ᐊᒃᓱᑕᔅ 7
7
ᒧᓱᔅ ᒋᓇᐱᑯᒡ ᑲ ᐃᓯᓇᑯᓂᔨᒡ ᐅᓯᔅᑲᐅᓐ
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᓂᑭ ᒥᔭᐤ ᒋᔅᑕᔅ ᐊᕋᓐ ᒐᒋ ᐃᔨᒥᔅᑎᒪᔅᒃ, ᒧᔭᒻ ᐅᒋᔅᒋᐛᐃᒐᓱᐤ ᐊᔨᒧᑎᒧᐛᒋ ᓂᑦ ᐃᔨᒧᓂᔪᐤ ᐊᓂᔭ ᐃᔪᐛ᙮ 2ᒐ ᐎᑎᒧᐅᑦ ᐊᕋᓐ ᓄᑎᒻ ᒐᒂᔪᐤ ᑲ ᐃᑎᑕᓐ ᑭᔭ ᒐ ᐃᑎᓱᒪᑦ ᒋᓴᐅᒋᒪᐛ ᒐᒋ ᐱᔅᑎᓇᔨᒋ ᓂᑦ ᐃᔨᒪ ᒐᒋ ᓂᑭᑎᒥᔨᒋ ᐊᓂᔭ ᐅᑦ ᐊᔅᒋᔪᐤ᙮ 3ᑭᔭ ᓂᑭ ᐃᑐᑐᐛᐤ ᒐᒋ ᒥᔅᑯᔅᑎᒂᓇᑦ᙮ ᓇᒪ ᒋᑭ ᓂᑐᑕᒃ ᐊᑎᓱᐧᒄ ᒥᔅᑎ ᐊᓏᔨᒥᑲ ᑭᔭ ᐅᑦ ᐃᔨᒪ᙮ 4ᐊᑯ ᒐ ᐃᑐᑎᒪᓐ ᓂᓱᐧᑲᑎᓯᐅᓐ ᒪᔅᑕᔾ ᒐ ᒥᔅᑎ ᐊᓏᔨᒥᒂᐤ ᐊᓐ ᐃᒋᑉᑦ ᐃᔪᒡ, ᐊᑯ ᒐ ᒋᔅᒋᓄᑕᐃᒂᐤ ᓂᑦ ᐃᔨᒥᒡ ᐃᒋᑉᑎᒡ ᐅᒡ᙮ 5ᐅ ᒋ ᐃᔅᐱᔨᒐ ᐊᑯ ᐃᒋᑉᑦ ᐃᔪᒡ ᒐ ᒋᔅᒐᔨᑕᒡ, ᓂᔾ ᐅ ᑎᐸᔨᒋᒐᓱᐤ᙮”
6ᐊᑯ ᒧᓱᔅ ᑭᔭ ᐊᕋᓐ ᒂ ᑐᑕᒡ ᑲ ᐃᑎᓱᒪᑯᒡ ᑎᐸᔨᒋᒐᓱᐛ᙮ 7ᔭᓇᐤ ᑕᑐᔪᐤ ᒋ ᐃᑕᑐᐳᓇᓱᐤ ᒧᓱᔅ ᑭᔭ ᔭᓇᐤ ᑕᑐᔪᐤ ᐊᓱ ᓂᔅᑐ ᒋ ᐃᑕᑐᐳᓇᓱᐤ ᐊᕋᓐ, ᑲ ᓂᑐᐛᐱᒪᒡ ᑭᔭ ᑲ ᐃᔨᒪᐊᒡ ᒋᓴᐅᒋᒪᐛ᙮
8ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ ᑭᔭ ᐊᕋᓇ, 9“ᐃᑎᑕᒂ ᒋᓴᐅᒋᒪᐤ, ‘ᒐ ᐃᑐᑎᒪᒄ ᒪᒥᔅᑲᒡ ᐃᑐᐅᓐ,’ ᒐ ᐃᑎᑦ ᐊᕋᓐ, ‘ᐅᑎᓇ ᒋᓯᔅᑲᐅᓐ ᑭᔭ ᒐ ᐛᐱᓂᒥᓐ ᐊᓐᑕ ᓂᑲᓐ ᐊᑕᑦ ᒋᓴᐅᒋᒪᐤ ᐊᑯ ᒋᓇᐱᑯᒡ ᒐ ᐃᓯ ᒥᔅᑯᒋᐱᔨᒡ᙮’ ”
