ᐊᒃᓱᑕᔅ 8
8
ᐃᔨᑭᒡ ᑲ ᐊᑯᓇᐊᒡ ᐊᔅᒋᔪᐤ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, ᒐ ᓂᑐᐛᐱᒥᑦ ᒋᓴᐅᒋᒪᐤ ᑭᔭ ᒐ ᐃᑎᑦ, “ᐊᐅᑯᐤ ᐅᔭ ᑎᐸᔨᒋᒐᓱᐤ ᐊ ᐃᔅᒋᔄᑦ: ‘ᐱᔅᑎᓂᒡ ᓂᑦ ᐃᔨᒥᒡ ᒐᒋ ᐊᔭᒥᐊᔅᑐᐅᒡ᙮ 2ᑲ ᑕᑈᑎᒥᓇ, ᓂᑭ ᐃᑎᓴᐛᐅᒡ ᓇᔅᒡ ᐊ ᒥᒐᑎᒡ ᐃᔨᑭᒡ ᐊᓐᑕ ᒥᓯᐛ ᒋᑦ ᐊᔅᒋᒡ᙮ 3ᒋᑭ ᓴᑭᔅᒋᓇᐅᒡ ᐃᔨᑭᒡ ᐊᓐᑕ ᓇᐃᔭᓪ ᓯᐱᒡ ᑭᔭ ᒋᒋᐛᐛᒡ ᒋᑭ ᑕᐅᒡ, ᒐ ᐊᑎ ᐱᒐᒡ ᐊᓐᑕ ᒋᑲᐱᔅᒋᒐᔭᒧᐛᒡ ᑭᔭ ᒋᓂᐸᐅᓄᐛᐛᒡ ᒋᑭ ᑕᐅᒡ ! ᓄᑎᒻ ᒥᒋᐛᐱᒡ ᐊᓐᑕ ᐃᒋᑉᑎᒡ ᒋᑭ ᑕᐅᒡ᙮ ᓄᑎᒻ ᐊᓐᑕ ᒋᑭ ᓴᑭᔅᒋᓇᐅᒡ ᒋᑲᐱᒥᓄᐛᐤ ᒋᓴᐱᔅᒐᐛᓄᐛᒡ ᑭᔭ ᒋᑦ ᐊᔅᒋᐧᑯᐛᐛᒡ᙮ 4ᒋᑭ ᒂᔅᑯᑕᑯᒡ ᑭᔭ ᒋᑦ ᐃᔨᒪ ᑭᔭ ᒋᑯᐸᓇᒪ᙮’ ”
5ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐃᑎᑦ ᐊᕋᓐ ᒐᒋ ᐃᔅᐱᔨᑕᑦ ᐅᓯᔅᑲᐅᓐ ᐊᓐᑕ ᓇᐃᔭᓪ ᓯᐱᒡ ᑭᔭ ᐊᓐᑕ ᒥᓯᐛ ᓴᑲᐃᑭᓂᒡ ᑭᔭ ᓯᐱᓯᒡ ᑭᔭ ᒐ ᑐᑐᐅᑥᐤ ᐃᔨᑭᒡ ᒐᒋ ᒧᔅᒋᐱᔨᒡ ᑭᔭ ᒐ ᐊᑯᓇᐊᒡ ᒥᓯᐛ ᐃᒋᑉᑦ ᐊᔅᒋᔪᐤ᙮”
6ᐊᑯ ᐊᕋᓐ ᒂ ᐃᔅᐱᔨᑕᑦ ᐅᒥᔅᑎᑯᒻ ᐊᓐᑕ ᒥᓯᐛ ᓂᐱᒡ ᐊᑯ ᐃᔨᑭᒡ ᒂ ᐊᑯᓇᐊᒡ ᒥᓯᐛ ᐃᒋᑉᑦ ᐊᔅᒋᔪᐤ᙮ 7ᒥᒄ ᑲᒥᓂᑐᐅᓯᒡ ᒂ ᑐᑕᒡ ᑭᔭ ᐎᔪᐛᐤ ᐅᒥᓂᑐᓯᐅᓄᐛᐤ, ᑭᔭ ᐎᔪᐛᐤ ᒂ ᐃᑐᑐᐛᒡ ᐃᔨᑲ ᒐᒋ ᑕᔨᒋ ᐊᓐᑕ ᐊᔅᒋᒡ᙮
