JOHAN 9

Jesuh In Pianpih Mitcaw Damtik

1Jesuh cu lampi ah a hawhlih laih takin pianpih mitcawpa pa khat mu hi. 2A nungzuitu ten a lakah, “Sazapa, a nu i pum sung pen mitcawsa in, a piannak hi a koi sualnak kaw? Ama sualnak hang maw, a nu le pa i sualnak hang kaw?” tin dong haw hi.

3Jesuh in, “A mitcawnak cu ama sualnak hang hei hi ma, a nu le pa tei sualnak hang hei hi ma, Pathian thil tihtheihnak huham a lang theihnak tukin hi. 4Sun khuavak sungzong cu keimah a tiiktu pa i na khi a dehlih tuk uhmi hi. Kuamah i deh theih ngawl can zaan hun heng li toh hi. 5Leihumah ka umlaihin leihum mitei ca in vaknak ing hi,” tin don hi.#Mt 5:14; Jn 8:12;

6Hi thu a son ceng ten Jesuh cu lei ah a cilsia in, leiciak dawmlaihno a bawl celh ten mah leiciakno cu la in, mitcawpa mitah noih hi. 7A noih ceng ten, “Hawh inna, Siloam tuitingah na maiphiatin,” ti hi. Siloam tih cu, ‘Tiik,’ tihnak hi. Mitcaw pa cu Jesuh i tiiknak bangin a mai a phiah ceng ten khua mu ciangin kikleh hi.

8A inn nelte le a veidawh lih laihin amu awngtu ten, “A khungin, veidawh li pa khi hi ma maw?” tin ti haw hi.

9Khenkhat ten, “Mahzuh hi,” tin ti haw hi. Khenkhat ten, “Amah kha ma hi. Mahpa tuah bangve ngai haw si,” tin ti haw hi.

Mahpa in, “Keimah zuh ing hi,” tin amahno sontodun hi.

10Amuh ten, “Iti bangin na mit khua muleh thei nge cim?” tin dong haw hi.

11Mahpa in, “Mi pa khat, a min Jesuh a tih haw pa in leiciak la in, ka mitah noih hi. A noih ceng ten, ‘Hawh inna, Siloam tuitingah na mai phiat tan hi,’ tin tiik hi. A tiiknak bangin hawh ing a, ka mai ka phiah bek ten ka mit hakto thei in khua mu thei ing,” tin don hi.

12Amuh ten, “Amah ilai ah kaw?” tin a dot haw ten, “Thei mang,” tin don hi.

Farasi Ten A Damnak Thu Kan

13Mitcaw awng pa cu Farasi tei lakah hawhpih haw hi. 14Jesuh in leiciak bawlin mi a damtik ni cu Sabbath ni hi. 15Farasi ten, “Iti bangin na mit khua mu thei cim?” tin dong leleu haw hi. Mahpa in, “Leiciak dawmlaih la in, ka mitah noih hi. Mahceng ten mai phiattikin, mai ka phiat le ka mit khua mu thei ing,” ti hi.

16Farasi khenkhat ten, “Himi thil bawltu pa cu Pathian lak pen a hungmi hi kha tukma hi. Itahim titale Sabbath daan palcat hi,” tin ti haw hi.

Mahnaven khenkhat ten, “Mah ahi ahin, mi sualmi cu iti bangin hi bang nalamdang bawl thei tuk him?” tin ti bok haw hi. Mah hangin amu sung lala ah khendunnak piang hi.

17Farasi ten mahpa cu vei khat dong thuah lehleu haw in, “Na mit a damtiktu hi akua tukin ngaisung kam?” tin dong haw hi. “Amah cu profet pa khat hi,” tin don hi.

18Judah thuneitu ten amah cu a mitcaw naven atu-in khua mulehta hi, tih cu sang thei viang haw ma hi. Mah hangin mahpa i nu le pa cu samin, 19“Hi pa hi na capa ngangai a maw? Mitcawsa in hinmi ti si uh si. Atu-in khua mu thei si,” tin dong haw hi.

