MARK 7

Upate’ Tang Ngaina

(Mat 15:1-20)

1Tua ciengin ama kimkotah Pharisee-te le Jerusalem pan a pei thukham hil siete a kikhawm vua, 2a nuazuite pawlkhat in khut sil lo a cinopna ahi, khutbua pi tawh an a neh lam uh amate in a mu kha uhi. 3(Azieh pen Pharisee-te le Jew mite zosie in upate’ tang ngaina a zui ziehun khut silsieng kilkel loin an a ne sih vua, 4vanzuana panin a pei ciengun zong kisil#7:4 Adang tang laibute ah “kisiensuo” ci-in kigiel hi. masa loin an a ne sih uhi; tuale amate in haite, umlebelte, sumngo kuongdaite sawpsiengna-a kipan tang ngaina dang tampi tah zong a tang lai uhi). 5Tuaci’n Pharisee-te le thukham hil siete in ama kungah, “Na nuazuite in upate’ tang ngaina zui loin bang dingin khutbua pi tawh an ne uh ahei?” ci-in a dong uhi. 6Ama in a kung vuah, “No mihoi kipangte thu Isaiah in a mantaha a na gensa tam banga a kigielna-ah,

‘Tam mite in a kam pi-un kei ei zatah vua,

hinanle a lungsim uh kei tawh kigamla hi;

7amate in mihingte’ bawltawm ngainate,

zui ding ngaina bangin a hil vua,

a mawhna-in kei ei bie uhi,’ a ci hi.#Isa 29:13

8Note in Pasien’ thupiehte taisanin mihingte’ tang ngainate na tukip uhi,” a ci hi.

9Tua ciengin ama in a kung vuah, “Na tang ngainate na zui thei nadingun Pasien’ thupiehte pampai dan na siem ta mama uhi! 10Azieh pen Moses in, “Na nu na pa na zatah un,’ ci hi; tuale, ‘A pa ahi sihle a nu a gensie poma si valon ding hi,’ ci hi.#Pei 20:12; 21:17; Siem 20:9; Thkna 5:16 11Hizongle mi khatpo in a nu ahi sihle a pa kungah, ‘Keima tung pana na nga thei ding hunate pen Corban (Pasien tunga kipiesa a cina) ahi ta hi,’ a ci nah po leh, 12a nu le a pate adingin bangma khat beh na semsah nawn sih uhi. 13Tua bangin na luosuh uh na tang ngainate ziehun Pasien’ thu bangma lo na suo ta uhi. Tam bang danin note in na tampi na sem uhi,” a ci hi.

14Tua ciengin ama in mihonpite hlankia a, amate kungah, “Na unpi-un ngai unlen thei ta un: 15A pulam panin a sungah tumin mi a buasah thei bangma om lo hi, ahi vangin ang pusuoh nate in mi buasah theizaw hi,” a ci hi. 16Zah nading bil neite in za taheh,” a ci hi.#7:16 Adang tang laibute in tami tang 16 pen a belap uh ahi hi.

17Ama in mihonpite a nuasie zaw ciengin inn sungah tum a, a nuazuite in tua thugentena thu a dong uhi. 18Ama in a kung vuah, “Tua ahile no zong a thei lo na hi bo uh amah? A pulam panin mihing sunga a tumsuh poma in mi buasah thei lo hi. 19Azieh pen lungtang sungah tum loin gilpi sunga a tumzawh ziehin khum panin a kithahkia thei lam thei lo na hi uh amah?” a ci hi. (Tua bangin ama in an zosie siengtho hi, ci-in a gen hi.) 20Ama in, “A sung pana pusuohte in mihing buasah hi. 21Azieh pen mihing lungsim tawng panin tam bang a sie ngaisutnate ang pei ahi hi: Numei-pasal pahtatna, guhtatna, tuolthana, 22angkawmna, huoihamna, gitlona, solna, thangtatna, thangsietna, mi daisahna, kihisahna, mottatnate ahi hi. 23Tam gitlonate zosie a sung lam pana pusuoh hi a, tuate in mihing a buasah hi,” a ci hi.

Syrophoenicia Numeinu’ Upna

(Mat 15:21-28)

24Khum panin ama dingkhie-in Tyre#7:24 Adang tang laibute in “le Sidon” ci-in belap hi. gam lamah a pei hi. Inn sungah ama lut a, tua sunga a op lam koima a theisah nuom sih hi. Hizongle mi thei lo dingin ama a kiphuol thei sih a, 25ahi vangin a tanu hlabua nei numei khat in thakhatin ama thu za a, tuale ama pei-in a keng zungah a khupbawh hi. 26Tua nu pen Gentile-te hi a, Syria gam Phoenicia khuo pieng ahi hi. Tua nu in ama kungah a tanu sung panin dawite a hawlkhiet pieh nadingin a thum hi. 27Ama in tua nu kungah, “Naupangte an nesah masa vai, azieh pen naupangte neh ding lahpiehin uite pieh ding kilawm lo hi,” a ci hi. 28Ahi vangin tua nu in, “Sie aw,#7:28 Ahi sihle “Topa; Adang tang laibute in amai-ah mathuo(prefix) ahi “Hi ma hi” ci kammal belap hi. sabuoi nei-a om uite nangawn in naupangte’ khateneng teng a ne uhi,” a ci hi. 29Tua ciengin ama in tua nu kungah, “Tua bang na ci ziehin na pei thei ta hi, na tanu sung panin dawi pusuoh zo hi,” a ci hi. 30Tuaci’n tua nu inn ah pei-in, lupna tunga a lum a tanu mu a, tua dawi a na peikhie ta hi.

Jesu in Bilbing Mipa Damsah

(Mat 15:29-31)

31Tua ciengin Tyre gam panin kilekia a, Decapolis gam sunga om Galilee Tuipi lam zuonin Sidon lampi zui-in a pei hi. 32Amate in a bilbing a ham-awh mi khat ama kungah a peipi uhi; tuale ama pa tungah a khut a ngah nadingin a thum uhi. 33Ama in mihonpi opna panin tua mipa a tuomin peipi a, a bil sungah a khutme guongin a cil nu-in a lei a thampieh hi. 34Tua ciengin ama in van lam ento a, khuisa-in tua pa kungah, “Ephphatha,” a ci hi. Tua pen, “Kihong in,” a cina ahi hi. 35Tuale a bil thakhatin kihong pai a, a lei zong kihlamin nuomtahin a ham thei pailien hi. 36Tua ciengin Jesu in koima kungah a gen lo nadingin amate thu a pieh vangin, thu pie semsem le thanuom tahin a gen semsem uhi. 37Gen thei lo za dongin amate in lamdang a sa vua, “Ama in na zosie a hoi-in bawl zo hi; bilbingte nangawn in khuo zasah a, a ham thei lote zong hamsah thei hi,” a ci uhi.

Currently Selected:

MARK 7: ZBOTF01

Highlight

Copy