8ᐊᑯ ᒋᓴᐅᒋᒪᐤ ᒂ ᐎᓴᒪᑦ ᒧᓱᓴ ᑭᔭ ᐊᕋᓇ ᑭᔭ ᒂ ᐃᑕᑦ, “ᐊᔭᒥᐊᔅᑐᐛᐧᒄ ᒋ ᑎᐸᔨᒋᒐᓯᒧᐛᐤ ᒐᒋ ᐅᑎᓇᑦ ᐊᓂᔭᔪᐛ ᐃᔨᑲ ᐊᓐᑕ ᓂᑦ ᐃᔨᒪ ᑭᔭ ᓂᔾ ᐅᒡ, ᓂᑭ ᐱᔅᑎᓇᐅᒡ ᒋᑦ ᐃᔨᒧᐛᐅᒡ ᒐᒋ ᒥᔭᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐛ᙮”
9ᒧᓱᔅ ᒂ ᐃᑕᑦ ᒋᓴᐅᒋᒪᐛ, “ᒐ ᐎᑎᒧᐎᓐ ᑕᐃᔅᐱ ᒐ ᐊᔭᒥᐊᔅᑕᑎᑯᒡ, ᒋᔾ ᑭᔭ ᒋᑯᐸᓇᒥᒡ ᑭᔭ ᒋᑦ ᐃᔨᒥᒡ ᒐ ᐊᑲ ᐃᑕᒡ ᐃᔨᑭᒡ ᐊᓐᑕ ᒋᒋᐛᐛᒡ ᒥᒄ ᐊᓐᑕ ᓇᐃᔭᓪ ᓯᐱᒡ ᒐ ᑕᒡ᙮”
10ᒋᓴᐅᒋᒪᐤ ᒂ ᐃᔅᒋᔄᑦ, “ᐛᐸᒐ ᒐ ᐃᔨᒥᑐᐎᓐ᙮” ᒧᓱᔅ ᒂ ᐃᑕᑦ, “ᐊᐅᑯᐤ ᒐ ᐃᓯᓇᒂᒡ ᐅ ᐊ ᐃᔅᒋᔄᔨᓐ ᐊᑯ ᒐ ᒋᔅᒐᔨᑎᒪᒄ ᐊ ᐊᑲ ᐃᔨᑕᑦ ᒪᓂᑐᐤ ᒧᔭᒻ ᑎᐸᔨᒋᒐᓱᐤ ᓂ ᒋᓴᒪᓂᑐᒥᓇᓐ᙮ 11ᒋᑭ ᓂᑭᑎᑯᐛᐅᒡ ᐃᔨᑭᒡ ᒋᔾ ᑭᔭ ᒋᑯᐸᓇᒥᒡ ᑭᔭ ᒋᑦ ᐃᔨᒥᒡ᙮ ᒥᒄ ᐊᓐᑕ ᓇᐃᔭᓪ ᓯᐱᒡ ᒋᑭ ᑕᐅᒡ᙮”
12ᐊᑯ ᒧᓱᔅ ᑭᔭ ᐊᕋᓐ ᒂ ᓂᑭᑕᒡ ᒋᓴᐅᒋᒪᐛ, ᑭᔭ ᒧᓱᔅ ᒂ ᓂᑐᑎᒪᔅᑎᒧᐛᑦ ᑎᐸᔨᒋᒐᓱᐛ ᒐᒋ ᐅᑎᓇᔨᒋ ᐃᔨᑲ ᑲ ᐃᑎᓴᐊᒧᐛᑦ ᒋᓴᐅᒋᒪᐛ᙮ 13ᑎᐸᔨᒋᒐᓱᐤ ᒂ ᐃᑐᑕᐧᒃ ᑲ ᐃᓯ ᓂᑐᑎᒪᑯᑦ ᒧᓱᓴ ᑭᔭ ᐃᔨᑭᒡ ᒥᓯᐛ ᒋ ᓂᐳᐅᒡ ᐊᓐᑕ ᒥᒋᐛᐱᒡ ᑭᔭ ᓂᑕᐅᒋᒋᑭᓂᒡ ᑲ ᑕᒡ᙮ 14ᐃᒋᑉᑦ ᐃᔪᒡ ᒂ ᒪᒧᓴᒋᓇᒡ ᑭᔭ ᒂ ᒪᒧᐊᔭᒡ, ᑭᔭ ᓇᔅᒡ ᒂ ᒥᒋᒪᒂᒡ ᐊᔅᒋᔾ᙮ 15ᐊᑯ ᒋᓴᐅᒋᒪᐤ ᒂ ᐛᐱᒪᑦ ᐃᔨᑲ ᓇᐱᔨᒋ, ᑲᐤ ᒥᓐ ᒂ ᒥᔅᑯᔅᑎᒂᓇᑦ ᓇᒪ ᐅᒋ ᐎ ᑕᑈᑎᒻ ᒐᒋ ᐱᔅᑎᓇᑦ ᐃᔪᐛ, ᒧᔭᒻ ᑎᐸᔨᒋᒐᓱᐤ ᑲ ᐃᔅᒋᔄᑦ, ᓇᒪ ᐅᒋ ᐎ ᓂᑐᑐᐛᐤ ᒧᓱᓴ ᑭᔭ ᐊᕋᓇ᙮
