ᐊᒃᓱᑕᔅ 11
11
ᑲ ᐳᓂᐱᒪᑎᓯᒡ ᐅᔅᑭᒡ ᐊᐛᓯᒡ ᑲ ᓇᐸᓯᐅᒡ
1ᐊᑯ ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒪᔅᑕᔾ ᐸᐃᒂᐤ ᓂᑭ ᐃᑎᓴᐊᒧᐛᐤ ᐊᓏᔨᑎᒧᐅᓂᔪᐤ ᐊᓐᒡ ᒋᓴᐅᒋᒪᐤ ᑭᔭ ᐃᒋᑉᑦ ᐃᔪᒡ᙮ ᐊᑯ ᐸᑐᔅ ᒐ ᐱᔅᑎᓇᑦ ᐃᔅᕋᐃᓪ ᐃᔪᐛ, ᓇᔅᒡ ᒋᑭ ᐎ ᐃᒐᑎᓴᐅᑯᐛᐤ ᐊᓐᑕ ᐅᑦ ᐊᔅᒋᐛᒡ᙮ 2ᒐ ᐎᑎᒧᐅᑥᐤ ᒥᓯᐛ ᐃᔅᕋᐃᓪ ᐃᔪᒡ, ᓇᐸᐅᒡ ᑭᔭ ᐃᔎᐅᒡ ᒐᒋ ᑯᒂᒋᒪᒡ ᐎᒐᐛᑭᓄᐛᐛ ᐃᒋᑉᑦ ᐊ ᐃᑎᔅᑲᓇᓯᔨᒋ ᐊ ᐎᓴᐅᓱᓇᔭᐎᒋ ᑭᔭ ᐊ ᓱᓇᔭᐱᔅᑯᔨᒋ ᐛᐛᓯᐅᓇ᙮” 3ᑎᐸᔨᒋᒐᓱᐤ, ᒋ ᐃᑐᑐᐛᐤ ᐃᒋᑉᑦ ᐃᔪᐛ ᒐᒋ ᐃᔅᐱᑕᐃᒪᔨᒋ ᐃᔅᕋᐃᓪ ᐃᔪᐛ, ᑭᔭ ᒧᓱᔅ ᓇᔅᒡ ᒋᔅᑕᔨᒥᑯᐤ ᐊᓂᔭ ᒋᓴᐅᒋᒪᐛ ᐅᑦ ᐊᐱᒋᐊᑭᓂᔪᐛ ᑭᔭ ᐃᒋᑉᑦ ᐃᔪᐛ᙮
4ᐊᑯ ᒧᓱᔅ ᒂ ᐃᔅᒋᔄᑦ, “ᐊᐅᑯᔪᐤ ᐅᔭ ᐊ ᐃᔅᒋᔄᑦ ᑎᐸᔨᒋᒐᓱᐤ: ‘ᐊᐱᑕᑎᐱᔅᑲᒐ ᓂᑭ ᐃᑐᑕᓐ ᐊᓐᑕ ᒥᓯᐛ ᐃᒋᑉᑎᒡ᙮ 5ᒥᓯᐛ ᓂᔅᑎᒧᓴᓐᒡ ᑲ ᓇᐸᓯᐅᒡ ᐊᓐᑕ ᐃᒋᑉᑎᒡ ᒋᑭ ᐳᓂᐱᒪᑎᓯᐅᒡ, ᒋᓴᐅᒋᒪᐤ ᐅᓂᔅᑎᒧᓴᓇ ᑲ ᓇᐸᓯᐎᔨᒋ ᐃᔅᐱᔅ ᐊᓐ ᑯᐸᓇᔎᐤ ᐅᓂᔅᑎᒧᓴᓇ ᑲ ᓇᐸᓯᐎᔨᒋ ᑭᔭ ᓇᐸ ᐊᐛᓯᓯᒡ ᐃᔭᐱᒡ ᒋᑭ ᐳᓂᐱᒪᑎᓯᐅᒡ᙮ 6ᒥᓯᐛ ᐊᓐᑕ ᐃᒋᑉᑎᒡ ᒋᒋᐛ ᒋᑭ ᒥᔅᑎ ᒪᓄᐤ, ᓇᒪ ᓂᑕ ᐃᔅᐱᔪᐤ ᐅ ᒐᒂᓐ ᑭᔭ ᓇᒪ ᓂᑕ ᒥᓐ ᒋᑭ ᐃᔅᐱᔪᐤ᙮ 7ᒥᒄ ᐊᓐᑕ ᐊᑕᒡ ᐃᔅᕋᐃᓪ ᐃᔪᒡ, ᓇᔅᒡ ᓇᒪ ᒐᒂᓐ ᒋᑭ ᐸᑕᑯᓐ, ᓇᒪ ᒋᑭ ᐸᑕᑯᓱᐤ ᐊᑎᒻ ᒐᒋ ᒥᒋᔅᑕᑦ ᓇᐸᐛ ᑭᔭ ᒪᒃ ᐊᐛᓯᓴ᙮’ ᐊᐅᑯᓐ ᐸᑐᔅ ᒐ ᒋᔅᒐᔨᑎᒪᒄ ᑎᐸᔨᒋᒐᓱᐤ ᐊ ᒥᔪᑐᑐᐛᑦ ᐃᔅᕋᐃᓪ ᐃᔪᐛ ᒪᒂᒡ ᐊ ᐊᓏᔨᒪᑦ ᐃᒋᑉᑦ ᐃᔪᐛ᙮ 8ᒥᓯᐛ ᒋᑦ ᐊᐱᒋᐊᑭᓐᒡ ᓂᑭ ᓂᑐᐛᐱᒥᑯᒡ ᒐ ᐊᑎ ᓂᐱᔅᑯᐱᔅᑐᐅᒡ ᑭᔭ ᒐ ᐃᔅᒋᔄᒡ, ‘ᒪᒋᒄ ᔅᑐᑕᒄ ! ᒋᔾ ᑭᔭ ᒥᓯᐛ ᒋᑦ ᐃᔨᒥᒡ !’ ᐊᑯ ᐸᑐᔅ ᒐᔅᑐᑕᔭᓐ᙮” ᐊᑯ ᓇᔅᒡ ᐊ ᒋᔄᐱᑦ ᒧᓱᔅ ᒂ ᓂᑭᑕᑦ ᒋᓴᐅᒋᒪᐛ᙮
9ᑎᐸᔨᒋᒐᓱᐤ ᒋ ᐃᑕᐤ ᒧᓱᓴ, “ᓇᒪ ᒋᑭ ᑕᑈᑎᒻ ᒋᓴᐅᒋᒪᐤ ᒐᒋ ᓂᑐᑕᔅᒄ, ᐊᑯ ᒪᒃ ᐊᑎᑐᐤ ᐊ ᓱᐧᑲᑎᓯᒥᑲᒋ ᓂᒋᔅᒋᓄᐛᒡ ᐛᐸᑎᔨᐛᐅᓇ ᒐ ᐃᑐᑎᒪᓐ ᐊᓐᑕ ᐃᒋᑉᑎᒡ᙮” 10ᒧᓱᔅ ᑭᔭ ᐊᕋᓐ ᒂ ᐃᑐᑎᒺᒡ ᒋᓴᒪᓂᑐᐛ ᐅᒪᒥᔅᑲᒡ ᐃᑐᐅᓂᔪᐤ ᐊ ᐛᐱᒥᑯᒡ ᐊᓂᔭ ᒋᓴᐅᒋᒪᐛ, ᒥᒄ ᑎᐸᔨᒋᒐᓱᐤ ᒋ ᐃᑐᑐᐛᐤ ᒋᓴᐅᒋᒪᐛ ᒐᒋ ᒥᔅᑯᔅᑎᒂᓇᔨᒋ, ᑭᔭ ᓇᒪ ᐅᒋ ᐎ ᐱᔅᑎᓇᐤ ᐃᔅᕋᐃᓪ ᐃᔪᐛ ᒐᒋ ᓂᑭᑎᒥᔨᒋ ᐅᑦ ᐊᔅᒋᔾ᙮
Currently Selected:
ᐊᒃᓱᑕᔅ 11: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
