ᐊᑈᔅᑕᓇᒡ 11
11
ᐱᑕᕐ ᑲ ᐎᑎᒧᐛᑦ ᐊᓂᔭ ᑲ ᑕᑈᑎᒥᔨᒋ ᐊᓐᑕ ᒋᕈᓯᓕᒥᒡ ᑲ ᑕᔨᒋ ᑕᓐ ᑲ ᐃᔅᐱᔨᒡ
Acts 11.1-18 (Easter-5 Year C)
1ᐊᓐᒡ ᐊᑈᔅᑕᓇᒡ ᑭᔭ ᐊᓐᒡ ᐎᐧᑲᓂᓯᒪᐅᒡ ᐊᓐᑕ ᒍᑎᔭ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᑲ ᑕᒡ ᒋ ᐸᑎᒧᒡ ᐊᓂᔭᔪᐤ ᐃᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᐊ ᑕᑈᑎᒥᔨᒋ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 2ᐃᔅᐱ ᒪᒃ ᐱᑕᕐ ᑲ ᑎᑯᓯᐧᒃ ᐊᓐᑕ ᒋᕈᓯᓕᒥᒡ, ᒋ ᐃᔨᒥᐃᑯᐤ ᐊᓂᔭᔪᐛ ᑲ ᒋᔅᒋᓄᐛᒋᔄᑭᓄᔨᒋ ᑲ ᑕᑈᑎᒥᔨᒋ ᐊᑲ ᓇᐊᔨᑎᒥᔨᒋ ᐅᔭ ᑕᓐ ᑲ ᐃᑎᑦ᙮ 3ᒂ ᐃᑕᒡ ᐊᓂᔭ ᐱᑕᕋ, “ᔅᒋ ᐃᑐᑕᓐ ᐊᓐᑕ ᐊᓐᒡ ᐃᔪᒡ ᐊ ᑕᒡ ᐊᑲ ᒍᐤ ᐃᑎᔅᑲᓇᓯᒡ, ᐛᐛᒡ ᑭᔭ ᔅᒋ ᐎᒋᒥᒋᓱᒪᐅᒡ !”
4ᐊᑯ ᐱᑕᕐ ᒂ ᐎᑎᒧᐛᑦ ᒥᓯᐛ ᑕᓐ ᓇᐊᐤ ᑲ ᐸᒋ ᐃᔅᐱᔨᒡ ᐊ ᐃᑕᑦ, 5“ᒪᒂᒡ ᑲ ᐊᔭᒥᐊᔭᓐ ᐊᓐᑕ ᒍᐸᒡ, ᓂᒋ ᐛᐸᑎᔨᑯᐅᓐ ᐛᐸᑎᔨᐛᐅᓐ᙮ ᓂᒋ ᐛᐸᑕᓐ ᒐᒂᓐ ᐊ ᐸᒋ ᔭᓯᒥᑲᒡ ᒋᒋᒋᓯᑯᒡ ᐅᒋ, ᒧᔭᒻ ᒥᒋᓱᐛᑭᓂᐱᒍᐎᔭᓐ ᐊ ᐃᓯᓇᒂᒡ᙮ ᐊᑯ ᒂ ᐸᒋ ᓂᑲᐱᔨᒡ ᐊᓐ ᐊᓐᑕ ᐅᑎᔅᑯᐤ ᐊ ᑕᔭᓐ᙮ 6ᐃᔅᐱ ᒪᒃ ᒥᒋᒪ ᑲ ᐱᑕᔭᐸᑎᒪᓐ ᓂᒋ ᐛᐱᒪᐅᒡ ᓂᓇᐧᑯᐤ ᐊ ᐃᓯᓇᑯᓯᒡ ᐊᐛᓯᓯᒡ ᑭᔭ ᒥᓐᑐᓯᒡ ᑭᔭ ᐱᔭᓯᓯᒡ ᐊᓐᑕ ᐊ ᑕᒡ᙮ 7ᐊᑯ ᒂ ᐸᑐᐅᒃ ᐊᐛᓐ ᐊ ᐸᒋ ᐃᔨᒥᐃᑦ ᐊ ᐃᓯᑦ, ‘ᐱᑕᕐ ᐱᓯᑯ, ᓂᐸᐊᑕᒐ ᑭᔭ ᒐ ᒥᒋᔨᓐ ᐊᓐ ᑲ ᓂᐸᑕᔨᓐ᙮’ ”
