ᒐᓂᓯᔅ 14
14
ᑲ ᒪᑯᓇᑭᓄᐅᑦ ᑭᔭ ᑲ ᐱᐧᑯᐊᐛᑭᓄᐅᑦ ᓗᑦ
1ᓇᐤ ᒋᓴᐅᒋᒪᐅᒡ, ᐸᐱᓗᓂᔭ ᒋᓴᐅᒋᒪᐤ ᐊᒻᕋᐸᓪ, ᐃᓚᓴᕐ ᒋᓴᐅᒋᒪᐤ ᐊᕆᐅᒃ, ᐃᓚᒻ ᒋᓴᐅᒋᒪᐤ ᑲᑐᓚᐅᒧᕐ ᑭᔭ ᑯᐃᒻ ᒋᓴᐅᒋᒪᐤ, ᑎᑕᓪ ᒋᓴᐅᒋᒪᐤ᙮ 2ᒋ ᓂᑐᐱᔨᑐᐛᐅᒡ ᐱᑕᑕᒡ ᑯᑎᑲ ᒋᓴᐅᒋᒪᐛ, ᓱᑕᒻ ᒋᓴᐅᒋᒪᐛ ᐱᕋ, ᑯᒧᕋ ᒋᓴᐅᒋᒪᐛ ᐱᕐᓴ, ᐊᑦᒪ ᒋᓴᐅᒋᒪᐛ ᓯᓇᑉ, ᓴᐳᐃᐃᒻ ᒋᓴᐅᒋᒪᐛ ᓯᒥᐱᕐ ᑭᔭ ᐱᓚ ᒋᓴᐅᒋᒪᐛ (ᑭᔭ ᒪᒃ ᓱᐊᕐ)᙮ 3ᐱᑕᑕᒡ ᒋᓴᐅᒋᒪᐅᒡ ᒋ ᒪᒧᓇᐅᒡ ᐅᓂᑐᐱᔪᐅ-ᐃᔨᒧᐛᐛ ᑭᔭ ᒪᒧᐤ ᒂ ᐃᑐᑕᒡ ᐊᓐᑕ ᓯᑎᒻ ᐊ ᐱᓴᔨᒡ, (ᐊᓄᒡ ᑲ ᓂᐱᒥᑲᒡ ᐎᓂᐸᒄ ᐃᓯᓂᐧᑲᑕᐤ᙮) 4ᓂᓱᓴᑉ ᐱᐳᓇ ᑲᑐᓚᐅᒧᕐ ᒋ ᑎᐸᔨᒪᐤ ᑯᑎᑲ ᒋᓴᐅᒋᒪᐛ, ᒥᒄ ᑲ ᓂᔅᑎᓴᑉ ᐱᐳᓂᔨᒡ ᓇᒪ ᐅᒋ ᑎᐸᔨᑎᒻ᙮
5ᑲᒋ ᐸᐃᑯᐳᓂᔨᒡ, ᑲᑐᓚᐅᒧᕐ ᑭᔭ ᑯᑎᑭᒡ ᒋᓴᐅᒋᒪᐅᒡ ᒋ ᓂᑐᐱᔨᑐᐛᐅᒡ ᑭᔭ ᒋ ᓴᒂᐅᒡ ᕋᐸ ᐃᔪᐛ ᐊᓐᑕ ᐊᔅᑐᕈᑦ ᑲᓇᐃᒻ ᑭᔭ ᓱᓯᒻ ᐃᔪᐛ ᐊᓐᑕ ᐊᒻ ᑭᔭ ᐃᒥᒻ ᐃᔪᐛ ᐊᓐᑕ ᓴᐸ ᑭᕆᐊᑕᐃᒻ, 6ᑭᔭ ᐦᐅᕆ ᐃᔪᐛ ᐊᓐᑕ ᓯᐅᕐ ᐱᔅᑯᑎᓇᒡ, ᐃᓪ ᐸᕋᓐ ᐃᔅᐱᔅ ᒋ ᓇᓴᐛᐅᒡ ᒥᒋᒪ ᐸᐧᑯᑎᔅᑭᒥᑲᒡ᙮ 7ᒋ ᒋᐛᐱᔪᐎᒡ ᑭᔭ ᑲᐤ ᒂ ᐃᑐᑕᒡ ᐊᓐᑕ ᑲᑎᔅ (ᐊᓄᒡ ᐃᓐ ᒥᔅᐸᑦ ᐃᓯᓂᐧᑲᑕᐤ) ᑭᔭ ᓄᑎᒻ ᐊᒪᓕᒃ ᐃᔪᐛ ᐅᑦ ᐊᔅᒋᔨᒡ ᒋ ᓴᑯᐎᐛᐅᒡ, ᐃᔭᐱᒡ ᒋ ᓴᒂᐅᒡ ᐊᒧᕆ ᐃᔪᐛ ᑲ ᐎᒋᔨᒋ ᐊᓐᑕ ᐊᓯᓴᓐ ᑕᒪᕐ᙮
8ᐊᑯ ᓱᑕᒻ ᒋᓴᐅᒋᒪᐤ, ᑯᒧᕋ ᒋᓴᐅᒋᒪᐤ, ᐊᑦᒪ ᒋᓴᐅᒋᒪᐤ, ᓴᐳᐃᐃᒻ ᒋᓴᐅᒋᒪᐤ ᑭᔭ ᐱᓚ ᒋᓴᐅᒋᒪᐤ (ᑭᔭ ᒪᒃ ᓱᐊᕐ) ᒋ ᔅᑐᑕᐅᒡ ᑭᔭ ᒋ ᐊᔭᔅᑯᐎᔪᐅᒡ ᒐᒋ ᒪᓯᒐᒡ ᐊᓐᑕ ᓯᑎᒻ ᐊ ᐱᓴᔨᒡ᙮ 9ᒐ ᒪᓯᐧᑯᐛᐅᒡ ᐃᓚᒻ, ᑯᐃᒻ, ᓯᓇᕐ ᑭᔭ ᐃᓚᓴᕐ ᒋᓴᐅᒋᒪᐛ᙮ ᐅᒡ ᐱᑕᑕᒡ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᓂᑐᐱᔨᑐᐛᐅᒡ ᐊ ᓇᐎᔨᒋ ᐊ ᓱᐧᑲᑎᓯᔨᒋ ᒋᓴᐅᒋᒪᐛ ᑭᔭ ᐅᓂᑐᐱᔪᐅ-ᐃᔨᒥᔪᐛ᙮ 10ᐃᔅᐱ ᑲ ᐎ ᒋᑎᓯᒧᔨᒋ ᐅᓂᑐᐱᔪᐅ-ᐃᔨᒧᐛᐛ ᓱᑕᒻ ᑭᔭ ᑯᒧᕋ ᒋᓴᐅᒋᒪᐅᒡ, ᐱᔅᒐ ᓇᐸᐅᒡ ᒋ ᐱᑎᓱᐛᐱᔪᒡ ᐊᒂᐃᑕᐅᐧᑲᔨᒡ ᐱᒍᐛ ᐊ ᓴᑭᔅᒋᓇᔨᒋ ᐊᓐᑕ ᓯᑎᒻ ᐊ ᐱᓴᔨᒡ᙮ ᑯᑎᑭᒡ ᐱᔅᑯᑎᓇᒡ ᒋ ᐃᔅᐸᔨᑐᐅᒡ ᒐᒋ ᑲᓱᒡ᙮ 11ᐊᑯ ᐊᓐᒡ ᑲ ᓱᐧᑲᑎᓯᒡ ᓇᐤ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᐅᑎᓂᒧᒡ ᒥᓯᐛ ᒐᒂᓂᔪᐤ ᐊᓐᑕ ᓱᑕᒻ ᑭᔭ ᑯᒧᕋ ᐅᑕᓇᐛ, ᒋᒡ ᒥᒋᒥᔪᐤ ᑭᔭ ᒂ ᐊᑎ ᔅᑐᑕᒡ᙮ 12ᐃᔭᐱᒡ ᓗᑕ ᒋ ᑲᔅᑎᓇᐅᒡ, ᐊᑉᕋᒪ ᐅᑐᓯᒥᔪᐛ ᑭᔭ ᒥᓯᐛ ᐅᐛᔪᑎᓯᐅᓂᔪᐤ᙮
