MATTHAI 13

Anci Vawhtu Tehkipnak

(Mk 4:1-9; Lk 8:4-8)

1Mah ni lelengin, Jesuh cu inn pen tulin tuinimpi mawkah thuzilh tukin khung hi. 2A el a mipi hung khawmte cu a tam leita haw hangin hawmkuang sungah khung hi. Mi honpite cu tuimawkah ding haw hi.#Lk 5:1-3; 3Thu tehkipnakte tuah thu tampi zilhin, hi bangin hilh hi.

“Vei khat laihin, mi pa khat cu anci theh tukin hawh hi. 4Ancite cu lo sungah a theh ten khenkhat cu lampi ah cu in, vano ten ei khawng hawta hi. 5A khenkhatte cu leisianak suang hawl lakah cu hi, a lei a sah ngawl hangin thakhatin poto haw naven, 6ni a sat ten a potungnote cu thileh khawng hi; a zung lei thukpi a mat zawh ngawl hangin ko khawngleh paih haw hi. 7Anci khenkhatte cu lingcam lakah cu in poto bok haw naven lingin depin khangto thei haw ma hi. 8Mahnaven anci khenkhatte cu lei ngam pha ah cu in, khangto haw hi. A khenkhatte cu a let za khat, a let sawm luk, a let sawm thumin suak hi,” tin hilh hi.

9Jesuh in, “Beng a nei hempoh ten za un,” ti hi.

Thu Tehkipnak i Sullam

(Mk 4:10-12; Lk 8:9-10)

10Nungzuitute cu a lakah hung haw in, “Mipi tei lakah thu na hilh ten, itakaw tehkipnak tuah ngehin thu na hilh hi,” tin dong haw hi.

11Jesuh in amu lakah, “Vancung ngam thukuh theih theihnak cu nangmu lakah piak hi zo naven mipi tei lakah piak hi kha ma hi. 12Itahim titale a neisa tei humah a valin piak belh hi tuk naven a nei ngawlmi tei lak pen a neihcalamno hei laksak hi tuk laih hi.#Mt 25:29; Mk 4:25; Lk 8:18; 19:26; 13Itakaw amu lakah ka ot ten tehkipnak mang ing kaw titale amuh ten zo haw naven mu thei haw ma hi, ngai haw naven za thei haw ma hi. 14‘Mah hangin profet Isaiah i hilhmi amu humah kim hi. Profet Isaiah in hi bangin ti hi.

Mipi ten ngai li haw tuk naven

za thei haw tukma hi.

Zoli haw tuk naven

mu thei haw tukma hi.#Isa 6:9-10;

15Itahim titale

a lungmu haw bing leita,

a beng haw hupin, a mit haw vang

hak haw ma hi.

Mahti bangin, ahi haw ngawl ahin

a mit haw in mu in le

a beng haw in zain,

a lungmu haw in

theithei haw tuk hi.

Mahten keima lamah

hek haw tuk a damtik tung hi,’ tin

Pathian in ti hi.#Isa 6:9-10;

16Mahnaven, nohte cu itihzah mi bawngpha uh cim! na mit uhin mu in, na beng uh vangin za uh ci. 17Thungai in hilh ing, na muh uhmi le na theih uhmi hi profet tampi le Pathian i mihing tampi ten mu nuamin, thei nuamzet haw tuk naven mu haw ma, za nuamzet haw tuk naven za thei haw ma hi.#Lk 10:23-24;

Jesuh In Hilhciang

(Mk 4:13-20; Lk 8:11-15)

18“Mah hangin hi anci theh tehkipnak i sullam hi ngai in thei un. 19Lampi humah a cakmi ancite cu Vancung Uknak thu thei naven a sullam a theithei ngawltu hi. A lungmu sung a pawi mi anci khi mipha ngawl khawhuai ten laksakleh hi. 20Suang lakah a cakmi anci cu Vancung Uknak thu a theih haw ten lungdam zetin pomtu haw hi. 21Lungdam zetin pom haw naven, amu sung thukpi ah a mut ngawl hangin ngeiphat ma hi. A pom haw mi thu le la hangin haksatnak le bawlsiatnak a hen ten tawpleh paih haw hi. 22Lingcam lakah a cakmi anci cu Vancung Uknak thu thei naven hi leihum nunnak thu le la ah lungmu tamin, a ummite haw hi. Sum le pai a deihnak haw in mah thu cu khuh cihin, ngah nei ma hi. 23Lei ngampha ah a cakmi anci cu Vancung Uknak thu a beng haw in zain, a sullam vang a theitute haw hi. Amuh ten ngah nei in, a let za khat, a let sawm luk, a let sawm thum tianin nei haw hi,” tin hilh hi.

Hampa Thu Tehkipnak

24Jesuh in tehkipnak thu a dang hilh lehleu in: “Vancung Uknak cu hi bangin hi. Mi pa khatin, a lo sungah anci pha vawh hi. 25Zan khat cu mi hempoh tei hihbuh lanin, a ngalpa hungin anci lakah hampa ci vawhin taitullehta hi. 26Ankung cu poto haw in, a nguih hun ten hampa vang cu langbok hi. 27A umlawhte a lakah hung haw in, ‘Sazapa na lo sungah na vawhmi anci khi anci pha si mei? Ilai lam pen heng hampa a hen khak?’ tin dong haw hi. 28Amah in, ‘Hitih bangin a bawltu cu a ngalpa uh hi,’ tin don hi. Amuh ten, ‘Hampa cu bot ni ung maw?’ tin dong lehleu haw hi. 29Mahnaven amah in, ‘Bot pahsuh un,’ itahim titale hampa na bawh uhten ankungte botcih kha sual tuk uh ci. 30Ankungte a cop hun tian ankung le hamkung cu khangto kawm haw tahen; ‘Ankung a cop hun ten a masabelin hampa bot masa unna, haal tukin tom un hi; mah nungten ankungte cu cawm unna, ka beem sungah sung un tin don hi.’ ”

Ankam Ci Tehkipnak

(Mk 4:30-32; Lk 13:18-19)

31Jesuh in tehkipnak a dang pa khat hilh lehin: “Vancung Uknak cu hi bangin hi. Mi pa khatin ankam ci la in, a lo sungah vawh hi. 32Anci hempoh lak pen a neubelmi anci hinaven poto in, khangto a, huandum sung a cinmi ankung hempoh lak pen a ngengbel hi. Thingkung bang bokin vanote hungin, a kangte ah bu sa haw hi,” tin ti hi.

Naman Tehkipnak

(Lk 13:20-21)

33Jesuh in tehkipnak pa khat amu lakah hilh lehleu in; “Vancung Uknak cu numei pa khatin naman neuno la in sangvut seu thum sung a, cawhhelmi tuah bangten hi. Mahmi naman neuno in cangho bawm khat cu a venghawng thotik khawng hi,” tin ti hi.

Jesuh i Tehkipnak A Mandan

(Mk 4:33-34)

34Jesuh in hitih bang thute hi mipi lakah a hilh ten tehkipnak mangmek hi. Tehkipnak mang ngawlin amuh tei lakah imah hilh awng ma hi. 35Hitih bangin a hilhnak cu profet i hilhmi a kimnak tukin hi. Profet i hilhmi cu:

“Amuh tei lakah ka ot ten,

tehkipnak mang tung.

Leipi a pianpat pepan

a theih awng haw ngawlmi

thu khi amu lakah phuang tung,”

tin a tihmi hi.#Saam 78:2;

Jesuh In Hampa Thu Hilhciang

36Jesuh in mipite zamsanin, inn sungah tum hi. A nungzuitute cu a lakah hung haw in, “Lo sung a hampa kung tehkipnak cu itihnak kaw hilhin hi,” tin dong haw hi.

