ᐊᒃᓱᑕᔅ 19
19
ᐊᓐᑕ ᓴᐃᓇᐃ ᐱᔅᑯᑎᓇᒡ
1ᑲᒋ ᓂᔅᑐ ᐱᓯᒺᔭᔨᒡ ᑲ ᒋᔅᑐᑕᒡ ᐃᔅᕋᐃᓪ ᐃᔪᒡ ᐊᓐᑕ ᐃᒋᑉᑎᒡ ᐅᒡ, ᐊᓂᔭ ᓂᔅᑎᒻ ᒋᓯᑯᔪᐤ ᒋ ᑎᑯᓯᓄᐅᒡ ᐊᓐᑕ ᓴᐃᓇᐃ ᐱᔅᑯᑎᓇᒡ᙮ 2ᑲᒋ ᒋᔅᑐᑕᒡ ᐊᓐᑕ ᕆᐱᑎᒻ ᐅᒡ, ᒂ ᐅᑎᑕᒡ ᓴᐃᓇᐃ ᐸᐧᑯᑎᔅᑭᒥᑯᔪᐤ, ᓂᑕᒥᑎᓄᐤ ᐊᓐᑕ ᒂ ᒪᓂᑲᓱᒡ᙮
3ᑭᔭ ᒧᓱᔅ ᒂ ᓴᑭᒋᐛᑦ ᐱᔅᑯᑎᓇᔪᐤ ᒐᒋ ᓂᒋᔅᑯᐛᑦ ᒋᓴᒪᓂᑐᐛ᙮ ᑎᐸᔨᒋᒐᓱᐛ ᒋ ᑕᑈᑎᑯᐤ ᐊᓐᑕ ᐱᔅᑯᑎᓇᔪᐤ ᐅᒡ ᑭᔭ ᒂ ᐃᑎᑯᑦ ᒐᒋ ᐃᑕᑦ ᐃᔅᕋᐃᓪ ᐃᔪᐛ, ᒐᑭᐸ ᐅᑦ ᐊᓂᔅᑯᑕᐸᓂᔪᐛ, 4“ ‘ᔅᒋ ᐛᐸᑕᓇᐛᐤ ᒐᒂᓐ ᓂᔾ, ᑎᐸᔨᒋᒐᓱᐤ, ᑲ ᑐᑐᐅᒂᐤ ᐊᓐᒡ ᐃᒋᑉᑦ ᐃᔪᒡ ᑭᔭ ᑲ ᑕᐧᑯᓂᑎᑯᒡ ᒧᔭᒻ ᒥᒋᓱᐤ ᐊ ᐃᓯ ᑕᐧᑯᓇᑦ ᐅᑦ ᐊᐛᓯᒥᓴ ᐊᓐᑕ ᐅᑎᑎᑭᓂᒡ ᑭᔭ ᑲ ᐸᓱᑎᑯᒡ ᐅᑕ ᐊᑕᔭᓐ᙮ 5ᐊᑯ ᐊᓄᒡ, ᑕᑈᑐᐅᔭᒂ ᑭᔭ ᑭᓄᐛᔨᑎᒪᒂ ᓂᓂᔅᑯᒧᐅᓐ, ᒋᑭ ᐅᑦ ᐃᔨᒥᑕᑎᓇᐛᐤ᙮ ᒥᓯᐛ ᐊᔅᒋᔾ ᓂ ᑎᐸᔨᑕᓐ᙮ 6ᓂᔾ ᐅ ᔅᒋ ᑎᐸᓇᐃᑎᓇᐛᐤ ᑭᔭ ᒋᑭ ᐊᑐᔅᑯᓇᐛᐤ ᒧᔭᒻ ᐊᔭᒥᐊᐅᒋᒪᐅᒡ,’ ᐊᐅᑯᔪᐤ ᐅᔭ ᐃᔨᒧᐅᓂᔪᐤ ᒐ ᐃᑎᑥᐤ ᐃᔪᒡ᙮”