ᒥᓐᑐᓯᓯᒡ ᓇᔅᒡ ᑲ ᒥᒐᑎᒡ
16ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐃᑎᑦ ᐊᕋᓐ ᒐᒋ ᐅᑕᒪᐊᒃ ᒧᔅᑎᔅᑭᒥᔪᐤ ᐅᓯᔅᑲᐅᓐ ᐊ ᐊᐱᒋᑕᑦ, ᐊᑯ ᒥᓯᐛ ᐊᓐᑕ ᐃᒋᑉᑦ ᐊᔅᒋᒡ ᒥᓐᑐᓯᓯᒡ ᒐ ᐃᓯᓇᑯᓂᔨᒡ ᐃᔭᑲᔪᐤ᙮” 17ᐊᑯ ᐊᕋᓐ ᒂ ᐅᑕᒪᐊᐧᒃ ᒧᔅᑎᔅᑭᒥᔪᐤ ᐅᓯᔅᑲᐅᓐ ᐊ ᐊᐱᒋᑕᑦ ᐊᑯ ᒥᓯᐛ ᐃᔭᑲᔪᐤ ᐊᓐᑕ ᐃᒋᑉᑦ ᐊᔅᒋᒡ ᒥᓐᑐᓯᓯᒡ ᒂ ᐃᓯᓂᑯᓂᔨᒡ ᒥᓯᐛ ᐃᔪᒡ ᑭᔭ ᐊᐛᓯᓯᒡ ᐊᑯᓇᐅᑯᒡ᙮ 18ᐊᑯ ᑲᒥᓂᑐᐅᓯᒡ ᑲ ᑯᒋᐱᑕᒡ ᑭᔭ ᐎᔪᐛᐤ ᐊ ᐊᐱᒋᑕᒡ ᐅᒥᓂᑐᓯᐅᓄᐛᐤ ᒐᒋ ᓄᑯᓯᔨᒋ ᒥᓐᑐᓯᓴ ᒥᒄ ᓇᒪ ᐅᒋ ᑭᔅᒋᑕᐅᒡ, ᒥᓯᐛ ᐊᓐᑕ ᒋ ᑕᐅᒡ ᒥᓐᑐᓯᓯᒡ᙮
19ᑭᔭ ᑲᒥᓂᑐᐅᓯᒡ ᒂ ᐃᑕᒡ ᒋᓴᐅᒋᒪᐛ, “ᐊᐅᑯᔪᐤ ᐅᔭ ᒋᓴᒪᓂᑐᐤ ᐅᑦ ᐃᑐᐅᓐ᙮” ᒥᒄ ᒋᓴᐅᒋᒪᐤ ᒋ ᒥᔅᑯᔅᑎᒂᓇᐤ, ᒧᔭᒻ ᑎᐸᔨᒋᒐᓱᐤ ᑲ ᐃᔅᒋᔄᑦ, ᓇᒪ ᐅᒋ ᐎ ᓂᑐᑐᐛᐤ ᒧᓱᓴ ᑭᔭ ᐊᕋᓇ᙮
ᐅᒐᐅᒡ ᓇᔅᒡ ᑲ ᒥᒐᑎᒡ
20ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐎᐱᒡ ᒐᒋᓴᐸ ᒐ ᐅᓂᔨᓐ ᑭᔭ ᒐ ᓂᔅᑯᐅᑦ ᒋᓴᐅᒋᒪᐤ ᐊᓐᑕ ᓯᐱᒡ ᒪᒂᒡ ᒐ ᒋᔅᑕᐸᐅᐎᓱᑦ, ᑭᔭ ᒐ ᐃᑎᑦ, ‘ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᐊ ᐃᔅᒋᔄᑦ: ᐱᔅᑎᓂᒡ ᓂᑦ ᐃᔨᒥᒡ ᒐᒋ ᔅᑐᑕᒡ ᑭᔭ ᒐᒋ ᐊᔭᒥᐊᔅᑐᐅᒡ᙮ 21ᐊᑲ ᐎ ᐱᔅᑎᓂᑥᐛ ᒋᑭ ᐃᑎᓴᐊᒪᑎᓐ ᓇᔅᒡ ᐊ ᒥᒐᑎᒡ ᐅᒐᐅᒡ ᑭᔭ ᒋᑯᐸᓇᒥᒡ ᑭᔭ ᒋᑦ ᐃᔨᒥᒡ᙮ ᒋᑭ ᓴᑭᔅᒋᓇᐅᒡ ᐊᓐᑕ ᐃᒋᑉᑦ ᐃᔪᒡ ᐎᒋᐛᐛᒡ ᑭᔭ ᒋᑭ ᑯᓇᐊᒧᒡ ᒧᔅᑎᔅᑭᒥᔪᐤ᙮
22ᒋᓴᒪᓂᑐᐤ ᐅᑦ ᐃᔨᒪ ᐊᓐᑕ ᑯᓯᓐ ᐊ ᑕᔨᒋ ᓇᒪ ᒋᑭ ᐛᐧᑲᐃᑯᐅᒡ ᐅᒐᐛ, ᒥᒄ ᒋᑦ ᐃᔨᒥᒡ ᐊᓐᑕ ᒥᓯᐛ ᐃᒋᑉᑦ ᐊᔅᒋᒡ ᓇᔅᒡ ᒋᑭ ᐛᐧᑲᐃᑯᐅᒡ᙮ ᐊᐅᑯᓐ ᒐ ᒋᔅᒐᔨᑎᒪᒃ ᑎᐸᔨᒋᒐᓱᐤ ᐊᑕᑦ ᐅᑕ ᐃᒋᑉᑦ ᐊᔅᒋᒡ᙮ 23ᓂᑭ ᑎᐸᓇᐅᒡ ᓂᑦ ᐃᔨᒥᒡ ᒋᑦ ᐃᔨᒪ ᐅᒡ, ᐛᐸᒐ ᐅ ᒋᑭ ᐃᔅᐱᔪᐤ᙮’ ”
24ᑭᔭ ᑎᐸᔨᒋᒐᓱᐤ ᒂ ᐃᑐᑕᐧᒃ ᑲ ᐃᔅᒋᔄᑦ, ᐊᑯ ᒋᒋᐛ ᒋ ᒥᒐᑎᔪᐛ ᐅᒐᐛ ᐊᓐᑕ ᒋᓴᐅᒋᒪᐛ ᐎᒋᔨᒡ ᑭᔭ ᐊᓐᑕ ᒥᓯᐛ ᒥᒋᐛᐱᒡ ᐊᓐᑕ ᐃᒋᑉᑎᒡ᙮ ᒥᓯᐛ ᒋ ᐃᔭᔪᑕᐅᒡ ᐃᒋᑉᑦ ᐊᔅᒋᔪᐤ ᐊᓐᒡ ᐅᒐᐅᒡ᙮
25ᒋᓴᐅᒋᒪᐤ ᒂ ᐎᓴᒪᑦ ᒧᓱᓴ ᑭᔭ ᐊᕋᓇ, “ᒪᒋᒄ ᒥᔭᐧᒄ ᒥᑐᔅᑕᐊᒪᒐᐅᓂᔪᐤ ᒋᒋᓴᒪᓂᑐᒧᐛᐤ ᐅᑕ ᐊᔅᒋᒡ᙮”
26ᐊᑯ ᒧᓱᔅ ᒂ ᐃᑕᑦ, “ᓇᒪ ᒥᔽᐤ ᒐᒋ ᐃᑐᑎᒪᓐ ᐅ᙮ ᒋᑭ ᐛᐧᑲᐃᑯᐅᒡ ᐃᒋᑉᑦ ᐃᔪᒡ ᐊ ᒥᑐᔅᑕᐊᒧᒥᒋᒋ ᐊᐛᓯᓴ ᑎᐸᔨᒋᒐᓱᐛ ᓂᒋᓴᒪᓂᑐᒥᓇᓇ᙮ ᒐᔅᑎᓇᔅ ᓂᐸ ᐎ ᓂᐸᐃᑯᓇᓐᒡ ᐊᓯᓂᔭ ᐊ ᐸᐱᒧᓯᓇᑕᐎᒥᒡ᙮ 27ᐛᔅ ᓇᔅᒡ ᓂᑭ ᐎ ᐱᒧᑕᓇᓐ ᓂᔅᑐ ᒋᓯᑲᐛ ᐊᓐᑕ ᐸᐧᑯᑎᔅᑭᒥᑲᒡ ᒐᒋ ᒥᔨᒋᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ ᓂᒋᓴᒪᓂᑐᒥᓇᓐ, ᒧᔭᒻ ᑲ ᐃᔅᒋᔄᑦ᙮”
