JOHAN 11

Lazaras Thihnak

1Bethani khua a um Lazaras cu a tina hi. Bethani cu Mary le a u Martha tei umnak khua hi.#Lk 10:38-39; 2Mary cu Topa i ke zimui tui leihin, a sam tuah nawttu khi hi. Lazaras cu a ningpa haw hi.#Jn 12:3; 3Hi unau pa nih ten Jesuh lakah, “Topa na ihmi na ngualcam pa a tina hi,” tin cah haw hi.

4Jesuh in, mah thu a zak ten, “Lazaras i nat a tawpnak cu thihnak hi kha tukma hi. Hi hangin Pathian Capa sunloihnak a langnak tuk hi,” ti hi.

5Jesuh in Martha, a naunu le Lazaras cu itzet hi. 6Lazaras a tina hi tih thu za leng napi in, ama umnak munah ni nih camhih laih hi. 7Mahceng ten a nungzuitu tei lakah, “Judah ngamah hawh kikleh nung,” ti hi.

8A nungzuitu ten, “Sazapa, nungno in mipi ten suang tuah sep nuam li haw zo si. Mahlai munah maw na hawhleh tuk,” tin ti haw hi.

9Jesuh in, “Ni khat sungah nazi sawm le pa nih hi ma maw? Mah hangin mi pa khat sun ni cangcai a hawhtu cu bah awng tukma hi. Itahim titale hi leihum khuavaknak khi mu hi. 10Mahnaven zanlamin, a hawh bang ahin bah tuk hi. Itahim titale mahpa i sungah khuavaknak umma hi,” tin a tih ceng ten bet lehin, 11“A ngualcam uh Lazaras cu hihbu zo naven hawhin phong tung,” ti hi.

12A nungzuitu ten, “A hihbu tale damleh tuk poh hi,” tin ti haw hi.

13Jesuh i sonnuammi cu Lazaras cu thi zo hi, tih khi hi naven nungzuitu ten a hihbu thong ngai in sa haw hi. 14Mah hangin Jesuh in ciangkohin, “Lazaras cu thi zo hi, 15mahnaven ama lak a, ka um ngawl cu nangmu ca in pha saw hi. Itahim titale sang thei saw deuh tuk uh ci. Atu-in ama lakah hawhta nung,” ti hi.

16Caphil a tih haw Thomas in, “Ohte vang ama lakah thi bok tukin Sazapa, tuah hawh bok pah nung!” ti hi.

Jesuh Cu Thawhlehnak le Nunnak

17Jesuh cu mahlai mun a hen ten Lazaras cu a vui sawng haw ni li kimleh zo hi. 18Bethani cu Jerusalem pen peng nih kim deuh ngawl a hih hangin 19Judah mi tampi ten Mary le Martha tei ningpa a hih hangin tohpihleh tukin hung haw hi.

20Jesuh hung li hi tih thu Martha in, a zak ten lampi ah a muak tukin a hawh ten Mary cu innah um hi. 21Martha in Jesuh cu, “Topa aw, nangmah hilai ah na um bangta ahin ka ningpa thi tukma hi. 22Mahnaven atu hei in, na ngetmi pawpoh cu Pathian in pia tuk hi tih cu thei ing,” ti hi.

23Jesuh in, “Na ningpa cu tholeh tuk,” ti hi.

24Martha in, “Hi zuh hi, ni dawlbel ni ten tholeh tuk tih cu thei ing hi,” tin don hi.

25Jesuh in Martha lakah, “Kei cu thawhlehnak le nunnak ing hi. Keimah a umtu cu a thi hei in, nungleh tuk hi. 26A kuakua hei hihen keima sungah a nungtu le a umtute cu ituk mahten thi haw tukma toh hi. Hi thu hi um cim?” tin ti hi.

27Martha in, “Hi zuh hi, um ing hi. Topa, Nang cu Pathian Capa Khrih, leihumah a hung tukmi hi ci, tin um ing,” ti hi.

Jesuh Kap

28Martha in hi thu a son ceng ten a nau Mary cu samkuh denin, “Sazapa hilai ah hung zo ven nangmah hei cian li hi,” tin hilh hi. 29Mary in, a zak ten Jesuh tawk tukin manlang zetin hawh hi. 30Jesuh cu khuasung heng ngawl laihin, Martha i muahnak munah na um leng laih hi. 31Mary a tohpihtu Judah mipi ten Mary dingvutin manlang zetin, a tul ten a nungzuitute tul paih bok haw hi. Khanah kap tukin hawhbel tuk hi tin ngaisung haw hi.

