MARKA 10
10
Nupa Khennak Thu
(Mt 19:1-12; Lk 16:18)
1Jesuh cu Kapernaum pen thawnin, Jordan ngun ngalkhat a, Judah ngam lamah hawh hi. Mihonpi cu Jesuh nelah khawm leleu haw ten thuhilhnak nei hi.
2A ngei ngawlin Farasi mite cu a sual zei nuamin heng paih haw in, “Mi pa khatin, zi a ma nuam tale a maaknak tukin Daan um ni maw?” tin dong haw hi.
3Jesuh in, “Moses in iti bang thupia him?” tin dong hi.
4Farasi ten, “Zi a ma nuam ten khehnak tuk thu le a maak nuamnak thu cu lai sungah nganin, pia pohleh maakthei tuk hi, tin Moses in thupia hi,” tin don haw hi.#Daan 24:1-4; Mt 5:31;
5Jesuh in, “Moses in ita hi bangin thupia hum titale na lungmu uh khoh leita in, hilh theih na hih uh ngawl hangin hi. 6Lai Thiangtho tihnak bangin Pathian in van le lei a bawl pepanin pano le numei bawlbok hi.#Pian 1:27; 5:2; 7Hithu hangin pano in, a nu le pa zamin, a zi zuanta henna, amu pa nih cu pumkhat suak haw tahen hi.#Pian 2:24; 8Mahti bang a hih hangin amuhte cu pa nih hileh ngawltohin pa khat hi zo toh haw hi. 9Pathian i khoptuah sa cu kuamah in khen haw pahsuh hen,” ti hi.
10Inn sungah a tumleh haw ten a nungzuitu ten mah thu cu dong haw hi. 11Jesuh in, “Mi pa khatin, a zi maakin, zi dang a huai tale, a zi i hum pen numei dang tuah sualnak bawl hi.#Mt 5:32; 1Kor 7:10-11; 12Mahti bang bokin numei in, a pasal zamin pano dang a nei tale pano dang tuah sualnak bawl hi,” tin ti hi.
Jesuh In Naupangte Thupha Pia
(Mt 19:13-15; Lk 18:15-17)
13Mi khenkhat ten a cate haw cu Jesuh i thupha piak tukin hawhpih haw naven a nungzuitu ten liat haw hi. 14Mah thu cu Jesuh in, a zak ten a thinukin, a nungzuitu tei lakah, “Naupangte cu ka lakah hunpih un hi, kham pahsuh un! Itahim titale Vancung Uknak cu hi bang naupang tei ca in hi. 15Thungai in hilh ing; a kuakua hei hihen naupang tei Vancung Uknak a san haw bangin a sang bok haw ma tale Vancung Uknakah tum thei haw tukma hi,” ti hi.#Mt 18:3; 16Mahten naupangte cu pomin, a hum hawah khutsuanin thupha pia hi.
Mihau Pa
(Mt 19:16-30; Lk 18:18-30)
17Jesuh cu khualzin a hawh lih laihtakin, mi pa khatin, amah zuanin, a mai ah khukdinin, “Zilhtu pha pa, kumkhua nunnak ka co theihnak tukin i bawl kam nang?” tin dong hi.
18Jesuh in, “Itakaw zilhtu pha pa na tih?” tin dong hi. “Pathian sial ngawl mipha kuamah umma hi. 19Thukhamte cu thei leng ci, ‘Mi that pahsun, nupa sualnak bawl pahsun, nguca pahsun, a man ngawlin mite sual nawn pahsun, mizol pahsun, na nu le na pa upatin,’ ti hi.”#Suah 20:12-16; Daan 5:16-20;
20Mahpa in, “Sazapa, mah thukhamte cu ka naupangno laih pepan zui khawng zo ing,” ti hi. 21Mahmi pa cu Jesuh in itnak tuah zo cangcianin, “Thil pa khat sam laih ci. Hawhin, na neihmi hempoh zuak inna, na ngahmi cu mi ca-ngahte pia in hi. Mahti bangin na bawl tale vancungah mihau pa hi tuk ci, mahceng ten keimah zui in,” ti hi. 22Mah thu a zak ten mi hauzet a hih hangin a thasia in tulta hi.
23Jesuh in, a nungzuitute cu zo pepelin, “Mihau tei ca in Vancung Uknak sungah tum tuk cu itih zahin hak him?” tin ti hi.
24A nungzuitu ten hithu a zak haw ten lamdangsazet haw naven Jesuh in, a thuson pehzomin, “Ka cate aw, Pathian Uknak sungah luh tuk hi iti zahin haksa him? 25Mihau pa i Vancung Uknak sung a tum tuk sangin hio kua awng sung a, kalauk a tum tuk baih saw,” ti hi.
26Mah thu a zak haw ten nungzuitute cu lamdangsa sesemin, “Mahti bang ahi tale akua kaw nunpatnak a ngah thei tuk?” tin pa khat le pa khat dongdun li haw hi.
27Jesuh in, a nungzuitute cu zo cangcianin, “Hi thu cu mihing tei ca in, cangthei ma hi. Mahnaven Pathian ca in tih theih ngawlmi umma,” ti hi.
