MALAKHI 3
3
1Ihempoh tithei Topa in, “Keima ca tukin lampi sialtu tuk palai hah tung. Na zei lih uhmi Topa cu a Biakinn ah muankhak ngawlin hung tuk hi. Na ngahhelhzet uhmi ka palai cu hung tuk a, ka thutiam cu phuang tuk hi.”#Mt 11:10; Mk 1:2; Lk 1:76; 7:27;
2Mah ahi hei in, a hen tuk ni cu akua in thuak thei tuk kaw? A hun ngangai ten akua luat thei tuk hum? Van sawpnak sahphio le thik nangawnin, a ciangtik theitu mei alh bang hi tuk hi.#Joel 2:11; Mang 6:17; 3Ngun cu tuitikin, thiangtik theitu bangin, thukhen tukin amah cu hung tuk hi. Thiksektu in, sui le ngun a ciantik bangin Topa i palai in, thiampite thiangtik tuk a, mahten a manmi biakpiaknak cu Topa nelah cawi haw tuk hi. 4Judah mi le Jerusalem mitei piakmi biakpiaknak cu ni dang bang lengin Topa i mai ah santak hi tuk toh hi.
5Ihempoh tithei Topa in, “Na thu uh khen tukin noh tei lakah hung tung a, mitzial thiamte, angkawm sualnak a bawltute, theihpihtu man ngawlte, meivong le ca-ngah siat thei ngamdangmi tei humah metnak a zeitute le keimah a upat ngawltu tei humah dantatin thukhen tung,” ti hi.
Seh Sawm Seh Khat Piaknak
6 Topa in, “Keimah cu Topa ing hi, a thekdun awng viang ngawlmi ing. Mah hangin noh Jakob casuante cu cimit ma laih ci. 7Nangmu laih ngawlin na pu le pa uhte bang lelengin nohte vang ka daan piakmi tei lak pen pialin, zui ma uh ci. Keima lamah hekkik unna, nangmu lam hek kikleh bok tung. Mahnaven noh ten, ‘Nangma lakah hek kikleh tukin i bawl tuk kam ung?’ tin dong uh ci. 8Kei vangin dong bok tung: Mi pa khatin Pathian ta nguk hi man ti uh cim maw? Man ma hi tih cu zapi thei ten cu hi naven noh ten ngu leleng uh ci. ‘Itin kaw ka nguk uh?’ tin dongta laih uh ci. Seh sawm seh khat le sumpi na piak ngawl uhten a ngu hi uh ci. 9Na venghawng uh humah tamsiatnak heng hi, itahim titale na miphun venghawng uhin kata ngu uh ci. 10Biakinn ah na seh sawm seh khat uh cu a kimno in cawi unna, an tampi um tuk hi. Keimah hi khingkhai himpo hem un, vancung kongkate hong tung a, noh tei ca in thilpha namkim buaksuk tung hi.#Thiam 27:30; Mipum 18:21-24; Daan 12:6; 14:22-29; Neh 13:12; 11Na lo uh a, ante lunghing sivai ten siatsuah ngawlin, na sabit ngui uh i humah ngah sabit bawkluih tuk hi. 12Miphun hempoh ten thupha co, mi lungdam tin, ti haw tuk hi. Itahim titale na ngam uh cu ngam pha le ngam op hi tuk ti hi.
Pathian Hehpihnak Thutiam
13 Topa in, “Ka thu la cu mawi ngawl zetin son uh ci. ‘Mahnaven na thu uh ka sonmi i um hum?’ tin ti uh ci. 14Na ottul li uhmi cu ‘Pathian na ka deh lih uhte hi thawn thong hi. A hilhmi bangin bawl lih hei hi i nemcuam hum? Ka bawl sual uhmi sikdunin le ka khaw-ngaihnak uhte Ihempoh tithei Topa nelah langtik tum lih hi nemcuamnak i um kaw? 15Amuh ten uh bangin mi pualthau lehlam thupha co haw! Mipha ngawlte hau mahtakin, a um haw i humah thil sual bawl thahin Pathian thinsaunak cu khingkhai haw a, bawngsiatnak imah um ngawlin luat leng haw poh ma maw i hum!’ ti uh ci,” ti hi.
16 Topa a kihcatute cu pa khat le pa khat otpihdun haw in, a ot haw mi cu Topa in ngai in, za hi. A mitmuh haw cilcelin Topa a kihcatu le a upattu tei thu la cu laibu sungah khum haw hi. 17Ihempoh tithei Topa in, “Amuhte cu ka mihing hi haw tuk hi. Na ka bawlsuah ni ten kata in, cang loli haw tuk hi. A pa i na a dehsaktu capa cu a pa in, a hehpih bang bokin, amuhte cu hehpih tung hi. 18mi dikcangte le mi ngilote, keima nadektu le dek ngawltu tei a lamdan dunnak muleh haw tuk hi.”
Currently Selected:
MALAKHI 3: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
