ᐊᒃᓱᑕᔅ 29
29
ᒐ ᐃᑎᓇᓄᐅᒡ ᐊ ᐅᓯᐊᑭᓄᐅᒡ ᐊᔭᒥᐊᐅᒋᒪᐅᒡ
1ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᐊᐅᑯᐤ ᒐ ᐃᑐᑐᐅᑥᐤ ᐅᓯᔨᑥᐛ ᐊᕋᓐ ᑭᔭ ᐅᑯᓴ ᒐᒋ ᐊᔭᒥᐊᐅᒋᒪᐅᒡ, ᒐ ᐅᑎᓂᑥᐤ ᐊᑲ ᓇᔅᒡ ᒐᒂᓐ ᐃᓯᓇᑯᓯᒡ ᐊᐛᓯᓯᒡ: ᐸᐃᒄ ᓇᐸ ᒥᔅᑐᔅ ᑭᔭ ᓂᓱ ᓇᐸ ᒪᔭᑕᓂᓯᒡ᙮ 2ᒐ ᐅᑎᓂᑥᐤ ᐊ ᒥᔪᓯᒡ ᔪᔎᐛᓂᒡ ᐊ ᐊᑲ ᓯᐅᔅᑎᒪᑭᓄᐅᒡ ᑭᔭ ᒐ ᐱᒥᓄᐛᔨᓐ ᐸᒂᓯᑭᓐᒡ: ᐱᒥᔾ ᐊ ᐊᐱᒋᑕᔨᓐ, ᐱᔅᒐ ᐸᒂᓯᑭᓐᒡ ᐊ ᐊᑲ ᐊᐱᒋᑕᔨᓐ ᐱᒥᔾ, ᑭᔭ ᒐ ᑐᑐᐅᑥᐤ ᒂᔨᐧᑯᓇᐅᒡ ᐱᒥᔪᐤ ᐊᓱᓯᓂᑥᐤ᙮ 3ᒐ ᐱᑕᐛᑯᒡ ᐸᒂᓯᑭᓐᒡ ᐊᓐᑕ ᐅᑎᐱᐅᑎᒡ ᑭᔭ ᒐ ᐱᔅᑎᓂᒧᐅᔭᒄ ᒪᒂᒡ ᒥᑐᔅᑕᐊᒪᒐᔭᒂ ᓇᐸ ᒥᔅᑐᔅ ᑭᔭ ᓂᓱ ᓇᐸ ᒪᔭᑕᓂᓯᒡ᙮ 4ᒐ ᐸᓱᐛᑯᒡ ᐊᕋᓐ ᑭᔭ ᐅᑯᓴ ᐊᓐᑕ ᐛᒋ ᐱᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ ᑭᔭ ᒐ ᒋᔅᑕᐸᐎᑥᐤ᙮ 5ᐊᑯ ᒐ ᒋᑭᒧᑎᔨᑦ ᐊᕋᓐ ᐊᔭᒥᐊᐤ ᐊᐱᒋᑕᐅᓇ: ᐊᑯᐱᔪᐤ, ᐊᔭᒥᐊᐤ ᐊᑯᐱᔪᐤ ᑕᒥᒡ ᐊᔅᐱᒋᑯᓇᐅᓂᒡ ᒐ ᒋᔅᑲᐧᒃ, ᐊᔅᐱᒋᑯᓇᐅᓂᔪᐤ, ᐱᑕᓱᐅᓂᔪᐤ, ᑭᔭ ᐱᒂᑕᐅᓂᔪᐤ᙮ 6ᒐ ᒋᑭᒧᑕᑎᔨᑦ ᑕᐱᔅᑲᑭᓂᔪᐤ ᑭᔭ ᒐ ᒪᑯᐱᑎᒧᑦ ᐊᓴᑯᐛᔨᒡ ᐎᔄᐅᓱᓇᔭᐱᔅᑯᔪᐤ ᐊᓐᑕ ᒪᓯᓇᑕᔨᒡ ‘ᐊ ᐸᔭᒋᓯᑦ ᑎᐸᔨᒋᒐᓱᐛ ᐃᔅ,’ ᐊᑎᔅᑕᔨᒡ᙮ 7ᐊᑯ ᒐ ᐅᑎᓂᑦ ᐊᓐ ᑐᒥᓂᒐᐅ-ᐱᒥᔾ ᐊᑯ ᒐ ᑯᑎᐱᓂᒧᐅᑦ ᐅᔅᑎᒂᓂᒡ ᒐᒋ ᐅᓯᐃᑦ ᒐᒋ ᐊᔭᒥᐊᐅᒋᒪᐅᑦ᙮ 8ᐊᑯ ᒐ ᐸᓱᒥᑎ ᐅᑯᓴ ᑭᔭ ᒐ ᒋᑭᒧᑕᑎᔨᒥᑎᔾ ᐊᑯᐸ᙮ 9ᒐ ᒋᑭᒧᑕᑎᔨᒥᑎᔾ ᐱᒂᑕᐅᓇ ᑭᔭ ᒐ ᒪᑯᐱᑎᒧᑦ ᐊᑯᓂᔎᐅᓇ ᐅᔅᑎᒂᓄᐛᒡ᙮ ᐊᐅᑯᓐ ᒐ ᐎ ᐃᑐᑎᒥᓐ ᐊ ᐅᓯᔨᑥᐤ ᐊᕋᓐ ᑭᔭ ᐅᑯᓴ᙮ ᐎᔨᐛᐤ ᑭᔭ ᒥᓯᐛ ᐊ ᓇᐸᐎᒋ ᐅᑦ ᐊᓂᔅᑯᑕᐸᓄᐛᐛ ᓂᑭ ᐊᑐᔅᑲᑯᒡ ᒧᔅ ᑲᒋᒡ ᐊᔭᒥᐊᐅᒋᒪᐅᒡ᙮
10ᐊᑯ ᒐ ᐸᓱᐅᑦ ᓇᐸ ᒥᔅᑐᔅ ᐊᓐᑕ ᐛᒋ ᐱᒐᓄᐅᒡ ᐸᔭᒋ-ᐱᒍᐎᔭᓂᒋᐛᐱᒡ ᑭᔭ ᒐ ᐃᑎᑥᐤ ᐊᕋᓐ ᑭᔭ ᐅᑯᓴ ᒐᒋ ᐊᔅᑕᒡ ᐅᑎᒋᐛᐛ ᐊᓐᑕ ᐅᔅᑎᒂᓂᔨᒡ᙮ 11ᒪᒂᒡ ᐊᓂᔭ ᐃᑎᑥᐛ, ᐊᑯ ᒐ ᓂᐸᐃᑦ ᐊᓐ ᓇᐸ ᒥᔅᑐᔅ ᐊ ᒋᒥᑯᔪᐛᓯᑦ ᑭᔭ ᓱᐸᐳᔭᑭᓂᒡ ᒐ ᓯᑯᐸᒋᐱᔨᑕᐅᑦ ᐅᒥᐧᒄ᙮ 12ᐊᑯ ᒐ ᑯᑕᔨᓐ ᒋᑐᐛᑭᓐ ᐊᓐᑕ ᓇᐸ ᒥᔅᑐᔅ ᐅᒥᐧᑯᒡ ᑭᔭ ᒐ ᐊᓯᐳᑎᒥᓐ ᐊᓐᑕ ᐊ ᓇᐅᒡ ᐊᔅᑭᓐᒡ ᐊᓐᑕ ᐊ ᒋᒐᔭᒋ ᐱᔅᑎᓂᒐᐅᓇᐱᔅᑯᒡ᙮ ᐊᑯ ᒐ ᑯᑎᐱᓂᒥᓐ ᐊᔅᑯᐱᔨᒡ ᒥᐧᒄ ᐊᓐᑕ ᒋᑲᔅᒄ ᐱᔅᑎᓂᒐᐅᓇᐱᔅᑯᒡ᙮ 13ᒐ ᒥᓂᓯᒥᓐ ᒥᓯᐛ ᐊᓂᔭ ᐊ ᐎᔪᐅᑦ ᐊᐛᓯᔅ ᐊᓯᒡ ᐅᔅᑯᓇ ᑭᔭ ᐅᑕᑕᐧᑯᓱᐛ ᐊ ᐎᔪᐎᒋ ᑭᔭ ᒐ ᐃᔎᓱᒥᓐ ᐊᓐᑕ ᐱᔅᑎᓂᒐᐅᓇᐱᔅᑯᒡ ᒧᔭᒻ ᐊ ᐱᔅᑎᓂᒧᐎᓐ᙮ 14ᒥᒄ ᐊᓂᔭ ᐅᐎᔭᓯᒻ ᓇᐸ ᒥᔅᑐᔅ ᑭᔭ ᐊᓂᔭ ᓇᐸ ᒥᔅᑐᓱᔭᓐ ᑭᔭ ᐅᑎᒋᓯᔭ ᐎᐎᑎᒥᒡ ᐊᓐᑕ ᐊ ᐎᒋᓇᓄᒡ ᒋᑭ ᐃᔎᓴᑭᓂᔪᐛ᙮ ᐊᐅᑯᓐ ᐊᓐ ᐱᔅᑎᓂᒐᐅᓐ ᒐ ᐛᐸᔨᑎᒧᐛᑭᓄᐅᒡ ᐅᒥᒋᑥᐅᓄᐛᐛ ᐊᓐᒡ ᐊᔭᒥᐊᐅᒋᒪᐅᒡ᙮
15ᐊᑯ ᒐ ᐅᑎᓂᑦ ᐸᐃᒄ ᓇᐸ ᒪᔭᑕᓂᔅ ᑭᔭ ᒐ ᐎᑎᒧᐅᑥᐤ ᐊᕋᓐ ᑭᔭ ᐅᑯᓴ ᒐᒋ ᑕᐧᑯᑎᔅᑕᒡ ᐅᑎᒋᔨᐛᐛ ᐊᓐᑕ ᐅᔅᑎᒂᓂᔨᒡ᙮ 16ᒐ ᐊᑎ ᓂᐸᐃᑦ ᓇᐸ ᒪᔭᑕᓂᔅ ᑭᔭ ᒐ ᐅᑎᒧᑦ ᐅᒥᐧᒄ ᑭᔭ ᒐ ᐊᑎ ᐅᔄᐸᒋᐱᔨᑕᐅᑦ ᒥᓯᐛ ᓇᐎᒡ ᐅᐱᒪ ᐃᑕᒐ ᐱᔅᑎᓂᒐᐅᓇᐱᔅᑯᒡ᙮ 17ᐊᑯ ᒐ ᐱᐱᑯᓱᑦ ᐊᓐ ᓇᐸ ᒪᔭᑕᓂᔅ, ᒐᔅᑕᐳᑕᐅᑦ ᐅᑎᒋᓯᔭ ᑭᔭ ᐅᔅᑲᑕ ᐊᑯ ᒐ ᑕᐧᑯᑎᔅᑕᔨᓐ ᐊᓐᑕ ᓇᐸ ᒪᔭᑕᓂᔅ ᐅᔅᑎᒂᓂᒡ᙮ 18ᒐ ᐃᔎᓱᑦ ᒥᓯᐛ ᓇᐸ ᒪᔭᑕᓂᔅ ᐊᓐᑕ ᐱᔅᑎᓂᒐᐅᓇᐱᔅᑯᒡ ᒧᔭᒻ ᒥᒋᒻ ᐱᔅᑎᓂᒐᐅᓐ᙮ ᓂ ᓇᐊᔨᑎᒥᔨᑯᓐ ᐊᓐ ᐊ ᒥᔭᒂᒡ ᐱᔅᑎᓂᒐᐅᓐ᙮
19ᒐ ᐅᑎᓂᑦ ᑯᑎᒃ ᓇᐸ ᒪᔭᑕᓂᔅ ᐊᓐ ᒐ ᐊᐱᒋᐊᑭᓄᐅᑦ ᐅᓯᐊᑭᓄᐅᒐ ᐊᔭᒥᐊᐅᒋᒪᐤ ᑭᔭ ᒐ ᐎᑎᒧᐅᑥᐤ ᐊᕋᓐ ᑭᔭ ᐅᑯᓴ ᒐ ᑕᐧᑯᑎᔅᑕᒡ ᐅᑎᒋᔨᐛᐛ ᐊᓐᑕ ᓇᐸ ᒪᔭᑕᓂᓴ ᐅᔅᑎᒂᓂᔨᒡ᙮ 20ᐊᑯ ᒐ ᓂᐸᐃᑦ ᐊᓐ ᓇᐸ ᒪᔭᑕᓂᔅ, ᒐ ᐊᑎ ᐅᑎᓂᒧᑦ ᐊᓂᔭ ᐅᒥᐧᒄ ᒐ ᐊᑎ ᓱᐳᓂᒧᑦ ᐊᓐᑕ ᐊᓇᒡ ᐅᒥᔪᓄᐛᒡ ᐎᑐᑲᐛᒡ ᐊᕋᓐ ᑭᔭ ᐅᑯᓴ ᑭᔭ ᐊᓐᑕ ᒥᔪᓂᒡ ᐅᑐᐛᑭᓄᐛᒡ ᑭᔭ ᐅᓯᑯᑕᒧᐛᒡ᙮ ᒐ ᐊᑎ ᐅᔄᐸᒋᐱᔨᑕᔨᓐ ᒥᓯᐛ ᓇᐎᒡ ᐅᐱᒪ ᐃᑕᒐ ᐱᔅᑎᓂᒐᐅᓇᐱᔅᑯᒡ ᐊᔅᑯᐱᔨᒡ ᒥᐧᒄ᙮ 21ᐊᑯ ᒐ ᐊᑎ ᐅᑎᓂᒥᓐ ᐱᔅᒐ ᒥᐧᒄ ᐊᓐᑕ ᐱᔅᑎᓂᒐᐅᓇᐱᔅᑯᒡ ᐅᒡ ᑭᔭ ᑐᒥᓂᒐᐅ-ᐱᒥᔾ ᐊᑯ ᒐ ᐱᓂᐱᔨᑐᐅᑥᐤ ᐊᕈᓐ ᑭᔭ ᐅᑯᓴ ᑭᔭ ᐊᓐᑕ ᐅᑦ ᐊᐱᒋᑕᐅᓄᐛᒡ᙮ ᐊᑯ ᒐ ᐸᔭᒋᓯᒡ ᐊᕈᓐ ᑭᔭ ᐅᑯᓴ ᑭᔭ ᐅᑦ ᐊᐱᒋᑕᐅᓄᐛᐛ ᑎᐸᔨᒋᒐᓱᐛ ᐃᔅ᙮
22ᒐ ᒥᓂᓯᒧᑦ ᐊ ᐎᔪᐅᑦ ᓇᐸ ᒪᔭᑕᓂᔅ ᑭᔭ ᐊ ᐎᔪᐎᔨᒡ ᐅᓱᔾ ᑭᔭ ᐊ ᐎᔪᐅᑦ ᑕᒥᔪᐤ ᐊᓯᒡ ᐊ ᒥᔽᔨᒡ ᐅᔅᑯᓐ ᑭᔭ ᐅᑕᑕᐧᑯᓱᐛ ᐊ ᐎᔪᐎᒋ ᑭᔭ ᒥᔪᓂᒡ ᐅᑈᒪᐅᒄ᙮ 23ᒐ ᐅᑎᓂᑦ ᐃᔭᐱᒡ ᐊᑲ ᐅᐱᓱᑦ ᐸᒂᓯᑭᓐ ᐅᑎᐱᐅᑎᒡ ᐅᒡ ᐊᓐ ᑲ ᐱᔅᑎᓂᒪᑯᐎᔭᓐ, ᒐ ᐅᑎᓂᑥᐤ ᐸᐸᐃᒄ ᐊᓐ ᑕᑐᐎᒡ ᐊ ᐃᓯᓇᑯᓯᒡ ᐸᒂᓯᑭᓐᒡ, ᐸᐃᒄ ᐸᒂᓯᑭᓐ ᐱᒥᒡ ᐊ ᐅᒋ ᐅᓯᐊᑭᓄᐅᑦ ᑭᔭ ᐸᐃᒄ ᐊᑲ ᐱᒥᒡ ᐅᒋ ᐅᓯᐊᑭᓄᐅᑦ ᑭᔭ ᐊ ᐊᑲ ᐅᐱᓱᑦ ᐸᒂᓯᑭᓐ ᑭᔭ ᐸᐃᒄ ᒂᔨᐧᑯᓇᐤ᙮ 24ᒥᓯᐛ ᒐᒂᓂᔪᐤ ᒐ ᐱᔅᑎᓂᒧᑦ ᐊᕋᓐ ᑭᔭ ᐅᑯᓴ ᐅᑎᒋᐛᒡ ᐊᑯ ᒐ ᐎᑎᒧᐅᑥᐤ ᒐᒋ ᓂᒥᓇᒡ ᐊᓂᔭ ᒐᒂᔪᐛ ᒋᒋᒋᓯᑯᒡ ᐃᔅ ᒐᒋ ᐱᔅᑎᓂᒧᐅᒡ ᒧᔭᒻ ᐊ ᒋᔅᑕᔨᑯᓂᔨᒡ ᒥᔨᐛᐅᓂᔪᐤ᙮ 25ᒋ ᑐᑕᐧᑲᐛ ᐅᔭ ᐊᑯ ᒐ ᐅᑎᓂᒧᑦ ᑭᔭ ᒐ ᐊᑎ ᑕᐧᑯᑎᔅᑕᔨᓐ ᐊᓐᑕ ᐱᔅᑎᓂᒐᐅᓇᐱᔅᑯᒡ, ᑕᐧᑯᒡ ᐊᓐᑕ ᑲ ᒥᑐᔅᑕᐊᒪᒐᓄᒋ ᒐᒂᔪᐛ᙮ ᐊᐅᑯᓐ ᐃᔭᐱᒡ ᒐ ᐱᔅᑎᓂᒪᑯᐅᔭᓐ ᑭᔭ ᓂᑭ ᓇᐊᔨᑎᒥᔨᑯᓐ ᐊᓐ ᐊ ᒥᔭᒂᒡ᙮ 26ᐊᑯ ᒐ ᐅᑎᓂᒧᑦ ᓇᐸ ᒪᔭᑕᓂᔅ ᐅᔅᐱᒐᑭᓇ ᐊᓐ ᓂᓱ ᑲ ᓂᐸᐊᑭᓄᐅᑦ ᓇᐸ ᒪᔭᑕᓂᔅ ᐊᑯ ᒐ ᐃᑎᓂᒥᓐ ᐊᓐᑕ ᒋᒋᒋᓯᑯᒡ ᐃᔅ ᒧᔭᒻ ᐊ ᐱᔅᑎᓂᒧᐎᔨᓐ᙮ ᐊᐅᑯᓐ ᒐ ᑎᐸᔨᑎᒥᓐ ᒐᒋ ᒥᒋᔨᓐ᙮
27ᐊᑯ ᒐ ᐅᑎᓂᒥᓐ ᐎᔭᔅ ᐊᓐᑕ ᐅᔅᐱᒐᑭᓂᒡ, ᑭᔭ ᑯᑎᒡ ᐅᑈᒪᐅᒄ ᐊᓐᑕ ᐅᔅᑭᒡ ᑲ ᓂᐸᐊᑭᓄᑦ ᓇᐸ ᒪᔭᑕᓂᔅ ᑲ ᐊᐱᒋᐊᑭᓄᐅᑦ ᑲ ᐅᓯᐊᑭᓄᐅᒡ ᐊᔭᒥᐊᐅᒋᒪᐅᒡ ᑭᔭ ᐊᓂᔭ ᑯᑎᒃ ᓇᐸ ᒪᔭᑕᓂᔅ ᐅᔅᐱᒐᑭᓇ ᒋᒋᒋᓯᑯᒡ ᐃᔅ ᑲ ᐃᑎᓂᒥᓐ ᒧᔭᒻ ᐊ ᐱᔅᑎᓂᒧᐎᔨᓐ ᑭᔭ ᒐ ᑎᐸᓂᔅᑎᒧᐅᑥᐤ ᐊᕋᓐ ᑭᔭ ᐅᑯᓴ ᒐᒋ ᒥᒋᒡ ᐊᓂᔭ ᐎᔭᓯᔪᐤ ᐊᓐᑕ ᐅᔅᐱᒐᑭᓂᒡ ᑭᔭ ᐅᑈᒪᐅᑯᔪᐤ ᐅᒡ᙮ 28ᓂᑲᓄᒡ ᐊᓐᑕ ᐃᔅᐱ ᐊᐛᓐ ᐃᔅᕋᐃᓕᒡ ᐅᒡ ᐱᔅᑎᓂᒐᒐ ᐅᔅᐱᒐᑭᓇ ᑭᔭ ᐅᑈᒪᐅᑯᔪᐤ ᒐᒋ ᐅᓯᐊᑭᓄᐎᒋ ᐊᔭᒥᐊᐅᒋᒪᐛ ᑭᔭ ᒪᒃ ᓂᑐᐛᔨᑕᒐ ᓂᓱᐛᔨᒋᒐᐅᓂᔪᐤ, ᓂᔾ ᐊᓐ ᓂᑭ ᑎᐱᔨᐛᐅᓯᓐ ᐎᔭᔅ, ᒥᒄ ᒋᑭ ᒋ ᒥᒍᐅᒡ ᐊᓂᔭ ᐊᔭᒥᐊᐅᒋᒪᐅᒡ᙮ ᓇᒪ ᓂᑕ ᒋᑭ ᒥᔅᑯᒋᐱᔪᐤ ᐅ ᐃᑎᓱᐛᐅᓐ᙮