13ᒥᒄ ᐸᐃᒄ ᓇᐸᐤ ᒋ ᒋᑎᓯᒧᐤ ᑭᔭ ᑲ ᐎᑎᒧᐛᑦ ᐊᑉᕋᒪ, ᐃᑉᕈᐤ ᐃᔪᐛ, ᑲ ᐎᒋᔨᒋ ᐊᓐᑕ ᒥᒋᒪ ᐃᓚᓐ ᒥᔅᑎᒂ, ᒪᒻᕋ ᐊᒧᕆ ᐃᔪᐛ ᑲ ᑎᐸᔨᒪᔨᒋ᙮ ᒪᒻᕋ ᒋ ᓂᓯᔪᐛ ᐎᐧᑲᓂᓴ, ᐃᔅᑯᓪ ᑭᔭ ᐊᓄᕐ, ᐅᒡ ᐊ ᓂᔅᑎᒡ ᓇᐸᐅᒡ, ᒋ ᐃᑐᑎᒧᒡ ᐊᓱᑎᒪᒐᐅᓂᔪᐤ ᒐᒋ ᐎᒋᒪᓯᒐᒪᒡ ᐊᑉᕋᒪ ᓇᑐᐱᓇᓄᔨᒋ᙮ 14ᐃᔅᐱ ᐊᑉᕋᒻ ᐱᔭᑕᐧᒃ ᒥᐊᑯᓇᑭᓄᔨᒋ ᐅᑐᓯᒪ, ᒋ ᐎᓴᒪᐤ ᒪᒧᐤ ᐅᑲᒪᓯᒐᓯᒪ᙮ ᓂᔅᑐ ᒥᑕᓯᒥᑎᓄᐤ ᐊᓱ ᔭᓇᐤ ᑕᑐᓴᑉ ᒋ ᑕᑎᓯᔨᐛ, ᒥᓯᐛ ᑲ ᐃᔪᔨᒋ ᐊᓐᑕ ᐅᑦ ᐊᔅᒋᒡ᙮ ᐊᑯ ᐎᔾ ᑭᔭ ᐅᑦ ᐃᔨᒪ, (ᒋᒡ ᒪᒻᕋ ᑭᔭ ᐎᐧᑲᓂᓴ) ᒪᒧᐤ ᒋ ᓇᓴᐛᐅᒡ ᑲ ᓇᐎᔨᒋ ᒋᓴᐅᒋᒪᐛ ᐃᔅᐱᔅ ᑕᓐ ᐅᑕᓇᔪᐤ᙮ 15ᐊᑉᕋᒻ ᒋ ᑕᑎᐸᓇᐊᐤ ᐅᑦ ᐃᔨᒪ ᑭᔭ ᒂ ᒋᒋᓇᒡ ᑲ ᐛᐧᑲᑎᑯᒡ ᒪᒂᒡ ᑕᐱᔅᑲᔨᒡ᙮ ᑲ ᓇᐅᒡ ᒋᓴᐅᒋᒪᐅᒡ ᑭᔭ ᐅᓂᑐᐱᔪᐅ-ᐃᔨᒧᐛᐛ ᒋ ᒋᑎᓯᒧᐅᒡ᙮ ᐊᑉᕋᒻ ᑭᔭ ᐅᓂᑐᐱᔪᐅ-ᐃᔨᒪ ᒋ ᓇᓴᐛᐅᒡ ᐃᔅᐱᔅ ᐅᐸ, ᑕᒪᔅᑲᔅ ᒋᐛᑎᓄᒡ᙮ 16ᐊᑉᕋᒻ ᒋ ᐅᑎᓂᒺᐤ ᒥᓯᐛ ᒐᒂᓂᔪᐤ ᒋᓴᐅᒋᒪᐛ ᑲ ᐅᑎᓂᒥᔨᒋ ᑭᔭ ᑲᐤ ᒋ ᒋᐛᑕᐤ᙮ ᐅᑐᓯᒪ ᓗᑕ ᒋ ᐱᐧᑯᐊᐤ, ᒋᒡ ᑭᔭ ᐃᔎᐛ ᑭᔭ ᒥᓯᐛ ᑲ ᒪᑯᓇᑭᓄᔨᒋ᙮
17ᐊᑉᕋᒻ ᑲᐤ ᒋ ᑎᑯᓯᓐ ᑲᒋ ᓴᑯᐛᑦ ᒋᓴᐅᒋᒪᐛ ᑲᑐᓚᐅᒧᕐ ᑭᔭ ᑯᑎᑲ ᒋᓴᐅᒋᒪᐛ᙮ ᓱᑕᒻ ᒋᓴᐅᒋᒪᐤ ᒋ ᐃᑐᑕᐤ ᐊᓐᑕ ᓴᐸ ᐊ ᐱᓴᔨᒡ ᒐᒋ ᓂᒋᔅᑯᐛᑦ ᐊᑉᕋᒪ (ᒋᓴᐅᒋᒪᐅᒡ ᐅᐱᓴᒧᐛᐤ ᐊᓄᒡ ᐃᓯᓂᐧᑲᑕᐤ)᙮