7ᒂ ᓂᑎᒋᐛᑦ ᒧᓱᔅ ᑭᔭ ᒂ ᑕᑈᑕᑦ ᒥᓯᐛ ᐅᒋᒪᐛ ᑭᔭ ᒂ ᐎᑎᒧᐛᑦ ᒥᓯᐛ ᒐᒂᔪᐤ ᑲ ᐃᑎᑯᑦ ᑎᐸᔨᒋᒐᓱᐛ ᒐ ᐃᔅᒋᔄᑦ᙮ 8ᐊᑯ ᒂ ᐃᔅᒋᔄᒡ ᒥᓯᐛ ᐃᔪᒡ, “ᓂᑭ ᑐᑕᒺᓇᓐ ᒥᓯᐛ ᒐᒂᔪᐤ ᑎᐸᔨᒋᒐᓱᐤ ᑲ ᐃᑎᓱᒥᔨᒥᑦ᙮” ᐊᑯ ᒧᓱᔅ ᒂ ᐎᑎᒧᐛᑦ ᐃᔨᒧᓂᔪᐤ ᑎᐸᔨᒋᒐᓱᐛ ᑲ ᐃᔅᒋᔄᔨᒋ ᐃᔪᐛ᙮
9ᑎᐸᔨᒋᒐᓱᐤ ᒋ ᐃᑕᐤ ᒧᓱᓴ, “ᒋᑭ ᓂᑐᐛᐱᒥᑎᓇᐛᐤ ᒧᔭᒻ ᐊ ᒋᔅᐱᒋᓯᑦ ᑭᔅᑯᐅᓐ ᓂᑭ ᐃᓯᓇᑯᓯᓐ, ᐊᑯ ᐃᔅᕋᐃᓪ ᐃᔪᒡ ᓂᑭ ᐸᑕᑯᒡ ᒪᒂᒡ ᐃᔨᒥᔨᑕᓇ ᑭᔭ ᓇᓂᑎᒻ ᒋᑭ ᓱᒐᔨᒥᑯᒡ᙮” ᐊᑯ ᒧᓱᔅ ᒂ ᐎᑎᒧᐛᑦ ᐊᓂᔭ ᐃᔪᐛ ᒐᒂᔪᐤ ᑲ ᐃᔅᒋᔄᔨᒋ ᑎᐸᔨᒋᒐᓱᐛ᙮
10ᐊᑯ ᒂ ᐃᑎᑯᑦ ᒧᓱᔅ ᑎᐸᔨᒋᒐᓱᐛ, “ᒪᒋ ᓂᑐᐛᐱᒥᒡ ᐃᔪᒡ ᑭᔭ ᒐ ᐎᑎᒧᐅᑥᐤ ᒐᒋ ᐊᔭᔅᑯᐱᒡ ᒐ ᑎᑯᓯᓄᐅᒡ᙮ ᒋᑭ ᐸᔭᒋᐃᓱᐅᒡ ᐊᓄᒡ ᑭᔭ ᐛᐱᓂᒐ ᑭᔭ ᒋᑭ ᐎ ᒋᔅᑕᐸᐅᑕᐅᒡ ᐅᑦ ᐊᐱᒋᑕᐅᓄᐛᐛ᙮ 11ᐛᒧᒡ ᐅᔭ ᒋᑭ ᐎ ᐃᑐᑎᒧᒡ ᒐᒋ ᐊᔭᔅᑯᐱᒡ ᐅᓱᐛᐱᓂᔨᒐ᙮ ᐊᐅᑯᓐ ᒋᓱᒄ ᒐ ᓂᑎᒋᐛᔭᓐ ᓴᐃᓇᐃ ᐱᔅᑯᑎᓇᐤ ᒐᒋ ᐛᐱᒥᒡ ᒥᓯᐛ ᐃᔅᕋᐃᓪ ᐃᔪᒡ᙮ 12ᒐ ᓂᔅᑐᐛᒋᑕᔨᓐ ᐊᓐᑕ ᐛᔅᑲ ᐱᔅᑯᑎᓇᒡ ᑭᔭ ᒐ ᐃᑎᑥᐤ, ᒐ ᓇᑭᑐᐛᐸᑎᒪᒃ ᒐ ᐊᑲ ᓴᑭᒋᐛᔭᒃ ᑭᔭ ᒪᒃ ᒐᒋ ᐎᒪᔅᑭᒪᒄ ᐅ ᒐ ᓂᔅᑐᐛᒋᑕᔭᓐ᙮ ᒋᑭ ᓂᐸᐊᑭᓄᐤ ᐊᐛᓐ ᐊᑲ ᓂᑐᑕᐧᒃ᙮ 13ᐃᔪᐤ ᑭᔭ ᒪᒃ ᐊᐛᓯᔅ, ᒋᑭ ᐎ ᓂᐸᐊᑭᓄᐤ ᐊ ᐊᑲ ᑕᒋᓇᑭᓄᐅᑦ᙮ ᒥᒄ ᐃᔅᐱ ᐸᑕᒂᒐ ᐳᑕᒋᑭᓐ, ᐊᑯ ᒋᐸ ᓴᑭᒋᐛᐅᒡ ᐃᔪᒡ ᐊᓂᔭ ᐸᐃᔅᑯᑎᓇᔪᐤ᙮”