37Jesuh cu, “Anci pha thehtu cu Mihing Capa hi. 38Lo cu hi leihum na hi; anci pha cu Vancung Uknak a cotu mihingte hi a, hampa cu mipha ngawl pa i mihingte hi. 39Hampa ci a vawhtu a ngal uh cu Satan pa hi. Ankung cop cu hun bonak hi in, ankung cawmtute cu vancungmite haw hi. 40Hampate cu cawmkhawmin mei sungah haal khawng haw tuk hi: huntawpnak ten mah bangbok tuk hi. 41Mihing Capa in, a Uknak sung pen mi a sualtiktu le thilpha ngawl a bawltute cu a pualamah vawk tukin vancungmite tiik tuk hi. 42Mah mite cu mei sungah khia haw tuk a, mahlai ah kapin, hacang ngawi haw tuk hi. 43Pathian i mite cu a Pa Pathian haw i Uknak sungah ni bangin vak haw tuk hi. Mah hangin beng a neitu ten zata un,” ti hi.

Selmi Na Manpha Tehkipnak

44Jesuh in, “Vancung Uknak cu lo sungah selmi na manpha bang hi. Mahmi na manpha cu mi pa kha khatin amuh ten phano selta in, lungdam zetin pinleh tuk a, a neihmi hempoh zuakin mah lo cu lei hi,” tin hilh hi.

Suang Manpha Tehkipnak

45“Vancung Uknak cu hi bangin hi. Mi pa khatin kepsuang manpha zei hi. 46A man hak zetmi kepsuang manpha amuh ten pin vingvengin, a neih hempoh zuakin mah na manpha cu lei hi,” tin hilh hi.

Suuk Tehkipnak

47“Vancung Uknak cu hi bangin hi, tuinim sungah vawkin ngasa namkim a awkmi suuk tuah bangve hi. 48A suuk haw a dim ten tuimawkah dokin, a khungthahin ngasa cu teng haw hi; ngasa pha cu bawm sungah khumin, ngasa pha ngawlte cu vawk haw hi. 49Leihum hun tawpnak ten mahtibang bok tuk hi; Vancung mite hungin mipha tei lak pen mipha ngawlte cu cawmkhawmin, 50meipi sungah vawk haw tuk hi. Mahlai ah kap le tau in, hacang ngawi in um haw tuk hi,” tin ti hi.

Thudik Thak le Lun

51Mipite cu Jesuh in, “Hi thu hempoh hi theithei uh cim?” tin dong hi.

Amuh ten, “Thei ung,” tin don haw hi.

52Mahten Jesuh in, “Mah ahi tale Vancung Uknak sung a, Daan zilhtu hempoh cu a na koihnak inn sung pen thil thak le a lun kaisuah libektu inn neitu pa bang hi,” tin hilh hi.

Nazareth Ah Jesuh Sang Haw Ma

(Mk 6:1-6; Lk 4:16-30)

53Jesuh in hi tehkip thu a hilh celh ten mahlai pen tulin, 54ama khua ah pin hi. A pumkhawm inn innsung hawah thuzilhin, a thutheitu ten lamdangsa ngangai haw hi. “Hitih bang cihnak hi ilai lam pen la nantim?” tin dongdun li haw hi. “Hitih bang nalamdang hi itin kaw a bawl theih? 55Lettama pa i capa hi ma maw? A nu cu Mary a tih haw poh ma maw? James, Josef, Simon le Judas khi a naute si maw? 56A celnute vang hilai ah um bok haw ma maw? Ilai pen him hitih bang a ngah thei?” tin ti haw hi. 57Mah hangin Jesuh cu sang thei haw ma hi.

Jesuh in amu lakah, “Profet cu ama hinnak khua le tui sialngawl mundangah upat haw,” ti hi.#Jn 4:44; 58Upnak a neih haw ngawl hangin mahlai ah nalamdang tampi bawl ma hi.

Currently Selected:

MATTHAI 13: NBF1

Highlight

Copy