LUKA 11

Jesuh Kah Cang puei Thangthuina

(Mt. 6:9-13; 7:7-11)

1Hin at vengah Jesuh tah ahuen pakhat ah thangthui. A thangthui coeng atah a hubang pakhat a tengla law tih, “Bawipa, Johan lawng a hubang thli a cang puei van angla thangthuina te kaimi n'cang puei u van lah,” a tina.

2Jesuh lawng ahimi nala te, “Nangmi lawng na thangthui u vengah tila thui uh:

‘A Pa: Na miing ciim tah hinyahna

awm hawn seh;

na Ram va pai hawn seh.

3Kaimi lawng ka ngoe caak awkk te hin at coeng hin at m'pe lah.

4Kaimi sawah thawlhpalhna aka sai boeih te khawdawp ka ngaai u van angla kaimi kah thawlhna he khawdawp van ngaai van lah.

Aka rai tangkiik noekdakna te kaimi tengah van pha sak boel’ tila thangthui uh.” a tina.

5Tecoengah Jesuh lawng a hubang thli tengah, “Thuina maiah, nangmi pakhat khat lawng yiinthuem ah na paya im la na cet tih ahih nala te, Anaang nang, takawi cuun thum ah m'pe de lah. 6Ka paya pakhat khawlawng cet tih tapekca ah ka im avan pha tih ka cah ka awh ham caak koei khat khaw ka khueh nawh!’ na tina. 7Tevengah na paya lawngah im khui kalawng, ‘Thlaang kawhuet cakbat la khueh boel! Thawh ka khaih poen, ka ca thli oen ka ip u poen. Nang te thaihu peek ham ka tho thai tlaih manawh.’ ti. 8Te atah metila a awm ai? Kavan thui u, ahih te na paya la a awm dawngah tho nawh tih takawi te m'pe nawh de nang lawng yah ohla na bih mangkhak atah ahih lawng tho vetih na ngoe thaihu boeih te m'peek ai. 9Tedawngah he he kavan thui u: Bih u lah, m'peek ai; tlap u lah na dang ai, Thawh te khooek u lah, nang ham avan awng ai. 10Metihtiah aka bih boeih te a peek ai, aka tlap boeih lawng adang ai, thawh aka khooek boeih ham a awng pe ai. 11Na ca lawng nga avan bih vengah ruul aka pe papa nangmi khuiah khat khaw na awm u aw? 12Aaidui avan bih vengah celkhuita-ai na peek ai aw? 13Thlaangthe la na awm u de ta, na ca thli te thaihu theen peek ham na ming u. Te atah vaan ah aka awm Pa lawng atah Ciim Muithla te aka bih boeih tengah a peek tare ai ta!” a tina.

Jesuh oen Beelzebul

(Mt. 12:22-30; Mk. 3:20-27)

14Raaithe lawng akuun tih awl aka mueh thlaang pakhat kah a kaw khui kalawng raaithe te Jesuh lawngah a hek tih te thlaang te raaithe lawng a ceh taak coeng atah awl cal. Thlaangping tah a kawpoek la rai sut u, 15tede, thlaang khatsut lawngtah, “Raaithe thli hek thai hamla huham tharana he raaithe thli kah a bawipa Beelzebul lawng ni a peek,” ti u.

16Thlaangtloe lawngtah Jesuh kah a thawlhna te tuuk ham a ngaih u dawngah ahih kah a sai te Pathen ben-kah aka law ni tite tuengsakna ham kawpoek raina sai ham te a bih u. 17Tede Jesuh lawng ahimi kah poekna te thiim a ming tih ahimi nala te, “Ram pakhat he amah oen amah athloekla pek u the tih thek u kawinih asan pai thai manawh; imkhuikaw khaw pek u the tih a roep u nawh atah khawsak paw. 18Tedawngah Seitan kah ram khaw pakhat oen khat raal u the kawinih metila asan a pai thai ai? Nangmi lawng atah kai lawngah raaithe ka hek he Beelzebul lawngah raaithe hek thaina te kai he a peek na ti u. 19Kai lawng Beelzebul rang oen raaithe ka hek atah nangmi kah hubang thli lawng ta metila a hek u? Nangmi na soeng u nawh tite namami kah hubang thli lawng a tueng sak! 20Tetih nawh ni, kai lawngah Pathen kah huham tharana oen raaithe ka hek tih, te lawngah te Pathen Ram nangmi teng avan pha poen tite a tueng sak.