14ᑲᒋ ᓂᑎᒋᐛᑦ ᒧᓱᔅ ᐱᔅᑯᑎᓇᔪᐤ, ᒂ ᐊᑎ ᐃᑕᑦ ᐃᔪᐛ ᒐᒋ ᒥᔪᐧᑭᒥᔨᒋ ᐅᑦ ᐊᐱᒋᑕᐅᓂᔪᐛ ᑭᔭ ᒐᒋ ᐸᔭᒋᓯᔨᒋ ᑭᔭ ᒐᒋ ᐊᔭᒥᐊᔅᑐᐛᒡ ᒋᓴᒪᓂᑐᐛ᙮ 15ᒂ ᐊᑎ ᐃᑕᑦ ᐃᔪᐛ ᒐᒋ ᐊᔭᔅᑯᐎᒋ ᐅᓱᐛᐱᓂᔨᒐ ᑭᔭ ᒐ ᐊᑲ ᐎᐸᒥᑐᐎᔨᒋ ᓇᐸᐛ ᑭᔭ ᐃᔎᐛ᙮
16ᑲᒋ ᓂᓱ ᒋᓯᑲᔨᒡ ᐊ ᒐᒋᓴᐸᔭᒡ ᒋ ᓂᒥᔅᒋᐅᔅᔎᔪᐤ, ᑭᔭ ᒋ ᑯᒋᓂᔪᐛ ᐊ ᐎᐱᓯᔨᒋ ᑭᔅᑯᐅᓇ ᐊᓐᑕ ᐱᔅᑯᑎᓇᒡ᙮ ᒂ ᐸᑕᑯᓂᔨᒡ ᐳᑕᒋᑭᓂᔪᐤ ᓇᔅᒡ ᐊ ᒋᔄᐱᔨᒡ, ᑭᔭ ᒥᓯᐛ ᐃᔅᕋᐃᓪ ᐃᔪᒡ ᒋᓴᒋᓱᐅᒡ᙮ 17ᒧᓱᔅ ᒂ ᓂᑲᓄᑕᐊᑦ ᐃᔪᐛ ᒐᒋ ᓂᒋᔅᑯᐛᔨᒋ ᒋᓴᒪᓂᑐᐛ, ᓂᑎᒍᐤ ᐱᔅᑯᑎᓇᒡ ᒋ ᓇᓂᐳᐎᒡ᙮ 18ᒥᓯᐛ ᓴᐃᓇᐃ ᐱᔅᑯᑎᓇᐤ ᒋ ᐱᐳᑕᐤ ᐅᓴᒻ ᑎᐸᔨᒋᒐᓱᐤ ᒋ ᓂᑎᒋᐛᐤ ᐱᔅᑯᑎᓇᔪᐤ ᐊᐛᔅᑲᔅᑲᑯᑦ ᐃᔅᑯᑕᔪᐤ᙮ ᒋ ᐅᐸᐱᑕᐤ ᒧᔭᒻ ᐊ ᐱᐳᑥᑦ ᒋᓴᐱᔅᒐᐛᓐ, ᑭᔭ ᒥᓯᐛ ᐱᔅᑯᑎᓇᐤ ᒋ ᒥᔅᑎ ᓇᓇᒥᐱᔪᐤ᙮ 19ᒪᒃ ᐊᔭᔅᒄ ᒋ ᒋᐧᑲᐛᐱᔪᐤ ᐳᑕᒋᑭᓐ᙮ ᒧᓱᔅ ᒂ ᐃᔨᒪᐊᑦ ᒋᓴᒪᓂᑐᐛ ᑭᔭ ᒂ ᓂᔎᐅᓯᐃᑯᑦ ᐊ ᒋᐧᑲᐛᔨᒋ ᒧᔭᒻ ᓂᒥᔅᒍᐛ ᐊ ᐃᑎᑕᑯᓯᔨᒋ᙮
