JOHAN 6

Jesuh in Mi Thawng Nga An Vak

(Mt 14:13-21; Mk 6:30-44; Lk 9:10-17)

1Mah nungten Jesuh cu Galilee Tuitingpi ngalkhat lamah hawh hi. Mah Tuitingpi cu Tiberius tih hei in sam haw hi. 2Mi honpi ten amah cu tina damtikin, thasiahhuai nalamdang a bawl mite khi mu zo toh haw hangin zui haw hi. Hi. 3Jesuh cu mualhumah kaito in, a nungzuitute tuah khungkhawm haw hi. 4Judah tei Kaltan Puai cu naizet zo hi. 5Jesuh cu a elkimte a zoh kawkawi ten mihon tampi in amah zuan li cu mu hi. Mahten Filip lakah, “Mi honpi tei eih tukin ilai ah an lei kam nung?” tin dong hi. 6Mahti bangin a dotmi cu Filip lungmu a zohnak thongpoh hi, a ngangai cu itin bawm kam nang tih cu amah in thei leng hi.

7Filip in, “Ngun tangka#6:7 Tangka cang khat cu mah hun lai in mi zalan tei ni khat lawhman hi. za nih val man cangho a lei uh hei in, tham cuang ol ma laih si,” tin don hi.

8Nungzuitu tei sung pen Simon Peter i naupa Andru in, 9“Hilai ah naupang pa khatin, cangho pa nga le ngasa pa nih nei hi. Mahnaven mihing hi zong ca in, tingcak ceng tukma,” ti hi.

10Jesuh in, “Mi honpi cu khungtik un,” tin ti hi. Mahlai munah hampa tampi um hi. Mi honpi cu a khun haw ten, a venghawng haw in thawng nga laih kim hi. 11Jesuh in cangho cu la in, Pathian nelah lungdamnak thu a hilh ceng ten, a khung khawmmi mi honpi cu sem hi. Mahti bang bokin ngasa cu sem leleu in, a venghawng haw in kham-ukin, ei haw hi. 12A kham khawng ceng haw ten nungzuitute cu, “An khambangte cawmleh khawng unna, thial khatno hei thamthongtik tukma hung,” ti hi. 13A tih bangin nungzuitu ten cawmleh haw in, cangho pa nga le ngasa pa nih a eih khambang haw cu kho sawm le kho nih kim hi.

14Mahlai a um mi honpi ten, mahti bangin Jesuh i thasiahhuai nalamdang a bawlte amuh haw ten, “Hi pa hi, hi leihumah a hung tukmi profet a tih haw mi hi toh hi,” tin ti haw hi. 15Mi honpi ten Jesuh cu a nuam vang nuam ngawl vangin kumpi bawi dektik nuam haw hi. Mahnaven hi bangin a lungtup haw mi cu Jesuh in, a theih ten amah nguakcangin mualhumah hawhleh hi.

Tui humah Jesuh Hawh

(Mt 14:22-33; Mk 6:45-52)

16Taklam ten nungzuitute cu Galilee tuitingpi lamah hawhsuk haw hi. 17Hawmkuang sungah khung haw in, Kapernaum khua lam zuanin hawh haw hi. Khuathim li toh naven Jesuh cu amu lakah hung cuang ma laih hi. 18Huihsia nasezet theu in, tuihualpi khanglet hi. 19Nungzuitute cu peng thum, peng li laih cu a hawmkuang hot li haw hi. Jesuh cu tuipi humah amu lam zuanin, a hung li khi amuh haw ten lau mahtak haw hi. 20Jesuh in, “Lau pahsuh un keimah ing,” ti hi. 21Nungzuitu ten Jesuh cu hawmkuang sungah khungtik haw in, a ngeingawlno in, a hen nuamnak haw munah heng paih haw hi.

Mipi Ten Jesuh Zei Haw

22A zingten tuipi ngalkhat lam a, mi honpi ten tui mawkah hawmkuang pa khat um leng khi mu haw hi. Nungzuitu tei hawh laih khin Jesuh tel kha ngawlin amuhno hawh haw tih thu vang thei haw hi. 23Mahlai takin Topa Pathian nelah lungdamnak thu a hilh ceng ten cangho a eihnak haw munah Tiberius lam pen a hengmi hawmkuang dangte vang cawl bok haw hi. 24Mi hempoh ten mahlai ah Jesuh le nungzuitute vang umleh haw ma toh tih a muh haw ten, hawmkuang khungin Kapernaum lamah Jesuh cu zei haw hi.

Jesuh Cu Nunnak Cangho

25Ngalkhat lamah Jesuh cu tawk haw in, “Sazapa, ituk laihin, hilai heng cim?” tin dong haw hi.

26Jesuh in, “Thutakin hilh ing. Noh ten thasiahhuai nalamdang ka bawlnak hangin keimah zei hi kha saw ngawlin, vonvah ukin, an na eih uh hangin keimah zei hi saw uh ci. 27A sialeh theimi an ca in, nadek pahsuh un. Kumkhua a phaatmi nunnak an ca tukin dek saw un hi. Mah an cu Mihing Capa in, nohte pia tuk hi. Itahim titale Pa Pathian in, a humah lungkimnak tacik khen zo toh hi.”

28Mi honpi ten, “Pathian in deh tuk a deihsakmi ka deh tuk uh ite um kam ni?” tin dong haw hi.

29Jesuh in, “A tiikmi pa cu um un. Mahmi cu Pathian in nohte a dehtik nuammi nadeh hi,” tin don hi.

30Mi honpi ten, “Mah ahi tale nangmah ka up theihnak tukin, nalamdang i bawl tuk nge cim? 31Lai Thiangtho sungah, ‘Eih tuk cangho van pen piasuk hi,’ tin, a tih bangin ka pu le pa uhten phillawn sung pen manna ei ngangai haw hi,” tin ti haw hi.#Suah 16:4, 15; Saam 78:24;

32Jesuh in, “Thutakin hilh ing. Moses i piakmi cu vanhum cangho hi kha ma hi. Vanhum cangho ngangai a piatu cu ka Pa bek hi. 33Pathian i piakmi cangho cu vanhum pen hungin leihumah nunnak a piatu pa khi hi,” ti hi.

34Amuh ten, “Topa mahmi cangho cu kohte pia lelengin hi,” tin ngen haw hi.

35Jesuh in, “Keimah cu mahmi nunnak cangho ing. Keima lakah a hung mite cu ituk mahten a ngilkialleh haw tukma toh hi. Keimah a umtute cu ituk mahten dangdumleh haw tukma toh hi. 36Mahnaven ka hilhsa bangin noh ten kei cu mu zo nave uhcin um nuam ma uh ci. 37Ka pa in keimah a piakmi pawpoh cu kua hei hihen ka lakah hung haw tuk hi. Keima lakah a hungmi pawpoh cu pa khatno hei kik tuk mang hi. 38Itahim titale kei cu keima deihnak bang dek tukin hung hi ngawlin, keimah a tiiktu pa i deihnak bangin dek tukin van pen a hungsukmi ing. 39Keimah a tiiktu pa i deihnak cu ni dawlbel ten pa khatno hei paithong ngawlin nunnakah thawhlehtik theihnak tukin hi. 40Itahim titale Capa mu in, a umtu hempoh ten kumkhua nunnak a ngah haw tuk khi ka pa i deihnak hi, mahten ni dawlbel ni ten nunnakah thokiktikleh tung,” ti hi.

41Jesuh in, “Kei cu vanhum pen a hungsukmi cangho ing hi,” a tih ten Judah mite cu phu celhculh haw hi. 42Judah ten, “Hi pa hi Josef capa hi ma maw? A pa thei ung, a nu vang thei si ung. Ita vanhum pen a hungsukmi cangho ing hi! tin ti thei heng?” tin tili haw hi.

43Jesuh in, “Phu celhculh li pahsuh un! 44Keimah a tiiktu pa in keima lakah heng tukin a bawl ngawl ahin, ka lakah hung thei haw tukma hi; amuhte cu ni dawlbel ni ten nunnakah thotik tung hi. 45Profet tei laibu sungah, ‘Mi hempoh cu Pathian in hilh tuk laih hi,’ tin um hi. Pa i thu zain, a zuitu cu keima lakah hung haw hi.#Isa 54:13; 46Mahti bangin tih ten a kuakua hei hihen pa amutu um haw tihnak cu kha ma hi. Pathian lak pen a hungmi pa bekin Pa mu awng hi. 47Thutakin hilh ing. Amah umtu in kumkhua nunnak nei hi. 48Kei cu nunnak cangho ing. 49Na pu le pa uhten phillawn pen manna ei haw naven thi leleng haw hi. 50Mahnaven vancung pen a hungsukmi cangho a eitute cu thi haw tukma hi. 51Vancung pen a hungsukmi nunnak cangho cu keimah ing hi. Hi cangho a eitu pawpoh cu kumkhua in nung haw tuk hi. Ka piakmi cangho cu ka taksa hi toh hi. Ita pia hing ngim titale leihum mitei nunnak tukin hi.”