8“ᓂᒋ ᐃᔅᒋᔄᓐ ᒪᒃ, ‘ᓇᒪ ᓂᑭ ᐅᒋ ᐃᑐᑕᓐ ᐅ ᐅᑎᐸᔨᒋᒐᐤ, ᓇᒪ ᓂᑕ ᓂ ᐅᒋ ᒥᒋᓐ ᒐᒂᓐ ᐊ ᐎᓇᒡ ᐊ ᐃᑕᔨᑕᒂᒡ ᒍᐤ ᐎᓱᐛᐅᓂᒡ ᑲ ᐎᑕᒂᒡ ᐊᑲ ᓂᑕ ᒋᐸ ᐅᒋ ᒥᒋᓇᓄᐤ᙮’ ”
9“ᐊᑯ ᒥᓐ ᒂ ᐅᒋ ᐸᑕᒂᒡ ᐸᑕᑯᓱᐅᓐ ᒋᒋᒋᓯᑯᒡ ᐅᒡ ᐊ ᐃᔅᒋᔄᑦ ᐊᐛᓐ, ‘ᐊᑲᐎᔾ ᐃᔅᒋᔄ ᐊ ᐎᓇᒡ ᐊᓂᔭ ᒋᓴᒪᓂᑐᐤ ᐊᒋ ᐃᔅᒋᔄᑦ ᐊ ᐸᔭᐧᑭᓂᔨᒡ᙮’ 10ᓂᔍᐤ ᒪᒃ ᓂᒋ ᐃᔨᒥᐃᑯᓐ, ᐊᑯ ᒥᓐ ᑲᐤ ᐊᓐᑕ ᒋᒋᒋᓯᑯᒡ ᑲ ᐃᓯ ᐅᒋᐱᔨᑕᑭᓄᐅᒡ ᐊᓐ ᒥᒋᓱᐛᑭᓂᐱᒍᐎᔭᓐ᙮”
11“ᒪᒂᒡ ᒪᒃ ᐅ ᓂᔅᑐ ᓇᐸᐅᒡ ᒧᔭᒻ ᒋ ᑎᑯᓯᓄᐅᒡ ᐊᓐᑕ ᓯᓴᕆᔭᒡ ᐊ ᐅᑐᑕᒡ ᐊᒋ ᐸᒋ ᐃᑎᓴᐛᑭᓄᐅᒡ ᐊᓐᑕ ᐊᓐ ᒥᒋᐛᐱᒡ ᑲ ᑕᔭᓐ᙮ 12ᑲ ᐸᔭᒋᓯᑦ ᐊᒐᐧᒄ ᓂᒋ ᐃᑎᒄ ᒐᒋ ᐎᒐᐅᒥᒋ ᐅᔭ ᓇᐸᐛ ᑭᔭ ᒐ ᐊᑲ ᒋ ᓇᑲᐎᔭᓐ ᒐᒋ ᐎᒐᐅᒂᐤ ᒥᒄ ᐊᓂᔭ ᐅᒋ ᐊᑲ ᒍᐤ ᐃᑎᔅᑲᓇᓯᒡ᙮ ᐊᑯ ᒪᒃ ᒂ ᐎᒐᐅᒂᐤ᙮ ᒪᒃ ᑭᔭ ᐅᒡ ᐊᓱᑕᒡ ᑯᑎᑭᒡ ᒋᐧᑲᓂᓯᓄᐅᒡ ᑲ ᑕᑈᑕᒡ ᒍᐸᒡ ᑲ ᐅᒋᒡ ᓂᒋ ᐎᒐᐅᑯᒡ ᐊᓐᑕ ᓯᓴᕆᔭᒡ ᐊ ᐃᑐᑕᐅᒡ᙮ ᒥᓯᐛ ᒪᒃ ᓂᒋ ᐱᒐᓇᓐ ᐊᓐᑕ ᑯᕐᓂᓕᔭᔅ ᐎᒋᒡ᙮ 13ᐊᑯ ᒪᒃ ᑯᕐᓂᓕᔭᔅ ᒂ ᐎᑎᒧᔨᒥᑦ ᐊᒋ ᐛᐱᒪᒂ ᐊᓐᒋᓇ ᐊ ᓂᐳᔨᒋ ᐊᓐᑕ ᐱᑎᑭᒥᒡ ᐎᒋᒡ ᐊ ᐃᑎᑯᑦ, ‘ᐃᑎᓴᐛᐤ ᐊᐛᓐ ᓇᑕ ᒍᐸᒡ ᒐ ᐎᓴᒪᑦ ᐊᓂᔭ ᓇᐸᐛ ᓴᐃᒥᓐ ᐱᑕᕐ ᑲ ᐃᓯᓂᐧᑲᓱᔨᒋ᙮ 14ᐅ ᒪᒃ ᓇᐸᐤ ᓴᐃᒥᓐ ᐱᑕᕐ ᒋᑭ ᐛᐎᑎᒪᒄ ᑕᓐᑕ ᒐᒋ ᐅᒋ ᐱᒪᒋᐅᔨᓐ ᑭᔭ ᒥᓯᐛ ᐊᓐᒡ ᐊᓐᑕ ᐊ ᐸᐃᑯᑕᐅᓯᔨᓐ,’ ᐊᐅᑯᓐ ᑲ ᐃᑎᑯᒂ ᑯᕐᓂᓕᔭᔅ ᐊᓂᔭ ᐊᓐᒋᓇ᙮”
