ᐊᑈᔅᑕᓇᒡ 10
10
ᐱᑕᕐ ᑲ ᓂᑐᐛᐱᒪᑦ ᑯᕐᓂᓕᔭᓴ
1ᒋ ᑕᐤ ᓇᐸᐤ ᑯᕐᓂᓕᔭᔅ ᐊ ᐃᓯᓂᐧᑲᓱᑦ ᐊᓐᑕ ᐅᑕᓇᒡ ᓯᓴᕆᔭ ᑲ ᐃᓯᓂᐧᑲᑕᔨᒡ, ᕈᒻ ᓂᑐᐱᔪᐅ-ᐅᒋᒪᐛ ᐊ ᐃᓯ ᐊᑐᔅᒐᑦ, ᐊ ᓂᑲᓂᔅᑯᐛᑦ ᐊᓯᒪᑭᓂᓴ ᐊᓐᑕ ᐃᑕᓕ ᐊᔅᒋᒡ ᐊ ᐅᒋᔨᒋ᙮ 2ᒋ ᐊᔭᒥᐊᐛᑎᓯᔪᐤ ᒪᒃ ᑭᔭ ᒥᓯᐛ ᐊᓐᑕ ᐊ ᐸᐃᑯᔅᑲᓇᓯᑦ ᒋ ᐊᔭᒥᐊᔅᑐᐛᐅᒡ ᒋᓴᒪᓂᑐᐛ᙮ ᒥᔅᑎ ᒪᒃ ᒋ ᐎᒋᐊᐤ ᐊᓂᔭ ᑲ ᒋᔅᑎᒪᑎᓯᔨᒋ ᒍᐤ ᐃᔪᐛ᙮ ᑭᔭ ᒧᔅ ᒋ ᐊᔭᒥᐊᐤ᙮ 3ᐸᐃᒂᐤ ᑲᒋ ᐊᐱᑕᒋᓯᑲᔨᒡ ᒂᔄᓐ ᓂᔅᑐ ᐊ ᐃᔅᐱᔨᒡ ᐱᓯᒧᐧᑲᓇ, ᒋ ᐛᐸᑎᔭᑭᓄᐤ ᐛᐸᑎᔨᐛᐅᓂᔪᐤ, ᓇᔅᒡ ᐊᒋ ᐛᐱᒪᑦ ᒋᓴᒪᓂᑐᐛ ᐅᑦ ᐊᓐᒋᓂᒥᔪᐛ ᐊ ᐸᒋ ᐱᒐᔨᒋ, ᐊ ᐃᑎᑯᑦ ᒪᒃ, “ᑯᕐᓂᓕᔭᔅ᙮”
4ᒋ ᒥᔅᑎ ᑭᓄᐛᐱᒪᐤ ᒪᒃ ᐊᓂᔭ ᐊᓐᒋᓇ ᐊ ᑯᔅᑕᒋᑦ ᐊᑯ ᒂ ᐃᑕᑦ, “ᒐᒂᓐ, ᐅᑎᐸᔨᒋᒐᐤ ?”
ᐊᑯ ᒂ ᐃᑎᑯᑦ ᐊᓂᔭ ᐊᓐᒋᓇ, “ᒋᓴᒪᓂᑐᐤ ᒋ ᓇᐊᔨᑎᒥᐃᑯᐤ ᑕᓐ ᑲ ᐃᓯ ᐊᔭᒥᐊᔨᓐ, ᑭᔭ ᑕᓐ ᑲ ᐃᓯ ᒥᔪ ᐎᒋᐃᑥᐤ ᑯᑎᑭᒡ ᐊᐛᓐᒋ, ᓇᒪ ᒪᒃ ᒋᑭ ᒋ ᐅᓂᒋᔅᒋᑕᒄ᙮ 5ᐃᑎᓴᐅᒡ ᒪᒃ ᓇᐸᐅᒡ ᐊᓐᑕ ᒍᐸᒡ ᒐᒋ ᐎᓴᒪᒡ ᓴᐃᒥᓇ ᐊᓂᔭ ᓇᐸᐛ ᐱᑕᕐ ᑲ ᐃᓯᓂᐧᑲᑕᑭᓄᔨᒋ᙮ 6ᐊᓐᑕ ᑕᐤ ᐊᓂᔭ ᑲ ᒋᓯᓂᒐᔨᒋ ᓴᐃᒥᓇ ᑲ ᐃᓯᓂᐧᑲᓱᔨᒋ ᒥᒋᒪ ᓯᓱᒡ ᐎᓂᐸᑯᒡ ᑲ ᐎᒋᔨᒋ᙮”
