NUNGZUITU 15

Jerusalem Ah Thuson Khawmnak

1Mi khenkhat cu Judah ngam pen Antiok khua ah hungin, “Moses Daan i cialmi bangin vunceptalhnak na bawl uh ma tale nunpatnak ngah thei tukma uh ci,” tin zilh li haw hi.#Thiam 12:3; 2Mah thu cu Paul le Barnabas ten nase zetin el haw hi. Hi thu hangin Paul le Barnabas le Antiok khua a upa dangte cu nungzuitute le pawlpi upate tuah Jerusalem ah tawkdun tukin vaihawm haw hi.

3A hawh haw ten pawlpi ten hen haw a, Fonisia le Samaria ngam bang thahin, mahlai a Gentail mite iti bangin Pathian lamah thinthek zo haw toh him tih khi theitik pepel haw hi. Mah thu a zak haw ten thu umtute cu a lungdam mahtak haw hi. 4Jerusalem a hen haw ten pawlpi, nungzuitute le pawlpi upa ten muak haw in, a muaktu tei lakah Pathian nadehnak cu a kimno in hilh haw hi. 5Mahnaven Farasi tei lakah a telmi thu umtu khenkhat ten, “Gentail mite cu vuncep a tan tukin le Moses Daan zui tukin a hilh hihim uh kul hi,” tin ti haw hi.

6Nungzuitute le pawlpi upate cu mah thu sonkhawm tukin tawkdun khawm haw hi. 7Hun ngeipi a dondun ceng haw ten Peter cu dingto in, “Na theihsa uh bangin, kei hi nangmu lak pen Gentail miten Thuthangpha cu zain, a up theihnak tukin hilh tukin Pathian in, a tennak ngei zo hi.#Nung 10:1-43; 8Mahten mi hempoh tei ngaihsutnak a thei khawngtu Pathian in Gentail mite vangin a uptheih hawnak tukin eimu lak a Hawvang Thiangtho a piak bang bokin amu lakah vangin Hawvang Thiangtho a piaknak pen langtik bok hi.#Nung 2:4; 10:44; 9Pathian in amuh le eimu laklawhah deidatnak nei ma hi; a upnak haw i hangin a sualnak haw ngaithiam hi. 10Mahti bang a hih hangin itakaw a pu le pa uhte le eimuh hei in hihen, a puak theih uh ngawlmi vanngit cu thu umtu tei ngumah suanin, Pathian cu khingkhai na nuam uh? 11Mahtin kha ma! Eimuh vang amuh bang bok kekin upnak nei in, Topa Jesuh i hehpihnak thawm hangin nunpatnak ngah hung,” ti hi.

12Paul le Barnabas ten thuhilh bok haw a, Pathian in amuh mangin Gentail mitei lakah thasiahhuai nalamdang a phunkim a bawlmi hempoh khi a hilh haw ten a venghawng haw in, dai khipkhep ngai haw hi. 13A hilh ceng haw ten James dingto in, “U le naute, ngai un!

14Simon in atu a, a hilhmi cu za uh ci! Pathian in Gentail tei ca ngaisungin amu lak pen mi khenkhat cu ama mi hi tukin teng hi, tin hilhciang zo hi. 15Profet ten hitih bang lengin hilh zo toh hi. Lai Thiangtho in:

16‘Topa in, hi ceng ten,

kikleh tung a,

a sia zo mi David i uknak cu

tungdingleh tung.

A sia sa mi cu sa lehin,

kho lehtik tung.

17Mahten leihum miphun hempoh cu

ka lakah cawlum tukin

hung haw tuk a, ka samsami

Gentail mi hempoh vang

hung haw tuk hi.

18Tanglaih pepan

hi thu a zatiktu

Topa in,’ ti hi.#Amos 9:11-12;

19“Mah hangin kei ka ngaihsutnakah: Pathian zuantu Gentail mite hi buainak pia tukma hung. 20Mah sangin amuh tei lakah milim biaknak an thiang ngawlte ei tuk ngawlin le nupa sualnak bawl tuk ngawlin, ngawng awkin, thahmi cik le sathi pawpoh ei tuk ngawlin laikuat saw nung.#Suah 34:15-17; Thiam 17:10-16; 18:6-23; 21Itahim titale Sabbath nisialin pumkhawm innah Moses Daan cu kum ngeipi sung sial lihmi hi in, Pathian i thu vang cu khua tihkimah phuan hi zo hi.”

Thu Umtu Gentail Tei Lakah Laikuat

22Jesuh nungzuitute le upate, pawlpi sung hempoh pen mi khenkhat tengin Paul le Barnabas tuah Antiok khua ah hah tukin vaihawm haw hi. Amu sung pen thu umtu tei upat zetmi pa nih, Barsabbas tih hei in, a sam haw mi Judah le Silas cu teng haw a, 23a nuailam a laikuat hi a khut hawah sanin:

“Na unau uh keimuh nungzuitute le upa ten Antiok, Siria le Silisia ah a ummi, Gentail unaupih na venghawng uh i lakah nuksatnak laikuat ung hi. 24Hilai a, eimu sung pen nangmu lakah a hengtu mi khenkhat ten a awnkam haw tuah haksatnak pia in, buaitik haw tih thu za ung hi. Hitih bang a ot haw mite khi keimu ottikmi kha ma hi. 25Mah hangin tawkdun khawm ung a, keimu sung pen tenmi palai nangmu lakah kuat ung. 26A Topa uh Jesuh Khrih i nadehnak tukin nunnak tian a pia ngamtu, a ih uhmi Paul le Barnabas hung haw tuk hi. 27Mahten Judah le Silas cu nangmu lakah kuat ung a, amuh ten a laisung a, ka ngat uhmi hi hilh haw tuk hi. 28Hawvang Thiangtho le ohte cu lungkimnak nei hung a, hi a kulmi daante sialngawl a dang vanngit nohtei humah koih tuk nuam ma ung hi. 29Milim biaknak an ei pahsuh unna; sathi ei pahsuh un; ngawng awkin, thahmi cik ei pahsuh unna; nupa sualnak bawl pahsuh un hi. Hi mite hi bawl ngawlin na pial thei uh tale pha khawng tuk hi. Damno in umta un,” tin ngan haw hi.

30A tiik haw mi palaite cu Antiok khua heng haw hi. Mahlai a thu umtu hempoh khi sam khawm haw in, a puak haw mi laikuat cu pia haw hi. 31Mah a sial haw ten mipi thapiaknak thu a hih hangin lungdam mahtak haw hi. 32Judah le Silas vang profet hi haw a, mipi tei lakah ngalphatnak le ngilnak thu ngeipi hilh haw hi. 33Mahlai ah tawkfang a um nung haw ten thu umtu ten ngimta zetin hen haw a, amuh a tiiktu pawlpi tei lakah kikleh haw hi. 34Mahnaven Silas cu mahlai ah tangta hi.

35Paul le Barnabas cu Antiok ah ngeithim um haw a, midang tampi tuah Pathian thu cu zilhin, phuang haw hi.

Paul le Barnabas Khendun

36Dawmlaih a ngei nungten Paul in, “Topa i thu a hilhnak uhah hawhleh nung a, mah khua hempoh a unaupih veh lehin, a umdan haw zoleh tuk hung,” tin Barnabas lakah ti hi. 37Barnabas in Johan Marka khi amu lakah hawhpih nuam hi. 38Mahnaven Paul in Johan Marka pui tuk cu lemcangtik ma hi. Itahim titale Johan Marka in, a khualzinnak haw a tawp tian zui ngawlin Pamfilia pen a kihsan awng zo hang hi. #Nung 13:13; 39Mah thu ah Paul le Barnabas cu nasezet eldunta in khek haw hi. Barnabas in John Marka cu pui in, Saipras ah hawmkuang tuah hawh haw hi. 40Paul in Silas pui in, thu umtu ten Topa i hehpihnak tuah hawhta poh un tin hen haw hi. 41Paul le Silas cu Siria ngam le Silisia ngamsung palthahin, Pawlpite khi thapia thah pepel haw hi.

Currently Selected:

NUNGZUITU 15: NBF1

Highlight

Copy