29ᐊᑯ ᐳᓂᐱᒪᑎᓯᒐ ᐊᕋᓐ, ᐊᓂᔭ ᐊᔭᒥᐊᐅ-ᐊᐱᒋᑕᐅᓇ ᑲᒋ ᒋᔅᑲᐧᒃ, ᐅᑯᓴ ᒋᑭ ᑎᐸᔨᑎᒥᔨᐛ᙮ ᒋᑭ ᐎ ᐳᔅᑭᒥᔨᐛ ᐃᔅᐱ ᐅᓯᐊᑭᓄᐎᒐᓂ ᒐᒋ ᐊᔭᒥᐊᐅᒋᒪᐎᒋ᙮ 30ᐊᓂᔭ ᒐ ᐅᔅᑕᔅᑯᑦ ᐊᕋᓐ ᐅᑯᓴ ᐊᔭᒥᐊᐅᒋᒪᐎᒋ ᐱᒐᔨᒐᓂ ᐸᔭᒋ ᐱᒍᐎᔭᓂᒋᐛᐱᔪᐤ ᑭᔭ ᐃᑐᑎᒥᔨᒐ ᐅᑦ ᐊᔭᒥᐊᐤ ᐊᑐᔅᒐᐅᓂᔪᐤ ᐊᓐᑕ ᑲ ᐸᔭᐧᑭᓂᔨᒡ, ᒋᑭ ᐎ ᐃᑕᐤ ᐊᓐᑕ ᐸᔭᒋ ᐱᒍᐎᔭᓂᒋᐛᐱᒡ, ᐊ ᒋᔅᑲᐧᒃ ᐊᔭᒥᐊᐅ-ᐊᐱᒋᑕᐅᓇ, ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ᙮
31ᒐ ᐅᑎᓂᒧᑦ ᐅᐎᔭᔅ ᓇᐸ ᒪᔭᑕᓂᔅ ᐊᓐ ᑲ ᒥᑐᔅᑕᐊᒪᒐᓄᐅᒡ ᐊ ᐅᓯᐊᑭᓄᐅᒡ ᒐᒋ ᐊᔭᒥᐊᐅᒋᒪᐅᒡ ᐊᕈᓐ ᑭᔭ ᐅᑯᓴ ᑭᔭ ᒐ ᐅᓯᒥᓐ ᐊᓐᑕ ᐊᑐᐛᒡ ᐃᑕᐅᓂᒡ᙮ 32ᐊᑯ ᒋ ᑎᑭᔅᑕᔨᒐ, ᐊᕋᓐ ᑭᔭ ᐅᑯᓴ ᒪᒧᐤ ᒋᑭ ᒥᒍᐅᒡ ᐊᓯᒡ ᐸᒂᓯᑭᓇ ᑲ ᐃᔅᑯᐱᔨᒋ ᐅᑎᐱᔪᑎᒡ ᐊᓐᑕ ᒥᒋᒪ ᐛᒋ ᐱᔨᒐᓄᐎᒡ ᐸᔭᒋ ᐱᒍᐎᔭᓂᒋᐛᐱᒡ᙮ 33ᒋᑭ ᐎ ᒥᒍᐅᒡ ᐊᓂᔭ ᓇᐸ ᒪᔭᑕᓂᓴ ᐅᐎᔭᓯᔪᐤ ᑲ ᒥᑐᔅᑕᐊᒪᒐᓄᐎᔨᒋ ᒐᒋ ᐛᐸᔨᑎᒧᐛᑭᓄᐅᒡ ᐅᒥᒋᑥᐅᓄᐛᐛ ᐃᔅᐱ ᑲ ᐱᔅᑎᓇᑭᓄᐅᒡ ᒐᒋ ᑐᑕᒡ ᐅᔭ ᐊᑐᔅᒐᐅᐱᔪᐤ᙮ ᐎᔪᐛᐤ ᒥᒄ ᒥᔭᑭᓄᐅᒡ ᒐᒋ ᒥᒋᒡ ᐅᔭ ᐎᔭᓯᔪᐤ᙮ ᓇᒪ ᓇᐊᔨᒪᑭᓄᐅᒡ ᒐᒋ ᒥᒋᒡ ᐊᓐᒡ ᐊᑲ ᐊᔭᒥᐊᐅᒋᒪᐅᒡ ᐛᔅ ᐸᔭᒋᓯᒥᑭᓇ ᐊᓂᔭᔪᐛ᙮ 34ᐊᑯ ᐃᔅᑯᐱᔨᒐ ᐊᓐ ᐸᔭᒋ ᒥᒋᒻ ᒐᒋᓴᐸᔭᒐ ᒋᑭ ᐎ ᐃᔎᓴᑭᓄᐤ᙮ ᓇᒪ ᒋᑭ ᒋ ᒥᒋᓇᓄᐤ ᐊᓐ ᒥᒋᒻ ᐛᔅ ᐸᔭᒋᓯᒥᑭᓇ ᐊᓂᔭᔪᐛ᙮
35ᓂᔄᐅᑕᒡ ᑕᑐᐤ ᒋᓯᑲᐛ ᒋᑭ ᐃᔅᐱᔅ ᑕᓄᐤ ᐊ ᐅᓯᐊᑭᓄᐅᒡ ᒐᒋ ᐊᔭᒥᐊᐅᒋᒪᐅᒡ ᐊᕋᓐ ᑭᔭ ᐅᑯᓴ ᒧᔭᒻ ᑲ ᐃᑎᓱᒥᑕᓐ᙮ 36ᐊᓯᑯᒻ ᒋᓯᑲᐛ ᒋᑭ ᐎ ᒥᑐᔅᑕᐊᒧᐅᓐ ᓇᐸ ᒥᔅᑐᔅ ᒐᒋ ᐅᒋ ᐛᐸᔨᑎᒪᒐᔭᓐ ᒥᒋᑥᐅᓇ᙮ ᐃᔭᐱᒡ ᑯᑎᒃ ᒋᑭ ᐎ ᒥᑐᔅᑕᐊᒧᐅᓐ ᒐᒋ ᐅᒋ ᐸᔭᒋᓇᒂᒡ ᐱᔅᑎᓂᒐᐅᓇᐱᔅᒄ᙮ ᐃᔭᐱᒡ ᒋᑭ ᐎ ᑐᒥᓇᓐ ᐱᔅᑎᓂᒐᐅᓇᐱᔅᒄ ᐅᓕᑉ ᐱᒥᔾ ᐅᒋ ᒥᓯᐛ ᒐᒋ ᐸᔭᐧᑲᒡ᙮ 37ᓂᔄᐅᑕᒡ ᑕᑐᐤ ᒋᓯᑲᐛ ᐃᔅᐱᔅ ᒋᑭ ᑐᑕᓐ ᐊᑯ ᐊᓐ ᐱᔅᑎᓂᒐᐅᓇᐱᔅᒄ ᒋᑭ ᒥᔅᑎ ᐸᔭᒋᓇᑯᓐ ᒥᓯᐛ ᑕᒋᓇᒐ ᐊᐛᓐ ᒋᑭ ᐸᔭᒋᓯᐤ᙮
38ᐊᓯᑯᒻ ᒋᓯᑲᐛ ᓂᓱ ᒋᑭ ᐎ ᒥᑐᔅᑕᐊᒪᒐᓐ ᐊ ᐸᐃᑯᐱᓇᓯᒡ ᒪᔭᑕᓂᓯᒡ ᐊᓐᑕ ᐱᔅᑎᓂᒐᐅᓇᐱᔅᑯᒡ᙮ 39ᐸᐃᒄ ᒋᔭᒋᓴᐸᔭᒋ ᑭᔭ ᐸᐃᒄ ᐛᑕᑯᓯᔨᒋ᙮ 40ᐊᓐ ᐊᓯᒡ ᓂᔅᑎᒻ ᒪᔭᑕᓂᔅ ᐃᔭᐱᒡ ᒋᑭ ᒥᑐᔅᑕᐊᒪᒐᓐ ᓂᓱ ᑎᐸᐸᑲᐃᑭᓐ ᓇᔅᒡ ᐛᒋ ᒥᔪᓯᒡ ᔪᔎᐛᓂᒡ ᐊᓯᒡ ᐊ ᒪᒧᐱᔨᒡ ᓇᔅᒡ ᐛᒋ ᒥᔪᓯᑦ ᓇᐤ ᐎᔭᑭᓇ ᐅᓕᑉ ᐱᒥᔾ ᑭᔭ ᒐ ᑯᑎᐱᓂᒥᓐ ᓇᐤ ᐎᔭᑭᓇ ᓱᒥᓇᐳᔾ ᒧᔭᒻ ᐱᔅᑎᓂᒐᐅᓐ᙮ 41ᒐ ᒥᑐᔅᑕᐊᒪᒐᔨᓐ ᐊᓐ ᑯᑎᒃ ᒪᔭᑕᓂᔅ ᐅᑕᑯᓯᔨᒐ, ᑭᔭ ᒐ ᒥᑐᔅᑕᐊᒪᒐᔨᓐ ᐊᓯᒡ ᐸᐃᑯᑕᐤ ᒐ ᐃᔅᐱᔅ ᐊᐱᒋᐃᑥᐤ ᔪᔎᐛᓂᒡ ᑭᔭ ᐸᐃᑯᑕᐤ ᒐ ᐃᔅᐱᔅ ᐊᐱᒋᑕᔨᓐ ᐱᒥᔾ ᑭᔭ ᓱᒥᓇᐳᔾ ᒧᔭᒻ ᑲ ᒐᒋᓴᐸᔭᒡ᙮ ᐊᐅᑯᐤ ᒥᒋᒻ ᓂᔾ ᑎᐸᔨᒋᒐᓱᐤ ᒐ ᐱᔅᑎᓂᒧᐎᔨᓐ, ᑭᔭ ᓂᑭ ᓇᐊᔨᑎᒥᔨᑯᓐ ᐊ ᒥᔭᒂᒡ᙮
42ᒋᔾ ᑭᔭ ᒋᑦ ᐊᓂᔅᑯᑕᐸᓐᒡ ᒋᑭ ᐎ ᐱᒥᐱᑕᓇᐛᐤ ᐊ ᒥᑐᔅᑕᐊᒧᐅᔭᒄ ᐊᓂᔭ ᒐᒂᔪᐛ ᐊᓐᑕ ᐛᒋ ᐱᔨᒐᓄᐅᒡ ᐸᔭᒋ ᐱᒍᐎᔭᓂᒋᐛᐱᒡ, ᐊᑯᑕ ᐊᓐᑕ ᒐ ᓂᒋᔅᑲᑎᑯᒡ ᑭᔭ ᒐ ᐃᔨᒥᑎᑯᒡ᙮ 43ᐊᑯᑕ ᐊᓐᑕ ᒐ ᓂᒋᔅᑯᐅᒂᐤ ᐃᔅᕋᐃᓪ ᐃᔪᒡ ᑭᔭ ᓂᑭ ᐸᔭᒋᑕᔭᓐ ᐸᔭᒋ ᐱᒍᐎᔭᓂᒋᐛᑉ ᓂᐛᔅᑕᐅᓐ ᐅᒡ᙮
44ᓂᑭ ᐸᔭᒋᑕᓐ ᐸᔭᒋ ᐱᒍᐎᔭᓂᒋᐛᑉ ᑭᔭ ᐱᔅᑎᓂᒐᐅᓇᐱᔅᒄ ᑭᔭ ᐃᔭᐱᒡ ᓂᑭ ᐸᔭᒐᐅᒡ ᐊᕋᓐ ᑭᔭ ᐅᑯᓴ ᒐᒋ ᐊᑐᔅᑯᐅᒡ ᐊᔭᒥᐊᐅᒋᒪᐅᒡ᙮ 45ᓂᑭ ᐎᒋᒪᐅᒡ ᐃᔅᕋᐃᓪ ᐃᔪᒡ ᑭᔭ ᓂᑭ ᐅᒋᓴᒪᓂᑐᒥᑕᑯᒡ᙮ 46ᒋᑭ ᒋᔅᒐᔨᑎᒧᒡ ᓂᔾ ᐊᐅᒄ ᑎᐸᔨᒋᒐᓱᐤ ᐛ ᒋᓴᒪᓂᑐᒧᒥᒡ ᐊᓂᔭ ᑲ ᐎᐎᑕᐃᑯᒡ ᐃᒋᑉᑎᒡ ᐅᒡ, ᐊᑯ ᒪᒃ ᒐᒋ ᐎᒋᒥᒂᐤ᙮”
Currently Selected:
ᐊᒃᓱᑕᔅ 29: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