7ᐃᔅᐱ ᒪᒃ ᑲᒋ ᔅᑐᑕᔨᒋ ᐊᓂᔭ ᐊᓐᒋᓇ ᑲ ᐃᔨᒥᐃᑯᑦ, ᐊᑯ ᑯᕐᓂᓕᔭᔅ ᒂ ᐎᓴᒪᑦ ᓂᓱ ᐅᑦ ᐊᐸᒐᐊᑭᓐ, ᑭᔭ ᐸᐃᒄ ᐊᓯᒪᑭᓂᓴ ᐊ ᐊᔭᒥᐊᐛᑎᓯᔨᒋ, ᐊᓂᔭ ᒧᔅ ᑲᒋ ᓂᓇᑭᑐᐛᔨᒥᑯᑦ᙮ 8ᑯᕐᓂᓕᔭᔅ ᒂ ᐎᑎᒧᐛᑦ ᒥᓯᐛ ᑕᓐ ᑲ ᐃᑎᑯᑦ ᐊᓂᔭ ᐊᓐᒋᓇ ᑭᔭ ᒂ ᐃᑎᓴᐛᑦ ᐊᓐᑕ ᐊᓂᔭ ᐅᑕᓂᔪᐤ ᒍᐸ ᑲ ᐃᓯᓂᐧᑲᑕᔨᒡ᙮
9ᒥᓐ ᒪᒃ ᐎᔭᐸᓂᔨᒡ ᓴᓯᑲᓐ ᑲᒋ ᐊᐱᑕᒋᓯᑲᔨᒡ ᐊᑯ ᒋ ᐸᔄᐸᑎᒧᒐᓂᒋ ᐊᓂᔭ ᐅᑕᓂᔪᐤ ᒍᐸ ᑲ ᐃᓯᓂᐧᑲᑕᔨᒡ᙮ ᐊᑯᑕ ᒪᒃ ᑭᔭ ᐊᓐᑕ ᑲ ᐊᔭᒥᐊᑦ ᐱᑕᕐ ᑕᐧᑯᒡ ᐊᓐᑕ ᐊᓂᔭ ᒥᒋᐛᐱᔪᐤ ᑲ ᑕᑦ᙮ 10ᒐᒃ ᒪᒃ ᒋ ᓯᐛᔪᐤ ᐊᑯ ᒂ ᐎ ᒥᒋᓱᑦ, ᒪᒂᒡ ᒪᒃ ᐊ ᐃᔅᐱᓯᓇᓄᐎᒡ ᐊ ᐱᒥᓄᐅᑕᑭᓄᐅᑦ ᒋ ᐛᐸᑎᔭᑭᓄᐤ ᐛᐸᑎᔨᐛᐅᓂᔪᐤ᙮ 11ᒋ ᐛᐸᑎᒻ ᒋᓯᑯᔪᐤ ᐊ ᔪᑕᐱᔨᒡ, ᐊᑯ ᒂ ᐛᐸᑕᐧᒃ ᒐᒂᔪᐤ ᒧᔭᒻ ᒥᒋᓱᐛᑭᓂᐱᒍᐎᔭᓂᔪᐤ ᐊ ᐃᓯᓇᑯᓂᔨᒡ ᐊᓐᑕ ᐊ ᑭᒋᒐᔭᑭᓂᔨᒡ ᐊ ᐅᒡ ᐸᒋ ᔭᓯᓂᑭᓄᐎᒡ ᐊᓐᑕ ᐃᔅ ᐊᔅᒋᒡ᙮ 12ᐊᓐᑕ ᒪᒃ ᐅᔭ ᑲ ᐸᒋ ᔭᓯᓂᑭᓄᐎᒡ ᓂᓇᐧᑯᐤ ᐊᐛᓯᓴ ᐊ ᐃᓯᓇᑯᓯᔨᒋ ᑭᔭ ᒥᓐᑐᓴ ᑭᔭ ᐱᔭᓱᐛ ᒋ ᑕᔪᐛ ᐊᓐᑕ᙮ 13ᐊᑯ ᑲ ᐅᒋ ᐸᑐᐛᑦ ᐊᐛᔪᐛ ᐊ ᐃᑎᑯᑦ, “ᐱᑕᕐ, ᐱᓯᑯ, ᒐ ᓂᐱᑕᒐᔨᓐ, ᒐ ᒥᒋᓱᔨᓐ ᒪᒃ᙮”
14ᐊᑯ ᐱᑕᕐ ᒂ ᐃᔅᒋᔄᑦ, “ᓇᒪ ᓂᑭ ᒋ ᑐᑕᓐ ᐅ, ᑎᐸᔨᒋᒐᓱᐤ᙮ ᓇᒪ ᓂᑕ ᓂᑭ ᐅᒋ ᒥᒋᓐ ᒐᒂᓐ ᐊ ᐊᑲ ᐃᑕᔨᑕᒂᒡ ᒐᒋ ᒥᒋᓇᓄᐅᒡ᙮”