21Thara thlaang pakhat lawng amah kah aw-vaa boeih oen a im te a toet atah a khueh a toen boeih te sueng. 22Tede tha aka ra ngaai bet pakhat lawng a teek tih a taa atah ahih lawng a uepna awva boeih te a lawh pe vetih thaihu thaiha te a rek a ra pe ai.

23A-u khaw kai he aka pai puei nawh tah kai he aka raalna thlaang ni; a-u khaw thlaang ka cawitun vengah kai he aka bawmcem nawh tah thlaang aka thekyak thlaang ni.” a tina.

Raaithe Va Meel Koep

(Mt. 12:43-45)

24“Raaithe pakhat, thlaang pakhat kah a kaw khui kalawng co tih a ceh vengah, ramhum huhang te a hiil tih a awmna ham ahuen amawl te a tlap. Pakhat khaw a huh nawh veng atah, ‘Ka ceh taak kamah im la te ka meel koep hawn ai.’ tila a poek. 25Tedawngah meel koep tih im te aciimbiit la awm tih thaihu thaiha atheenla a kuem heet u te a huh. 26Tecoengah cet tih amah lak ah athe eep ngaai atloe raaithe pasarih te avan law puei tih te ah te awm u. Tedawngah te thlaang te tah acuek veng kah lak ah nauh tare ngaai.” a tina.

Awmngaihna Taktak

27Jesuh lawng tila a thui coengah thlaang tim kah hutaa pakhat lawngah paang tih ahih nala te, “Nang he aka cuunkung oen cawmcahkung tah metihtlukla a awmngaih ai te!” a tina.

28Tede Jesuh lawngah, “Pathen awl te a yaak tih aka vai tah metihtlukla a awmngaih tare ai!” a tina.

Kawpoekraina Sai ham A Bih U

29Thlaangping lawngah Jesuh te a veel khoep u vengah te Jesuh lawng, “Tihin hang kah thlaang thli he the-akk tangkiik! Ahimi lawng kawpoekraina te a bih u, tede Jonah kah kawpoekraina nawh atah atloe khat khaw ka sai manawh. 30Nineveh khaaw kah thlaang thli hamla tawngha Jonah te noekna la a awm van angla Thlaanghing Capa he khaw tihin hang kah thlaang thli ham miknoek la awm van ai. 31Sheba sengpahrang Nu lawng Solomon kah cuihna awl hutung ham athla hlang amah ram kalawng va law; Awlcekna Khawhin ah ahih lawng pai vetih tihin hang kah thlaang thli he thawlh a peel poen ai; ataktang kavan thui u, Solomon lak ah aka lenduet ngaai he ah he awm. 32Nineveh khaaw kah thlaang thli lawng Jonah kah phung thui awl a yaak u dawngah a thawlhna yut u, Awlcekna khawhin ah ahimi lawng pai vetih nangmi te thawlh m'peel poen ai; ataktang kavan thui u, Jonah lak ah aka lenduet ngaai he ah he awm.” a tina.

Pum Aangna

(Mt. 5:15; 6:22-23)

33A-u lawng haiim te a vaang tih thlip khoep nawh, beeldung oen khaw dah khoep nawh; im khuila aka law thlaang thli lawng aangna te a huh thaina ham haivangna dawngah te a khueh. 34Pum hamla tah mik he haiim angla awm. Na mik rawi te acaih vengah na pum te aangna oen be; tede na mik rawi te atheen nawh veng atah na pum te yiinna khuiah awm. 35Tedawngah na pum dawngah aka awm aangna te yiinna la a coengg nawh ham ngaithuen uh. 36Haiim a aangna oen nang te n'thue vengah na pum te aangna oen be tih ame huen maiah khaw yiinna a awm nawh angla na pum boeih te aang ai.” a tina.

