AMOS 7

Khaaumawng Muhnak

1Cungnungbel Topa nel pen muhnak pa khat nei ing. Mah ka muhnakah kumpipa i ankungte at cengin, hampa dawn a po semnakah Topa in khaaumawng honpi a bawl cu mu ing. 2Mah ka muhnakah khaaumawng ten ngam buppi sung a, thing hing hempoh a eih khawng haw cu mu ing. Kei in, “Cungnungbel Topa, na mihingte hi ngai thiam zalin hi. Iti bang nung thei haw tuk hum? Mi dawmno haw a, nawmtamzet haw!” ti ing.

3 Topa in, a lungmu khelin, “Na muh bangin cangleh tukma,” ti hi.

Mei-alh Muhnak

4Cungnungbel Topa nel pen muhnak a dang pa khat nei ing. Topa in, a mihingte mei alh tuah bawlsiat a tum cu mu ing. Mah mei alhin leinuai a, tuipi thuanthum cu halkang khawngin, leihum lam vang halkang leleu tukin um hi. 5Keimah in, “Topa Pathian aw, cawl tohin hi. Iti bangin na mihingte nung thei haw tuk him? Mi dawmno haw a, nawmtamzet haw!”

6 Topa in, a lungmu khelin, “Na muh bangin cangleh tukma,” ti hi.

Camtiknak Khaukhaih Muhnak

7 Topa nel pen muhnak a dang pa khat nei ing. A camtiknak khaukhaih a sakmi inn pang elah, Topa ding leng cu mu ing. A camtiknak khaukhaih cu a khut sungah caw hi. 8“Amos i kaw na muh?” Tin dong hi.

A camtiknak khaukhaih mu ing tin donleh ing.

Mahten amah in, “Ka mihing Israel hi a cam ngawlmi pang tian bang haw in, a man ngawl daan haw langtik tukin hi camtiknak khaukhaih hi lak ing. Amuh dantat tukin ka ngaihsutsa mi cu khelleh tukma toh ing. 9Isaak casuan tei Pathian biaknak mun cu siatsuah khawng tuk hi. Israel i mun thiangthote cu buaksehnak munin cang tuk hi. Kumpi Jeroboam i cikhaih tei ngam uknak cu botik tung,” ti hi.

Amos le Amaziah

10Bethel a, thiampi Amaziah in, Israel Kumpi Jeroboam lakah thuthanin, “Amos in Israel mipi tei lakah zuak hi. A otmi in ngampi siatsuah tuk hi. 11A hilhmi cu hi tih bangin hi: ‘Jeroboam cu ngal donakah thi tuk a, Israel mite a ngam haw pen salah pui khawng hi haw tuk tin hilh het hi.’ ”

12Amaziah in Amos lakah, “Nang profet! Awn toh pahsun; Judah ngamah kik inna, mahlai ah thuhilhin hi. Amuh ten na thaman pia haw hen. 13Hilai Bethel ah profet awn tuah awn toh pahsun. Hilai hi ka ngampi biakinn hi a, kumpi i Pathian biaknak mun hi.”

14Amos in, “Kumpi i profet kha ma ung; nganhing khaltu le theipi kungte cingkhawitu ing. 15Mahnaven Topa in ka tuu cinnak pen samin, a mi Israel lak a, profet nadek tukin thupia hi. 16Topa i otmi hi ngai hemin! Nang in, Israel hinnam le Isaak hinnamte suamin awn tuk ngawltohin kham ci. 17Mahti bang na tih hangin, Topa in, na lakah, na zi cu khua sungah numei pha ngawl cang tuk a, na canote cu ngalnam tuah thi haw tuk ti hi. Na ngam uh cu khenkhek khawng hi haw tuk a, midang tei lakah piak hi tuk toh hi. Nangmah vang Pathian thei ngawltu ngam, ngamdangah thi tuk ci. Israel mite cu a ngam haw pen, salin pui khawng loli haw tuk,” ti hi.

Currently Selected:

AMOS 7: NBF1

Highlight

Copy