10ᐊᑯ ᒧᓱᔅ ᑭᔭ ᐊᕋᓐ ᒂ ᓂᑐᐛᐱᒪᒡ ᒋᓴᐅᒋᒪᐛ, ᒂ ᑐᑕᒡ ᑲ ᐃᑎᓱᒪᑯᒡ ᑎᐸᔨᒋᒐᓱᐛ᙮ ᐊᕋᓐ ᒂ ᐛᐱᓇᐧᒃ ᐅᓯᔅᑲᐅᓐ ᐊᓐᑕ ᓂᑲᓄᒡ ᑭᔭ ᒋᓇᐱᑯᒡ ᒂ ᐃᓯ ᒥᔅᑯᒋᐱᔨᒡ᙮ 11ᒋᓴᐅᒋᒪᐤ ᒂ ᐎᓴᒪᑦ ᐅᑲᒥᓂᑐᐅᓯᒪ ᑭᔭ ᒂ ᐃᑐᑎᒥᔨᒋ ᒧᔭᒻ ᑲ ᑐᑕᒡ ᑭᔭ ᐎᔨᐛᐤ᙮ 12ᒂ ᐛᐱᓇᒡ ᐅᓯᔅᑲᐅᓄᐛᐛ ᑭᔭ ᒋᓇᐱᑯᒡ ᒂ ᐃᓯ ᒥᔅᑯᒋᐱᔨᒋ, ᒥᒄ ᐊᕋᓐ ᐅ ᒋᓇᐱᑯᒪ ᑲ ᑯᒋᐱᔭᔨᒋ ᐊᓂᔭ ᑯᑎᑲ ᒋᓇᐱᒂ᙮ 13ᒋᓴᐅᒋᒪᐤ ᐊᔅᒄ ᐃᔭᐱᒡ ᒋ ᒥᔅᑯᔅᑎᒂᓇᐤ ᑭᔭ ᓇᒪ ᐅᒋ ᐎᓂᑐᑎᒻ ᐃᔭᐱᒡ, ᒧᔭᒻ ᑎᐸᔨᒋᒐᓱᐛ ᑲ ᐃᔅᒋᔄᔨᒋ᙮
ᓂᐱᔾ ᒥᐧᑯᒡ ᑲ ᐃᓯᓇᒂᒡ
14ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒋᒋᐛ ᐃᔭᐱᒡ ᒥᔅᑯᔅᑎᒂᓇᐤ ᒋᓴᐅᒋᒪᐤ, ᑭᔭ ᓇᒪ ᑕᑈᑎᒻ ᒐᒋ ᐱᔅᑎᓇᑦ ᓂᑦ ᐃᔨᒪ᙮ 15ᒐᒋᓴᐸᔭᒐ, ᒐ ᑕᐧᑯᓂᒥᓐ ᒋᓯᔅᑲᐅᓐ ᒋᓇᐱᑯᒡ ᑲ ᐃᓯ ᒥᔅᑯᒋᐱᔨᒡ, ᑭᔭ ᓯᓱᒡ ᓇᐃᔭᓪ ᓯᐱᒡ, ᐊᑯᑕ ᒐ ᐊᓱᐛᐱᒥᑦ ᐊᓐ ᒋᓴᐅᒋᒪᐤ᙮ 16ᑭᔭ ᒐ ᐎᑎᒧᐅᑦ, ‘ᑎᐸᔨᒋᒐᓱᐤ, ᐃᑉᕈᐤ ᐅᒋᓴᒪᓂᑐᒧᐛᐛ, ᓂᒋ ᐃᑎᓴᐅᒃ ᒐᒋ ᐃᑎᓱᒥᑕᓐ, ᐱᔅᑎᓇᐧᑯᒡ ᓂᑦ ᐃᔨᒥᒡ ᒐᒋ ᐊᔭᒥᐊᔅᑐᐅᒡ ᐊᓐᑕ ᐸᐧᑯᑎᔅᑭᒥᑲᒡ᙮ ᒥᒄ ᐊᔅᒄ ᐃᔭᐱᒡ ᐊᓄᒡ, ᓇᒪ ᒋ ᐅᒋ ᓂᑐᑐᐛᐤ᙮ 17ᑎᐸᔨᒋᒐᓱᐤ ᐃᔅᒋᔄᐤ, “ᐊᑯ ᒐᔅᒐᔨᑎᒥᓐ ᐊᐛᓐ ᐊᓐ ᐎᔾ ᐊᓂᔭ ᒐᒂᔪᐤ ᒐ ᐃᑐᑕᐧᒃ ᐅᒡ: ᐅ ᓂᓯᔅᑲᐅᓐ ᐅᒡ ᓂᑭ ᑕᐧᑲᑭᒪᐊᓐ ᓇᐃᔭᓪ ᓯᐱᔾ, ᐊᑯ ᒥᐧᑯᒡ ᒐ ᐃᓯᓇᒂᒡ᙮ 18ᒥᓯᐛ ᓂᒪᓯᒡ ᒋᑭ ᓂᐳᐅᒡ, ᑭᔭ ᓇᐃᔭᓪ ᓯᐱᔾ ᒋᑭ ᒥᒋᒪᑯᓐ᙮ ᐃᒋᑉᑦ ᐃᔪᒡ ᓇᒪ ᒋᑭ ᒋ ᒥᓄᐅᒡ ᐊᓂᔭ ᓂᐱᔪᐤ ᐊᓐᑕ ᓯᐱᒡ ᐅᒡ᙮” ’ ”
19ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐃᑎᑦ ᐊᕋᓐ, ‘ᐅᑎᓇ ᒋᓯᔅᑲᐅᓐ ᑭᔭ ᓂᐱᒡ ᐊᓐᑕ ᒐ ᐃᔅᐱᑕᔨᓐ, ᒥᓯᐛ ᓯᐱᓴ, ᑭᔭ ᒥᓯᐛ ᓂᐱᔭ,’ ᒥᐧᑯᒡ ᒐ ᐃᓯᓇᒂᒋ᙮ ᒥᓯᐛ ᓂᐱᔾ ᐊᓐᑕ ᐃᒋᑉᑎᒡ ᒥᐧᑯᒡ ᒋᑭ ᐃᓯᓇᑯᓐ ᐃᔭᐱᒡ ᐊᓐᑕ ᐛᐱᑎᓂᔅᒋᐳᑕᒡ ᑭᔭ ᒥᓯᐛ ᒐᒂᓂᒡ ᑲ ᐊᓱᐅᑕᒡ ᓂᐱᔾ᙮”
20ᒧᓱᔅ ᑭᔭ ᐊᕋᓐ ᒂ ᑐᑕᒡ ᑎᐸᔨᒋᒐᓱᐛ ᑲ ᐃᑎᑯᒡ᙮ ᐊᕋᓐ ᒂ ᐅᐱᑕᐧᒃ ᐅᓯᔅᑲᐅᓐ ᑭᔭ ᒂ ᑕᐧᑲᑭᒪᐊᐧᒃ ᓇᐃᔭᓪ ᓯᐱᔪᐤ, ᐊᑯ ᒥᐧᑯᒡ ᒂ ᐃᓯᓇᑯᓂᔨᒡ ᓄᑎᒻ ᓂᐱᔪᐤ᙮ 21ᓂᒪᓯᒡ ᒋ ᓂᐳᐅᒡ ᑭᔭ ᓂᐱᔾ ᒋᑭ ᒥᒋᒪᑯᓐ, ᐃᒋᑉᑦ ᐃᔪᒡ ᓇᒪ ᒋ ᐅᒋ ᒥᓄᐅᒡ ᐊᓂᔭ ᓂᐱᔪᐤ᙮ ᒥᓯᐛ ᐊᓐᑕ ᒥᐧᒄ ᒋ ᑎᑯᓐ ᐃᒋᑉᑦ ᐊᔅᒋᒡ᙮
22ᒋᓴᐅᒋᒪᐤ ᐅᑲᒥᓂᑐᓯᒪ ᐸᐃᑯᑕᐤ ᒂ ᐃᑐᑎᒥᔨᒋ᙮ ᐊᑯ ᒋᓴᐅᒋᒪᐤ ᐃᔭᐱᒡ ᒋ ᒥᔅᑯᔅᑎᒂᓇᐤ, ᓇᒪ ᐅᒋ ᐎ ᓂᑐᑐᐛᐤ ᒧᓱᓴ ᑭᔭ ᐊᕋᓇ ᒧᔭᒻ ᑎᐸᔨᒋᒐᓱᐤ ᑲ ᐃᔅᒋᔄᑦ᙮ 23ᒋᓴᐅᒋᒪᐤ ᑲᐤ ᒂ ᒋᐛᑦ ᐊᓐᑕ ᐅᒋᓴᒋᒪᐅᒋᐛᐱᒡ ᐊᑲ ᐅᒋ ᒪᒥᑐᓇᔨᑕᐧᒃ ᐅᔭ ᑲ ᐃᔅᐱᔨᒡ ᒐᒂᔪᐤ᙮ 24ᐃᒋᑉᑦ ᐃᔪᒡ ᒋ ᒧᓇᐃᒐᐅᒡ ᐊᓐᑕ ᓯᓱᒡ ᓯᐱᒡ ᐊ ᓇᓂᑐᐛᐸᑕᒡ ᐊ ᒥᔽᑭᒥᔨᒡ ᓂᐱᔪᐤ ᒐᒋ ᒥᓂᒡ, ᐛᔅ ᓇᒪ ᐅᒋ ᒥᓄᐅᒡ ᓂᐱᔪᐤ ᐊᓐᑕ ᓯᐱᒡ ᐅᒡ᙮ 25ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ ᑎᐸᔨᒋᒐᓱᐤ ᑲ ᐅᑕᒪᑭᒪᐊᐧᒃ ᓇᐃᔭᓪ ᓯᐱᔪᐤ᙮
Currently Selected:
ᐊᒃᓱᑕᔅ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
