MARKA 7

Pu le Pa Tei Thuzilhmi

(Mt 15:1-9)

1Jerusalem khua pen Farasi mite le Daan zilhtu khenkhatte cu Jesuh lakah hawh langkhat haw hi. 2A nungzuitu khenkhat ten khut som ngawlin an a eih haw cu mu haw hi.

3Farasi mite pepan Judah mi hempoh ten tanglaih pu le pa tei daan zui in, khutsom masa ngawlin an ei awng haw ma hi. 4Dawl mun pen a pin haw hei ten tuibual ngawlin an ei awng haw ma hi. Mahbek hei hi ngawlin daan dang tampi; beel le kuang, somdan, tuibeel somdante le khaza beel le zaunak somdante zui haw hi.

5Mah hangin Farasi le Daan zilhtu ten, “Ita tanglaih pupa tei thukhamte na nungzuitu ten zui ngawlin an ei haw kaw?” tin dong haw hi.

6Jesuh in, “Profet Isaiah in, noh mi ultungte,” tin a thuhilhnak cu hi bangin ngan hi:

‘Hi mihing ten a kam pawleu

lambek haw in,

keimah upat haw naven

lungmu sung ngangai

haw cu kei tuah kangzet hi.

7Phatnak neuno hei um ngawlin

keimah bia haw hi.

Itahim titale mihing tei

bawlcopmi daan cu,

Pathian piakmi daan bangin

zilh haw hi,’ ti hi.#Isa 29:13;

8“Noh ten Pathian thukhamte lawlin, tanglaih mitei lak pen na ngah uhmi thukhamte zui uh ci,” tin donleh hi.

9Jesuh in pehlehin, “Nangmuh tei thuzilhmi khotikin, Pathian piakmi thukham nial cu thiam mahtak uh ci! 10Moses in, ‘Na nu le pa upat un, nu le pa i humah awn kha a hah ten thihnak thuak tahen!’ ti hi.#Suah 20:12; 21:17; Thiam 20:9; Daan 5:16; 11Mahnaven noh ten mi pa khatin, a nu le pa bop theihnak nei leng na pi in, ‘Hi cu Koban hi,’ (Koban tih cu Pathian ta tihnak hi) a titale, 12Mahpa cu a nu le pa a bop tuk luat hi tin ngaisung uh ci. 13Hi bangin thu na hilhnak uhin Pathian awnkam cu kaltan khawng uh ci, mahtih bangin na bawl uhmi tampi um hi,” ti hi.

Mihing Nintiktu

(Mt 15:10-20)

14Jesuh in mi honpi sam lehin, “Na venghawng uhin ngai in, thei un! 15Mihing sungah tumin, mi a nintik thei kuamah umma hi. 16Zaknak beng a nei ten za haw tahen,” tin hilh hi.

17Jesuh cu mi honpi tei lak pen thawnin, inn sungah a tum ten a nungzuitu ten a thu tehkipnakte hilhciangtik haw hi. 18Jesuh in, “Nangmuhte hei in, thei ma laih uh ci maw? Mihing sungah tumin, a nintik thei imah umma hi, tih thei ma laih uh cim? 19Itahim titale mihing lungmu sungah tum ngawlin a pumpi sungah tumin, pawlamah tulleh hi. (Hi thute cu an hempoh thiangtho tin nuamnak hi.)

20Mihing a nintiktu cu a sung pen a tulmi saw khi hi. 21A sung pen le a lungmu sung pen ngaihsutnak pha ngawl tul hi. 22Ngukcaknak, mi thahnak, mi zi hum a sualnak, duhhawpnak, ngitlohnak, mizolnak, a siasuak deihnak, mi ennak, mi iknak, ultunnak, imah khenkhuai ngawlin nun pawpoh nunnak; 23Hi ngitlohnak hempoh cu mi lungmu sung pen tulin mi nintik thei hi,” tin hilh hi.

Numei Nu i Upnak

(Mt 15:21-28)

24Jesuh cu mahlai mun pen a thawn celh ten Taiar le Sidon ngam sungah hawh hi. Hilai pen kuamah i theih tuk ngawlin inn khatah tum den naven ngelh thei cuang ma hi. 25A canu i sungah ningdelhhuai khawhuai umtu i nu cu Jesuh i thu a zak bek ten a lakah hawhin, a ke bulah bok hi. 26Hi nu cu (Gentail nu hi), Siria ngam Fonisia peng pen suak hi. A canu i sungah khawhuai hawlvawk sak tukin kuun li hi. 27Jesuh in, “Ca ten an kham masa hih haw tahen, ca tei eih tuk laksakin uico paih cu mawi ti uh cim maw?” tin ti hi.

28“Hi ngai zuh hi, Topa aw, mahnaven naupang tei cabuai nuai a, an thial a caksuktik haw khi uico in khul mek bok poh si,” tin don hi.

29Jesuh in, “Na tihnak bangin na innah pinleh inna, na canu i sung pen khawhuai cu tul zo hi,” ti hi.

30Mah nu cu a innah pinlehin, inn a hen ten a canu i sung a, khawhuai cu tai zo in, a canu cu zaunak humah zau lengin mu hi.

Bengbul, Awn Thei Ngawl Damtik

31Taiar ngam pen thawn leleu in, Sidon khua tawnin khua sawm ngam a tihmi haw, ‘Dekhapolis,’ ngam kaltanin, Galilee tuipi lamah hawh hi. 32Mahlai munah a bengbul awn ngawipa pa khat cu Jesuh lakah hawhpihin, a humah khutsuan tukin kuun li haw hi. 33Jesuh in bengbul awn ngawipa cu mi honpi lak pen tul pihin, mivengnak munah hawhpih hi. Jesuh in, a khutzungin, a beng sung tawhtum ceng ten a khut cilnopin, a lei cu zen hi. 34Jesuh cu vanlam zoto in, “Effatha,” ti hi. Effatha tih cu, “Hong in!” tihnak hi.

35A beng vakleh paihin, a lei vang phe lehin, baihno awnleh thei hi. 36Hi thute cu kuamah i lakah son tuk ngawlin kham li naven, a kham nase dedeuh ten, van nuai ah thangin zalh sesem haw hi. 37Mi hempoh ten lamdang sazet haw in, “Zo in! Hi pa in tihtheih ngawl imah nei ma hi. Bengbulte thu za lehtik thei in, awn thei ngawlte awn lehtik thei!” tin ti li haw hi.

Currently Selected:

MARKA 7: NBF1

Highlight

Copy