MARK 9
9
1Tuale ama in amate kungah, “A tahtah a kang ci-in, tam sunga a ding mi kimkhat in vanglietna tawh Pasien’ manggam ang tun a mu masangun sina a ciemkha sih ding uhi,” a ci hi.
Mel Kikhelna
(Mat 17:1-13; Luk 9:28-36; 2Pet 1:16-18)
2Ni guh zaw ciengin Jesu in Peter, James, John-te a tuomin muolsang tung khatah a zawpi hi. Tuale amate mai-ah a mel kikhelin 3a puonsilte tee lihlehin kang silsel a, leitungah puonsawp mi koima in a ngosah zawh lo ding za dongin a vam lihleh hi. 4Khum sungah Moses le Elijah kilaa a, Jesu tawh a kiho uhi. 5Tua ciengin Peter in Jesu kungah, “Siepa#9:5 Gk “Rabbi” aw, tam sunga i op ding uh a hoi hi; nang ading buh khat, Moses ading buh khat, le Elijah ading buh khat, buh thum ei lamsah in,” a ci hi. 6Amate a nahzau seng ziehun ama in ci nading mel a thei sih hi. 7Tua ciengin meiingo khat in amate tuomin meii lah panin, “Tam pa pen ka it mama ka Tapa ahi hi; ama’ thu na ngai un!” ci-in aw khat a ging hi.#Mat 3:17; Mrk 1:11; Luk 3:22#2Pet 1:17-18 8Thakhatin a kimkot a et uleh Jesu khat losie koima dang a mu nawn sih uhi.
Elijah ang Peina
(Mat 17:9-13)
9Muol tung pan a kumsuh laitahun sina panin Mihing Tapa a thawkia masangsie, a sil mute uh koima kungah a gen lo nadingun ama in thu a pie hi. 10Tuaci’n tami thu amate teng beh thei-in a koi vua, sina pana thawkiana a ci pen bang a cinopna ahei, ci-in khatlekhat a kidong uhi. 11Tua ciengin amate in ama kungah, “Bang dinga thukham hil siete in Elijah ang pei masa ding hi, a ci uh ahei?” ci-in a dong uhi.#Mal 4:5; Mat 11:14 12Ama in a kung vuah, “Na zosie a bawlpha dingin Elijah ang pei masa tahpi ding hi. Tua ahile Mihing Tapa in zong gimna tampi a thuohdan ding le a kisimmawbawl dan ding teng a na kigielsa hi lo amah? 13Ahi vangin ke’n kang ci-in, Elijah ang pei zo a, ama’ thu a kigielsa bangin ama tungah a dei bangun a bawl zo ta uhi,” a ci hi.
Hlabua Nei Naupang Khat a Kidamsahna
(Mat 17:14-21; Luk 9:37-43)
14A nuazuite kungah a tun ciengun a kimkot vuah mihon tampite a mu vua, thukham hil siete pawlkhat tawh a na kisel uhi. 15Mihon buppi in ama a mu uh ciengin lamdang a sa vua, a hopi dingin a mailamah a tai uhi. 16Ama in a kung vuah, “Amate tawh bang thu kisel na hi uh ahei?” 17Mihon lah panin mi khat in ama dawng a, “Siepa aw, nangma kungah ka tapa kang peipi hi; ama dawi vei-in ham thei lo hi; 18tua dawi in ama a mat vanglah ciengin tuol satna-in nei a, a cilphuon buo-in a ha gawi-in a hui zong a kin zel hi; tuale na nuazuite kungah ei delmang pieh un, ci-in ka nget vangin a delmang zo sih uhi,” a ci hi. 19Ama in a kung vuah, “No upna nei lo khang mite aw, note lahah bang tanvei hing om nalai ding ka hei? Note bang tanvei hing thuoh zo lai ding ka hei? Ka kungah ama hing peipi un,” a ci hi. 20Tuale amate in ama kungah tua naupang a peipi uhi. Tua hlagau in Jesu a mu ciengin thakhatthu-in tua naupang kinlawmsah a, ama tuolah pua-in kikhuleh a, a kam panin a cilphuon a buo hi. 21Jesu in a pa kungah, “A hici zaw bang tanvei a sawt tai?” ci-in a dong hi. Ama in, “A neu lai-a kipan hi ta bo. 22Tua hlagau in tha sawmin meikhuh sung le tui sungah tamveipi sawnpua zo ta hi; ahi zongin na bawl thei ding khatpo a op leh ei hepi inlen ei panpi in,” a ci hi. 23Jesu in ama kungah, “Na bawl thei leh na ci amah! A um mi adingin na zosie kibawl thei hi,” a ci hi. 24Thakhatthu-in naupang’ pa in, “Ka um ta hi; ka uplana ei panpi in!” ci-in a kiko hi. 25Jesu in a hontai valuoi mihonpite a mu ciengin tua hlabua kungah, “Tami naupangno a ham thei nading le khuo a zah thei nading a khahtan nang hlabua aw, ama kung panin pusuoh in, ci-in thu kang pie hi!” ci-in a hosie hi. 26Tua hlagau pengzahin naupangno nahpi-in a kinlawmsah zaw ciengin pusuoh a, tuale naupang misi tawh kibang ahi ziehin mi a tamzawte in, “Ama si ta,” a ci uhi. 27Ahi vangin Jesu in a khut tawh ama tu-in a phongto leh a ding thei pai hi. 28Inn sungah ama a tum zaw ciengin a nuazuite in, “Kote in bang dinga ka delmang zawh lo uh ahei?” ci-in a dapdawh uhi. 29Ama in a kung vuah, “Tam bangte pawl pen antanna le thungetna#9:29 Adang tang laibute ah “antanna” ci kammal om hi. beh tawh a kinotmang thei pan ahi hi,” a ci hi.
Jesu in a Si ding le a Thawkia ding Magenkia
(Mat 17:22-23; Luk 9:43-45)
30Khumtah panin amate dingkhie-in Galilee gam a nawh uhi. Ama in koima’ thei ding a nuom sih hi; 31azieh pen ama in a nuazuite thuhil a, amate kungah, “Mihingte’ khut sungah Mihing Tapa kilehehin amate in that ding a, a kitha zaw a ni thum ciengin thokia ding hi,” ci thu a hil zieh ahi hi. 32A nuazuite in a thugen a tel sih vua, hinanle a dong ngam sih uhi.
Koi Lienpen Ahei?
(Mat 18:1-5; Luk 9:46-48)
33Tua ciengin amate Capernaum khuo-ah a tung vua, inn sungah a op laitahun ama in a kung vuah, “Lampi-a na kiselna uh bang thu ahei? ci-in a dong hi. 34Amate a sip khinkhian uhi. Azieh pen lampi-ah a lienpen koi ahei, ci-in khatlekhat a kisel zieh uh ahi hi.#Luk 22:24 35Ama to-in sawm le nite hlan a, amate kungah, “A masapen a suoh nuom poma in a nukhia pen le adang teng’ sila a suo phot kul hi,” a ci hi.#Mat 20:26-27; 23:11; Mrk 10:43-44; Luk 22:26 36Tua ciengin naupang khat kai-in amate lahah koi a, a kangah tawi-in amate kungah, 37“Keima zieha tam bang naupang khat a limbawl poma kei ei limbawl ahi a, kei ei limbawl poma in kei ei limbawl hi loin kei ei sawl pa limbawl ahi zaw hi,” a ci hi.#Mat 10:40; Luk 10:16; Jhn 13:20
Adang Dawi Delmangpa
(Mat 10:40-42; Luk 9:49-50)
38John in ama kungah, “Siepa aw, na min tawh dawite a hawlkhie mi khat ka mu vua, ama in eite ei zui lo ziehin ka kham uhi,” a ci uhi. 39Ahi vangin Jesu in, “Ama kham sih un; azieh pen ka min tawh na lienpi a sem mi koima in ei nua gensiet thei pah sih ding hi. 40Ei langdo lo poma i pawl ahi hi.#Mat 12:30; Luk 11:23 41Azieh pen a tahtah a kang ci-in, Khris’ min na puoh ziehun dawn ding tui hai khat ang pie popo thaman nga loin a om poma sih ding hi.#Mat 10:42
Maw Nading Ze-etna
(Mat 18:6-9; Luk 17:1-2)
42“Note khatpo in keima ei um tami naupangnote khat a puasah leh, a ngawng ah an gawina suong golpi khat khai-in tuipi sungah tummang dawh leh ama adingin hoizaw ding hi. 43Na khut in ang puasah leh tansan in; khut kim keng kimin mei a mi thei lona hell#9:43 Gk “Gehenna” sungah na pei sangin khut sam keng samin hinna sunga na lut ding pen nang adingin hoizaw tham lai hi.#Mat 5:30 44#9:44 tang 44 le 46 te pen (tang 48 tawh kibang ahi ziehin) taang laibu a hoi pente ah na kiguong lo hi. 45Na keng in ang puasah leh tansan in; keng kimin hell sunga ang kipai sangin keng langbai-a hinna sunga na lut ding nang adingin hoizaw tham lai hi. 46#9:46 tang 44 le tang 46 te pen (tang 48 tawh kibang ahi ziehin ) taang laibu a hoi pente ah na kiguong lo hi. 47Na mit in ang puasah leh khei dawh in; mittang kimin hell khuh sunga ang kipai sangin, mit langkhat beh tawh Pasien’ manggam sunga na lut ding nang adingin hoizaw hi.#Mat 5:29 48Tua sungah a than nangawn uh si ngai lo a, a mei uzong a mit ngai sih hi.#Isa 66:24
49“Azieh pen mi zosie cisaw bangin mei tawh a kisaw ding uhi.#9:49 Adang tang laibute in “le biehpiehna zosie ci tawh kisaw ding hi” ci-in belap ahi sihle a tang ding guong uhi. 50Ci hoi hi; ahi vangin ci a alna mang leh bang na ci alsahkia thei ding ahei? Note zong ci bangin al unlen, khatlekhat na kilem un,” a ci hi.#Mat 5:13; Luk 14:34-35
Currently Selected:
MARK 9: ZBOTF01
Highlight
Share
Copy

Want to have your highlights saved across all your devices? Sign up or sign in
Zo Bible © Bible Society of Myanmar, 2018.