ᐊᒃᓱᑕᔅ 30
30
ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᐃᔎᓴᑭᓄᐅᒋ ᑲᐎᒋᒪᑯᓯᔨᒋ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐎᑎᒧᐅᑥᐤ ᑲ ᑭᔅᒋᑕᒡ ᐊᑐᔅᒐᒡ ᒐᒋ ᐅᓯᑕᒡ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒐ ᐃᔎᓴᑭᓄᐅᒋ ᐎᒋᒪᓯᑭᓇ, ᐊᑲᓯᐊ ᒥᔅᑎᒂ ᒋᑭ ᐊᐱᒋᐊᐅᒡ᙮ 2ᒋᑭ ᐎ ᑭᒋᒐᔭᐤ ᐱᔅᑎᓂᒐᐅᓇᐱᔅᒄ᙮ ᔭᓇᐅᑕᑐᓴᑉ ᒥᒋᒋᓐ ᒋᑭ ᐎ ᐃᔅᐱᔅ ᒋᓏᐤ ᐊᓐᑕ ᐊᔨᑐᐤ ᑭᔭ ᓂᔅᑐᔪᐤ ᐊᓱ ᐊᓱᑕᒡ ᒥᒋᒋᓐ ᒋᑭ ᐎ ᐃᔅᐱᔅ ᐃᔅᐸᓇᐤ ᑭᔭ ᒋᑭ ᒋᑭᒧᑕᐅᒡ ᒥᒋᑎᐧᒄ ᐊᔅᑭᓇ ᐊᓐᑕ ᑕᐧᑯᒡ ᒥᓯᐛ ᐊ ᒋᒐᔭᔨᒡ᙮ ᐸᐃᑯᑕᐤ ᒥᔅᑎᒂ ᑲ ᐅᓯᑕᒡ ᐱᔅᑎᓂᒐᐅᓇᐱᔪᐤ ᒋᑭ ᐅᒋ ᒧᐧᑯᑎᑕᐅᒡ᙮ 3ᒥᓯᐛ ᐊᔅᐱᓴᔨᒡ ᐎᔄᐅᓱᓇᔭᔪᐤ ᒋᑭ ᐎᔎᔭᒋᓂᒧᒡ ᑭᔭ ᐃᔭᐱᒡ ᐛᔅᑲᔅᑲᐃᑭᓇ ᒋᑭ ᒋᑭᒺᐅᒡ ᐊᓐᑕ ᒐᑲᑦ ᑕᐧᑯᒡ ᐱᔅᑎᓂᒐᐅᓇᐱᔅᑯᒡ᙮ 4ᐊᓐᑕ ᐊᔨᑐᐤ ᒥᐅᑎᒡ ᒋᑭ ᒋᑭᒺᐅᒡ ᐛᐎᔭᐱᔎ ᐊ ᐎᔄᐅᓱᓇᔭᐱᔅᑯᔨᒋ ᒐᒋ ᐱᒧᑕᑭᓄᐎᔨᒡ ᐱᔅᑎᓂᒐᐅᓇᐱᔅᑯᔪᐤ᙮ ᐊᔨᑐᐤ ᓂᑕᒡ ᐊᓐᑕ ᐛᔅᑲᔅᑲᐃᑭᓂᒡ ᒋᑭ ᒋᑭᒺᐅᒡ᙮ ᐊᐅᑯᐤ ᐅᒡ ᐛᐎᔭᔅᐱᑯᒡ ᐊᓐᑕ ᒐ ᓴᒂᐛᑭᓄᐅᒡ ᒥᔅᑎᑯᐧᑲᓐᒡ ᒐ ᐅᒋ ᐱᒧᑕᑭᓄᐅᒡ ᐱᔅᑎᓂᒐᐅᓇᐱᔅᑯᒡ᙮ 5ᒐ ᐎ ᑎᒧᐅᑥᐤ ᓂᓱ ᒥᔅᑎᑯᐧᑲᓇ ᒐᒋ ᐅᓯᐊᒡ ᐊᑲᓯᔭ ᒥᔅᑎᒂ ᐅᒡ ᑭᔭ ᐎᔄᐅᓱᓇᔭᐤ ᒋᑭ ᐎᔎᔭᒋᓇᐅᒡ᙮ 6ᐎᐎᑎᒥᒡ ᒋᑭ ᐊᔅᑕᐅᒡ ᐱᔅᑎᓂᒐᐅᓇᐱᔅᑯᔪᐤ ᐊᑯᑕᔨᒡ ᐊᑯᐛᑲᐃᑭᓂᔪᐤ ᓂᑲᓄᒡ ᐊᔅᑕᔨᒡ ᐸᔭᒋ-ᒥᐅᑎᔪᐤ ᑭᔭ ᒋᐸᐃᑭᓂᔪᐤ᙮ ᐊᑯᑕ ᐊᓐᑕ ᒐ ᓂᒋᔅᑲᑎᑯᒡ᙮
7ᐊᑯ ᐊᕋᓐ ᒋᑭ ᐎ ᐃᔎᓯᒻ ᑲᐎᒋᒪᑯᓯᔨᒋ ᐊᓐᑕ ᐱᔅᑎᓂᒐᐅᓇᐱᔅᑯᒡ ᐊᓯᑯᒻ ᒋᔭᒋᓴᐸᔭᔨᒋ ᐃᔅᐱ ᐊ ᐃᑐᑐᐛᒋ ᐛᔅᑕᓂᐱᒪᑭᓇ᙮ 8ᑭᔭ ᐛᑕᑯᓯᔨᒋ ᐃᔭᐱᒡ ᒋᑭ ᐃᔎᓯᐊᒻ ᑲᐎᒋᒪᑯᓯᔨᒋ ᐃᔅᐱ ᓴᔅᑲᐛᒋ ᐛᔅᑕᓂᐱᒪᑭᓇ᙮ ᓇᓂᑎᒻ ᒋᑭ ᐎ ᐃᔎᓴᑭᓄᐤ ᒐ ᐃᔅᐱᔅ ᐊᓂᔅᒐ ᐱᒪᑎᓯᓇᓄᐅᒡ᙮ 9ᒐ ᐊᑲ ᐱᔅᑎᓂᒐᔨᓐ ᐊᓐᑕ ᐱᔅᑎᓂᒐᐅᓇᐱᔅᑯᒡ ᐊᑲ ᐸᔭᒋᓇᒂᔨᒋ ᑲᐎᒋᒪᑯᓯᔨᒋ ᑭᔭ ᒪᒃ ᒐᒋ ᒥᑐᔅᑕᐊᒪᔨᓐ ᐎᔭᔅ ᑭᔭ ᒪᒃ ᓂᑕᐅᒋᑕᑭᓐ, ᑭᔭ ᒪᒃ ᒐᒋ ᐳᐅᓂᒥᓐ ᓱᒥᓇᐳᔾ ᐊᓐᑕ ᐱᔅᑎᓂᒐᐅᓇᐱᔅᑯᒡ᙮ 10ᐸᐃᒂᐤ ᐸᐃᒄ ᐱᐳᓇ, ᐊᕋᓐ ᒋᑭ ᐎ ᐸᔭᒋᑕᐤ ᐱᔅᑎᓂᒐᐅᓇᐱᔅᑯᔪᐤ ᐊ ᑐᒥᓂᒺᑦ ᐊᐛᓯᓴ ᐅᒥᔪᐧᑯᔪᐤ ᐊᓐᑕ ᒥᒋᑎᒂ ᐅᑦ ᐊᔅᑭᓂᔨᒡ ᓇᐤ ᐊ ᒋᒐᔭᔨᒡ ᒐᒋ ᐛᐸᔨᑎᒧᐛᑭᓄᐅᒡ ᐃᔪᒡ ᐅᒥᒋᑥᐅᓄᐛᐛ᙮ ᓇᔅᒡ ᒋᑭ ᐎ ᐸᔭᐧᑭᓐ ᐅ ᐱᔅᑎᓂᒐᐅᓇᐱᔅᒄ ᑎᐸᔨᒋᒐᓱᐤ ᐃᔅ᙮”
ᐱᔅᑎᓂᒐᐅᐤ ᓱᓇᔭᐤ
11ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 12“ᐃᔅᐱ ᐊᓐᒡ ᑲᓂᑲᓂᔅᑲᒐᒡ ᑎᐱᒋᒪᑥᐛ ᐃᔅᕋᐃᓪ ᐃᔪᐛ, ᒥᓯᐛ ᑕᑐᐤ ᐊᐛᓐ ᑕᐱᒋᒪᑭᓄᐅᑦ ᓂᑭ ᐎ ᒋᓯᐧᑲᒄ ᒐᒋ ᐱᒪᒋᑕᑭᓄᐎᔨᒡ ᐅᐱᒪᑎᓯᐅᓐ᙮ ᒋᑭ ᐎ ᐃᑐᑎᒧᒡ ᐅᔭ ᒐ ᐊᑲ ᒋ ᐅᑎᑎᑯᒡ ᒐᒂᔪᐤ ᑲ ᑯᔅᑕᑎᑯᓂᔨᒡ ᒪᒂᒡ ᑎᐱᒋᒪᑭᓄᑕᐛ ᐃᔪᒡ᙮ 13ᒥᓯᐛ ᐊᐛᓐ ᐊ ᑎᐱᒋᒪᑭᓄᐅᑦ ᒋᑭ ᐎ ᒋᓯᐧᑲᓱᐤ ᐊᔅᐱᔅ ᓂᑐᐛᑎᒧᐛᑭᓄᐅᑦ ᓱᓇᔭᐱᔅᑯᓴ ᐊ ᐃᓯ ᑎᐸᐸᑲᐃᑭᓄᐎᔨᒋ ᒧᔭᒻ ᐊ ᐱᔅᑎᓂᒧᐅᑦ᙮ 14ᒥᓯᐛ ᓇᐸᐅᒡ ᐊ ᓂᓱᔪᐊᐳᓇᓯᒡ ᑭᔭ ᒪᒃ ᐅᔅᑕ ᓂᑭ ᐎ ᒋᓯᐧᑲᒄ ᐊᔅᐱᔅ ᓂᑐᐛᔨᑕᑯᓂᔨᒡ ᐃᔅᐱ ᑎᐱᒋᒪᑭᓄᑕᐛ ᐃᔪᒡ᙮ 15ᑲ ᐛᔪᑎᓯᑦ ᐊᐛᓐ ᓇᒪ ᒋᑭ ᒥᔅᑎ ᒋᓯᐧᑲᓱᐤ ᑭᔭ ᐊ ᒋᔅᑎᒪᑎᓯᑦ ᐊᐛᓐ ᓇᒪ ᐊᐱᓯᔅ ᒋᑭ ᒋᓯᐧᑲᓱᐤ ᐊᔅᐱᔅ ᓂᑐᐛᔨᑕᑯᓂᔨᒡ ᐃᔅᐱ ᒋᓯᐧᑲᓱᑥᐛ ᒐᒋ ᐱᒪᒋᑕᑭᓄᐎᔨᒋ ᐅᐱᒪᑎᓯᔪᓄᐛᐛ᙮ 16ᒋᑭ ᒪᒧᓴᒋᓂᒧᒡ ᐊᓐᒡ ᑲᓂᑲᓂᔅᑲᒐᒡ ᐅᔭ ᓱᓇᔭᐤ ᐃᔅᕋᐃᓪ ᐃᔪᐛ ᐅᒡ ᑭᔭ ᒐ ᐊᐱᑎᒡ ᐊᓐ ᓱᓇᔭᐤ ᒐᒋ ᐱᒥᐱᔨᒡ ᐸᔭᒋ-ᐱᒍᐎᔭᓂᒋᐛᑉ ᐊᓐᑕ ᐊᑕᔭᓐ᙮ ᐊᐅᑯᔪᐤ ᐅᔭ ᒐᓯᐧᑲᓱᒡ ᐅᐱᒪᑎᓯᐅᓄᐛᐛ ᐅᒡ ᑭᔭ ᓂᑭ ᒋᔅᒋᑎᒺᓐ ᒐᒋ ᒥᔪᑭᓄᐛᔨᒥᒂᐤ᙮”
ᐛᐸᑲᐅᓱᔭᑭᓐ
17ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 18“ᒐ ᐎ ᑎᒧᐅᑥᐤ ᑲ ᑭᔅᒋᑕᒡ ᐊᑐᔅᒐᒡ ᒐᒋ ᐅᓯᑕᒡ ᐊ ᐎᔄᐛᐱᔅᑯᔨᒡ ᐛᐸᑲᐅᓱᔭᑭᓂᔪᐤ ᑭᔭ ᐊ ᐎᔄᐛᐱᔅᑯᔨᒡ ᒐ ᑐᐧᑯᑎᔅᑕᔨᒡ, ᑎᔅᑐᐎᒡ ᐊᓐᑕ ᒋᑭ ᐊᔅᑕᐅᒡ ᐱᔅᑎᓂᒐᐅᓇᐱᔅᑯᒡ ᑭᔭ ᐸᔭᒋ-ᐱᒍᐎᔭᓂᒋᐛᐱᒡ, ᐊᑯ ᒐ ᓴᑭᔅᒋᓇᐱᑕᒡ ᓂᐱᔪᐤ᙮ 19ᐊᕋᓐ ᑭᔭ ᐅᑯᓴ ᒋᑭ ᒋᔅᑕᐸᐅᑕᐅᒡ ᐅᓯᑐᐛᐛ ᑭᔭ ᐅᑎᒋᐛᐛ ᐊᓐᑕ ᐅᒡ᙮ 20ᐊᒺᔭ ᐱᒐᒡ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᐊᒺᔭ ᒥᒋᒪ ᓇᑕᒡ ᐱᔅᑎᓂᒐᐅᓇᐱᔅᑯᔪᐤ ᒐᒋ ᒥᑐᔅᑕᐊᒧᐛᒡ ᑎᐸᔨᒋᒐᓱᐛ᙮ ᐃᑐᑕᒂᐛ ᐅᔭ, ᐊᑯ ᓇᒪ ᒋᑭ ᐳᓂᐱᒪᑎᓯᐅᒡ ᐊ ᐊᑲ ᐱᓯᒋᑕᒡ ᑲ ᐃᑎᓱᒥᒂᐤ᙮ 21ᓇᓂᑎᒻ ᒋᑭ ᐎ ᒋᔅᑕᐸᐅᑕᐅᒡ ᐅᑎᒋᔨᐛᐛ ᑭᔭ ᐅᓯᑐᐛᐛ ᒐ ᐊᑲ ᐳᓂᐱᒪᑎᓯᒡ᙮ ᓇᓂᑎᒻ ᐅᔭ ᒋᑭ ᐎ ᓇᓴᐊᒧᒡ ᐎᓱᐛᐅᓂᔪᐤ ᑭᔭ ᓂᔭᐸᐎᒋ ᐅᑦ ᐊᓂᔅᑯᑕᐸᓄᐛᐛ ᒐ ᐸᒋ ᑕᔨᒋ᙮”
ᑐᒥᓂᒐᐅ-ᐱᒥᔾ
22ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, 23“ᒐ ᐎᑎᒧᐅᑥᐤ ᑲ ᑭᔅᒋᑕᒡ ᐊᑐᔅᒐᒡ ᒐᒋ ᒪᒧᓴᒋᓇᒡ ᓂᐱᓯᔭ ᑲ ᐎᒋᒪᑯᓂᔨᒋ: ᓂᓴᑉ ᑎᐸᐸᑲᐃᑭᓇ ᑲ ᐎᒋᒪᑯᓯᔨᒋ ᑐᒥᓂᑭᓇ ᑭᔭ ᐊᓱᑕᒡ ᑎᐸᐸᑲᐃᑭᓇ ᑲ ᐎᒋᒪᓱᔨᒋ ᐱᒍᐛ᙮ 24ᑭᔭ ᓂᓴᑉ ᑎᐸᐸᐃᑭᓇ ᑲᓯᐊ ᒥᔅᑎᒃ ᐎᒐᔎ ᑯᐃᔅᒄ ᐊ ᐃᓯ ᑎᐸᐸᑲᐃᒐᓄᐎᒡ, ᒋᑭ ᒪᒧᐱᑕᐅᒡ ᐅᔭ ᒐᒋ ᐅᓯᐊᒡ ᔭᓇᐤ ᑕᑐᔭᑭᓇ ᐱᒥᔭ᙮ 25ᒐᒋ ᐊᐱᒋᐊᑭᓄᐅᑦ ᐸᔭᒋ ᑐᒥᓂᒐᐅ-ᐱᒥᔾ ᒐ ᑐᒥᓂᑐᓇᓄᐅᒡ᙮ 26ᐊᐅᑯᐤ ᒐ ᐊᐱᒋᐃᑦ ᐅ ᐱᒥᔾ ᒐᒋ ᑐᒥᓂᒥᓐ ᐸᔭᒋ-ᐱᒍᐎᔭᓂᒋᐛᑉ ᑭᔭ ᐸᔭᒋ-ᒥᐅᑦ, 27ᑭᔭ ᒥᒋᓱᐛᑭᓇᑎᒄ ᑭᔭ ᒥᓯᐛ ᐊ ᐃᑕᐱᑎᒡ ᒥᒋᓱᐛᑭᓇᑎᑯᒡ, ᐛᔅᑕᓂᐱᒪᑭᓇᔅᒄ ᑭᔭ ᒥᓯᐛ ᒐᒂᓐ ᐃᔭᐱᒋᑕᑭᓄᐅᒡ ᐊ ᐃᑐᑕᑭᓄᐅᒡ ᐛᔅᑕᓂᐱᒪᑭᓇᔅᒄ, ᑭᔭ ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᐃᔎᓴᑭᓄᐅᒋ ᑲᐎᒋᒪᑯᓯᔨᒋ᙮ 28ᑭᔭ ᐱᔅᑎᓂᒐᐅᓇᐱᔅᒄ ᐊᓐᑕ ᐊ ᒥᑐᔅᑕᐊᒪᒐᓄᐅᒡ ᑭᔭ ᒥᓯᐛ ᐊᓐᑕ ᒐᒂᓐ ᐊ ᐃᑕᐱᑎᒡ, ᐛᐸᑲᐎᓱᔭᑭᓐ ᑭᔭ ᐊᓐᑕ ᑎᔭᐧᑯᑎᔅᑕᒡ᙮ 29ᒐ ᐸᔭᒋᑕᔨᓐ ᐅᔭ ᒐᒂᔪᐛ ᑎᐸᔨᒋᒐᓱᐤ ᐃᔅ, ᐊᑯ ᒋᒋᐛ ᒐ ᐸᔭᐧᑲᒋ ᑭᔭ ᒥᒄ ᒐᒂᓐ ᑕᔭᒋᑎᒡ ᐊᓐᑕ ᒋᑭ ᐸᔭᐧᑭᓐ᙮”
30“ᐊᑯ ᒐ ᑐᒥᓂᑥᐤ ᐊᕋᓐ ᑭᔭ ᐅᑯᓴ ᑭᔭ ᒐ ᐅᓯᔨᑥᐤ ᒐᒋ ᐊᔭᒥᐊᐅᒋᒪᐅᒡ ᒐᒋ ᐊᑐᔅᑯᐅᒡ᙮ 31ᒐ ᐃᑎᑥᐤ ᐃᔅᕋᐃᓪ ᐃᔪᒡ, ‘ᐅ ᐱᒥᔾ ᐊᐅᑯᐤ ᓂᐸᔭᒋ-ᑐᒥᓂᒐᐅ-ᐱᒥᒻ ᐊᓐ ᒐ ᐊᐱᒐᑭᓄᐅᑦ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ᙮ 32ᒐ ᐊᑲ ᐳᓂᒧᐅᑥᐤ ᐊᓐᒡ ᐃᔪᒡ ᐊᑲ ᐊᔭᒥᐊᐅᒋᒪᐅᒡ᙮ ᑭᔭ ᒐ ᐊᑲ ᐸᐃᑯᑕᐤ ᐃᓯ ᐅᓯᐊᑦ ᐅ ᐱᒥᔾ, ᐸᔭᒋᓯᐤ ᐅ ᐱᒥᔾ ᑭᔭ ᐊ ᐸᔭᒋᓯᑦ ᒋᑭ ᐎ ᐃᓯ ᐅᑎᓇᐤ᙮ 33ᐅᓯᐊᒐ ᐊᐛᓐ ᑯᑎᒂ ᐱᒥᔭ ᒧᔭᒻ ᑐᒥᓂᒐᐅ-ᐱᒥᔭ ᑭᔭ ᒪᒃ ᐳᓂᒧᐛᒐ ᐊᐛᔪᐛ ᐊᑲ ᐊᔭᒥᐊᒋᒪᐅᐎᔨᒋ ᓇᒪ ᓂᑭ ᒋ ᐃᓯ ᐅᑎᓇᐤ ᒧᔭᒻ ᓂᑦ ᐃᔨᒻ᙮’ ”
ᑲᐎᒋᒪᑯᓯᒋ
34ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᐎᑎᒧᐅᑥᐤ ᑲ ᑭᔅᒋᑕᒡ ᐊᑐᔅᒐᒡ ᒐᒋ ᐅᑎᓇᒡ ᓂᔅᑐ ᐸᐃᑯᑕᐤ ᐊᔅᐱᓴᔨᒋ ᑲ ᐎᒋᒪᑯᓯᔨᒋ᙮ 35ᐊᐅᑯᐤ ᐅᔭ ᒐ ᐊᐱᒋᑕᒡ ᐊ ᐅᓯᑕᒡ ᑲᐎᒋᒪᑯᓯᔨᒋ ᐊ ᒪᒧᐱᑕᒡ ᒧᔭᒻ ᑲᐎᒋᒪᑯᓂᒡ, ᒋᑭ ᐊᔅᑕᐅᒡ ᓯᐅᑕᑭᓂᔪᐤ ᒐᒋ ᐸᔭᒋᓯᒥᑭᓂᔨᒡ᙮ 36ᒋᑭ ᑎᒂᐊᒧᒡ ᐱᔅᒐ ᒐᒋ ᐱᓂᐱᔨᒡ ᑭᔭ ᒐ ᐊᑎ ᐱᓂᐱᔨᑕᔨᓐ ᐊᓐᑕ ᓂᑲᓐ ᑲ ᐸᔭᒋᓇᒂᒡ ᒥᐅᑎᒡ ᐊ ᐸᔭᐧᑲᒡ ᒋᑭ ᐎ ᐃᓯ ᐅᑎᓇᓐ᙮ 37ᓇᒪ ᒋᑭ ᐅᓯᑎᒪᓱᐤ ᐊᐛᓐ ᑯᑎᒋᔪᐤ ᑲᐎᒋᒪᑯᓯᔨᒡ ᒧᔭᒻ ᐊ ᐃᓯ ᐅᓯᑕᑭᓄᐎᒡ, ᐊ ᐸᔭᐧᑲᒡ ᑎᐸᔨᒋᒐᓱᐤ ᐃᔅ ᒋᑭ ᐎ ᐃᓯ ᐅᑎᓇᓐ᙮ 38ᐅᓯᑎᒪᓱᒐ ᐅᔭ ᐊᐛᓐ ᒧᔭᒻ ᑲᐎᒋᒪᑯᓯᔨᒡ, ᓇᒪ ᓂᑭ ᒋ ᐃᓯ ᐅᑎᓇᐤ ᒧᔭᒻ ᓂᑦ ᐃᔨᒻ᙮”
Currently Selected:
ᐊᒃᓱᑕᔅ 30: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