32Jesuh i umnak a hen ten Mary cu a kebulah bokin, Topa, hilai ah na umta ahin ka ningpa thi tukma naven,” ti hi.

33Jesuh cu Mary le a zuitu Judah tei kah amuh ten a khua ngaih pihzet bok hi. 34“Ilai ah vui uh cim?” tin a dot ten, “Topa hungin zo in,” tin ti haw hi.

35Jesuh cu kap hi. 36Judah ten, “itizah takin it him, zo un!” tin ti haw hi.

37Mahnaven khenkhat ten, “Mitcaw nangawn hei khua mutik thei si, Lazaras hei cu thi ngawlin bawl thei tukma maw?” tin ti haw hi.

Lazaras Nunglehtik

38Jesuh cu thasiazet leleu in, khanmualah hawh hi. Khan cu suangkua hawmpi na hi a, suangpek tuah khahcihmi hi. 39Jesuh in, “Suangpek hi thawn un,” ti hi. Mithi pa i celnu Martha in, “Topa uih leita tuk toh hi. Ka vui sawng uh ni li ngei zo ven,” ti hi.

40Jesuh in Martha cu, “Na um tale Pathian i sunloihnak mu tuk ci, tin ti ma tang maw?” tin ti hi. 41Suangpek cu thawn haw in, Jesuh cu van hekto in, “Pa aw, ka thu na ngaih hangin lungdam ing. 42Ka thu na ngaih leleng cu thei ing. Mahnaven hilai a um mipi ten nangma tiikmi ka hihnak a up theihnak haw tukin hi bangin ka otnak cu na hi. 43Mahtin a tih ceng ten, “Lazaras aw, tulin!” tin nging zetin au hi. 44Mithi pa cu a khut le a ke, miluang cunnak puan le a mai khuhnak puanpi tuahin tul hi. Jesuh in, “Duuk unna, hawh tahen,” ti hi.

Jesuh Thah Tuk Siam Haw

(Mt 26:1-5; Mk 14:1-2; Lk 22:1-2)

45Mary tohpih tukin a hungmi Judah mipi ten hi bangin a nadehnak amuh haw ten Jesuh um haw hi. 46Mahnaven mi khenkhat ten Farasi tei lakah hawhin, Jesuh i nalamdang bawlmite cu hilh haw hi. 47Mah hangin thiampi upate le Farasi mite cu Khawnselte tuah tawkdun khawmin, “Itin bawl kam nung? Hi pa i nalamdang a bawl pepel lih hi zo hem un! 48Hi bangin a hahzau thong uh tale mi hempoh ten amah um haw tuk hi. Mahbek sial ngawlin Rom thuneitu ten ngaimawhin, a Biakinn pi uh le a ngam buppi uh tian siatsuah haw tuk hi,” tin ti haw hi.

49Amu sung pen Thiampi Sang, a min Kaiafas a tih haw pa in, “Sil mahtak si uh ci! 50A miphun le nam uh hi, a pongpi in, a siat tuk sangin, eimu phun le nam ca in, mi pa khat a thih tuk pha saw tih thei ma uh cim maw?” tin ti hi. 51Thu ngangai titale hi thu hi amah thinthawhin, a sonmi thu kha sapma hi. Mah kum cu ama Thiampi Sang a hihnak bangin Jesuh cu Judah mitei ca in thi tuk hi tih thu a hilhnak khi hi. 52Judah mitei ca bek hei hi ngawlin Pathian canau a khenkhek hempoh ten munkhatah khoptuahnak tukin, a thihnak hi tuk hi tih thu a hilhhamnak hi.

53Mah ni pepan Judah thuneitu ten Jesuh thah theihnak tuk thu ngeh vaihawm hawta hi. 54Mah hangin Jesuh cu Judea ngamah lang zetin zinleh ngam ngawltohin, phillawn el a um Efraim tihmi khua ah a nungzuitute tuah um haw hi.

55Judah tei Kaltan Puai hun nai toh a hih bangin khuano lam pen mi tampi cu puai laih ngawlin thianthohnak bawl tukin Jerusalem ah hawh haw hi. 56Jesuh cu zei haw in, Biakinn sung a khawmnak hawah pa khat le pa khat, “Itin ngaisung kam? Puainakah hung bok ni maw?” tin dongdun li haw hi. 57Thiampi upate le Farasi ten Jesuh umnak a theitu pawpohin hilh unna, man tuk ung, tin thuthan haw hi.

Currently Selected:

JOHAN 11: NBF1

Highlight

Copy