ᐊᒃᓱᑕᔅ 18
18
ᒐᑦᕈᐤ ᒧᐱᔅᑐᐛᐤ ᒧᓱᓴ
1ᒐᑦᕈᐤ, ᒥᑎᐊᓐ ᐃᔪᒡ ᐅᑦ ᐊᔭᒥᐊᐅᒋᒪᒧᐛᐛ ᑭᔭ ᒧᓱᔅ ᐅᒋᓴᐃᔨᒪ᙮ ᒋ ᐸᑎᒥᔪᐛ ᒐᒂᔪᐤ ᒋᓴᒪᓂᑐᐛ ᑲ ᐃᑐᑎᒧᐛᔨᒋ ᒧᓱᓴ ᑭᔭ ᐅᑦ ᐃᔨᒥᔪᐛ᙮ ᐃᔅᐱ ᑎᐸᔨᒋᒐᓱᐤ ᑲ ᐎᐎᑕᐊᑦ ᐃᔅᕋᐃᓪ ᐃᔪᐛ ᐊᓐᑕ ᐃᒋᑉᑎᒡ ᐅᒡ᙮
2ᐊᑯ ᒧᓱᔅ ᒋ ᐃᑎᓴᐛᐤ ᐎᐛ ᓯᐳᕋᔨᒋ ᑭᔭ ᓂᓱ ᐅᑯᓯᔨᐛ ᒐᒋ ᐎᒋᒪᔨᒋ ᒐᑦᕈᐛ᙮ 3ᒧᓱᔅ ᐊᔅᒃ ᒋ ᒪᓐᑕᐤ ᐊᓐᑕ ᒥᑎᐊᓂᒡ ᑲ ᐃᔪᐎᔨᒋ ᐅᓂᔅᑎᒧᓴᓇ, ᐊᑯ ᒧᓱᔅ ᒂ ᐃᔅᒋᔄᑦ, “ᑭᕐᓱᒻ ᒋᑭ ᐃᓯᓂᐧᑲᓱᐤ᙮ ᑭᕐᓱᒻ ᒧᔭᒻ ‘ᒪᓐᑕᐤ’ ᐊ ᐃᓇᓄᐅᒡ ᐃᑉᕈᐤ ᐃᔨᒧᐅᓂᒡ᙮” 4ᐊᑯ ᐊᓂᔭ ᑯᑎᑲ ᐅᑯᓴ ᑲ ᐃᔪᐎᔨᒋ, ᒧᓱᔅ ᒂ ᐃᔅᒋᔄᑦ, “ᐃᓕᐃᓱᕐ ᒋᑭ ᐃᓯᓂᐧᑲᓱᐤ, ᐛᔅ ᐊᓂᔭ ᒋᓴᒪᓂᑐᐛ ᓄᑕᐎᔾ ᑲ ᐊᔭᒥᐊᔅᑐᐛᑦ ᓂᒋ ᐱᒪᒋᐃᒄ ᐃᒋᑉᑎᒡ ᒋᓴᐅᒋᒪᐛ ᐅᒡ᙮”
5ᒐᑦᕈᐤ, ᐊᐎᒐᐅᑯᑦ ᒧᓱᓴ ᐅᑯᓯᔪᐛ ᑭᔭ ᐎᐎᐛ, ᒋ ᑎᑯᓯᓄᐅᒡ ᐊᓐᑕ ᐸᐧᑯᑎᔅᑭᒥᑲᒡ, ᐊᓐᑕ ᒧᓱᓴ ᑲ ᐎᒋᔨᒋ ᒥᒋᒪ ᑎᐸᔨᒋᒐᓱᐛ ᐅᐱᔅᑯᑎᓇᒥᔪᐤ᙮ 6ᒐᑦᕈᐤ ᒋ ᐃᑎᓴᒧᐛᐤ ᐃᔨᒧᐅᓂᔪᐤ ᒧᓱᓴ, “ᓂᔾ, ᒐᑦᕈᐤ ᒋᒋᓴᐃᔨᒻ, ᓂᒋ ᑎᑯᓯᓐ ᒐᒋ ᒧᐱᔅᑕᑕᓐ ᐊᓯᒡ ᐊᐸᓱᐅᒂᐤ ᒋᔪᐤ ᑭᔭ ᐊ ᓂᓯᒡ ᒋᑯᓯᒡ᙮”
