PIANPATNAK 17
17
Thutep Sialsiahnak Vunceptan
1Abram cu kum sawm kuah le kum kuah a kim ten, Topa cu a lakah langin, “Keimah cu Cungnungbel Pathian ing. Ka thu zui inna, sonbang tuk ngawlin thuman zetin umin hi. 2Na lakah thutepnak bawl tung a, casuan tampi pia tung hi.” 3Abram cu a mai lei tawngkha tian kunin, Pathian in, 4“Nangmah tuah hih thutepnak bawl ing hi: hinnam tampi tei cikhaihtu hi tukin thutiam ing. 5Na min cu Abram hileh ngawltohin, Abraham hi tuk toh hi; itahim titale hinnam tampi tei pa in bawl tung hi.#Rom 4:17; 6Casuan tampi pia tung a, khenkhat cu kumpi vang na hi haw tuk hi. Casuan tampi nei tuk ci a, hinnam tampi in suak haw tuk hi.”
7“Ka thutep cu khotik tung a, nangmah le na casuan tei mailam khangah kumkhua phat thutepnak hi tuk hi. Keimah cu na Pathian hi tung a, na casuan tei Pathian vang hi tung hi.#Lk 1:55; 8Atu a, na umnak ngam, mikhual na hihnak ngam hi nangmah le na casuan tei lakah pia tung hi. Kanaan ngam hempoh hi kumkhua in nangmuta hi tuk a, keimah cu na Pathian uh hi tung,” ti hi.#Nung 7:5;
9Pathian in, Abraham lakah, “Nangmah ka thutiamnak cu zui in, khotik tuk ci; na casuante vangin mailamah khotik leleng bok haw tuk hi. 10Nangmah le na casuan ten ka thutep na khotiknak tuk uh cu hi bangin hituk hi: Pano hempoh ten vunceptan hihim haw tuk hi.#Nung 7:8; Rom 4:11; 11-12Tu pepanin pano hempoh cu ni liat a kim ni haw ten vunceptan un hi; na innsung suak sal hihen, ngamdang pen na lei uhmi sal hei hihen, a vuncep haw tan khawng un. Hi cu keimah le nangmu lak a, thutepnak khotiktu hi tuk hi. 13Vuncep tanmi hi khawng haw tuk a; hi cu kumkhua in, na lak uhah ka thutepmi a langnak tukin na taksa hum uh a, sialsiahnak hi tuk hi. 14Vuncep tan ngawl pano cu, ka thutep a zui ngawl hangin a hinnam sung pen vawk hi tuk,” ti hi.
15Pathian in, Abraham lakah, “Na zi hi Sarai tin sam toh pahsun; tu pepanin, a min cu Sarah hi zo hi. 16Sarah cu muicu pia tung a, ama sung pen capa pia tung hi. Muicu pia tung a, miphun tampi tei nu in cang tuk hi. A casuan tei sung pen kumpi tampi piang haw tuk,” ti hi.
17Abraham cu a mai lei tawngkha tian kunin, nui a, mah ceng ten thu ngaisung hi: “Mihingin kum za khat a hih nungten ca nei thei ni maw?” Kum sawm kuah a hih nungten Sarah in ca nei thei ngangai ni maw? ti in, a nuihsuak hi. 18Abraham in Pathian nelah, “Ishmael hi ka lo le lam luahtu tuk bekin hi thei tukma maw, tin ngen ing hi,” ti hi.
19Mahnaven Pathian in, “Abraham, mahtin kha ma hi. Na zi Sarah hihimin capa hing tuk a, a min Isaak#17:19 Isaak min sullam cu “Nui hi,” tihnak hi. tin sa tuk ci. Ama lakah hihen, a casuan tei lakah hei hihen, ka thutiam cu khotik tung hi. Itahim titale kumkhua phat thutepnak hi. 20Ishmael ca tukin na ngetnak cu za zo ing; mah hangin Ishmael cu muicu pia tung a, ca tampi le casuan tampi pia tung hi. Amah cu kumpi sawm le pa nih tei pa in suak tuk hi. A casuante cu hinnam ngeng zetin suaktik tung hi. 21Mai kum tubang hun ten Sarah i hin tukmi na capa Isaak lakah ka thutiam khotik tung,” ti hi. 22Abraham tuah a otpih celh ten Pathian in hawhsan hi.
23Mah sun hihimin, Pathian in, a hilhsa bangin Abraham in, a capa Ishmael le a sal hempoh, innsung suak sal hihen, leimi sal hihen, a innsung a ummi pano hempoh cu a vuncep haw tan khawng hi. 24Abraham cu vuncep a tan ten, kum sawm kuah le kum kuah hi. 25A capa Ishmael cu kum sawm le kum thum hi. 26Mah ni-in, a paca haw in vunceptan haw hi. 27Abraham i innsung a ummi sal hempoh tuah vunceptan langkhat haw hi.
Currently Selected:
PIANPATNAK 17: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
