MARK 16

Jesuh Thawhkoepna

(Mt. 28:1-8; Lk. 24:1-12; Jhn. 20:1-10)

1Sabbath hin aboeih coengah Meri Makdalin, Jeem manu Meri oen Salome mi lawng Jesuh rawkk a thlukna hamla riimtuui a lai u. 2Hin rih khuiah lamhacuek khawhin, khaw a thoeng cuek ah ahimi tah phuel la cet u. 3-4Lawngpueng a ceh u vengah ahimi lawng, “Thlann thawhka kah lungto te a-u lawng a plet ai?” ti u. (Te tah lungto bo hlang ni.) Tecoengah ahimi lawng a bueh vengah, te lungto plet tangte la a awm te a huh u. 5Ahimi lawng thlann khuila a kuun u vengah cadawng tawngpang pakhat himbai bawk a bai tih bantang ben ah aka ngawl te a huh tih let u.

6Ahih lawngah, “Let u boel, nangmi lawngah thinglam dawng a ngawn u Nazaret khaw kah Jesuh na tlap u te ka ming. Ahih tah he ah awm tlaih nawh, tho poen! Ahih a khuehna huen he bueh lah. 7Tahe ah cet u langtah a hubang hue oen Piter te, he awlthang he thui pe uh: “Ahih tah nangmi haiah Galili la cet; nangmi tengah avan thui angla te ah te na huh u ai,” tila van thui pe uh,” a tina.

8Tedawngah ahimi tah cet tih lakueng oen thuen ruila heng u. Ahimi lawng a rih u tangkiik dawngah a-u tengah khaw thui u nawh.

Meri Makdalin tengah Jesuh Phumpho

(Mt. 28:9-10; Jhn. 20:11-18)

9Hin rih khuiah lamhacuek khawhin mincanghi ah duekna kalawng Jesuh a thawh coengah, raaithe pasarih a kaw khuikah a hek pe Meri Makdalin tengah lamhacuek la phumpho. 10Meri Makdalin lawng cet tih a paya thli te a thui pe. Ahimi tah a kaw the u tih rap u; 11“Jesuh tah hing koep tih ka huh poen tila a thui te ahimi lawngah tangna u nawh.

Hubang Pahih tengah Jesuh Phumpho.

(Lk. 24:13-35)

12He coengah hubang pahih vangca la a ceh vengah Jesuh lawng muei ame phuntloe ngai bet la ahih rawi tengah a phumpho pe. 13Ahih rawi lawng meel koep hih tih atloe hue tengah a thui pe hih de ahimi lawng tangna u nawh.

Hubang Thlai khat tengah Jesuh Phumpho

(Mt. 28:16-20; Lk. 24:36-39; Jhn. 20:19-23; Cel. 1:6-8)

14Hukhueng koek ah a hubang paha thlaikhat buh a caak u lii vengah Jesuh te a phumpho pe. Ahimi lawng oengna khueh nawh tih Jesuh te a hing la aka hu thli kah awlthui khaw tangna ham thinkaw aniing khaklal u dawngah ahimi te a siim. 15Jesuh lawng ahimi nala te, “Dilai peng tawm ah cet u lang thlaangphun boeih tengah, awlthang theen he thui pe uh. 16A-u lawngkhaw a tangna tih baptisma a huh atah thlawn la awm ai; A-u khaw a tangna nawh atah awlcekna a dang ai. 17Aka oeng thli tah kawpoek rai saina huham te a peek ai; ahimi lawngah ka miing oen raaithe thli te a hek ai; awl thaai la cal u ai; 18ahimi lawng asue aka awm ruul tu cakhaw, duekna sue aw cakhaw nganbawh ya manawh, ahimi lawng thlaangtlo thlaangnaa thli sawah kut a tloeng atah te thli lawng hoeih ai.” a tina.

Jesuh Vaan La Luui

(Lk. 24:50-53; Cel. 1:9-11)

19Bawipa Jesuh lawng ahimi te awl a thui pe coengah vaan la luui tih Pathen bantang ben ah te ngawl. 20A hubang thli lawng cet u tih peng tawm ah awlthang a thui u, Bawipa tah ahimi tengah bii a bi tih ahimi lawng a thui he soeng tite kawpoekrai saina oen a tueng sak u.

Atloe Aboetna pakhat

9Hutaa hue lawng Piter oen a paya thli tengla cet u tih vanthlaang lawng ahimi tengah a thui pe awl te atawila a thui pe u. 10He coengah Jesuh amah lawng a hubang hue rang oen khawcuuk ben kalawng ah khawtlaak ben toe aka hing yoeyah tih aka ciim dungyan thlawnna awlthang te a thui.

Currently Selected:

MARK 16: MCNT2006

Highlight

Copy