7ᐊᑯ ᒧᓱᔅ ᒂ ᓇᒋ ᓂᒋᔅᑯᐛᑦ ᐅᒋᓴᐃᔨᒪ, ᒂ ᓂᐱᔅᑯᐱᔅᑐᐛᑦ ᑭᔭ ᒂ ᓱᐛᔨᒪᑦ ᐊᓐᑕ ᐅᑕᒥᐧᑭᓂᒡ᙮ ᒋ ᑎᒥᔅᑲᑐᐅᒡ ᑭᔭ ᒂ ᐱᒐᒡ ᐊᓐᑕ ᐱᒍᐎᔭᓂᒋᐛᐱᒡ᙮ 8ᐊᑯᑕ ᐊᓐᑕ ᒧᓱᔅ ᑲ ᐛᐎᑎᒧᐛᑦ ᑎᐸᔨᒋᒐᓱᐛ ᑲ ᐃᑐᑎᒥᔨᒋ ᒐᒋ ᓇᑭᑐᐛᔨᒪᔨᒋ ᐃᔅᕋᐃᓪ ᐃᔪᐛ ᐊᓂᔭ ᑲ ᐃᑐᑐᐛᔨᒋ ᒋᓴᐅᒋᒪᐛ ᑭᔭ ᐃᒋᑉᑎᒡ ᐃᔪᐛ᙮ ᐃᔭᐱᒡ ᑲ ᐃᓯ ᐊᔨᒥᔪᐅᒡ ᑭᔭ ᑲ ᐃᓯ ᐱᒪᒋᐃᑯᒡ ᑎᐸᔨᒋᒐᓱᐛ᙮
9ᒐᑦᕈᐤ ᒋ ᒥᔽᔨᑎᒻ ᐅᔭ ᐱᔭᑕᐧᒃ ᒥᓯᐛ ᑲ ᐃᓯ ᒥᔪᑐᑐᐛᔨᒋ ᑎᐸᔨᒋᒐᓱᐛ ᐃᔅᕋᐃᓪ ᐃᔪᐛ ᑲ ᐎᐎᑕᔨᒋ ᐃᒋᑉᑎᒡ ᐅᒡ᙮ 10ᑭᔭ ᒂ ᐃᔅᒋᔄᑦ, “ᒪᒥᒋᒪᑕᐤ ᑎᐸᔨᒋᒐᓱᐤ, ᑲ ᐱᒪᒋᐃᑕᐧᒄ ᐃᒋᑉᑎᒡ ᒋᓴᐅᒋᒪᐛ ᐅᒡ ᑭᔭ ᐅᓂᑐᐱᔪᐅ-ᐃᔨᒥᔪᐛ᙮ 11ᓴᔅ ᓂᒋ ᒋᔅᒐᔨᑕᓐ ᑎᐸᔨᒋᒐᓱᐤ ᐊᑐᐎᔅ ᐎᔾ ᐊᓱᐧᑲᑎᓯᑦ ᐃᔅᐱᔅ ᑯᑎᑭᒡ ᒥᓂᑐᐅᒡ᙮ ᒋ ᐃᑐᑎᒻ ᐅᔭ ᐃᔅᐱ ᐃᒋᑉᑦ ᐃᔪᒡ ᑲ ᐱᐛᔨᒪᒡ ᐃᔅᕋᐃᓪ ᐃᔪᐛ᙮” 12ᐊᑯ ᒐᑦᕈᐤ ᒂ ᐸᑕᑦ ᐱᔅᑎᓂᒐᐅᓂᔪᐤ ᒐᒋ ᐃᔎᓴᑭᓄᐎᒡ ᑭᔭ ᑯᑎᑲ ᒥᑐᔅᑕᐊᒪᒐᐅᓇ ᒐᒋ ᒥᔭᑭᓄᐅᑦ ᒋᓴᒪᓂᑐᐤ᙮ ᐊᕋᓐ ᑭᔭ ᐃᔅᕋᐃᓪ ᐅᒋᒪᐅᒡ ᒋ ᑎᑯᓯᓄᐅᒡ ᒐᒋ ᒥᒋᓱᐅᒡ ᐊᓐᑕ ᐊᔭᒥᐊᓄᐎᒡ᙮ ᐊᕈᓐ ᒋ ᑎᑯᓯᓄᐤ ᐊ ᐎᒐᐛᑦ ᒥᓯᐛ ᐃᔅᕋᐃᓪ ᐅᒋᒪᐅᒡ ᒐᒋ ᐎᒋᒥᒋᓱᒪᒡ ᒧᓱᓴ ᐅᒋᓴᐃᒥᔪᐛ ᐅᑎᔅᑯᐤ ᒋᓴᒪᓂᑐᐛ᙮