15ᐊᑯ ᒥᓐ ᒂ ᐸᑐᐛᑦ ᐊᐛᔪᐛ ᐊ ᐃᑎᑯᑦ, “ᐊᑲᐎᔾ ᐃᔅᒋᔄ ‘ᐊ ᐎᓇᒡ’ ᐊᓂᔭ ᒋᓴᒪᓂᑐᐤ ᐊᒋ ᐃᔅᒋᔄᑦ ‘ᐊ ᐸᔭᐧᑭᓂᔨᒡ᙮’ ”
16ᓂᔍᐤ ᒪᒃ ᒋ ᐃᑎᑎᒻ ᐊ ᐸᑐᐛᑦ ᐊᐛᔪᐛ ᐊ ᐃᔨᒥᐃᑯᑦ ᐊᑯ ᑭᔭ ᐊᓂᔭ ᒥᒋᓱᐛᑭᓂᐱᒍᐎᔭᓂᔪᐤ ᑲ ᐃᓯᓇᑯᓂᔨᒡ ᒥᓐ ᑲᐤ ᒋ ᐅᐱᔪᐤ ᐊᓐᑕ ᐃᔅ ᐃᔅᐱᒥᒡ᙮
17ᒪᒂᒡ ᒪᒃ ᐱᑕᕐ ᐊ ᒪᒥᑐᓇᔨᑕᐧᒃ ᑕᓐ ᐊᓯ ᐎᑎᒪᒐᒥᑭᓂᔨᒡ ᐅᔭ ᑲ ᐃᓯ ᐛᐸᑎᔭᑭᓄᐅᑦ, ᐊᓐᒡ ᓇᐸᐅᒡ ᑯᕐᓂᓕᔭᓴ ᑲ ᐸᒋ ᐃᑎᓴᐅᑯᒡ ᒂ ᒥᔅᑭᒺᒡ ᑕᓐᑕ ᐛᒋᔨᒋ ᓴᐃᒥᓇ, ᐊᑯ ᒪᒃ ᐊᓐᑕ ᐊ ᐅᒋ ᐱᒐᓄᐎᒡ ᒂ ᐸᒋ ᓂᐳᐅᒡ᙮ 18ᒂ ᑕᑈᒡ ᐊ ᐃᔅᒋᔄᒡ, “ᐊᑯᑕ ᐊ ᐅᑕ ᐛᒋᑦ ᓴᐃᒥᓐ ᐱᑕᕐ ?”
19ᐱᑕᕐ ᒪᒃ ᐊᔅᒄ ᒋ ᒪᒥᑐᓇᔨᑎᒻ ᑕᓐ ᒋᐸ ᒋ ᐃᓯ ᐎᑎᒪᒐᒥᑭᓂᔪᐤ ᐊᓂᔭᔪᐤ ᑲ ᐃᓯ ᐛᐸᑎᔭᑭᓄᐅᑦ᙮ ᐊᑯ ᒂ ᐃᑎᑯᑦ ᑲ ᐸᔭᒋᓯᔨᒋ ᐊᒐᒂ, “ᓂᑐᑕ ᒪ, ᓂᔅᑐᐅᒡ ᐅᑕ ᓇᐸᐅᒡ ᐊ ᐸᒋ ᓇᓂᑐᐛᔨᒥᔅᒡ᙮ 20ᒪᒋ ᓂᑎᒋᐛ ᒐ ᐊᔭᔅᑯᐎᔨᓐ, ᑭᔭ ᐊᑲᐎᔾ ᐅᒋ ᓇᓂᑲᐎ ᒐᒋ ᐎᒐᐅᑥᐤ᙮ ᐛᔅ ᓂᔾ ᓂᒋ ᐸᒋ ᐃᑎᓴᐛᐅᒡ᙮” 21ᐊᑯ ᐱᑕᕐ ᒂ ᓂᑎᒋᐛᑦ, ᐊᑯ ᒂ ᐃᑕᑦ ᐊᓂᔭ ᓇᐸᐛ, “ᐊᐅᒄ ᓂᔾ ᐊᔭᐎᔭᓐ ᑲ ᓇᓂᑐᐛᐱᒥᔭᒄ᙮ ᒐᒂᓐ ᒪᒃ ᐅ ᐛᒡ ᑎᑯᓯᓂᔭᒄ ?”
