ᒐᓂᓯᔅ 15
15
ᓂᔅᑯᒧᑐᐅᓂᔪᐤ ᑲ ᐃᑐᑎᒪᑐᒡ ᒋᓴᒪᓂᑐᐤ ᑭᔭ ᐊᑉᕋᒻ
Genesis 15.1-12, 17-18 (Lent-2 Year C)
Genesis 15.1-6 (Proper-14 Year C)
1ᓇᓇᒐ ᑎᐸᔨᒋᒐᓱᐤ ᒋ ᓄᑯᓯᔅᑐᐛᐤ ᐊᑉᕋᒪ ᑭᔭ ᒋ ᐃᑕᐤ,
“ᐊᑲ ᑯᔅᑕᒋ, ᐊᑉᕋᒻ᙮ ᓂᔾ ᐅ ᒋᑦ ᐊᒂᓇᐅᓱᐛᑭᓐ,
ᒋᒋᐛ ᒋᑭ ᒥᓴᐤ ᒋᑎᐸᒪᑯᓯᐅᓐ᙮”
2ᒥᒄ ᐊᑉᕋᒻ ᐃᑕᐤ, “ᑎᐸᔨᒋᒐᓱᐤ ᒋᓴᒪᓂᑐᐤ, ᒐᒂᓐ ᒐ ᒥᔨᓐ ? ᐊᔅᒄ ᓇᒪ ᓂ ᐅᑦ ᐊᐛᓯᒥᓐ᙮ ᐃᓕᐃᓱᐤ ᑕᒪᔅᑲᔅ ᑲ ᐅᒋᑦ ᐊᐅᑯᓐ ᒐ ᑎᐸᔨᑕᐧᒃ ᓂᑎᐸᔨᑎᒧᐅᓇ ᐃᔅᐱ ᐳᓂᐱᒪᑎᓯᔭᓇ᙮” 3ᑭᔭ ᐊᑉᕋᒻ ᐃᑕᐤ, “ᓇᒪ ᒋ ᐅᒋ ᒥᔨᓐ ᐊᐛᓯᒡ, ᐊᑯ ᓂᒋᒡ ᐊᐱᒋᐊᑭᓐ ᒋᑭ ᑎᐸᔨᑎᒻ ᓂᑎᐸᔨᑎᒧᐅᓇ᙮”
4ᑎᐸᔨᒋᒐᓱᐤ ᒋ ᐃᔨᒪᐊᐤ ᒥᓄᐛᒡ ᐊᑉᕋᒪ ᐊ ᐃᑕᑦ, “ᐃᓕᐃᓱᐤ ᒋᑦ ᐊᐱᒋᐊᑭᓐ ᓇᒪᔭᐤ ᐎᔾ ᒐ ᑎᐸᔨᑕᐧᒃ ᒋᑎᐸᔨᑎᒧᐅᓇ ! ᒋᑭ ᑕᐤ ᑎᐱᔨᐛ ᒋᑯᔅ ᑭᔭ ᐎᔾ ᒋᑭ ᑎᐸᔨᑎᒻ ᒋᑎᐸᔨᑎᒧᐅᓇ᙮” 5ᐊᑯ ᑎᐸᔨᒋᒐᓱᐤ ᐎᐎᑎᒥᒡ ᐊ ᑐᑕᐊᑦ ᐊᑉᕋᒪ ᑭᔭ ᒋ ᐃᑕᐤ, “ᒋᓯᑯᒡ ᐃᑕᐱᔾ ᑭᔭ ᑯᒋᑕ ᒐᒋ ᐊᒋᒥᑥᐤ ᐅᒐᑭᑕᐧᑯᒡ,” ᐊᑯ ᑎᐸᔨᒋᒐᓱᐤ ᐊᑕᑦ, “ᐊᐅᑯᓐ ᒐ ᐃᔅᐱᒐᑎᒡ ᒋᓂᑕᐅᒋᐊᑭᓐᒡ ᒐ ᑭᓄᐛᔨᒥᑥᐤ᙮”
6ᐊᑉᕋᒻ ᒋ ᑕᑈᐅᒐᔨᒪᐤ ᑎᐸᔨᒋᒐᓱᐛ ᑭᔭ ᑎᐸᔨᒋᒐᓱᐤ ᒂ ᐃᑎᒋᒪᑦ ᒧᔭᒻ ᐊ ᑯᐃᔅᑯᑕᑎᓯᑦ ᐃᔪᐤ᙮
7ᐊᑯ ᒋᓴᒪᓂᑐᐤ ᐊᑕᑦ ᐊᑉᕋᒪ, “ᓂᔾ ᐅ ᑎᐸᔨᒋᒐᓱᐤ, ᑲ ᐎᐎᑕᐃᑕᓐ ᐅᕐ ᐅᒡ ᐊᓐᑕ ᑲᓪᑎᔭ, ᒐᒋ ᒥᔨᑕᓐ ᐅ ᐊᔅᒋᔾ ᒐᒋ ᑎᐸᔨᑎᒥᓐ᙮”
8ᐊᑉᕋᒻ ᒋ ᑯᒂᒋᒪᐤ, “ᐅ ᑎᐸᔨᒋᒐᓱᐤ ᒋᓴᒪᓂᑐᐤ, ᑕᓐᑕ ᒐᒋ ᐅᒋ ᒋᔅᒐᔨᑎᒪᓐ ᓂᔾ ᒐ ᑎᐸᔨᑎᒧᐛᓇ ᐅ ᐊᔅᒋᔾ ?”
9ᐊᑯ ᑎᐸᔨᒋᒐᓱᐤ ᐊᑕᑦ ᐊᑉᕋᒪ, “ᒐ ᐸᑐᐎᓐ ᐊ ᓂᔅᑐᐳᓇᓯᑦ ᓄᓴ ᒥᔅᑐᓯᔅ, ᐊ ᓂᔅᑐᐳᓇᓯᑦ ᓇᐸ ᒪᔭᑕᓂᔅ ᑭᔭ ᐊ ᓂᔅᑐᐳᓇᓯᑦ ᓇᐸ ᒪᔭᑕᓂᔅ, ᐛᐱᓯᐤ ᐱᔭᓯᔅ ᑭᔭ ᐅᔅᑎᓂᒋᐅ-ᐱᔭᓯᔅ᙮”
10ᐊᑉᕋᒻ ᒋ ᐸᑐᐛᐤ ᑎᐸᔨᒋᒐᓱᐛ ᒥᓯᐛ ᐅᔭ ᐊᐛᓯᓴ, ᒂ ᓂᐸᐊᑦ᙮ ᒂ ᑕᔅᒍᐛᑦ ᑭᔭ ᒂ ᑕᐱᔅᑯᒐᔭᑦ ᐊᓐᑕ ᒧᔅᑎᔅᑭᒥᒡ᙮ ᒥᒄ ᓇᒪ ᐅᒋ ᑕᔅᒍᐛᐤ ᐊᓂᔭ ᐱᔭᓯᓴ᙮ 11ᐊᑯ ᐱᔅᒐ ᐱᔭᓱᐅᒡ ᐱᔭᒋᓂᓯᐱᔪᐅᒡ ᒐᒋ ᒧᐛᒡ ᐊᓂᔭ ᐊᐛᓯᓴ, ᒥᒄ ᐊᑉᕋᒻ ᒋ ᐅᐸᐎᔭᐤ᙮
12ᐃᔅᐱ ᐱᔭᒋᓯᒧᑦ ᐱᓯᒻ, ᐊᑉᕋᒻ ᒋ ᓂᐸᐤ ᒧᔭᒻ ᐳᓂᐱᒪᑎᓯᔨᒋ ᒋ ᐃᓯᓇᑯᓱᐤ ᑭᔭ ᓯᔅᒋᑯᒡ ᒋ ᐅᑎᑎᑯᐤ ᑯᔅᑕᒋᐅᓂᔪᐤ᙮ 13ᐊᑯ ᑎᐸᔨᒋᒐᓱᐛ ᐊᑎᑯᑦ, “ᒐ ᐎ ᓂᔅᑐᑎᒥᓐ ᒐᒂᓐ ᒐ ᐎᑎᒪᑕᓐ, ᒋᓂᑕᐅᒋᐊᑭᓐᒡ ᒋᑭ ᐎᒍᐅᒡ ᐊᓐᑕ ᐊᔅᒋᒡ ᐊᑲ ᑎᐸᔨᑕᒡ᙮ ᒋᑭ ᓯᒋᒪᐅᒡ ᐃᔪᒡ ᐛᑎᔅᒋᒡ ᒐᒋ ᐊᑐᔅᒐᔅᑕᑯᒡ ᒋᓂᑕᐅᒋᐊᑭᓇ ᑭᔭ ᓇᐤ ᒥᑕᓯᒥᑎᓄᐛᐳᓇ ᐃᔅᐱᔅ ᒋᑭ ᐱᐛᔨᒪᑭᓄᐎᒡ᙮ 14ᒥᒄ ᓂᑭ ᐊᓏᔨᒪᐛ ᐊᓂᔭ ᐊ ᐸᐃᑯᔅᑲᓇᓯᔨᒋ ᐊᑐᔅᒐᔅᑐᐛᒡ᙮ ᐊᑯ ᒋᓂᑕᐅᒋᐊᑭᓐᒡ ᒋᑭ ᓂᑭᑎᒧᒡ ᐊᓂᔭ ᒪᓐᑕᐤ ᐊᔅᒋᔪᐤ ᐛᔪᑎᓯᐅᓂᔪᐤ ᐊ ᔅᑐᑕᒡ᙮ 15ᒥᒐᑐᐳᓇ ᒋᑭ ᐱᒪᑎᓯᓐ, ᒋᔭᒪᔨᑎᒧᐅᓂᒡ ᒋᑭ ᐳᓂᐱᒪᑎᓯᓐ ᑭᔭ ᒋᑭ ᓇᐃᐧᑲᑯᐅᓐ᙮ 16ᐸᑎᒪ ᓇᐤ ᐊᓂᔅᒐ ᐱᒪᑎᓯᓇᓄᒐ, ᒋᓂᑕᐅᒋᐊᑭᓐᒡ ᑲᐤ ᒋᑭ ᑎᑯᓯᓄᐅᒡ ᐅᑕ ᑭᔭ ᒋᑭ ᐅᑎᓂᒧᒡ ᐅᔭ ᐊᔅᒋᔪᐤ, ᐛᔅ ᐊᒧᕆ ᐃᔪᒡ ᐊᔅᒄ ᓇᒪ ᐃᔅᐱᔅ ᒪᔭᑎᓯᐅᒡ ᓂᔾ ᒐᒋ ᐊᓏᔨᒥᒂᐤ᙮”
Genesis 15.1-12, 17-18 (Lent-2 Year C)
17ᐃᔅᐱ ᑲᒋ ᐸᒋᓯᒧᑦ ᐱᓯᒻ ᑭᔭ ᓇᔅᒡ ᐃᔭᒋᑲᒡ, ᐊᑉᕋᒻ ᓯᔅᒋᑯᒡ ᒋ ᐛᐱᒪᐤ ᐊ ᐱᒋᑥᔨᒋ ᐃᔅᑯᑕᐤ ᐊᔅᒋᒂ ᑭᔭ ᐊ ᐛᔭᑕᔨᒡ ᐃᔅᑯᑕᔪᐤ ᑲ ᐱᒥᐱᔨᒡ ᐊᓐᑕ ᑎᔅᑐᐎᒡ ᑲ ᑕᔅᒍᐛᑦ ᐊᐛᓯᓴ᙮
18ᐊᓂᔭ ᑲ ᒋᓯᑲᔨᒡ, ᑎᐸᔨᒋᒐᓱᐤ ᑭᔭ ᐊᑉᕋᒻ ᒋ ᐃᑐᑎᒧᒡ ᓂᔅᑯᒥᑐᐅᓂᔪᐤ ᑭᔭ ᑎᐸᔨᒋᒐᓱᐤ ᒂ ᐃᑕᑦ, “ᓂᒋ ᐊᓱᑎᒪᒐᓐ ᒐᒋ ᒥᔨᒂᐤ ᒋᓂᑕᐅᒋᐊᑭᓐᒡ ᒥᓯᐛ ᐅᔭᔪᐤ ᐊᔅᒋᔪᐤ, ᐃᒋᑉᑎᒡ ᓯᐱᒡ ᐛᒋᒋᐱᔨᒡ ᐃᔅᐱᔅ ᔪᑉᕆᑎᔅ ᓯᐱᒡ᙮ 19ᑭᓂ ᐃᔪᒡ ᐅᑦ ᐊᔅᒋᐛᐤ, ᑭᓇᔅ ᐃᔪᒡ, ᑲᑦᒧᓐ ᐃᔪᒡ, 20ᐊᑦ ᐃᔪᒡ, ᐸᕆᔅ ᐃᔪᒡ, ᕋᐸ ᐃᔪᒡ, 21ᐊᒧᕆ ᐃᔪᒡ, ᑲᐃᓇᓐ ᐃᔪᒡ, ᑯᑲᓯ ᐃᔪᒡ ᑭᔭ ᒐᐳᔅ ᐃᔪᒡ᙮”
Currently Selected:
ᒐᓂᓯᔅ 15: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