13ᐎᔭᐱᓂᔨᒡ ᒧᓱᔅ ᒋ ᐎᒋᐊᐤ ᐃᔅᕋᐃᓪ ᐃᔪᐛ ᒐᒋ ᓇᐃᐱᑕᑦ ᐊ ᒪᒥᒋᐱᔨᑐᐎᒋ᙮ ᑲ ᑎᐸᔅᑯᓂᒐᔅᑦ ᒋ ᐃᑕᐱᑎᓯᔪᐤ, ᐅᑎᔅᑯᐤ ᐊᓂᐳᔅᑕᑯᑦ ᐊ ᒐᒋᓴᐸᔨᒡ ᐃᔅᐱᔅ ᐊ ᐅᑕᑯᓯᔨᒡ᙮ 14ᐃᔅᐱ ᒐᑎᕈᐤ ᑲᒋ ᐛᐸᑎᒺᑦ ᒧᓱᓴ ᐊ ᐃᑐᑐᐛᔨᒋ ᐃᔪᐛ, ᒂ ᐃᔅᒋᔄᑦ, “ᐊᑯ ᒐᒂᓐ ᐛᒋ ᐸᐃᑯᓯᔨᓐ ᐊ ᑎᐸᔅᑯᓂᒐᔨᓐ ? ᐊᑯ ᒐᒂᓐ ᐛᒋ ᒥᔨᑥᐤ ᒐᒋ ᒥᒐᑎᑲᐳᐅᒡ ᐅᒡ ᐃᔪᒡ ᐊ ᒐᒋᓴᐸᔨᒡ ᐃᔅᐱᔅ ᐊᐅᑕᑯᓯᔨᒡ ?”
15ᒧᓱᔅ ᒂ ᐃᑕᑦ, “ᒋ ᑎᑯᓯᓄᐅᒡ ᒐᒋ ᒋᔅᒐᔨᑕᒡ ᒐᒂᔪᐤ ᒋᓴᒪᓂᑐᐛ ᓇᑐᐛᔨᒥᑯᒡ ᒐ ᑐᑕᒡ᙮ 16ᐃᔅᐱ ᒪᒥᒋᐱᐃᑐᑥᐎ ᓂᓱ ᐃᔪᒡ, ᓂ ᐸᒋ ᓂᑐᐛᐱᒥᑯᒡ, ᐊᑯ ᒂ ᑯᒂᒋᒥᒡ ᒐᒋ ᐎᔭᔨᑎᒪᓐ ᐊᐛᓐ ᑎᔭᑈᒂ ᑭᔭ ᒂ ᐎᑎᒧᐅᒂᐤ ᒋᓴᒪᓂᑐᐛ ᐅᑦ ᐃᑎᓱᐛᐅᓂᔪᐤ᙮”
17ᒂ ᐃᑎᑯᑦ ᐅᒋᓴᐃᔨᒪ, “ᓇᒪ ᒥᔽᐤ ᐊᓐ ᒐᒂᓐ ᐊ ᐃᑐᑎᒥᓐ᙮ 18ᒋᔾ ᑭᔭ ᐊᓐᒡ ᐃᔪᒡ ᒋᑭ ᐊᔭᔅᑯᓯᓇᐛᐤ᙮ ᒥᓴᐤ ᐊᓐ ᐊᑐᔅᒐᐅᓐ ᐊ ᐃᑐᑎᒥᓐ ᒐᒋ ᐸᐃᑯᐧᑭᒥᓐ᙮ 19ᒋᑭ ᐎᒋᐃᒄ ᒋᓴᒪᓂᑐᐤ ᓂᑐᑐᐎᓇ᙮ ᒋᑭ ᐎ ᐎᑎᒧᐛᐤ ᒋᓴᒪᓂᑐᐤ ᐊ ᐃᔅᐱᔨᒋ ᐃᔪᐛ᙮ 20ᒐ ᒋᔅᑯᑎᒧᐅᑥᐤ ᒋᓴᒪᓂᑐᐛ ᐅᑦ ᐃᑎᓱᐛᐅᓂᔪᐤ ᑭᔭ ᒐ ᐎᑎᒧᐅᑥᐤ ᑕᓐ ᒐ ᐃᓯ ᐱᒪᑎᓯᒡ ᑭᔭ ᒐᒂᔪᐤ ᒐ ᐎ ᑐᑕᒡ ᒐᒋ ᑯᐃᔅᑯᑕᑎᓯᒡ᙮ 21ᒥᒄ ᐃᔭᐱᒡ, ᒋᑭ ᐎ ᐅᑎᓇᐅᒡ ᓇᐸᐅᒡ ᒐᒋ ᐎᒋᐃᔅᒡ, ᓇᐸᐅᒡ ᐊ ᓇᓂᒋᔅᑐᐛᒡ ᒋᓴᒪᓂᑐᐛ, ᒐᒋ ᓱᒐᔨᒪᑭᓂᐅᒡ ᑭᔭ ᒐ ᐊᑲ ᐃᔭᐛᑭᓄᐅᒡ᙮ ᒐᒋ ᓂᑲᓂᔅᑯᐛᒡ ᐊ ᐸᐃᑯᔪᐛᓯᔨᒋ ᑭᔭ ᐊ ᐱᑕᑕᑐᔪᐅᐛᓯᔨᒋ, ᑭᔭ ᐊ ᐸᐃᑯᒥᑕᓯᒥᑎᓄᐛᓯᔨᒋ ᑭᔭ ᐊ ᐸᐃᑯᒐᓯᐱᔪᐛᓯᔨᒋ ᐃᔪᐛ᙮ 22ᑲᑎᐸᔅᑯᓂᒐᒡ ᓇᓂᑎᒻ ᒋᑭ ᐃᓯ ᐊᑐᔅᒐᐅᒡ᙮ ᐊᑯ ᒋᐸ ᐃᑐᑕᑕᑯᒡ ᐊᔨᒥᓂᔨᒡ ᐊ ᐃᓯ ᒪᒥᒋᐱᐃᑐᒡ, ᐊᑯ ᐊᑲ ᐊᔨᒥᓂᔨᒋ ᐎᔨᐛᐤ ᒋᑭ ᐎᔭᔨᑎᒧᒡ᙮ ᐊᑎᑐᐤ ᒋᐸ ᐛᑎᓐ ᐅ ᒥᔅᑯᒡ, ᒪᒧᐤ ᐊᑐᔅᑲᔅᑎᒪᒄ᙮ 23ᐃᑐᑎᒥᓇ ᐅ, ᒋᓴᒪᓂᑐᐤ ᐊ ᐃᑎᓱᒥᔅᒃ, ᓇᒪ ᒋᑭ ᐃᔅᐱᔅ ᐊᔭᔅᑯᓯᓐ, ᑭᔭ ᓄᑎᒻ ᐊᐛᓐ ᒋᑭ ᒥᔽᔨᑎᒻ ᒋᐛᒐ, ᐎᐱᒡ ᒥᔪᐱᐃᑐᑥᐛ ᐊ ᒪᒥᒋᐱᐃᑐᒡ᙮”
24ᒧᓱᔅ ᒋ ᓂᑐᑐᐛᐤ ᐅᒋᓴᐃᔨᒪ ᑲ ᐃᑎᑯᑦ ᑭᔭ ᒋ ᐃᑐᑎᒺᐤ ᒥᓯᐛ ᒐᒂᔪᐤ ᑲ ᐃᑎᑯᑦ᙮ 25ᒂ ᐅᑎᓇᑦ ᐊᑭᒐᑕᐛᔨᑕᑯᓯᔨᒋ ᓇᐸᐛ ᐊᓐᑕ ᐃᔅᕋᐃᓪ ᐃᔪᐛ ᐅᒡ ᑭᔭ ᒂ ᑐᑐᐛᑦ ᒐᒋ ᓂᑲᓂᔅᑯᐛᔨᒋ ᐊ ᐸᐃᑯᔪᐛᓯᔨᒋ, ᐊ ᐱᑕᑕᑐᔪᐅᐛᓯᔨᒋ, ᐊ ᐸᐃᑯᒥᑕᓯᒥᑎᓄᐛᓯᔨᒋ, ᐊ ᐸᐃᑯᒐᓯᐱᔪᐛᓯᔨᒋ ᐃᔪᐛ᙮ 26ᒋ ᑎᐸᔅᑯᓂᒐᓯᐅᐎᒡ ᐊᐎᔭᔨᑕᒡ ᐎᔪᐛᐤ ᐊ ᐛᑎᓂᔨᒋ ᐊ ᒪᒥᒋᐱᐃᑐᓇᓄᐎᒡ, ᒧᓱᓴ ᒋᒥᔭᐅᒡ ᐊ ᐊᒥᓂᔨᒋ ᒐᒋ ᑎᓯᐧᑭᒥᔨᒋ᙮
27ᑲᒋ ᐛᒋᔭᒥᑐᒡ ᒧᓱᔅ ᑭᔭ ᐅᒋᓴᐃᔨᒪ ᒐᑦᕈᐛ᙮ ᒐᑦᕈᐤ ᑲᐤ ᒋ ᒋᐛᐤ᙮
Currently Selected:
ᐊᒃᓱᑕᔅ 18: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