22ᒋ ᐃᑕᐅᒡ ᒪᒃ ᐊᓐᒡ ᓇᐸᐅᒡ, “ᓄᒋᒪᒥᓇᓐ ᑯᕐᓂᓕᔭᔅ ᑲ ᓂᑲᓂᔅᑯᐛᑦ ᕈᒻ ᐊᓯᒪᑭᓂᓴ ᓂᒋ ᐸᒋ ᐃᑎᓴᐅᑯᓇᓐ᙮ ᒥᔽᔨᑕᑯᓱᐤ ᐅ ᓇᐸᐤ, ᑭᔭ ᒋᔅᑕᔨᒪᐤ ᒋᓴᒪᓂᑐᐛ, ᒥᓯᐛ ᑭᔭ ᒍᐤ ᐃᔪᐛ ᐃᑕᔨᒥᑯᐤ ᐊ ᒥᔽᔨᑕᑯᓯᑦ᙮ ᐸᐃᒄ ᒋᓴᒪᓂᑐᐤ ᑲ ᐸᔭᒋᓯᔨᒋ ᐅᑦ ᐊᓐᒋᓂᒥᔪᐛ ᒋ ᐃᑎᑯᐤ ᒐᒋ ᐎᓴᒥᔅᒃ ᐊᓐᑕ ᐎᒋᒡ ᐊᑯ ᒪᒃ ᒐᒋ ᐸᑕᐧᒃ ᑕᓐ ᐛ ᐃᓯ ᐎᑎᒥᓐ᙮” 23ᐊᑯ ᒪᒃ ᐱᑕᕐ ᑲ ᐎᓴᒪᑦ ᐊᓂᔭ ᓇᐸᐛ ᒐᒋ ᐱᒐᔨᒋ ᐎᒋᒡ᙮
ᒥᓐ ᒪᒃ ᐎᔭᐱᓂᔨᒡ ᐊᑯ ᒂ ᐊᔭᔅᑯᐎᑦ ᒐ ᐎᒐᐛᑦ, ᑭᔭ ᐱᔅᒐ ᐊᓂᔭ ᐎᐧᑲᓂᓯᒪᐛ ᐊᓐᑕ ᒍᐸᒡ ᑲ ᐅᒋᔨᒋ ᒋ ᐎᒐᐅᑯᐅᒡ᙮ 24ᒥᓐ ᐎᔭᐱᓂᔨᒡ ᐊᑯ ᒂ ᑎᑯᓯᓂᒡ ᐊᓐᑕ ᐊᓂᔭ ᐅᑕᓇᔪᐤ ᓯᓴᕆᔭ ᑲ ᐃᓯᓂᐧᑲᑕᔨᒡ, ᐊᑯᑕ ᒪᒃ ᐊᓐᑕ ᑲ ᐊᓱᐛᐱᒥᑯᒡ ᑯᕐᓂᓕᔭᓴ ᑭᔭ ᐊᓂᔭᔪᐛ ᑲ ᐎᓴᒪᔨᒋ ᐎᐧᑲᓂᓯᔪᐛ ᑭᔭ ᐎᒐᐛᑭᓂᔪᐛ ᒐᒋ ᓂᑐᑐᐛᔨᒋ ᐱᑕᕋ᙮ 25ᐃᔅᐱ ᒪᒃ ᐱᑕᕐ ᐊ ᐊᑎ ᐱᒐᐛᑦ ᑯᕐᓂᓕᔭᓴ ᐎᒋᔨᒡ ᒋ ᐸᒋ ᓂᑐᐛᐱᒥᑯᐤ, ᐊ ᓂᐱᔅᑯᐱᔪᐎᔨᒋ ᐅᑎᔅᑯ ᐊ ᑕᑦ ᐊ ᐅᒋᒋᐧᑯᓂᐱᐅᔅᑕᑯᑦ᙮ 26ᒥᒄ ᒪᒃ ᐱᑕᕐ ᒋ ᐱᓯᑯᓇᐤ ᐊ ᐃᑕᑦ, “ᐱᓯᑯ, ᒥᒄ ᐛᔅ ᐊᓐ ᓇᐸᐤ ᑭᔭ ᓂᔾ᙮”
27ᒋ ᐃᔨᒪᐊᐤ ᒪᒃ ᐊᓂᔭ ᑯᕐᓂᓕᔭᓴ ᐊ ᐊᑎ ᐱᒐᑦ ᐊᓂᔭᔪᐤ ᒥᒋᐛᐱᔪᐤ᙮ ᑲ ᐛᐱᒪᑦ ᒥᒐᑦ ᐃᔪᐛ ᐊᒋ ᒪᒧᐎᒂᓂ ᐊᓐᑕ᙮ 28ᐊᑯ ᒂ ᐃᑕᑦ ᐊᓂᔭᔪᐛ ᐃᔪᐛ, “ᒋᑭ ᐊᔨᒧᑎᒪᑎᓇᐛᐤ ᒐᒂᓐ᙮ ᒋ ᒥᔪ ᒋᔅᒐᔨᑕᓇᐛᐤ ᐊᓐᑕ ᒍᐤ ᐊᔭᒥᐊᐅ-ᐎᓱᐛᐅᒥᓯᓇᐃᑭᓂᒡ ᐊᑎᔅᑕᒡ ᐊᐛᓐ ᐊ ᒍᐎᐃᔪᑦ ᒐ ᐊᑲ ᒋ ᒧᐱᔅᑐᐛᑦ ᐊᐛᔪᐛ ᐊᑲ ᒍᐤ ᐃᑎᔅᑲᓇᓯᔨᒋ, ᑭᔭ ᒐ ᐊᑲ ᒋ ᐎᒐᐛᑭᓂᑐᐛᑦ᙮ ᒋᓴᒪᓂᑐᐤ ᒪᒃ ᓂᒋ ᐛᐸᑎᔨᒄ ᒐ ᐊᑲ ᒋ ᐊᑐᐛᔨᒥᒃ ᐊᐛᓐ, ᒐᒋ ᐃᑕᔨᒥᒃ ᐊᑲ ᐸᔭᒋᓯᑦ ᒪᒃ ᐊ ᒥᒋᓯᑦ ᒐᒋ ᐃᑕᔨᒪᒃ᙮ 29ᑲ ᐸᒋ ᐎᓴᒥᔭᒄ ᒪᒃ, ᓇᒪ ᐊᑲ ᓂ ᐅᒋ ᐎ ᐸᒋ ᐃᑐᑕᓐ ᐛᔅ ᑎᐛᒡ ᓂᒋ ᓂᔅᑐᑕᓐ ᑕᓐ ᑲ ᐃᓯ ᐛᐸᑎᔨᑯᐅᔭᓐ ᐊᑯ ᒪᒃ ᑲ ᐸᒋ ᑎᑯᓯᓂᔭᓐ᙮ ᐊᑯ ᒪᒃ ᐛ ᒋᔅᒐᔨᑎᒪᓐ, ᒐᒂᓐ ᐛᒋ ᐎᓴᒥᔭᒄ ?”
