JOHAN 18

Jesuh A Mannak Haw

(Mt 26:47-56; Mk 14:43-50; Lk 22:47-53)

1Jesuh cu thu a nget celh ten nungzuitute tuah tulin Kidron a tih haw, lui ngalah hawh haw hi. Mahlai ah huan pa khat umin, mah huan sungah a nungzuitute cu tum haw hi. 2Mahlai mun cu Jesuh le a nungzuitute a tawhdun meknak haw a hih hangin, a zuaktu Judah in ilai ah um haw him tih khi thei hi. 3Judah cu mahlai huanah Rom ngalkap hon khat le thiampi upate le Farasi mitei hahmi Biakinn cingtu palikte tuah hawh haw hi; hiamnam kengin, mei inn le meilah de in hawh haw hi. 4Jesuh in, a humah i thute piang tuk him tih a theih khawng hangin mailamah tulin, “Akua kaw na zei uh?” tin dong hi.

5Amuh ten, “Nazareth mi Jesuh zei ung,” tin don haw hi.

Jesuh in, “Keimah toh ing,” ti hi.

A zuaktu Judah cu a elah ding hi. 6Jesuh in, “Keimah toh ing hi,” a tih ten nunglamah kikn lei ah lum haw hi. 7Jesuh in, “Akua kaw na zei uh?” tin dong lehleu hi.

Amuh ten, “Nazareth mi Jesuh zei ung,” tin ti leleu haw hi.

8Jesuh in, “Keimah ing hi tin hilh zo sing, keimah na zei uh ahi tale midangte bek hi cu hah un,” ti hi. 9Hi tin, a tihnak cu, “Pa aw, ka khut sung a, na piakmi cu pa khatno hei ka paihtikmi umma hi,” a tihmi kimtiknak tukin hi.

10Simon Peter in ngalnam a kenmi dawkin, Thiampi Sang pa i salpa i taklam beng satvawk hi. Mah sal pa i min cu Malkha hi. 11Jesuh in Peter i lakah, “Na ngalnam cu a kawng sungah thiat lehin hi; ka Pa i piakmi khuat cu a intuk ngawlin maw na ngaihsut?” tin ti hi.#Mt 26:39; Mk 14:36; Lk 22:42;

Annas Mai Ah Hawhpih Haw

12Rom ngalkap ten a hotu ngalbawi le Judah mi palikte tuah Jesuh cu man haw in; a ken ceng haw ten masabelin, 13Annas lakah hawhpih haw hi. Annas cu mah kumin Thiampi Sang dek a, Kaiafas i sungpa hi. 14Kaiafas cu mi zapi ai-awhin mi pa khat i thih pha saw hi tin Judah thuneitu tei lakah ngaihsutnak piatu pa khi hi.#Jn 11:49-50;

Peter In Jesuh Nial

(Mt 26:69-70; Mk 14:66-68; Lk 22:55-57)

15Simon Peter le a dang nungzuitu pa khatin, Jesuh zui haw hi. Mah nungzuitu cu Thiampi Sang tuah theidun zetmi a hih hangin Jesuh cu zui in, Thiampi Sang i inntualah hawh hi. 16Peter cu kongka el pualamah um hi. Mah nungzuitu pa cu kikleh a, kongka cingtu numei nu otpihin, Peter cu tumpih hi. 17Kongka cingtu numei nu in, “Nang hi a zuitu lakah telbok ci mei?” tin Peter cu ti hi. Peter in, “Mah kha mang,” ti hi.

18Khawsik hangin umlawh le a cingtu palik ten meihol tuah meilamin, a ding thahin mei awi haw hi. Peter vang cu amu lakah hawhin, mei awi bok hi.

Thiampi Sang In Jesuh Thudong

(Mt 26:59-66; Mk 14:56-64; Lk 22:66-71)

19Thiampi Sang in, Jesuh cu a nungzuitu tei thu le a zilhmi cu dong het hi. 20Jesuh in, “Langtaak zetin mipi tei mai ah thuhilh leleng sing. Mipi tei pumkhawm inn le Biakinnpi ah thuzilh leleng ing. A kuhno in thuhilh awng mang. 21Mahti bang hi napi in iata kaw thu na dotlih cu? Ka thusonmi a zatute khi dong saw vele, ka thuhilhmi thei khawng leng haw si,” ti hi.

