OBADIAH 1
1
1Cungnungbel Topa in, profet Obadiah lakah Edom miphun tei thu a hilhmi hi.
Topa In Edom Bawlsia Tuk
Topa in miphun tei lakah
a kamtai hahin,
“Na tuangtim unna,
na venghawng uhin tho in,
Edom do un,” a tihmi za ung hi.
2Edom nelah Topa in,
“Zo hemin, miphun lakah
phun nautabelin bawl tung hi;
zotsak nautatmi pa hi tuk ci.
3Na tuangkhawnnakin
nangmah zol ngah zo hi.
Suangbuk sungah umin,
Mual sangbel humah
na um hangin,
na lungmuno in,
‘Akua in doksuk thei tuk him?’
tin ti ci.
4Muvanlai bangin
vang sangbelah lengin,
na bu cu aksi humah na sa hei in,
doksuk leleng tung ti hi.
5Zan hunin, ngucate a hun haw ten,
a bawlsiat haw mi cu
tam tuk naven,
a deih haw mi bek laksak
haw tuk hi.
Sabit ngutute a hung haw ahin,
dawm bek zam ngawlin maw
a um haw tuk?
6Mahnaven Esau#1:6 Esau hilai ah Esau a tihmi cu Edom ngam a tihnak hi. nate
a lonsa dan haw hi
ngaisung hem un;
A kuhno in, a koih haw mi
sumte hei pholhsuah sak
khawng haw!#Pian 36:8; 36:43;
7Ni dang laih a, bawmtu ten
nangmah zol haw a,
na ngamsung pen hawlvawk haw hi.
Nangmah tuah ailem zetin,
a ummi
ten nangmah nehsiah
zo haw hi.
Na ankuang kilpih
na ngualcam ten
thangsiah haw;
Cihnak a neihmi ilai ah him tin
ti haw hi.
8Mah ni ten Edom micipte
siatsuah tung a,
Esau mual pen a cihnak haw
khawih tuk mang hi.
9Teman#1:9 Teman cu Edom ngam a, khuabawi pa khat hi. ngalkapte a thinsu haw tuk a,
Edom ngalkap hempoh
thah tawk haw tuk hi.#Pian 36:42;
Ita Edom Bawlsiat Tawk
10Na unau Jakob casuan tei nelah
bawlsia in, na thah hangin
zakca in um leleng tuk ci a,
kumkhua in lalthongta tuk ci.
11Ngal ten na kongkhah uh
a siatsuah khawng ni ten
imah kinmawh ngawlin
ding leng thong ci.
Jerusalem i neih le siah thiak khawngin
aisanin, a semdun khawngtu
ngamdangmi bangin
mi siasuak hi ci.
12Na unau tei bawngsiat ni-in,
tuangkhawng li pahsun.
Judah siatsuahnak a tawh ni-in,
nuihsan sihseh pahsun.
Judah siatnak a tawh ni-in,
na lungdam pahsun
Lungkham zetin, a um ni haw in,
nui aw ok pahsun.
13Ka mihingte haksatnak
a thuak ni haw in,
a kongbiangah tum pahsun.
Siat a tawh ni haw in,
angzet pahsun.
A lup ni haw hei ten
a na haw lonsak pahsun.
14Taitul a tum mite that tukin
lamkak pen pang pahsun.
Lungbingin, a um ni haw in,
a suakca calam
mi khenkhat cu
ngal khut sungah
pia pahsun.#Isa 34:5-17; 63:1-6; Jer 49:7-22; Ezk 25:12-14; 35:1-15; Amos 1:11-12; Mal 1:2-5;
Pathian Thukhen Tuk
15A ngei ngawlin
Topa keimah in,
miphun hempoh humah
ka thukhennak ni nai zo hi.
Edom, midang humah na bawl bangin
na humah bawlleh bok tung.
Na thil bawldan cu
na lu humah hengleh tuk hi.
16Ka mihing ten ka mual thiangtho
hum pen a khazetmi
dantatnak hai cawi in,
in zo haw hi.
Mahnaven a elkim a ummi
miphun hempoh ten,
mah sangin a kha saw mi hai cu
in haw tuk hi.
A venghawngin, in haw tuk a,
lalthong khawng haw tuk hi.
Israel i Nehnak
17Mahnaven Zion mual pen
mi khenkhat suakca haw tuk a,
mah mual cu thiangtho tuk hi.
Jakob i mihing ten
a covo haw ngam coleh haw tuk hi.
18Jakob innkuate cu mei alhin,
cang haw tuk hi.
Esau i innkuate cu
cangphol kang bangin
kang khawng haw tuk hi.
Esau i innkuate cu
kuamah suakca haw tukma hi.
Topa in hilh zo hi.
19“Negeb a ummi ten Esau mual cu
laleh haw tuk a,
Shephelah munlawn a ummi ten
Filistin ngam laleh haw tuk hi.
Israel miten Efraim le Samaria ngam
la leh haw tuk hi.
Benjamin hinnam ten Gilead ngam
co haw tuk hi.
20Israel Saklam um saltangte
kikleh haw tuk hi.
Saklam a, Zarefath tian,
Foenisia ngam
la leh haw tuk hi.
Jerusalem saltangte
Sardis a ummi ten
Judah hanglam a, ummi
Negeb khuapi cu laleh haw tuk hi.
21Ngal nehtu Jerusalem ten
Zion Mualah kai haw tuk a,
Esau Mual uktu in cang haw tuk hi.
Mah ngamah
Topa amah cu
Kumpi in um tuk hi.”
Currently Selected:
OBADIAH 1: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
