ZEKHARIAH 3
3
Profet In Thiampi Sang Muhnak
1Muhnak a dang pa khatah, Topa in, Thiampi Sang Joshua cu Topa i vancungmi mai ah a din leng khi lak hi. Joshua elah a sual zei tukin satan ding leng cu mu ing. 2Topa i vancungmi in satan nelah, “Topa in, nangmah cu liat tahen! Jerusalem a deihtu Topa in, nangmah cu vawk tahen. Hi pa cu meipual sung pen dawh tulmi thingthu tuah bangve,” ti hi.
3Joshua cu puansia silhin mahlai ah ding leng hi. 4Mah vancungmi in, amah cingtu vancungmi dang tei nelah, “Hi pa i silhmi puansiate cu duhsak khawng un, tin,” ti hi. Joshua nelah, “Na sualnak cu laksak khawng zo ing, na silh tuk puan thak pia tung tin,” ti hi.
5Amah cingtu ten Joshua lu humah lupawng thak pawngtik tukin thupia hi. A thupiakmi bang bawlin, mahlai ah vancungmi a din laihin, puanthak silhtik haw hi.
6Mahten vancungmi in Joshua nelah, 7Cungnungbel Topa i otmi cu hi bangin hilh hi; “Ka daan zui inna, dehvo ka piakmi na bawl tale ka Biakinn le a huang sung cingkhawitu hi leleng tuk ci. Ka mai a ummi vancungmi tei thungetnak ka san bangin, na thungetnak vang sang bok tung hi. 8Mah hangin Thiampi Sang; Joshua, phano in ngai in, thiampi Joshua i ngualcamte, nohte cu mailam hun pha limlaktu hi uh ci. Thingkak tin a sam haw mi keima nadektu cu na nelah langtik tung hi! 9Joshua mai ah mai salih neimi suangtum pa khat koih tung. A humah lai ngan tung a, ni khat sungin hi ngam i sualnak cu laksak khawng tung hi. 10Mah ni a hen ten na sabit huan uh le na theipi huan sung uhah na innnel uhte cu lemdaihnak le humhimnak sungah lungdamno in, mangkawm dediam tukin sam ten tuk uh ci tin,” ti hi.
Currently Selected:
ZEKHARIAH 3: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
