NUNGZUITU 17

Thesalon Khua Ah

1Paul le Silas cu Amfipolis le Appolonia ah zinin Thesalon khua ah heng haw hi. Mahlai ah Judah mitei Pumkhawm inn um hi. 2A bawldan sa bangin Paul cu pumkhawm innah hawh hi. Mahlai ah Sabbath ni, ni thum sung loli mipi tuah thu eldunin, 3Khrih cu thihnak thuak tuk a, tholeh tuk hi tih khi Lai Thiangtho sung pen langtikin hilhciang pepel hi. “Noh tei lakah ka phuanmi Jesuh cu Khrih hi,” tin Paul in ti hi. 4Mi khenkhatte cu a lungmu haw ciang ngangai in Paul le Silas khi kop haw hi. Mahti bang bokin numei hotu le Pathian a biatu Grik mi tampi ten Paul le Silas lakah khawm bok haw hi.

5Mahnaven Judah khenkhat ten iksikin lampi lakah thazawng vaktham khenkhat hulawmin, mi honpi ah suak haw hi. Khua sungah au le kio in buainak nasezet henpih haw hi. Jason a tih haw pa i inn cu kilin, mahlai ah Paul le Silas cu manin mipi mai ah doktul tuk tum haw hi. 6Mahnaven mahlai innah Paul le Silas cu mu haw ma hi. Jason le thu umtu khenkhat lehlam khi khuasung upa tei mai ah pui in, “Khua hempoh ah buainak a hengtiktu, atu-in eimu khuasungah heng haw a, 7Jasonin, a inn sungah umtik hi. A son haw mi cu Jesuh tihmi kumpi dang pa khat um, tin ti in, Rom kumpipa i daante siatsuah haw,” tin au tawtok haw hi. 8Mahti bangin a aunak haw hangin mi honpi le khuasung upa buaitik khawng haw hi. 9Thuneitu ten Jason le a ngualcam cu a kulzah tangka a kuantik ceng haw ten hahleh haw hi.

Berea Khua Ah

10Khuathim bek ten thu umtu ten Paul le Silas cu Berea khua ah hen haw hi. A hen bek haw ten pumkhawm innah hawh haw hi. 11Mahlai a mipi cu Thesalon mite sangin a lungmu taituang saw deuh haw hi. A thuhilh haw mite cu lungmu tak tuah ngai in, nisialin, Paul i hilhmi cu hi ngangai maw, hi ngangai ma him tin, Lai Thiangtho sialin zocik haw hi. 12Mi tampi ten umin; Grik numei muantakmi, upat mite le Grik pano ten um haw hi. 13Mahnaven Thesalon a ummi Judah ten Berea khua hei ah Paul cu Pathian thuhilh hi tih thu a zak haw ten Berea khua ah hungin mipi so in, buaitik pepel haw hi. 14Thakhatin, thu umtu ten Paul cu tuipi lamah hawhtik haw naven Silas le Timote cu Berea ah tang haw hi. 15Paul a hentu thu umtu ten Paul cu Athen khua tian zui haw hi; mahten a zuitute kikleh haw a, Silas le Timote in, a manlang theibelin hilleh haw tahen, tin thucahta hi.

Athen Khua Ah

16Paul in Silas le Timote khi Athen khua pen a ngah laihin mahlai khuapi cu milim zuk dim ukin amuh hangin a thasia mahtak hi. 17Mah hangin Judah mite le Pathian a biatu Grik mite tuah pumkhawm innah thu dondun mek haw a, mi zapi tawhdunnak mun hei pen a hung mite tuah eldun leleng haw hi. 18Epikurian thuzilhtu khenkhat le Stoik thuzilhtu khenkhatte tuah thu eldun haw hi. Mi khenkhat ten, “Hi pa hi imah le thei sih ngawl, mi mai ah langtuk nuamzet pa hi, ikaw a otlih bok?” tin ti haw hi.

Mi khenkhat ten, “Ngamdang tei pathian thu son li bang um,” tin ti haw hi. Ita mahtin ti haw hum titale Paul in Jesuh le a thawhlehnak thu a hilh hangin hi. 19Mah hangin Paul cu Areopagas mual a, khonsil lakah henpih haw in, “Thu thak na zilhmi poh um maw, tih thei nuam ung hi, 20A khenkhat na hilhmi ka zak uhmi cu lamdang zetin, a sullam ihim tih thei nuam ung hi,” tin ti haw hi. 21Ita mahtin ti haw him titale Athen khua mi hempoh le hi khua ah a ummi ngamdang mite cu thu thak le thil thak khi a hun neih haw hempoh mangin za li le hilh lih a nuambeltute haw hi.

22Paul cu khonsil tei mai ah dingin amu lakah, “Noh Athen mite hi biaknak lamah teimazet uh ci tih cu mu ing. 23Itahim titale na khuapi sung uhte ka hawh ten Pathian na biaknak uhte ka zo ten biaklandawh pa khat humah, ‘Theih ngawlmi Pathian nelah,’ tin na ngat uh mu ing. Mahtin thei ngawl napi in, na biak uhmi Pathian cu atu nangmu lakah ka phuan lihmi hi. 24Leipi le a sung ummi hempoh a bawltu Pathian cu lei le van i Topa hi in, mihing tei bawlmi biakinn sungah umma hi.#1Kum 8:27; Isa 42:5; Nung 7:48; 25Mah i humah Pathian cu mi hempoh tei humah nunnak haihawh le thildang hempoh a piatu Pathian a hih hangin mihing ten ama inn a bawl uhmi khi a kulmi umma hi. 26Mihing pa khat i sung pen leihum mihing hempoh bawlin leihum buppi ah umtik khawng hi. Mihing tei umlaih ngawl cawngin mihing tei nuncakdan tuk le ilai mun tian um thei haw tuk him, tih khi a laitek ham khawng sa hi. 27Ita hitin laitek ham him titale Pathian cu zei in amuh suak theihnak haw tukin hi. Mahnaven Pathian cu a thu ngai in, kua mah tuah khawla ma hi. 28Mi pa khat i sonham in,

‘A ma sungah nung hung,

ngamta in khuasa hung hi!’

Na la phuahtu uh

khenkhat tei tihnak bangin,

‘Ohte vang hi

a cate hung hi.’

29Mahti bangin Pathian i cano a hih uh bangin thil thiammi le zuksuai thiam tei sui le ngun milim le suang milim a bawlmi haw hi pathianin a ngaihsut hihim tuk ngawl uhmi hi. 30Mihing tei Pathian theih ngawl hun khi Pathian amah in amu ngawl bangin umsan thong hi; Mahnaven a atu-in, a nundan haw a pha ngawlmi khi nunghek san tukin mi hempoh thupia hi. 31Itahim titale a tensami mi pa khatin leihum buppi hi diknak tuah thukhencat tukin ni ciangtan zo hi. Mahmi thu cu thihnak pen tholehtik zo toh,” ti hi.

32Thihnak pen tholeh zo tihmi Paul i hilhnak a zak haw ten, mi khenkhat ten nuihsan haw; mahnaven midang ten, “Na thuhilh za nuam laih ung,” tin ti haw hi. 33Mahnung ten Paul cu a khawmnak sung haw pen tulta hi. 34Mi khenkhat ten zui in um haw hi. A umtu tei lak pen khonsil upa Dionisias tel bokin, Damaris a tih haw numei nu pa khat le midang khenkhat vang tel haw hi.

Currently Selected:

NUNGZUITU 17: NBF1

Highlight

Copy