LUKA 16

Tangka Kemtu Pha Ngawl

1Jesuh in, a nungzuitu tei lakah, “Mihau pa khat umin, mah mihau pa in, a sumkemtu tukin nadektu pa khat nei hi. Hi nadek pa in tangka cu a deih bangin theh khek hi tin, a bawipa i lakah hilh haw hi. 2Mah hangin a lakah samin, ‘Na thu ka zakmi hi iti bang him? Ka tangka na kepnak cazin kimno in pia in hi. Itahim titale ka tangka kemtu hi theileh tukma toh ci,’ tin ti hi. 3A nadektu pa in, ‘Ka bawipa ka nadehnak pen kei hawlvawk nuam hei! I ka bawl tuk heng? Leicek tuk ti ahin, nap lehma toh ing a, mi thil ngenin, um nang ti ahin ka zakca sih hi. 4Atu-in ka bawl tuk thei zo ing, ka nadeh a bo ten amu inn a, um a phaltu ngualcam pha ka neih kul tuk hi,’ tin ngaisung hi.

5Mah hangin a bawipa i lak a, leiba neitu hempoh sam khawm hi. Pa khatnak pa cu, ‘Ka bawipa lakah izong leiba cim?’ tin dong hi. 6Mahpa in, ‘Olif thau pung za khat,’ tin don hi. Sumkemtu pa in, ‘Hi na cazin hi tuk hi: khung inna, bung sawm nga tin nganin hi,’ tin ti hi. 7Mahten a dang pa khat pa cu, ‘Nang aw izah leiba nge cim?’ tin dong hi. Mahpa in, ‘Sangvut dip thawng khat,’ tin don hi. Cazin lentu pa in, ‘Hilai ah na cazin um hi, dip za liat tin nganin hi,’ tin ti hi. 8Hi micip ngawl sumkem pa cu hi bangin cipthiam zetin, na a deh hangin a bawipa in pakzet hi. Itahim titale hi leihummi cu amu thu le la vaihawmnak lamah khuavak mihingte sangin cip saw hi.

9Jesuh in, “Mahtibang a hih hangin hi tih hin hilh ing. Leihum thil tuah ngualcam na bawl un, itahim titale leihum thil a bo ten kumkhua a kho mi inn nopah tum tuk uh ci. 10Thil neuno hum a muanhuaimi cu thil ngengpi humah muantak hi tuk hi. Thil neuno hum a muantak ngawlmi cu thil ngengpi humah muanhuai hi tukma hi. 11Leihum thil na vaihawmnak uhah na muantak uhma tale let le hauhnak tatak cu noh tei lakah ita bangin piakin um thei tuk him? 12Midang tei humah nangawn muanhuaileh ngawl toh na hi uh tale nangmu co tuk cu akua in pia tuk him?

13“Mi pa khat cu bawi pa nih i sal hi thei ma hi; pa khat hua in pa khat it tuk hi. Pa khat lakah muanhuai in nung tuk a, pa khat saw cu nautat tuk hi. Pathian i na le sumpai na cu dek langkhat thei tukma uh ci,” ti hi.#Mt 6:24;

Jesuh Hilhmi Thu

(Mt 11:12-13; 5:31-33; Mk 10:11-12)

14Hi thu Farasi ten a theih haw ten sumpai deihte a hih haw bangin Jesuh cu nuihsan thong haw hi. 15Jesuh in amuh tei lakah, “Mipi mai ah midikbel bangin langdun cawmtik hi uh ci. Mahnaven Pathian in, na lungmu uhte thei khawng hi. Itahim titale mihingin man neizet a ngaihsutmi cu Pathian muhnak pen imah ma hi.

16Moses Daan le profet tei laingat cu tuiphum Johan khan tian ca bek hi. Johan pepanin Pathian Uknak Thuthangpha cu phuanin um hi. Mahlai ah mi hempoh heh tin luh tum haw hi.#Mt 11:12-13; 17Mahnaven Daan sung a laimal a neubel nangawn a bo tuk sangin van le lei bo khawng tuk baih saw hi.#Mt 5:18;

18Kua hei hihen a zi ma in, numei dang a puitu cu nupa sualnak bawl hi. Mah i humah maakmi puitu vang cu nupa sualnak bawl, ti hi.#Mt 5:32; 1Kor 7:10-11;

Mihaupa le Lazaras Thu

19Vei khat laihin, mihauzet pa khat um hi. Nisialin van man phapha silhin nop zetin nung hi. 20Mahlai takin Lazaras tihmi, mi ca-ngahzet pa khat um bok hi. Lazaras cu a ti pumpi cingin meima dim uk hi. 21Mihaupa i an eihnak cabuai nuai an thial caak khul tukin mihau pai kongka bulah heng thei mek hi. Uico hungin a meima liahsak theizet haw hi.

22Ni khat ni-in mi ca-ngah pa cu thi hi. Mahten vancungmi ten Abraham i angsungah hen haw hi. Mihau pa vang cu thi bokin vui haw hi. 23Mahten Hell sungah cakin, a thuak hakzet hi. Humlam a zohto ten a sangzetnak munah khin Abraham le a el a Lazaras khi muto hi. 24Mahten mihau pa in, ‘Pa Abraham kei hehpih zalin hi. Lazaras in, a khutzung cu tui ah nim henna, ka lei ah caksuk tukin cialin hi. Itahim titale kei cu hi meipi sungah hin ka thuak haksa leita hi,’ tin ti hi.

25Mahnaven Abraham in, ‘Ka capa aw, ngaisungin hi. Na nunlaih khin thilpha hempoh ngah kim zo toh ci. Lazaras in thilpha ngawl hempoh khi co hi. Mahnaven atu-in amah cu hilai ah hin nunnopin um hi. Nang cu atu-in, a thuak hi ci. 26Mah sial ngawl a laklawh uhah luam thukzet um hi. Mah hangin hilai pen nangma lakah a hawh nuam kuamah hawh thei ma hi. Mahti bang bokin nangma umnak pen kohtei umnakah vang a hung nuam tampi um naven hung thei haw ma hi,’ tin ti hi. 27Mahten mihau pa in, ‘Mah ahi tale, maw ka pa Abraham, ka pai innah Lazaras hawhtik zazalin hi. 28Mahlai ah unau pa nga nei ing, amuh beek hilai thuaknak munah a hen haw ngawlnak tukin ngallinnak pia tahen tin hehpih kuun ing hi,’ tin ti hi.

29“Abraham in, ‘Na unau ngallinnak piatu tuk Moses le profette um haw hi. A hilhmi thu ngai haw hen,’ tin ti hi. 30Mihaupa in, ‘Ka pa Abraham aw, hi tih bekin tawk ma laih hi. Mi pa khat thihnak pen tho in amuh tei lakah a heng bang ahin, a nunsualnak kheel haw tuk hi,’ tin ti hi. 31Mahnaven Abraham in, ‘Moses le profet tei thu a ngai nuam haw ma tale mi pa khat thihnak pen a tholeh hei in sang nuam haw tukma hi,’ tin ti hi,” tih thu Jesuh in hilh hi.

Currently Selected:

LUKA 16: NBF1

Highlight

Copy