28ᐊᑯ ᒋᓴᐅᒋᒪᐤ ᒂ ᐃᑕᑦ, “ᒋᑭ ᐱᔅᑎᓂᑎᓇᐤ ᒐᒋ ᐃᑐᑕᔭᒃ ᐊᓐᑕ ᐸᐧᑯᑎᔅᑭᒥᑲᒡ ᑭᔭ ᒐᒋ ᒥᔭᒄ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐤ ᒋᒋᓴᒪᓂᑐᒧᐛᐤ, ᒥᒄ ᒐ ᐊᑲ ᐛᔪᐤ ᐃᑐᑕᔭᒄ ᐊᑯ ᐸᒋ ᐃᔨᒥᑐᐅᒄ᙮” 29ᒧᓱᔅ ᒂ ᐃᑕᑦ, “ᐅ ᐊᑎ ᓂᑭᑕᓇ, ᓂᑭ ᐊᔭᒥᐊᔅᑐᐛᐤ ᑎᐸᔨᒋᒐᓱᐤ, ᑭᔭ ᐛᐸᒐ ᒋᑭ ᐳᓂᐧᑲᑯᐛᐅᒡ ᐊᓐᒡ ᐅᒐᐅᒡ ᒋᔾ ᑭᔭ ᒋ ᑯᐸᓇᒥᒡ ᑭᔭ ᐊᓐᒡ ᒋᑦ ᐃᔨᒥᒡ᙮ ᒥᒄ ᒋᑭ ᐎ ᑕᑈᓐ ᐅ ᐊ ᐃᔅᒋᔄᔨᓐ ᑭᔭ ᒐ ᓇᐃᒥᑥᐤ ᐃᔪᒡ ᒐᒋ ᐱᔅᑎᓂᒧᐛᒡ ᒥᑐᔅᑕᐊᒪᒐᐅᓂᔪᐤ ᑎᐸᔨᒋᒐᓱᐛ᙮”
30ᑲᒋ ᓂᑭᑎᒺᑦ ᐅᒋᓴᐅᒋᒪᐅᒋᐛᐱᔪᐤ, ᐊᑯ ᒂ ᐊᑎ ᓂᑐᑎᒧᐛᑦ ᑎᐸᔨᒋᒐᓱᐛ ᒧᓱᔅ, 31ᑭᔭ ᑎᐸᔨᒋᒐᓱᐤ ᒋ ᐃᑐᑎᒺᐤ ᑲ ᐃᓯ ᓂᑐᐛᔨᑎᒥᔨᒋ ᒧᓱᓴ᙮ ᓇᒪ ᐛᐛᒡ ᐸᐃᒄ ᐅᒐᐛ ᐅᒋ ᑕᔪᐛ ᒐᒋ ᐅᐧᑲᐃᑯᑦ ᒋᓴᐅᒋᒪᐤ, ᑭᔭ ᐅᑯᐸᓇᒪ, ᑭᔭ ᒪᒃ ᑯᑎᒃ ᐊᐛᓐ ᐊᓐᑕ ᐃᒋᑉᑎᒡ᙮ 32ᒥᒄ ᒋᓴᐅᒋᒪᐤ ᒥᓐ ᒋ ᒥᔅᑯᔅᑎᒂᓇᐤ ᑭᔭ ᓇᒪ ᐅᒋ ᑕᑈᑎᒻ ᒐᒋ ᔅᑐᑕᔨᒋ ᐊᓂᔭ ᐃᔪᐛ᙮
Currently Selected:
ᐊᒃᓱᑕᔅ 8: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