15“ᐃᔅᐱ ᒪᒃ ᑲ ᐸᑎᒪᓐ ᑕᓐ ᑲ ᐃᑎᑯᒂ ᑯᕐᓂᓕᔭᔅ ᐊᓂᔭ ᐊᓐᒋᓇ, ᐊᑯ ᑲ ᒋᒋ ᐃᔨᒥᔭᓐ᙮ ᒪᒂᒡ ᒪᒃ ᐊ ᐃᔨᒥᔭᓐ ᑲ ᐸᔭᒋᓯᔨᒡ ᐊᒐᐧᒄ ᒋ ᐸᒋ ᔭᓯᑐᑕᑯᐅᒡ ᒧᔭᒻ ᒋᔭᓄᐤ ᐅᔅᑭᒡ ᑲ ᒥᔨᑯᐅᔭᐧᒄ ᑲ ᐸᔭᒋᓯᑦ ᐊᒐᐧᒄ᙮ 16ᐊᑯ ᒂ ᐅᒋ ᒋᔅᒋᓯᔭᓐ ᐅᔭ ᑲ ᐃᔅᒋᔄᑦ ᐅᑎᐸᔨᒋᒐᐤ, ‘ᒠᓐ ᔅᒋ ᓯᑲᐃᑕᑯᐛᐤ ᓂᐱᔪᐤ, ᒥᒄ ᒪᒃ ᒋᓴᒪᓂᑐᐤ ᒋᑭ ᓯᑲᐃᑕᑯᐛᐤ ᑲ ᐸᔭᒋᓯᔨᒋ ᐊᒐᒂ,’ ᐊᑯᓐ ᑲ ᐃᔅᒋᔄᒂ ᐅᑎᐸᔨᒋᒐᐤ᙮ 17ᒐᔅᑎᓇᔅ ᒪᒃ ᒋᓴᒪᓂᑐᐤ ᒋ ᒥᔭᐤ ᐊᓂᔭᔪᐛ ᐃᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᐊᓂᔭᔪᐛ ᑲ ᐸᔭᒋᓯᔨᒋ ᐊᒐᒂ ᒧᔭᒻ ᒋᔭᓄᐤ ᑲ ᐃᓯ ᒥᔨᑯᐅᔭᐧᒄ ᐃᔅᐱ ᑲ ᑕᑈᔭᔨᒪᐧᒄ ᐅᑎᐸᔨᒋᒐᐤ ᒋᓴᔅ ᙭᙮ ᐊᐛᓐ ᒪᒃ ᓂᔾ ᒐᒋ ᒋᐱᒋᐃᒃ ᒋᓴᒪᓂᑐᐤ ᑕᓐ ᐛ ᐃᑎᑦ,” ᒋ ᐃᑕᐤ ᐱᑕᕐ ᐊᓂᔭ ᐃᔪᐛ᙮
18ᐅᔭ ᒪᒃ ᐊ ᐸᑐᐛᒡ ᐊ ᐃᓯ ᐎᑎᒥᔨᒋ ᓇᒪ ᐅᒋ ᓂᔅᑯᔅᑐᐛᐅᒡ᙮ ᒋ ᒋᔅᑕᒋᒪᐅᒡ ᒋᓴᒪᓂᑐᐛ ᐊ ᐃᔅᒋᔄᒡ, “ᒋᓴᒪᓂᑐᐤ ᒋ ᓇᐃᐱᔨᑕᐤ ᐊᓂᔭ ᐃᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᒐᒋ ᒂᔅᑲᑎᓯᔨᒋ ᑭᔭ ᒐᒋ ᐱᒪᒋᐅᔨᒋ᙮”
ᑲ ᑕᑈᑕᒡ ᐊᓐᑕ ᐊᓐᑎᔭᑭᒡ ᑲ ᑕᒡ