20ᐊᑯ ᑎᐸᔨᒋᒐᓱᐤ ᒂ ᑎᑯᓯᐧᒃ ᐊᓐᑕ ᑕᐧᑯᑕᒥᑎᓐ ᓴᐃᓇᐃ ᐱᔅᑯᑎᓇᔪᐤ ᑭᔭ ᒂ ᐃᑕᑦ ᒧᓱᓴ ᒐᒋ ᐊᓐᑕ ᓂᒋᔅᑲᑯᑦ᙮ ᒧᓱᔅ ᒂ ᓴᑭᒋᐛᑦ᙮ 21ᑎᐸᔨᒋᒐᓱᐤ ᒂ ᐃᑕᑦ, “ᒧᓱᔅ, ᒐ ᓂᑕᒥᒋᐛᔨᓐ ᑭᔭ ᒐ ᐎᑎᒧᐅᑥᐤ ᐃᔪᒡ ᒐ ᐊᑲ ᐎᒪᔅᑲᒡ ᑲ ᓂᔅᑐᐛᒋᑕᔨᓐ ᐊᓐᑕ ᓂᑕᒥᑎᓄᐤ ᒐᒋ ᑎᑯᓯᓂᒡ ᒐᒋ ᒋᑕᐱᒥᒡ; ᑐᑕᒐ ᐊᐛᓐ ᒋᑭ ᐳᓂᐱᒪᑎᓯᔪᐤ᙮ 22ᐃᔭᐱᒡ ᐊᓐᒡ ᐊᔭᒥᐊᐅᒋᒪᐅᒡ ᒋᑭ ᐎ ᐸᔭᒋᐃᓱᐅᒡ ᓂᑐᐛᐱᒥᑥᐛ ᑭᔭ ᒪᒃ ᓂᑭ ᐊᓏᔨᒪᐅᒡ᙮”
23ᒧᓱᔅ ᒂ ᐃᑕᑦ ᑎᐸᔨᒋᒐᓱᐛ, “ᐃᔪᒡ ᓇᒪ ᒋ ᓴᑭᒋᐛᐅᒡ ᐱᔅᑯᑎᓇᔪᐤ ᐅᓴᒻ ᒋᔾ ᔅᒋ ᐃᑎᓱᒪᐅᒡ ᒐᒋ ᓂᔅᑐᐛᒋᑕᒡ ᐊᓐᑕ ᐛᔅᑲ ᐱᔅᑯᑎᓇᔪᐤ ᑭᔭ ᒐᒋ ᐸᔭᒋᑕᒡ᙮”
24ᒂ ᐃᑕᑦ ᒧᓱᓴ, “ᓂᑕᒥᒋᐛᒪ ᑭᔭ ᒐ ᐸᓱᐅᑦ ᐊᕋᓐ᙮ ᒥᒄ ᐊᓐᒡ ᐊᔭᒥᐊᐅᒋᒪᐅᒡ ᑭᔭ ᐃᔪᒡ ᒐ ᐊᑲ ᐎᒪᔅᑲᒡ ᑲ ᓂᔅᑐᐛᒋᑕᑭᓄᐎᒡ ᒐᒋ ᓂᑐᐛᐱᒥᒡ ᑭᔭ ᒪᒃ ᓂᑭ ᐊᓏᔨᒪᐅᒡ᙮”
25ᒧᓱᔅ ᒂ ᓂᑕᒥᒋᐛᑦ, ᒋ ᐎᑎᒧᐛᐤ ᐃᔪᐛ ᒐᒂᔪᐤ ᑲ ᐃᔅᒋᔄᔨᒋ ᑎᐸᔨᒋᒐᓱᐛ᙮
Currently Selected:
ᐊᒃᓱᑕᔅ 19: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