Farasi Thlaang oen Phungawl Cangpueikung thli te Jesuh Lawng Thawlh A Peel

(Mt. 23:1-36; Mk. 12:38-40)

37Jesuh te awl a thui coeng atah Farasi thlaang pakhat lawng buh ca la ahih te a khue; tedawngah cet tih buh caak hamla te ngawl. 38Jesuh lawng buh caak thlan ah kut a silh nawh te Farasi thlaang lawng a huh u vengah a kawpoek rai. 39Tedawngah Bawipa lawng ahih nala te, “Nangmi Farasi thlaang thli lawngtah boengloeng oen beel te adauben tah na silh u, tede akhui ben tah tluung-athangna, athe thaihu oen betoet. 40Nangmi thlaangngau paathuu thli! Adauben aka sai Pathen lawngah akhuiben te khaw sai nawh aw? 41Tede nangmi kah boengloeng oen beel dawngah aka awm te khawdeng thlaang thli te pe u lah, tetih atah soeprep boeih te nangmi ham ciim ai.

42Nangmi Farasi thlaang thli ham khawmap tangkiik! Nangmi lawng cuenruek-an, sawngsing oen tawitlim anno Pateng khaw paha ah pakhat te Pathen na peek u, tede nangmi lawngah doengna, Pathen lungna te tah na hadalhna u. He ang thli he na sai hamla awm tih atloe te khaw dalrana ohla sai ham awm.

43Nangmi Farasi thlaang thli ham khawmap tangkiik! Nangmi lawng sinakok bok-im ah athloekla ahooep atlaang ngawlhcoen dawngah ngawlh ham oen ah thaihu yoeihna huen ah thlaang kah hinyahna oen voemtoeina te na ngaih u. 44Nangmi ham khawmap tangkiik mah aw! Nangmi tah thlaang lawng ming nawh tih asawah a cehna miknoekna aka awm nawh thlam oen na la u.” a tina.

45Phungawl cangpueikung pakhat lawng ahih nala te, “Saya he tila na thui he kaimi khaw nan sal nan phaam haih poen!” a tina.

46Jesuh lawng, “Nangmi Phungawl cangpueikung thli ham khaw khawmap tangkiik! Nangmi lawngah phueih ham aka rai tangkiik thalrih te thlaang na phueih sak u, tede namami lawngtah thalrih te na kutdawn oen Pateng na tek nawh. 47Nangmi ham khawmap tangkiik mah aw! Nangmi lawngah tawngha thli ham thlann te atheen theenla na sai pe u, te kah tawngha thli te namami kah patuer thli lawng a ngawn u te ni. 48Tedawngah nangmi lawng namami kah patuer thli lawngah a sai te na kawtlaak puei u tite na tueng sak u; ahimi lawng tawngha thli te a ngawn u tih nangmi lawng thlann te na sai pe u. 49He kawngah he Pathen kah Cuihna lawng, ‘Ahimi tengah tawngha thli oen laipai thli te ka tuih ai; ahimi lawngah khatsut te a ngawn u vetih atloe hue te tah a heem a tek u ai? tila a thui. 50-51Tedawngah Abel a ngawn u veng kalawng boknathaang oen Huen Ciim laklaw ah a ngawn u Zekhariah toe ah, dilai suen cuek veng kalawng tawngha boeih te a ngawn u dawngah tahe san kah thlaang thli he dan a tat ai. Teveng kah thlaang thli boeih ham te tahe san kah thlaang thli he dan a tat ai tila kavan thui u!

52Nangmi Phungawl cangpueikung thli ham khawmap tangkiik! Nangmi lawng cuihna im kah thawhka awngna caabi te na kuem khak u; namami khaw na kuun u nawh, kuun ham aka yawm thlaang thli ham khaw na khang pe u!” a tina.

53Te kalawng Jesuh te a ceh coeng atah, Phungawl cangpueikung thli oen Farasi thli lawng ah teveng kalawng tah ahih te a huhhuett tangkiik u poen tih, 54a cal thawlhna oen awl a thuina dawngah a thawlhna te tuuk pe ham thaihu kawng alam yahawh hlang te a doet u.

Currently Selected:

LUKA 11: MCNT2006

Highlight

Copy