28Mahten Peter in, “Kohten ihempoh zamin, nangmah zui zo ung,” ti hi.
29Jesuh in, “Hi zuh hi, thungai in hilh ing: a kuakua hei in, a inn le lo hihen, a unau le a celnu hihen, a nu le pa le a cate hihen, keimah le Thuthangpha i hangin pa kha khat a zamtute cu, 30atu khan hihimah a let za khatin ngah tuk hi. Inn le lo, a unau le celnu, a nute le a cate hihen, a let za khatin ngah tuk hi; bawlsiatnak cu thuak tuk naven, a heng tuk laih khanah kumkhua nunnak ngah tuk hi. 31Mahnaven atu khanin, a dawltate cu masabelleh haw tuk a, masabelte cu dawltabelleh haw tuk,” ti hi.#Mt 20:16; Lk 13:30;
Jesuh In A Thih Tuk Thu Vei Thumnak Hilh
(Mt 20:17-19; Lk 18:31-34)
32Jesuh le a nungzuitute cu Jerusalem lamah hawh haw hi. Jesuh cu a nungzuitu tei masuanah hawhin, a nungzuitute cu a lung nop viang haw ma hi. A zuitu mipite vang thinsuzet haw hi. Nungzuitu sawm le pa nihte cu mundang deuhah pui in, a humah a heng tuk thute hilhleh hi. 33Amah in, “Ngai hem un! Jerusalem khua ah heng tuk hung a, mahlai ah Mihing Capa cu thiampi upate le Daan zilhtu tei khutah piak hi tuk hi. Amuh ten that tukin thusoncat haw tuk a, mah nungten Gentail tei khutah hen hi tuk hi. 34Cekpan bawlnak mangin, cilsiak haw tuk a, vaatin that haw tuk naven ni thum lawi ten tholeh tuk,” ti hi.
James le Johan i Ngetnak
(Mt 20:20-28)
35Mahten Zebedi capa James le Johan cu Jesuh lakah hung haw a, “Sazapa, thil pa khat na bawlsak tukin deih ung,” tin kun haw hi.
36Jesuh in; “I bawlsak tuk kaw na deih uh?” tin dong hi.
37“A sunglawi mi na Uknak sung a, na bawi khunnak humah na khun ten pa khat na taklamah pa khat na veilamah tin na elah khungtik bokin,” tin ti haw hi.
38Jesuh in, “I ngen ung tih thei ma uh ci. Ka in tukmi thuaknak khuat hi in thei bok ni uh cim? Tuiphumnak ka laknak bangkekin la thei bok ni uh cim?” tin dong hi.#Lk 12:50;
39Amuh ten, “In thei tuk ung” tin don haw hi.
Jesuh in, “Ka in tukmi khuat cu in thei in, tuiphumnak ka laknak bangin la thei bok ngai men tuk uh ci. 40Mahnaven ka taklam le ka veilam a khungtu tukte ten theihnak thunei mang hi. Pathian in mahmi mun cu ngaihsutsa tei ca in pia tuk hi,” ti hi.
41Mah thu cu a dang nungzuitu sawm khat ten a zak haw ten James le Johan tei humah thinuk mahtak haw hi. 42Mah hangin, “Leihum ngam uktute cu a ukmi tei humah nehsiah zetin, a hotute cu thuneizet haw tih thei uh ci.#Lk 22:25-26; 43Mahnaven nohtei lakah hitih bangin hi tukma hi. Noh tei lak pen a ngengbel a nuam tale nangmuh tei nadehsaktu hi tuk a,#Mt 23:11; Mk 9:35; Lk 22:26; 44nangmu lak pen lupibel a nuamtu cu nangmu sal hi tuk hi. 45Itahim titale Mihing Capa hei hi midang nadektik tukin a hungmi hi ngawlin; mitei nadektu tukin, mi tampi tei nunpan tukin le a nunnak pia tukin hung saw hi,” ti hi.
Jesuh In Mitcaw Bartimia Damtik
(Mt 20:29-34; Lk 18:35-43)
46Jesuh le a nungzuitute cu mipi tuah Jerikho heng haw in, Timaeus i capa Bartimia a tih haw mitcawpa cu lampi elah veidawhin, na khungleng hi. 47Nazareth khua mi Jesuh tih a zak ten, “Jesuh! David Capa! Hu hehpih zazalin!” tin ti hi.
48A elkim a um, mipi ten daidenno um tukin hilh haw naven nase dedeuhin, “Jesuh! David Capa! Hu hehpih zazalin!” tin ti memek hi.
49Jesuh cu cawlhih in, “Hi pa cu sam un,” tin ti hi.
Mitcawpa cu sam haw in, “Na lungdamin, Jesuh in nangmah sam hi, tho in!” tin ti hilh haw hi.
50A vansilh laih vawkin, Jesuh lakah dawktulin zuan hi.
51Jesuh in, “I bawlsak tuk deih nge cim?” tin a dot ten, “Khua muleh nuam ing,” tin ti hi.
52Jesuh in, “Hawhin, na upnakin nangmah damtik zo,” tin ti hi.
Thakhat thu in, khua a muh theih ten, mah lampi ah Jesuh zui nom hi.
Currently Selected:
MARKA 10: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