30ᐊᑯ ᑯᕐᓂᓕᔭᔅ ᒂ ᐃᑕᑦ, “ᓇᐤ ᒋᓯᑲᐛ ᐅᑕᒡ ᐅᑕ ᐊᐅᑯᓐ ᓴᓯᑲᓐ ᒋ ᐃᔅᐱᔅ ᒋᓯᑲᒐ ᐊᒋ ᐊᔭᒥᐊᔭᓐ ᐊᓐᑕ ᓂᒋᒡ ᓂᔅᑐ ᐊ ᐃᔅᐱᔨᑦ ᐱᓯᒧᐧᑲᓐ ᑲᒋ ᐊᐱᑕᒋᓯᑲᒡ᙮ ᒐᒃ ᓯᔅᒋᑯᒡ ᓇᐸᐤ ᐊ ᐛᔅᑐᐛᔨᒋ ᐅᑦ ᐊᐱᒋᑕᐅᓇ ᒋ ᐅᒋ ᓂᐳᐅᐤ ᐊᓐᑕ ᐊ ᑕᔭᓐ᙮ 31ᐊᑯ ᒂ ᐃᓯᑦ, ‘ᑯᕐᓂᓕᔭᔅ, ᒋᓴᒪᓂᑐᐤ ᒋ ᐸᑎᒻ ᑕᓐ ᑲ ᐃᓯ ᐊᔭᒥᐊᔨᓐ ᑭᔭ ᒋ ᐛᐸᑎᒻ ᑕᓐ ᑲ ᐃᓯ ᐎᒋᐃᑥᐤ ᑯᑎᑭᒡ ᐊᐛᓐᒋ᙮’ 32ᐊᑯ ᒥᓐ ᒂ ᐃᓯᑦ ᐊᓐ ᐊᓐᒋᓐ, ‘ᐃᑎᓴᐅᒡ ᐊᐛᓐᒋ ᐊᓐᑕ ᒍᐸ ᒐᒋ ᐎᓴᒪᒡ ᐊᓂᔭ ᓇᐸᐛ ᓴᐃᒥᓐ ᐱᑕᕐ ᑲ ᐃᓯᓂᐧᑲᓱᔨᒋ᙮ ᐊᓐᑕ ᑕᐤ ᓴᐃᒥᓇ ᐊ ᑕᔨᒋ ᐊᓐ ᑲ ᒋᓯᓂᒐᑦ ᑲ ᐃᓯᓂᐧᑲᑕᑭᓄᐅᑦ, ᐊᓐᑕ ᔭᔭᐤ ᓯᓱᒡ ᐎᓂᐸᑯᒡ ᑲ ᐎᒋᑦ᙮’
33ᑎᐛᒡ ᒪᒃ ᓂᒋ ᐃᑎᓴᐛᐅᒡ ᓇᐸᐅᒡ ᒐᒋ ᐎᓴᒥᔅᒡ, ᒥᔽᓱᐤ ᒪᒃ ᑲ ᑎᑯᓯᓂᔨᓐ᙮ ᐊᑯ ᒪᒃ ᒥᓯᐛ ᐊ ᑕᔭᐧᒄ ᐅᑕ, ᒋᓴᒪᓂᑐᐤ ᑭᔭ ᐊᑯᑕ ᐊ ᑕᑦ, ᐊᑯ ᒪᒃ ᒐ ᐸᑎᒪᒡ ᑕᓐ ᑲ ᐃᑎᓱᒥᔅᒃ ᐅᑎᐸᔨᒋᒐᐤ ᒐᒋ ᐃᔅᒋᔄᐅᑦ᙮”
ᑕᓐ ᑲ ᐃᓯ ᐎᑎᒧᐛᑦ ᐱᑕᕐ ᑯᕐᓂᓕᔭᓴ
Acts 10.34-43 (Easter Sunday Year A, B, C)
34ᐊᑯ ᒪᒃ ᐱᑕᕐ ᐊ ᐃᔨᒥᑦ, ᐊ ᐃᔅᒋᔄᑦ, “ᐊᑯ ᒪᒃ ᓇᔅᑐᑎᒪᓐ ᒋᓴᒪᓂᑐᐤ ᐸᐃᑯᓄᒡ ᒥᓯᐛ ᐊ ᐃᑕᔨᒪᑦ ᐊᐛᔪᐛ᙮ 35ᒪᒃ ᒥᓯᐛ ᐊ ᐃᑎᔅᑲᓇᓯᔨᒋ ᐃᔪᐛ ᐅᒡ ᐊᓂᔭ ᑲ ᓇᓂᒋᔅᑕᑯᑦ ᑭᔭ ᑲ ᐃᑐᑎᒥᔨᒋ ᑯᐃᔅᑯᑕᑎᓯᐅᓂᔪᐤ ᐊᐅᑯᓂ ᐛᑎᓇᑦ᙮ 36ᒋᔅᒐᔨᑕᓇᐛᐤ ᐊᓐ ᐃᔨᒧᐅᓐ ᒋᓴᒪᓂᑐᐤ ᑲ ᐃᑎᓴᒧᐛᑦ ᐃᔅᕋᐃᓪ ᐃᔪᐛ, ᐊ ᐛᐎᑎᒧᐛᑦ ᒥᔽᒋᒧᐅᓂᔪᐤ ᐊᓐᑕ ᒐᒋ ᐅᒋ ᐊᔭᔨᒋ ᒋᔭᒪᔨᑎᒧᐅᓂᔪᐤ ᒋᓴᔅ ᙭ᑕ ᐅᒡ᙮ ᐛᔅ ᐎᔾ ᒋᓴᔅ ᒥᓯᐛ ᐊᔭᐤ ᑎᐸᔨᒋᒐᐅᓂᔪᐤ᙮ 37ᒋᔅᒐᔨᑕᓇᐛᐤ ᑭᔭ ᑕᓐ ᑲ ᐃᔅᐱᔨᒡ ᐊᓐᑕ ᒥᓯᐛ ᒍᑎᔭᒡ, ᑲᓕᓕᒡ ᐊᓐᑕ ᐅ ᒋ ᐅᒋ ᒋᒋᐱᔪᐤ ᐃᔅᐱ ᒠᓐ ᑲ ᐛᐎᑕᐧᒃ ᓯᑲᐃᑕᒐᐅᓂᔪᐤ᙮ 38ᔅᒋ ᐸᑕᓇᐛᐤ ᒋᓴᔅ ᓇᓴᕆᑎᒡ ᑲ ᐅᒋᑦ ᐊᒋ ᑐᒥᓂᑯᑦ ᒋᓴᒪᓂᑐᐛ ᑭᔭ ᐊᒋ ᒥᔨᑯᑦ ᓱᐧᑲᑎᓯᐅᓂᔪᐤ ᑭᔭ ᑲ ᐸᔭᒋᓯᔨᒋ ᐊᒐᒂ᙮ ᒥᒄ ᒪᒃ ᑕᓐᑕ ᑲ ᐊᑎ ᐃᑕᑦ ᒋ ᒥᔪᑐᑎᒪᒐᐤ ᑭᔭ ᒋ ᒥᓏᒋᐊᐤ ᐊᓂᔭ ᐃᔪᐛ ᒥᒋᒥᓂᑐᐛ ᑲ ᓂᓇᐧᑲᒋᐃᑯᔨᒋ ᐛᔅ ᒧᔅ ᒋ ᐎᒐᐅᑯᐤ ᒋᓴᒪᓂᑐᐛ᙮”
39“ᓂᔭᓐ ᒪᒃ ᓂ ᑎᐸᑕᓇᓐ ᒥᓯᐛ ᒐᒂᓇ ᑲ ᐃᑐᑕᐧᒃ ᑕᐱᔅᑯᓐ ᒍᐤ ᐃᔪᐛ ᐅᑦ ᐊᔅᒋᔨᒡ ᑭᔭ ᒋᕈᓯᓕᒥᒡ, ᐊᓂᔭ ᑲᒋ ᓂᐸᐃᑯᑦ ᑭᔭ ᑲᒋ ᐊᑯᑎᑯᑦ ᒥᔅᑎᑯᒡ᙮ 40ᐎᔾ ᒋᓴᒪᓂᑐᐤ ᒋ ᐅᓂᔅᑲᓇᐤ ᑲ ᓂᔅᑐ ᒋᓯᑲᔨᒡ, ᑭᔭ ᒧᓴ ᒋᓄᑯᐊᐤ᙮ 41ᓇᒪᐎᔾ ᑭᑈ ᒥᓯᐛ ᐊᐛᔪᐛ ᐅᒋ ᓄᑯᓯᔅᑐᐛᐤ ᒋᓴᔅ, ᒥᒄ ᐊᓂᔭ ᐊᐛᔪᐛ ᒋᓴᒪᓂᑐᐛ ᑲ ᐅᑎᓂᑯᔨᒋ ᒐᒋ ᑎᐸᒋᒥᑯᑦ᙮ ᑭᔭ ᓂᒋ ᐎᒋ ᒥᒋᓱᒪᓇᓐ ᑲᒋ ᐅᓂᔅᑲᑦ ᓂᐳᐅᓂᒡ ᐅᒋ᙮ 42ᓂᒋ ᐃᑎᓱᒥᑯᓇᓐ ᒋᓴᔅ ᒐᒋ ᐛᐎᑎᒧᒥᒋᒋ ᐃᔪᐛ ᒥᔽᒋᒧᐅᓂᔪᐤ ᑭᔭ ᒐᒋ ᐎᑎᒧᒥᒋᒋ ᐎᔾ ᒋᓴᔅ ᐊᒋ ᐅᑎᓂᑯᑦ ᒋᓴᒪᓂᑐᐛ ᒐᒋ ᑎᐸᔅᑯᓇᑦ ᑲ ᐱᒪᑎᓯᔨᒋ ᑭᔭ ᐊᓂᔭ ᑲ ᓂᐱᔨᒋ᙮ 43ᒋ ᑎᐸᒋᒥᑯᐤ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᐛ ᑲ ᐃᔅᒋᔄᔨᒋ, ᐎᔾ ᐅᑦ ᐃᓯᓂᐧᑲᓱᐅᓂᔨᒡ ᐅᒡ ᒥᒄ ᐊᐛᓐ ᒐ ᑕᑈᔭᔨᒪᒂ ᒋᑭ ᐛᐸᔨᑎᒧᐛᑭᓄᐤ ᐅᒥᒋᑥᐅᓇ᙮”
