MATTHAI 4

Jesuh Sualsohnak

(Mk 1:12-13; Lk 4:1-13)

1Satan i sualsoh tukin Jesuh cu Hawvangin ngamkhingah hawhpih hi.#Heb 2:18; 4:15; 2Ni sawm li le zan sawm li, an ei ngawlin a um hangin a ngilkial mahtak hi. 3Mahten Satan cu a lakah hengin, “Pathian Capa ngangai na hi tale hi suangte hi cangho suak tukin thupia in,” ti hi.

4Jesuh in, “Lai Thiangtho in mihing tei nunnak cu an bek kha ma hi. Pathian kam sung pen a tulmi awnkam hi saw hi,” tin don hi.#Daan 8:3;

5Satan in, Jesuh cu Jerusalem Khua Thiangtho a, Biakinn kuulah hawhpihin, 6a lakah, “Pathian Capa na hi tale hilai pen dawksukin hi, itahim titale Lai Thiangtho ah;

‘Pathian in, na elah

vancungmite thupia in,

a khut haw tuah domin,

na ke cu suang tuah hei

sukha tukma hi,’

tin um,” ti hi.#Saam 91:11-12;

7“Mahnaven Jesuh in, ‘Lai Thiangtho in, Topa, na Pathian cu khingkhai pahsun,’ tin hilh bok ma maw?” ti hi.#Daan 6:16;

8Satan in, Jesuh cu mual sangpi humah hawhpihin, leihum a ngam hempoh cu a thawmngengnak tuah lak khawng hi. 9Mah nungten Satan in, “Khukdinin keimah na bia tale hi hempoh pia khawng tung,” ti hi.

10Jesuh in, “Satan tai in, itahim titale Lai Thiangtho in; Topa na Pathian bia inna, ama na bek dekin hi tin ti hi,” tin don hi.#Daan 6:13;

11Mahten Satan in taisan a, mah nungten vancungmite hungin tuamlawm haw hi.

Jesuh Cu Galilee Ah Nadeh Pan

(Mk 1:14-15; Lk 4:14-15)

12Jesuh in, Johan thawngah khia haw tih a zak ten Galilee ah hawhin,#Mt 14:3; Mk 6:17; Lk 3:19-20; 13Nazareth ah um ngawlin Kapernaum khua ah um tukin hawh hi. Kapernaum khua cu Zebulun le Naftali miphun tei ngamsung Galilee tuimawkah a ummi khua hi.#Jn 2:12; 14Hitih bangin a umnak cu profet Isaiah i hilh hamsa mi a kimtiknak tukin hi; Isaiah in:

15“Zebulun miphun le

Naftali miphun tei ngam,

Jordan ngun ngalkhat a ummi,

Gentail mitei ngam Galilee!

16Khuathim sungah a ummi ten

a nase zetmi vaknak cu

mu haw tuk hi.

Thihnak ngamthim sungah

a um mitei humah

vaknak suak tuk,” ti hi.#Isa 9:1-2;

17Jesuh in, “Na sualnak uh sik un,

itahim titale

Vancung Uknak nai zo hi,”

tin thuhilh pan hi.#Mt 3:2;

Jesuh In Ngasa Mantu Mi Pa Li Sam

(Mk 1:14-15; Lk 5:1-11)

18Jesuh cu Galilee a, tuinim mawkah a hawhlih laih takin ngasa mantu unau pa nihte suuk vawkin ngasa man li khi mu hi. Mah unau pa nihte cu Simon (Peter tin sammi) le a nau Andru haw hi. 19Jesuh in, “Ka nelah hungin, ka nungzui unna, mi mantu in bawl tung,” ti hi. 20Thakhatin a suuk haw zamsanin, amah cu zui haw hi.

21Hawhngut laihin, Jebedi capa pa nih James le Johan tei unaute cu mu hi. A muhte cu a pa haw Zebedi tuah timbaw sungah umin, a suuk dah li haw hi. Jesuh in, a sam ten, 22thakhatin, a hawmkuang le a pa haw cu zamin zui paih haw hi.

Jesuh In Zilh, Phuangin Damtik

(Lk 6:17-19)

23Jesuh cu Galilee ngam a khua hempoh ah hawhin, pumkhawm inn hempoh ah thuzilh ngut hi. Vancung Uknak Thuthangpha hilh pepelin, natnak phunkim a thuakmite damtik pepel hi.#Mt 9:35; Mk 1:39; 24Mah thuthang cu Siria ngam tian thang khawng hangin natnak le haksatnak phunkim a thuaktute, khawhuai tei khalhsiat mite, thihtun nat neite le khut le kezawng mite cu a nelah a hunpih haw ten a venghawng haw in damtik khawng hi. 25Galilee le Dekhapolis#4:25 Dekhapolis: tihmi cu ‘khua sawm’ tihnak hi. ngam, Jerusalem le Judea ngam le Jordan ngun ngal khatlam pen mi tampi hungin amah cu zui haw hi.

Currently Selected:

MATTHAI 4: NBF1

Highlight

Copy