18ᒪᓪᑭᓴᑕᒃ, ᓴᓚᒻ ᒋᓴᐅᒋᒪᐤ, (ᑭᔭ ᐎᔾ ᒋ ᑎᑯᓯᓐ ᒐᒋ ᓂᒋᔅᑯᐛᑦ ᐊᑉᕋᒪ)᙮ ᐸᒂᓯᑭᓇ ᑭᔭ ᓱᒥᓇᐳᔪᐤ ᒋ ᐸᑕᐤ᙮ ᐎᔾ ᒋ ᐊᔭᒥᐊᐅᒋᒪᐤ ᒋᓴᒪᓂᑐᐛ ᒪᐅᒡ ᐃᔅᐱᒥᒡ ᐅᒡ᙮ 19ᒋ ᓱᐛᔨᑕᑯᐛᐤ ᐊᑉᕋᒪ, ᐊ ᐃᔅᒋᔄᑦ,
“ᓱᐛᔨᑕᑯᐃᑯᐤ ᐊᑉᕋᒻ ᒋᓴᒪᓂᑐᐛ ᒪᐅᒡ ᐃᔅᐱᒥᒡ, ᑲ ᐅᓯᑕᔨᒋ ᒋᒋᒋᓯᑯᔪᐤ ᑭᔭ ᐊᔅᒋᔪᐤ,
20ᒋᔅᑕᒋᒪᑕᐤ ᒋᓴᒪᓂᑐᐤ ᒪᐅᒡ ᐃᔅᐱᒥᒡ, ᐊᓐ ᑲ ᒥᔨᑕᒃ ᓴᑯᐎᐛᐅᓂᔪᐤ᙮”
ᐊᑯ ᐊᑉᕋᒻ ᒋ ᒥᔭᐤ ᒪᓪᑭᓴᑕᑲ ᐸᐃᒄ ᐊᓂᔭ ᐸᐃᑯᔪᐤ ᒐᒂᓂᔪᐛ ᑲ ᐸᑐᑕᑦ᙮
21ᓱᑕᒻ ᒋᓴᐅᒋᒪᐤ ᐃᑕᐤ ᐊᑉᕋᒪ, “ᐸᒋᒥᔾ ᑲᐤ ᐊᓐᒡ ᓂᑦ ᐃᔨᒥᒡ, ᒥᒄ ᒐ ᑎᐸᔨᑎᒥᓐ ᒥᓯᐛ ᒐᒂᓐ᙮”
22ᒥᒄ ᐊᑉᕋᒻ ᒋ ᐃᑕᐤ, “ᓂᒋ ᐅᐱᑐᐛᐤ ᓂᑎᒋᔪᐤ ᑎᐸᔨᒋᒐᓱᐤ ᒋᓴᒪᓂᑐᐤ ᒪᐅᒡ ᐃᔅᐱᒥᒡ, ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ ᑭᔭ ᓂᒋ ᑐᑕᓐ ᑕᑈᐅᓐ, 23ᒐ ᐊᑲ ᐅᑎᓂᒪᓐ ᐊᓐ ᒐᒂᓐ ᑕᐱᔨᐛᐅᓯᔨᓐ, ᐊᑎ ᒥᒄ ᓴᔅᑎᒂᔭᐱᔾ ᑭᔭ ᒪᒃ ᒥᔅᒋᓇᔭᐱᔾ, ᐊᑯ ᒐ ᐊᑲ ᓂᑕ ᒋ ᐃᔅᒋᔄᔨᓐ, ‘ᓂᒋ ᐃᑐᑐᐛᐤ ᐊᑉᕋᒻ ᒐᒋ ᐛᔪᑎᓯᑦ᙮’ 24ᓇᒪ ᒐᒂᓐ ᓂᑭ ᐅᑎᓇᓐ ᒥᒄ ᐊᓂᔭ ᓂᑦ ᐃᔨᒥᒡ ᑲ ᒥᒋᒡ, ᒥᒄ ᐊᓄᕐ, ᐃᔅᑯᓪ ᑭᔭ ᒪᒻᕋ ᒋᑭ ᐅᑎᓂᒧᒡ ᐱᔅᒐ ᒐᒂᔪᐛ, ᐅᓴᒻ ᓂᒋ ᐎᒐᐅᑯᒡ᙮”
Currently Selected:
ᒐᓂᓯᔅ 14: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