ᑲ ᐸᔭᒋᓯᔨᒋ ᐊᒐᒂ ᒋ ᒥᔭᑭᓄᐎᒡ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮
Acts 10.44-48 (Easter-6 Year B)
44ᒪᒂᒡ ᒪᒃ ᐱᑕᕐ ᐊ ᐃᔨᒪᐊᑦ ᐊᓂᔭᔪᐛ ᐃᔪᐛ, ᑲ ᐸᔭᒋᓯᔨᒋ ᐊᒐᒂ ᒋ ᐸᒋ ᔭᓯᔪᐛ ᐊᓐᑕ ᐊ ᑕᒡ ᐊᓐᒡ ᒥᓯᐛ ᑲ ᓂᑐᑐᐛᒡ᙮ 45ᐊᓐᒡ ᒪᒃ ᒍᐤ ᐃᔪᒡ ᑲ ᑕᑈᑕᒡ, ᐊᓐᒡ ᑲ ᐸᒋ ᐎᒐᐛᒡ ᐱᑕᕋ, ᒋ ᒥᔅᑲᑕᔨᑎᒥᐃᑯᐅᒡ ᒋᓴᒪᓂᑐᐛ ᐊ ᒥᔭᔨᒋ ᑲ ᐸᔭᒋᓯᔨᒋ ᐊᒐᒂ ᐊᓂᔭ ᐃᔪᐛ ᐊᑲ ᒍᐤ ᐃᑎᔅᑲᓇᓯᔨᒋ᙮ 46ᒋ ᒋᔅᒐᔨᑎᒧᒡ ᐊᒋ ᒥᔭᑭᓄᐎᒡ ᑲ ᐸᔭᒋᓯᔨᒋ ᐊᒐᒂ, ᐛᔅ ᒋ ᐸᑐᐛᐅᒡ ᐊ ᒂᔅᒋ ᐃᔨᒥᔨᒋ ᑭᔭ ᐊ ᒪᒥᒋᒪᔨᒋ ᒋᓴᒪᓂᑐᐛ᙮
ᐊᑯ ᐱᑕᕐ ᒂ ᐃᔅᒋᔄᑦ, 47“ᐅᒡ ᐃᔪᒡ ᒋ ᒥᔭᑭᓄᐎᒡ ᑲ ᐸᔭᒋᓯᔨᒋ ᐊᒐᒂ ᒧᔭᒻ ᑭᔭ ᒋᔭᓄᐤ ᑲ ᐃᓯ ᒥᔨᑯᐅᔭᐧᒄ ᑲ ᐸᔭᒋᓯᑦ ᐊᒐᐧᒄ᙮ ᐊᑯ ᒪᒃ ᓇᒪ ᐊᐛᓐ ᒋᐸ ᐅᒋ ᒋᐱᒐᐊᐤ ᒐᒋ ᓯᑲᐃᑐᐛᑭᓄᔨᒋ ᓂᐱᔪᐤ᙮” 48ᒋ ᐃᑎᓱᐛᐤ ᒪᒃ ᒐᒋ ᓯᑲᐃᑐᐛᑭᓄᔨᒋ ᐅᔭ ᒋᓴᔅ ᙭ᑕ ᐅᑦ ᐃᓯᓂᐧᑲᓱᐅᓂᔨᒡ᙮ ᐅᒡ ᒪᒃ ᑲ ᑕᑈᑕᒡ ᒋ ᑯᒂᒋᒪᐅᒡ ᐱᑕᕋ ᐛᐃᐱᔅᒋᔅ ᒥᓐ ᒐᒋ ᑕᔨᒋ ᐊᓐᑕ ᐊ ᑕᒡ᙮
Currently Selected:
ᐊᑈᔅᑕᓇᒡ 10: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