19ᐃᔅᐱ ᒪᒃ ᑲ ᓂᐸᐊᑭᓄᐅᑦ ᔅᑎᐱᓐ, ᒋ ᓂᓇᐧᑲᒋᐊᑭᓄᐅᒡ ᐊᓐᒡ ᑲ ᑕᑈᑕᒡ, ᒥᓯᐛ ᒪᒃ ᓂᓇᐧᑯᐤ ᒋ ᐃᑎᓯᒧᒡ᙮ ᐱᔅᒐ ᒪᒃ ᐛᔪᐤ ᒋ ᐃᑐᑕᐅᒡ ᒧᔭᒻ ᐊᓐᑕ ᐊᔅᒋᒡ ᐳᓂᓯᔭ ᑭᔭ ᓴᐃᐳᕋᔅ ᑲ ᐃᓯᓂᐧᑲᑕᔨᒋ ᑭᔭ ᐊᓐᑕ ᐅᑕᓇᒡ ᐊᓐᑎᔭᒃ, ᒥᒄ ᒪᒃ ᐊᓂᔭ ᒍᐤ ᐃᔪᐛ ᒋ ᐛᐎᑎᒧᐛᐅᒡ ᒥᔽᒋᒧᐅᓂᔪᐤ᙮ 20ᒥᒄ ᒪᒃ ᐱᔅᒐ ᐊᓐᒡ ᑲ ᑕᑈᑕᒡ ᐊᓐᑕ ᓴᐃᐳᕋᔅ, ᑭᔭ ᓴᐃᕆᓐ ᑲ ᐅᒋᒡ ᒋ ᐃᑐᑕᐅᒡ ᐊᓐᑕ ᐊᓐᑎᔭᑭᒡ ᐊᑯ ᒂ ᐎᑎᒧᐛᒡ ᐊᓂᔭ ᑯᕆᒃ ᐃᔪᐤ ᒥᔽᒋᒧᐅᓂᔪᐤ ᒋᓴᓴ ᐊ ᑎᐸᔨᒋᒐᔨᒋ᙮ 21ᒋ ᒥᔭᑭᓄᐎᒡ ᒪᒃ ᐅᑎᐸᔨᒋᒐᐛ ᐅᓱᐧᑲᑎᓯᐅᓂᔪᐤ, ᒥᒐᑦ ᒪᒃ ᐊᐛᓐᒋ ᒋ ᑕᑈᔭᔨᒪᐅᒡ ᑭᔭ ᒋ ᓇᓴᐛᐅᒡ ᐅᑎᐸᔨᒋᒐᐤ᙮
22ᐃᔅᐱ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᐊᓐᑕ ᒋᕈᓯᓕᒥᒡ ᑲ ᑕᒡ ᑲ ᐸᑕᒡ ᐅᔭ ᐊ ᐃᔅᐱᔨᒡ ᒋ ᐃᑎᓴᐛᐅᒡ ᐸᕐᓇᐸᓴ ᐊᓐᑕ ᐊᓐᑎᔭᑭᒡ᙮ 23ᐃᔅᐱ ᒪᒃ ᑕᑯᓯᐧᒃ ᐸᕐᓇᐸᔅ ᐊᓐᑕ, ᐎᔭᐸᑎᒧᐛᑦ ᒪᒃ ᒋᓴᒪᓂᑐᐤ ᑕᓐ ᐊ ᐃᓯ ᓱᐛᔨᒪᔨᒋ ᐊᓂᔭᔪᐛ ᐃᔪᐛ, ᒋ ᒥᔽᔨᑎᒻ᙮ ᒋ ᓯᒋᒪᐤ ᒪᒃ ᒐᒋ ᐊᔨᒋᑲᐳᔨᒋ ᑭᔭ ᓱᒃ ᒧᔅ ᒐ ᐎ ᓂᓇᐃᑎᒪᔨᒋ ᐅᑎᐸᔨᒋᒐᐛ᙮ 24ᐛᔅ ᐅ ᓇᐸᐤ ᐸᕐᓇᐸᔅ ᓇᔅᒡ ᒋ ᑯᐃᔅᑯᑕᑎᓯᐤ, ᑭᔭ ᒋ ᓴᑭᔅᒋᓇᔅᑲᑯᐤ ᑲ ᐸᔭᒋᓯᔨᒋ ᐊᒐᒂ, ᑭᔭ ᒋ ᓱᒐᔨᑕᑯᓂᔪᐤ ᐅᑕᑈᑎᒧᐅᓐ᙮ ᐊᑯ ᒪᒃ ᐊᑐᐎᔅ ᒥᒐᑦ ᐃᔪᒡ ᑲ ᑕᑈᔭᔨᒪᒡ ᐅᑎᐸᔨᒋᒐᐤ ᒋᓴᓴ᙮