22Mahti bang a tih ten mahlai a um palik pa khatin, Jesuh cu bengvawk hi. “Thiampi Sang lakah itin kaw mahti bangin na ot ngam!” tin ti hi.

23Jesuh in, “Ka ot sualmi a um tale mah ka ot sualmi cu hilai a ummi hempoh tei lakah hilhin hi! Mahnaven ka otmi a man leng napi in ita kei bengvawk thei cim?” tin don hi.

24Annas in, a kennak duk cuang ngawlin Jesuh cu Thiampi Sang Kaiafas lakah hawhtik hi.

Peter In Jesuh Nial Leh

(Mt 26:71-75; Mk 14:69-72; Lk 22:56-62)

25Peter cu mahlai ah mei awi thah dingleng laih hi. Mahlai takin, midang ten, “Nang vang hi pai nungzuitu tei lakah pa khat bok sisi maw?” tin ti haw hi. Peter in, “Mah kha mang,” tin nial leleu hi.

26Thiampi Sang i umlawh tei lak pen Peter in, a beng a sahvawkpa i unaupihpa in, “Hi pa hi, Jesuh tuah huan sungah mu bok sing me?” tin dong hi.

27Mahnaven Peter in, “Kei kha mang hi,” tin nialleh hi. Mahbek ten ak khuang hi.

Pilat Lakah Jesuh Hawhpih Haw

(Mt 27:1-2; Mk 15:1-5; Lk 23:1-5)

28Jesuh cu Kaiafas inn pen ngamuktu bawi i innah zingtungno hawhpih haw hi. Judah thuneitu cu amudan bangin thiangtho zetin Kaltan Puai an a eih nuam haw hangin ngamuktu bawi i inn sungah tum haw ma hi. 29Mah hangin Pilat bawipa cu tulin amuh tei lakah, “Hi pa in i sualnak nei kaw?” tin dong hi.

30Amuh ten, “Sualnak a nei ngawl ahin, nangma lakah hen tukma ung hi,” tin don haw hi.

31Pilat in amu lakah, “Mahti bang ahi tale pui unna, nangmudan bangin a thu na khen un,” ti hi. Amuh ten, “Kohten mithah theihnak thunei ma ung hi,” tin don haw hi. 32Jesuh in iti bang thihnak nantim ka thuak tuk tin, a sonsami awnkam a kimnak tukin hitih bangin a piannak na hi, hi.#Jn 3:14; 12:32;

33Pilat cu a inn sungah tumlehin, Jesuh cu sam hi, “Judah kumpipa cim?” tin dong hi.

34Jesuh in, “Hi thu na dotmi hi nangma thinthawhin maw, midang ten keima thu a hilh hangin kaw?” tin dong hi.

35Pilat in, “Keima hi Judah mi hi tin maw na ngaihsut? Keima lakah a hentu hi na miphun le thiampi upate haw pah cuh! Na bawlmi thil cu ikaw?” tin dong hi.

36Jesuh in, “Ka uknak ngam cu hi leihumah kha ma hi, hi leihumah ahi bang ahin, Judah thuneitu tei khutsungah heng tuk ngawlin ka nungzuitu ten do haw tuk hi. Ka uknak ngam cu hi leihumah kha ma,” ti hi.

37Pilat in, “Kumpi hi ngai a cim maw?” tin dong hi. Jesuh in, “Nang in, Kumpipa ci tin ti ci. Leihumah ka hunsanbel cu thu pa khat bek hi. Mahmi cu thutak lamah tettikhan tukin hi. Thutak sung a ummi hempohin ka thuhilhmi ngai haw,” ti hi.

38Pilat in, “Thutak cu ikaw?” tin dong hi.

Thah Tukin Soncat Haw

(Mt 27:15-31; Mk 15:6-20; Lk 23:13-25)

Pilat cu mipi tei lakah tul lehin, “A humah thah tuk takin, a sualnak mu mang hi. 39Mahnaven daan na neih uhmi bangin, Kaltan Puai ten thawngta pa kha khat hahsak mek ing. Judah Kumpipa hi ka hahsak ahin, awi uh cim?” tin dong hi.

40Amuh ten, “Amah hah tukin awi ma ung. Barabbas saw hahin hi,” tin au tawtok haw hi. Barabbas cu nguca hi.

Currently Selected:

JOHAN 18: NBF1

Highlight

Copy