MARK 11

Guolzawna tawh Jerusalem ah Jesu a Lutna

(Mat 21:1-11; Luk 19:28-40; Jhn 12:12-19)

1Jerusalem tawh a kinai Oliv Muol gei-a om Bethphage le Bethany khuo a tun ciengun ama in a nuazuite ni sawlin, 2ama gel kungah, “Na mai-vua khuo ah pei unlen, na lut lien uleh koima’ tuon ngai nai lona laano khat khau kikhisa-a om na mu ding uhi; a khau sut unlen hing kai ta un. 3Mi khatpo in, ‘Bang dinga tam banga na bawl uh ahei?’ ang ci leh, “Topa in tulmaw hi, tamtah ma-ah hing koisahkia pai na va,’ ci un,” a ci hi. 4Ama gel zong peipai-in, tuale lampi pulam kotkhah gei khatah laano a kikhi khat a mu uhi. Tua laano a khau a sut laitahun 5a gei-a om mite in, “Bang dinga laano a khau na sut uh ahei,” a ci uhi. 6Ama gel in zong Jesu’ kam vaihlah teng a gen uhi; tuale amate in kai ding a phal uhi. 7Tua ciengin Jesu kungah laano a tut vua, a tungah a puonte uh pha-in Jesu a tuong hi. 8Mi tampite in lampi-ah a puonte uh a na pha vua, adang pawlkhatte in gamlaha a sat uh singna bawhphate a pha uhi. 9Tua ciengin a mai-a pei mite le a nuazui mihonpite in,

“Hosanna!

Topa’ mina ang pei pa in thupha nga taheh!#Late 118:25-26

10Ang tung ding i pu David’ kumpi gam in thupha nga taheh!

Van a sangpen munah Hosanna!” ci-in a kiko uhi.

11Tua ciengin Jerusalem khuo ah ama lutin biehinnpi sungah tum a, na zosie a et kawikawi zaw ciengin, ni kai ta ahi ziehin sawm le nite tawh Bethany ah a pei hi.

Jesu in Theikung Samsie

(Mat 21:18-19)

12A zing ni, Bethany pan amate a peikia ciengun ama a gil a kiel hi. 13Theikung a na pha khat a galmu a, a ga khat beh ka mu khah leh ci-in a en dingin a va pei ta hi. A zang a tun ciengin a nate simlo bangma khat beh a mu sih hi. Azieh pen thei ga hun hi lo hi. 14Ama in theikung kungah, “Koima in na ga nekia ngai nawn sih heh,” a ci hi. Ama’ nuazuite in tua thu a za uhi.

Jesu in Biehinnpi Siensuo

(Mat 21:12-17; Luk 19:45-48; Jhn 2:13-22)

15Tua ciengin Jerusalem ah amate a tung uhi. Tuale biehinnpi sungah Jesu lut a, biehinnpi sunga om vanzuate le vanlei mite delmang dingin a kisa a, ama in sumkhelte’ tona sabuoite le paalva zuate’ tonate zong a khulepieh hi; 16tuale ama in biehinnpi sungah van khatpo peipi ding koima a phal sih hi. 17Ama in thuhil a,

‘Ka inn in mi namcinte’ thungetna inn kici ding hi,’ ci-in kigiel hi lo amah?

Ahi vangin note in misuomte’ kibuhna kuo na suo ta uhi,” a ci hi.#Isa 56:7; Jer 7:11

18Siempu liente le thukham hil siete in tami thu a zah ciengun ama tha thei nading lampi a sui den uhi; azieh pen mihonpite in ama’ thuhilna lamdang sa mama uh ahi ziehin ama a giing uhi. 19Nitah ciengin khuopi pulamah Jesu le a nuazuite a pei uhi.

Theikung Gawta Pan Thusinna

(Mat 21:20-22)

20Zingmawngin amate a pei laita hun tua theikung a hui dongin a gawta a mu uhi. 21Tua ciengin Peter in phawhkia a, ama kungah, “Siepa aw, en vawi tah! Na samsiet theikung gawta ta,” a ci hi. 22Jesu in amate kungah, “Pasien um un.#11:22 Adang tang laibute ah “Pasien na up leh” ci-in kigiel hi. 23A tahtah a kang ci-in, tami muol kungah, ‘Kihemkhie inlen tuipi lilai sena’n kinei in,’ ci-in lung hei nei loin, na ci bangun tangtung ding hi, ci-in na up nah po uleh note adingin ang kibawlpieh ding hi.#Mat 17:20; 1Cor 13:2 24Tuaci’n note kungah kang ci-in, na nget popo uh ka nga zo hi, ci-a na up uleh na nga ding uhi.

25Thungen dinga na din sielun mi khatpo tungah lungkimlona khatpo na nei khah uleh maisah un; tua hile vantunga om na Pa un zong na gamtat khielnate uh ang maisah ding hi,” a ci hi. 26#11:26 Adang tang laibute ah tang 26 na ahi “Ahi vangin note in na maisah sih uleh vantunga om na Pa un zong note’ khielnate maisah lo ding hi” ci-in belap hi.#Mat 6:14-15

Jesu’ Thuneina Kidong

(Mat 21:23-27; Luk 20:1-8)

27Jerusalem ah amate a tungkia leuleu uhi. Biehinnpi sungah a pei laitahin ama kungah siempu liente, thukham hil siete, le upate pei-in, 28“Bang thuneina tawh tamte na bawl ahei? Tam teng bawl nadingin koi in thuneina ang pie ahei?” a ci uhi. 29Jesu in amate kungah, “Thu khat kang dong ding hi; ei dawng un, tuale ke’n zong bang thuneina tawh tam teng ka bawl ahei ci, kang gen ding hi. 30John’ kibaptize-na pen vantung pana ang pei ahi amah, ahi sihle mihing tung pana ang pei ahei? Ei dawng un,” a ci hi. 31Amate khatlekhat kikumin, ‘Vantung pan hi,’ ci leih, ‘Tua ahile bang dinga ama na up lo uh ahei,’ ei ci ding hi. 32Ahi vangin, ‘Mihing tung pan hi,’ i ci ding uh amah,” a ci uleh mi zosie in John pen kamsang tahtah khatin ngaisun uh ahi ziehin mihonpite a giing vanuh uhi. 33Tuaci’n amate in, “Ka thei sih uhi,” ci-in Jesu a dawng uhi. Jesu in amate kungah, “Ke’n zong bang thuneina tawh tamte ka bawl ahei, ci kang gen sih ding hi,” a ci hi.

Currently Selected:

MARK 11: ZBOTF01

Highlight

Copy