14ᓴᐳᓕᓐ ᑭᔭ ᐅᑯᓴ: ᓴᕆᑦ, ᐃᓗᓐ ᑭᔭ ᔭᓕᐅᓪ᙮
15ᐊᐅᑯᔪᐛ ᐅᔭ ᓕᐊ ᐅᑯᓴ, ᒐᑭᐸ ᐅᑯᓯᔪᐛ ᑲ ᓂᑕᐅᒋᐃᒪᑦ ᐊᓐᑕ ᒥᓱᐱᑕᒥᐊᔨᒡ ᐊᓯᒡ ᐅᑕᓂᓯᔪᐛ ᑕᐃᓇᔨᒋ, ᒪᒧᐤ ᒋ ᓂᔅᑐᐎᔭᐛᓯᔨᐛ ᐊᓱ ᓂᔅᑐ ᐅᑯᓱᐛᐛ ᑭᔭ ᐅᑕᓂᓱᐛᐛ ᒐᑭᑉ ᑭᔭ ᓕᐊ᙮
16ᑲᑦ ᑭᔭ ᐅᑯᓴ: ᓯᐳᓐ, ᐊᑭ, ᓱᓂ, ᐃᔅᐳᓐ, ᐊᕋ, ᐊᕈᑎ ᑭᔭ ᐊᕆᓕ᙮
17ᐊᓱᕐ ᑭᔭ ᐅᑯᓴ: ᐃᒻᓇ, ᐃᔅᐸ, ᐃᔅᐱ, ᐱᕆᐊ ᑭᔭ ᐎᐧᑲᓂᓱᐛᐛ ᓯᕋ᙮ ᐃᐱᕐ ᑭᔭ ᒪᓪᑭᐊᓪ ᒋ ᐃᓯᓂᐧᑲᓱᔪᐛ ᐱᕆᐊ ᐅᑯᓴ᙮
18ᐊᐅᑯᔪᐛ ᐅᔭ ᒐᑭᑉ ᑭᔭ ᓯᓪᐸ ᐊᓱᑕᒡ ᑕᑐᓴᑉ ᑲ ᐃᑕᑎᓯᔨᒋ ᐅᑦ ᐊᓂᔅᑯᑕᐸᓄᐛᐛ, ᐊᓂᔭ ᐃᔎᐤ ᐊᐱᒋᐊᑭᓇ ᓚᐸᓐ ᑲ ᒥᔭᑦ ᐅᑕᓂᓴ ᓕᐊᔨᒋ᙮
19ᒐᑭᑉ ᐎᐛ ᕋᐃᒍᓪ ᓂᓱ ᒋ ᓂᑕᐅᒋᐃᒪᐤ ᒐᑭᐸ ᐅᑯᓯᔪᐛ: ᒍᓯᐸ ᑭᔭ ᐱᓐᒋᒥᓇ᙮ 20ᒋ ᓂᓯᔨᐛ ᒍᓯᑉ ᐅᑯᓴ, ᒪᓇᓴ ᑭᔭ ᐃᑉᕋᐃᒻ, ᐊᓯᓇᑦ ᑲ ᓂᑕᐅᒋᐃᒪᑦ ᐊᓐᑕ ᐃᒋᑉᑎᒡ, ᐸᑎᐸᕋ ᐅᑕᓂᓴ, ᐃᓕᐅᐳᓕᔅ ᑲ ᐊᔭᒥᐊᐅᒋᒪᐅᑦ᙮
21ᐱᓐᒋᒥᓐ ᐅᑯᓴ: ᐸᓚ, ᐸᑯᐤ, ᐊᔅᐱᓪ, ᑲᕋ, ᓇᒪᓐ, ᐃᐊᐦᐃ, ᕈᔅ ᒧᐱᒻ, ᐅᐱᒻ ᑭᔭ ᐊᕐᑦ᙮
22ᐊᐅᑯᔪᐛ ᐅᔭ ᒍᓯᑉ ᑭᔭ ᕋᐃᒍᓪ ᐊ ᓇᐅᓴᐳᔨᒋ ᐅᑯᓱᐛᐛ᙮
23ᑕᐊᓐ ᑭᔭ ᐅᑯᓴ ᐅᓯᒻ᙮
24ᓇᑉᑕᓕ ᑭᔭ ᐅᑯᓴ: ᔭᓯᐅ, ᑯᓂ, ᔭᓱᕐ ᑭᔭ ᓯᓕᒻ᙮
25ᐊᐅᑯᔪᐛ ᐅᔭ ᒍᓯᑉ ᑭᔭ ᐱᓚ ᐅᑯᓱᐛᐛ, ᐊᓂᔭ ᐃᔎᐛ ᓚᐸᓐ ᑲ ᒥᔭᑦ ᐅᑕᓂᓴ ᕋᐃᒍᓚ᙮ ᒪᒧᐤ ᓂᔄᐅᑕᒡ ᒋ ᑕᑥᐸᐎᔪᐛ᙮
26ᒥᓯᐛ ᐊᐛᔪᐛ ᒐᑭᑉ ᑲ ᐎᒐᐅᑯᑦ ᐃᒋᑉᑎᒡ ᑲ ᐃᑐᑕᒡ ᐊᓱᑕᒡ ᑕᑐᔪᐤ ᐊᓱ ᐊᓱᑕᒡ ᒋ ᐃᑕᑎᓱᐅᒡ, ᐎᔾ ᑎᐱᔨᐛ ᐅᑦ ᐊᐛᓯᒪ ᒐᑭᑉ, ᐊᑲ ᐊᔅᑎᒋᒪᑭᓄᔨᒋ ᐅᓇᐊᑭᓂᔎᒪ᙮ 27ᒋ ᓂᓯᔨᐛ ᐅᑯᓴ ᒍᓯᑉ ᑲ ᐃᔪᔨᒋ ᐊᓐᑕ ᐃᒋᑉᑎᒡ᙮ ᐊᑯ ᒪᒧᐤ ᓂᔄᐅᑕᒡ ᑕᑐᔪᐤ ᒋ ᐃᑕᑎᓱᐅᒡ ᒐᑭᑉ ᐊ ᐸᐃᑯᔅᑲᓇᓯᑦ ᐊᓐᑕ ᐃᒋᑉᑎᒡ᙮
28ᒐᑭᑉ ᒋ ᓂᑲᓂᑎᓴᐛᐤ ᐅᑯᓴ ᒍᑕᔨᒋ ᒐᒋ ᑯᒂᒋᒪᔨᒋ ᒍᓯᐸ ᒐ ᓂᔅᑲᑯᔨᒋ ᐊᓐᑕ ᑯᓴᓐ᙮ ᐃᔅᐱ ᑕᑯᓯᒡ ᐊᓐᑕ ᑯᓯᓐ ᐊᔅᒋᒡ, 29ᒂ ᐊᔭᔅᑯᐛᔭᑦ ᒍᓯᑉ ᑲᑎᑎᐱᔨᒋ ᐅᑕᐸᓇᔎ ᑭᔭ ᐊᑐᑕᑦ ᑯᓯᓐ ᒐᒋ ᓂᒋᔅᑯᐛᑦ ᐅᑕᐎᔭ ᒐᑭᐸ᙮ ᐎᐱᒡ ᓇᒋᔅᑲᑐᒡ, ᒋ ᐛᐅᒋᓇᐤ ᐅᑕᐎᔭ ᒍᓯᑉ ᑭᔭ ᓇᐅᔅ ᒋ ᒪᐤ᙮
30ᒐᑭᑉ ᒋ ᐃᑕᐤ ᒍᓯᐸ, “ᐊᓄᒡ ᓴᔅ ᑲᒋ ᐛᐱᒥᑕᓐ ᑭᔭ ᐊ ᒋᔅᒐᔨᑎᒪᓐ ᐊᔅᒄ ᐸᒪᑎᓯᔨᓐ, ᓴᔅ ᓂᑦ ᐊᔭᔅᑯᐎᓐ ᒐᒋ ᓂᐱᔭᓐ᙮”
31ᐊᑯ ᒍᓯᑉ ᐊᑕᑦ ᐎᐧᑲᓂᓴ ᑭᔭ ᐊᓂᔭ ᒥᓯᐛ ᑲ ᐸᒋ ᐎᒐᐛᔨᒋ, “ᓂᑭ ᓂᑐᐛᐱᒪᐤ ᑭᔭ ᓂᑭ ᐃᔨᒪᐊᐤ ᒋᓴᐅᒋᒪᐤ ᑭᔭ ᓂᑭ ᐃᑕᐤ, ‘ᓂᐧᑲᓂᓯᒡ ᑭᔭ ᒥᓯᐛ ᑲ ᑕᔨᒋ ᓄᑕᐎᔾ ᐎᒋᒡ ᓂ ᐸᒋ ᓂᑐᐛᐱᒥᑯᒡ ᑲᐃᓇᓐ ᐊᔅᒋᒡ ᐅᒡ᙮ 32ᓂᑭ ᐃᑕᐤ ᒪᔭᑕᓂᓯᐅ-ᐃᔪᒡ ᐅᒡ, ᐊᐛᓯᓴ ᓂᔭᑭᑐᐛᔨᒪᑯᐤ ᑭᔭ ᐱᔭᓱᒪᑯᐤ ᒋᒪᔭᑕᓂᓯᒧᐛᐛ, ᒋᒥᔅᑐᓯᒧᐛᐛ, ᒋᒥᒋᑎᐧᑯᒧᐛᐛ ᑭᔭ ᒥᓯᐛ ᒐᒂᔪᐤ ᑕᐱᔨᐛᐅᓯᐛᒄ᙮’ 33ᐃᔅᐱ ᐎᓴᒥᑕᒂ ᑭᔭ ᐃᑎᑕᒂ, ‘ᑕᓐ ᐊᓯ ᐊᑐᔅᒐᔭᒄ ?’ 34ᐊᑯ ᒐ ᐃᑕᒄ, ‘ᒋᑦ ᐊᐱᒋᐊᑭᓐᒡ ᒋ ᓇᑭᑐᐛᔨᒪᐅᒡ ᐊᐛᓯᓴ ᐊ ᐅᔅᑎᓂᒋᐅᒡ ᐅᒡ ᐃᔅᐱᔅ ᐊᓄᒡ, ᑕᐱᔅᑯᓐ ᓂᔭᓐ ᑭᔭ ᓂᑦ ᐊᓂᔅᑯᑕᐸᓇᓐᒡ,’ ᐊᑯ ᒪᒃ ᒐ ᒥᔨᑕᒄ ᒐᒋ ᐎᒋᐛᒄ ᐊᓐᑕ ᑯᓯᓐ ᐊᔅᒋᒡ, ᐛᔅ ᐃᒋᑉᑦ ᐃᔪᒡ ᓇᒪ ᒥᔽᔨᑎᒧᒡ ᒐᒋ ᒥᒋᒪ ᑕᐛᒡ ᒪᔭᑕᓂᓯᐅ-ᐃᔪᐛ ᐊ ᑕᔨᒋ᙮”
Currently Selected:
ᒐᓂᓯᔅ 46: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
