LUKA 14

Jesuh In Tina Pa Damtik

1Sabbath ni-in, Jesuh cu Farasi mi lak pen hotu bok pa khat i innah an zuan tukin hawh hi. Mipi ten phazetno in zo leleng haw hi. 2Mi pa khat, a khut le ke bum khawng pa Jesuh lakah hung hi. 3Jesuh in Daan zilhtu le Farasi khi, “A daan uhin, Sabbath ni-in, tina damtik tuk hi phal maw phal ma him,” tin dong hi.

4Mahnaven amuh cu imah awn haw ma hi. Jesuh in tina pa cu pui in, a damtik ceng ten hawh lehtik hi. 5Jesuh in, “Nangmu sungah mi pa khat cu a capa maw, a khui maw Sabbath ni-in tuikhuk sungah a cak kha ahin, Sabbath ni a hih hangin manlang zetin suah ngawlin maw na um tuk uh?” tih dong hi.#Mt 12:11;

6Hi thu ah imah don thei haw ma hi.

Mikhual Hum Phatnak le Lungnemnak

7An eih tuk a sammi khenkhat khunnak phabel a ten lih haw khi Jesuh in, amuh hangin hi tehkipnak hi a venghawng haw lakah hilh hi. 8“Mopuainak munah a sam haw tale khunnak phabel khi na cuh pahsuh un. Nangmah sangin mi upa sawte sam haw hei hi kha thei hi. 9Mahten nohte a samtu inn tek pa na lakah hungin, ‘Na khunnak hi kian in hi,’ tituk a, nang cu mun niambel a na khunleh ten na zakca leita tuk ci. 10Mah sangin a sam haw ten a niambel munah khung inna, a samtu inntek pa hungin, ngual aw, khunnak pha deuhah khungin; tin tituk hi. Mahten sammi mi honpi mai ah mitmai pha ngah tuk ci.#Thup 25:6-7; 11Itahim titale mah le mah a uangkho duncoptu cu mi nauta cangtik tuk hi. Lungmu niamkhiattu cu maison comi upa in cangtik tuk,” ti hi.#Mt 23:12;

12Jesuh in inntek pa i lakah, “Zingeih hihen, takeih hihen ei ten tukin mi na sam ten na ngualcamte le na unaute ahimata na sangngam mihauzette khi sam pahsun hi. Itahim titale himi ten nangmah khi samleh thei bok haw tuk hi. Na thil bawlmi khi lohleh thei haw tuk hi. 13Mahnaven an na vak ten ca-ngah haksa, kebai le mitcawte khi samin hi. 14Hi ten samleh thei haw tuk ngawl a hih hangin nang cu thupha muicu dong tuk ci. Mipha tei thihnak pen a thawhleh haw ten Pathian in nangmah lulleh tuk,” tin ti hi.

Anvak Puai Tehkipnak

(Mt 22:1-10)

15Hi thu cu an eihnak cabuai ah a khung boktu pa khatin, a zak ten Jesuh lakah, “Vancung Uknak sung a, an vaknak puai ah a tel tei humah thupha um hi” tin ti hi.

16Jesuh in himi pa i lakah, “Nidang laihin mi pa khat um a, mahpa in, an vaknak puai ngengzet bawlin mihing tamzet sam hi. 17An eih hun ten a samsami tei lakah a inncengte hawhtikin, ‘Hung toh un, na hempoh a mansa in um hi!’ tin ti hi. 18Mahnaven pa khat nung pa khat, ‘Man mang,’ tin otlap tuk zei tek haw hi. Pa khat pa cu, ‘Lo cing khat lei ing. Mahmi ka zohta kul hi. Ngaithiam hihin,’ tin innceng pa cu ti hi. 19Adang pa khatin, ‘Khuicang kap nga lei ing a, atu-in, a pha le pha ngawl teh hih nang, ngaithiam hih pohin,’ tin ti bok hi. 20Adang pa khatin, ‘Tu naino in, zihuai ngelcel ing. Mah hangin hung thei tuk mang,’ ti leleu hi.

21Innceng pa cu kiklehin, hi thu hempoh cu a bawipa lakah hilh khawng hi. A bawipa cu a thinukin, a innceng pa i lakah, ‘Manlang zetin hawh inna, khuasung lampi le inn laklawh lampi a, ca-ngah, haksa, khut le ke zawng, mitcaw, kebaite pui in ti hi.’ 22A ngeingawlno in, a innceng pa in, ‘Bawipa na thupiakmi bangin bawl khawng zo toh naveng umnak tampi tong laih hi,’ tin hilh hi. 23Mah hangin a Topa in, ‘Ngam sung a, lampi ngeng le neu hempoh ah hawh inna, ka inn dim khawng laklawh mihing hunpihin hi. 24Ciang zetin hilh ing. Ka samsami sung pen kuamah in ka takeih vaknak an, tep haw ma hen,’ tin ti hi,” tih thu hilh hi.

Nungzuitu i Haksatnak

(Mt 10:37-38)

25Vei khat cu mi tampi ten Jesuh a zui pepel haw laihin, Jesuh in amu lamah hekkikin, 26“Akua hei hihen ka lakah hungin a nu le pa, a zi le canote, a sangngam le a celnute le amah le amah nangawn keimah sangin a itduncop sawte cu ka nungzuitu hi thei tukma hi. #Mt 10:37; 27Akua hei hihen, ama thinglamteh pua in, ka nung a zui ngawltu cu ka nungzuitu hi thei kha tukma,” ti hi.#Mt 10:38; 16:24; Mk 8:34; Lk 9:23;

28Nangmu sung pen pa kha khatin, innpi sa tukin a tumtah tale, khung ciamciam masa in, a saknak tuk a kulzah tangka a kimin, a neih le neih ngawl khi tuat khawng masa ma maw? 29Mahti bangin a tuat masa khawng ngawl ahi tale, a nadeh tukmi cu a pat ngah ceng ten sa ceng ngawl hantangin, a mutu hempohin nuihsan haw tuk hi. 30‘Pan bok heng naven ceng theita bo,’ tin ti haw tuk hi.

31Ngalkap thawng sawm nei kumpi pa khatin, ngalkap thawng sawm nih neimi kumpi dang pa khat cu do tukin a tum tale, a masabelin khung ciamciam hihta in hi pa do zawhnak tuk thazaang a neih le neih ngawl a ngaihsut masak kul hi. 32Do theihnak thazaang a nei ma tale mah kumpipa cu khawlapi a umlaihin lemdunnak bawl tukin kamtai a hah kul tuk hi. 33Mahti bang bokin noh vang na neih uhmi hempoh na zamsan uh ma tale ka nungzuitu hi thei tukma uh ci,” tin Jesuh in ti hi.

Man Nei Ngawlmi Ci

(Mt 5:13; Mk 9:50)

34“Ci cu phazet naven a alnak a bo tale al tikleh theihnak lampi umma toh hi. 35Lei ngamphatiktu tuk hei in nemcuam ngawlin le ekdawm tuk hei in nemcuam ngawltohin vawkthong tuk toh khi hi. Mah hangin zaknak tuk beng a nei hempoh ten zata un,” tin Jesuh in ti hi.

Currently Selected:

LUKA 14: NBF1

Highlight

Copy