20A nu le pa ten, “Amah cu ka ca ngangai uh hi, tih cu thei ung hi. A mitcawsa in hing tul hi, tihvang thei ung hi. 21Mahnaven atu-in iti bangin khua muleh thei kaw, tih le kua in, a mitvaktikleh him tih cu thei ma ung hi. Amah vang upa bok zo ahi tak amah dong poh unna, son thei khawng tuk hi,” tin don haw hi. 22A nu le pa ten ita hi bangin donleh haw him titale, Judah thuneitu ten Jesuh cu Khrih hi tin, a titu pawpoh cu biaknak inn pen hawlvawk tuk hung hi, tin lungkimnak a neihsa haw mi a lau haw hangin hi. 23Mah hangin, “Upa bok zo hi. Amah dongta un,” tin a tihnak haw hi.

24Mitcawsa in hinmi pa cu vei nihnak sam leleu haw a, “Thutak son tung, tin Pathian mai ah thutiamin hi. A damtiktu pa cu misual tih thei ung,” tin ti haw hi.

25Mitcawsa in hinmi pa in, “Misual a hih le hih ngawl thei mang. Mahnaven ka theihmi pa khat cu kei cu mitcaw awng naven atu-in khua mu ing hi,” tin don hi.

26“Iti bangin bawl him?” tin dong leleu haw hi.

27“Hilh zo toh sing, na ngaih nuam uh ngawl hang si! Ita za nuam leleu uh cim? Nangmuh vang hi ama nungzuitute hi tuk poh nuam bok uh cim maw?” tin don hi.

28Mahpa cu vapzan haw in, “Nangmah saw sisi a nungzuitu! Kohte cu Moses i nungzuitute si ung. 29Pathian in Moses lakah thuhilh tih thei ung. Mahnaven hi pa khi cu ilai lam pen hung him tih thei ma ung hi,” tin don haw hi.

30Mahpa in, “Izahta in lamdang him! Ka mit khua mulehtik thei leng napi in, ilai pen hung him tih na theih uh ngawl cu lamdangzet ngai si! tin don hi. 31Pathian in misual tei thu cu ngai kha ma hi. Mahnaven amah a upattu le ama deihnak a bawltu tei thu cu ngai hi, tih cu thei hung hi. 32Leihum a pianpat pepan mitcawsa in hinmi khi vak lehtik tih thu a kuamah in thei awng ma hung hi. 33Hi pa hi Pathian lak pen a hungmi ahimata hitih bangte bawl thei tukma hi,” tin ti hi.

34Amuh ten, “Nang, sualnak sung pen tulin sualnak tuah a khangtomi in kohte thuhilh tuk ngen ngaisung bok cu?” tin pumkhawm inn pen hawlvawk haw hi.

Hawvang Mitcaw

35Jesuh in mahti bangin a hawlvawk haw a zak ten ama lakah, “Mihing Capa cu um cim?” tin dong hi.

36Mahpa in, “Topa aw mahmi pa cu ka up theihnak tukin akua him tih hilhin!” tin don hi.

37Jesuh in, “Amah cu mu zo ci. Atu-in nangmah tuah a otpihdun litu pa khi hi,” tin don hi.

38Mahpa in Jesuh i mai ah khukdinin, “Topa um ing hi,” tin don hi.

39Jesuh in, “Hi leihumah thukhen tukin hung ing. Mitcawte khua mutik tukin le khua musate mit cawtik tukin,” ti hi.

40Hiti bangin a tih lih laihtakin, a el a um Farasi khenkhat ten mah thu a zak haw ten, “Mah ahi tale keimuh vang na mit uh caw hi tin na tihnak ven maw?” tin dong haw hi.

41Jesuh in, “Na mit uh a caw bang ahin, sual tukma uh ci. Mahnaven noh ten, ‘Khua mu leng ung,’ na tih uh hangin na sualnak uh um leng laih hi,” tin don hi.

Currently Selected:

JOHAN 9: NBF1

Highlight

Copy