52Hi thu in Judah tei sungah thinuk zetin thu elnak piang pantik hi. “Hi pa in, iti bangin kaw a taksa cu eih tukin ohte a piak thei tuk?” tin ti haw hi.

53Jesuh in amuh tei lakah, “Thutakin hilh ing. Mihing Capa i taksa ei ngawl le thisan a in ngawltu hempoh cu a sung hawah nunnak nei haw tukma hi. 54Ka taksa ei in, ka thi a intute cu kumkhua nunnak nei in, ni dawlbel ni ten nunnakah tho lehtik tung hi. 55Itahim titale an ngangai cu ka taksa hi a, ka thisan cu in tukmi ngangai hi. 56Ka taksa ei in, ka thi a intute cu keima sungah nung haw in, kei hei amu sungah nung bok ing. 57A nungmi Pa in keimah tiikin, ka nunnak hi amah hangin nung ing. Mahti bang bokin, keima taksa a eitu cu keimah hangin nungbok haw tuk hi. 58Hihi van pen a hungsukmi cangho hi. Hi cangho cu na pu le pa tei eihmi tuah bangve ma hi, na pu le pa ten ei haw naven thi leng haw hi. Mahnaven hi cangho a eitu cu kumkhua in nung haw tuk hi,” tin Jesuh in ti hi.

59Hi thu cu Jesuh in Kapernaum khua Pumkhawm inn pen a zilh laihin, a hilhmi hi.

Kumkhua Nunnak Thu

60Hi thu cu a nungzuitu ten a zak haw ten, “A thuzilhnak haksa leita cu akua in pom thei tuk him?” tin ti haw hi.

61Kuamah in hilh kha po ma naven a nungzuitu tei phuk lih cu Jesuh in, a lungmu sungno in thei hi. Mah hangin, “Hi thu in, na lungmu uh haksatikin nungkiknuam li bang um si uh ci? 62Tehkipnakin Mihing Capa hi a umnaksa lengah a kaitoleh khi na mu uh bang ahin, itin ti kam ni uh ci? 63Nunnak piatu cu Pathian i Hawvang Thiangtho hi. Mihing tei cah le ngilnak cu i mamah ma hi. Nohte ka hilhmi thu hi Hawvang le nunnak hi. 64Mahnaven mi khenkhat ten umma uh ci,” tin Jesuh in ti hi. Jesuh in, a pattung himpo in amah umngawltu um haw tuk a, akua in kei zuak tuk him tih thei ham leng hi. 65Jesuh in, a awn cu peh lehleu in, “Hitih bangin a hih hangin, Ka Pa in amu ca in lam a honsak ma tale kuamah in ka nelah heng thei haw tukma,” ti hi.

66Hi thu hangin amah zuitu mi tampi cu nunghekin amah zui ngamleh haw ma toh hi. 67Jesuh in nungzuitu sawm le pa nih tei lakah, “Noh aw taisan bok ni uh cim?” tin dong hi.

68Simon Peter in, “Topa a koi lakah kaw ka hawh cuang tuk uh? Nang cu kumkhua nunnak thuneitu hi toh sisi?#Mt 16:16; Mk 8:29; Lk 9:20; 69Atu-in nang cu Pathian lak pen a hungmi Mithiang pa khat hi ci tih cu umzet ung,” ti hi.

70Jesuh in, “Noh sawm le pa nihte hi keimah loli in teng hi mang maw? Mahnaven pa khat cu dawi ngilo hi,” tin don hi. 71Jesuh in, Simon Iskariot i capa Judah Iskariot a sonnuammi hi. Itahim titale Judah Iskariot cu nungzuitu sawm le pa nihah tel bok naven amah zuak lehtu tuk khi na hi, leng hi.

Currently Selected:

JOHAN 6: NBF1

Highlight

Copy