MATTHAI 11

Tuiphum Johan i Kamtaite

(Lk 7:18-35)

1Jesuh in, a nungzuitu sawm le pa nih tei lakah thuzilh a celh ten mahlai mun pen tulin a elkim khua ah thuzilh tuk le thuhilh tukin hawh hi.

2Thawnginn sung pen tuiphum Johan in, Khrih i nadehmi thu le late a zak ten amah zuitu khenkhat hahin, a lakah thudongtik hi. 3“A heng tuk laihmi um hi tin, Johan i tihmi cu nangmah hi cim maw, mahma tale midang ngak hih tuk ung kaw?” tin Jesuh dong haw hi.

4Jesuh in, “Hawh unna, na muhmi le na theih uhmi hempoh Johan lakah hilh un hi. 5Mitcaw ten khua mu haw, kebai ten vak thei in, miphaak ten thiang haw a, bengbul ten thu zain, mithite nung lehin mi ca-ngah tei lakah Thuthangpha cu phuanin um hi.#Isa 35:5-6; 61:1; 6Keima thu ah lungmu aicang po ngawltu cu thupha ngahmi haw hi,” tin ti hi.

7Johan i nungzuite a pinleh celh haw ten Jesuh in mipi tei lakah, Johan i thu cu hilh hi. “Johan lakah phillawnah na hawh uhten i mu tukin kaw na hawh uh? Huih i muh awn lihmi phaikung maw? 8I zo tukin kaw na hawh uh? Puan mawizet silhte zo tukin maw? Mahti bang puan a silhtute cu kumpipa innah a umte haw hi. 9Hilh hem un, i mu tukin kaw na hawh uh? Profet pa zo tukin maw? Mahzuh hi, profet pa mu zuh uh ci. Mahnaven na muh uhmi cu profette sangin ngeng saw hi. 10Itahim titale Johan i thu le la cu Lai Thiangtho in, Pathian in nangma ca lampi sialhamtu tukin na mai ah ka thu phuangtu tukin kamtai hah tung hi,” tin ngan hi.#Mal 3:1; 11Thungai in hilh ing. Numei i hinmi lakah tuiphum Johan bangin a ngengmi kua mah um awng ma laih hi. Mahnaven vancung ngam a, mi nautabelno hei Johan sangin ngeng saw laih hi. 12Johan i thu a hilh hun pepan tuni tian Vancung Uknak cu dodalnak nasezet tawkin thisan suah a lau ngawl ten siatsuah bebel nuam haw hi.#Lk 16:16; 13Ni dang laih pepan profette le Moses Daan ten Vancung Uknak thu hi Johan khan tian hilh haw hi. 14A thuhilhte na sang nuam ma uh tale Johan hi hung tuk hi tin son hammi Elijah khi hi.#Mal 4:5; Mt 17:10-13; Mk 9:11-13; 15Mah hangin beng a nei ten za un!

16“Atu khan a mihingte hi i tuah tehkip kam nang? Amuhte cu van zuaknak munah a khung khawmmi naupangte bang haw hi. Naupang hon khat ten a dang naupang hon khat tei lakah, 17‘Mohuainak khuangte tum sak nave ung, lam nuam ma uh ci! Mithi vuinak la, ka sahsak uh hei in kap nuam ma uh ci,’ tin ti haw hi. 18Johan i hun ten an cangin, sabittui vangin ngawlin a um ten mi hempohin, ‘A sungah khawhuai tum hi,’ tin ti haw hi. 19Mihing Capa hungin a eih le a in, amuh haw ten mi hempoh ten, ‘hi pa khi zo hem un! Mi longaak le zu ngawp misilpa; siahkhontu le misual tei ngualcam hi,’ ti haw hi. Mahnaven Pathian i cihnak cu man hi tih a nadehnakin langtik,” ti hi.

A Umngawltu Khuapite

(Lk 10:13-15)

20Jesuh i nalamdang tambel a bawlnak khua ten a sualnak haw a sih cuang haw ngawl hangin liat hi. 21“Khorazin khua mite, bawngsiazet sisi! Bethsaida khua mite, bawngsiazet sisi! Nangmu lak pen nalamdang ka bawlte hi Taiar khua le Sidon khua ah ka bawlta ahin, mahlai khuasung ten sual a sih haw langtiknakin thangkhau puan silhin, vut a bualnak haw ngeizet tuk toh ven!#Isa 23:1-18; Ezk 26:1-28:26; Joel 3:4-8; Amos 1:9-10; Zek 9:2-4; 22Thungai in hilh ing. Thukhennak Ni ten Pathian in nohte sangin Taiar le Sidon khua tei humah hehpihnak tam saw nei tuk hi. 23Kapernaum khua mite, van khong tianin maw cawisan toh na nuam? Hell sungah vawk hi tuk ci! Nangma sung a, bawlmi nalamdangte khi Sodom khua ah bawlta ahin, sia ngawlin tuni tianin kho leng tuk laih naven!#Isa 14:13-15; Pian 19:24-28; 24Thungai in hilh ing: Thukhen Ni ten nangmah sangin Sodom khua humah Pathian in hehpihnak tam saw nei tuk,” ti hi.#Mt 10:15; Lk 10:12;

Keima Lakah Cawl Un Hi

(Lk 10:21-22)

25Jesuh in, “Maw ka pa, lei le van i Topa! Micip le mithiam tei lak pen a sel lelengmi khi atu-in imah a thiam ngawl tei lakah na langtik hangin lungdam ing. 26Mahzuh hi, Ka Pa, hitih bangin a piang tukin na deihmi hi.

27“Ka Pa in, ka khut sungah ihempoh pia khawng zo hi. Pa sialngawl kuamah in, Capa cu thei haw ma hi; mahten Capa in thei bok haw hen tin, a ten mite sial ngawl, kuamah in Pa thei haw ma hi.#Jn 3:35; 1:18; 10:15;

28“Van ngit a pua mi le a cim a kham mite, ka nelah hung un, colhdamnak pia tung hi. 29Ka kolhak hi pua teh unna, keima lak pen cung un; kei cu nunnem le niamkhiatnak lungmu neimi ing. Keima lak pen cung unna, colhdamnak ngah tuk uh ci.#Jer 6:16; 30Itahim titale kei kolhak cu puaknopin, ka van vang zang hi,” tin hilh hi.

Currently Selected:

MATTHAI 11: NBF1

Highlight

Copy