25ᐊᑯ ᐸᕐᓇᐸᔅ ᒂ ᐃᑐᑕᑦ ᐊᓐᑕ ᑕᕐᓯᔅ ᒐᒋ ᓇᓂᑐᐛᔨᒪᑦ ᓴᓚ᙮ 26ᐃᔅᐱ ᒪᒃ ᒪᔅᑯᐛᑦ, ᒋ ᐸᓱᐛᐤ ᐊᓐᑕ ᐊᓐᑎᔭᑭᒡ᙮ ᑕᐱᔅᑯᓐ ᒪᒃ ᐊ ᓂᓯᒡ ᓇᔅᒡ ᐸᐃᒄ ᐱᐳᓇ ᒧᔅ ᒋ ᓂᔅᑐᓇᐅᒡ ᐊᓂᔭ ᐅᒪᒧᐊᔭᒥᐊᐛ ᒐᒋ ᒪᒧᐤ ᐊᔭᒥᐊᒡ ᑭᔭ ᒥᒐᑦ ᐊᓂᔭ ᒋ ᒋᔅᑯᑎᒧᐛᐅᒡ᙮ ᐊᑯᑕ ᒪᒃ ᐊᓐᑕ ᐊᓐᑎᔭᑭᒡ ᒪᐅᒡ ᓂᔅᑎᒻ ᙭ᔅᑎᔭᓂᒡ ᑲ ᐃᓯᓂᐧᑲᑕᑭᓄᐎᒡ ᐊᓐᒡ ᑲ ᑕᑈᔭᔨᒪᒡ ᒋᓴᓴ᙮
27ᒪᒂᒡ ᒪᒃ ᐅᔭ ᑲ ᐃᑎᒡ ᐸᕐᓇᐸᔅ ᑭᔭ ᓴᓪ ᐊᓐᑕ ᐊᓐᑎᔭᑭᒡ, ᐱᔅᒐ ᐊᓐᒡ ᐅᒋᔅᒋᐛᐃᒐᓱᒡ ᒋ ᐃᑐᑕᐅᒡ ᐊᓐᑕ ᐊᓐᑎᔭᑭᒡ, ᒋᕈᓯᓕᒥᒡ ᐊ ᐅᑐᑕᒡ᙮ 28ᐸᐃᒄ ᒪᒃ ᐊᓐ ᐊᑲᐸᔅ ᐊ ᐃᓯᓂᐧᑲᓱᑦ, ᒋ ᐱᓯᑯᐤ ᐊ ᒥᔨᑯᑦ ᑲ ᐸᔭᒋᓯᔨᒋ ᐊᒐᒂ ᒐᒋ ᐃᓯ ᓂᑲᓐ ᐎᑕᐧᒃ ᒐ ᐱᒥᐱᔨᒡ ᐊ ᑯᐅᐧᑭᑕᓄᐎᒡ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐊᔅᒋᔪᐤ᙮ ᐊᐅᑯᓐ ᒪᒃ ᑕᑈ ᑲ ᐃᔅᐱᔨᒡ ᒪᒂᒡ ᑲᓗᑎᔭᓴ ᑲ ᒋᓴᐅᒋᒪᐎᔨᒋ᙮ 29ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒥᓯᐛ ᐸᐸᐃᒄ ᐊ ᑎᓯᒡ ᒂ ᐎᔭᔨᑕᒡ ᓱᒃ ᒐ ᐎᒋᐊᒡ ᑕᓐ ᐊ ᐃᓯ ᓂᑐᐛᔨᑎᒥᔨᒡ ᐊᓂᔭ ᐎᐧᑲᓂᓱᐛᐛ ᐊᓐᑕ ᒍᑎᔭ ᐊᔅᒋᒡ ᑲ ᑕᔨᒋ᙮ 30ᐊᐅᑯᓐ ᒪᒃ ᑲ ᐃᑎᒡ᙮ ᒋ ᐃᑎᓴᐛᐅᒡ ᐸᕐᓇᐸᓴ ᑭᔭ ᓴᓚ ᒐᒋ ᐃᑐᑕᔨᒋ ᐊᓂᔭ ᓱᓇᔭᔪᐤ ᐊᓐᑕ ᒋᕈᓯᓕᒥᒡ ᒐᒋ ᒥᔭᔨᒡ ᐊᓂᔭᔪᐛ ᑲ ᓂᑲᓂᔅᑭᒥᔨᒋ ᐊᔭᒥᐊᐅᒋᐛᐱᔪᐤ᙮
Currently Selected:
ᐊᑈᔅᑕᓇᒡ 11: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
