ZEKHARIAH 7
7
Lungmu Tel Ngawl An Cannak
1Darias in kumpi a deh kum linak kum, ha kuah ha, ni li ni-in, Topa i thu cu ka nelah heng hi. 2Bethel mipi ten Sharezer, Regemalek le amu mihingte cu Cungnungbel Topa i Biakinn ah Topa i muicu ngen tukin le, 3thiampi le profet tei lakah thudong tukin hawh haw hi. A thudot haw mi cu, “Biakinn pi siatsuah khawng a hih hangin, kum tampi sung ka bawl zo uh bangin ha nga ha ten an cangin thasia le khawngai in umlaih ni ung maw?” tin dong haw hi.
4 Topa i thu cu ka nelah heng hi. 5Topa in, “Hi ngam a mihing le thiampite cu hilhin: kum sawm salih sung, ha nga ha le ha salih ha an cangin, a taulih haw cu keimah a upat haw hang hi kha ma hi. 6Tui le an a in, a eih haw ten hei in, amu deih thu poh hi.”
7Jerusalem cu khangto le neinung zetin umin, mihing tampi a umlaih hun haw le khua elkim tei lakah mi tampi a um haw bek sial ngawl, hanglam ngam le nitumnak lam mualbulah mi tampi a um haw laihin, hi bangin Topa in, tanglaih profet mangin, a hilhsa mi hi.
Topa i Thu Zui Ngawl Hang Saltang
8 Topa in, hi thu cu Zekhariah nelah hilh hi. 9Tanglaihin, hi thutiamte cu ka mihing nelah pia ing. Cam zetin thuson unna, pa khat le pa khat humah hehpihnak le itdunnak nei ta un. 10Meivongte le ca-ngah siat theite, nangmu lak a, um ngamdang mite le mi haksate nemsuk pahsuh un. Pa khat le pa khat siatsuahdun tuk vang tum pahsuh un, ti ing.
11“Mahnaven ka mihingte cu mi lunglian leita haw in, ka thupiakmi hei zui nuam viang haw ngawlin, 12a lungmu haw cu suangtum bangin cang hi. Kum ngeipi laih a, ka hahmi profet tei thuzilhmite a ngaih nuam haw ngawl hangin amu humah ka thinukzet ing. 13Thu ka hilh ten a ngaih nuam haw ngawl hangin amuh vang thu a nget haw ten ngai nuam bok mang. 14Huih siapi bangin nawtvawkin, ngam dadangah lengkektik khawng ing. Hi tihzah ngampha sungah kuamah um ngawlin ngamko in cang zo tin,” ti hi.
Currently Selected:
ZEKHARIAH 7: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
