MALAKHI 2
2
1Tuale tu-in siempute aw, tam thupieh pen note ading ahi hi. 2Note in thu ngai loin na lungsim sung vuah ka min than nading na vom sih uleh, na tung vuah samsietna kang tungsah ding a, na thuphate uh ka samsie ding hi; a tahtahin ci leih, note in na lungsim vuah na vom lo ziehun tuate#2:2 Heb “tua” ka samsie zo hi. 3Na suonlehlahte uh phawhsie-in na maitang vuah na biehna ganhingte uh’ eh ka the ding a, ka opna panin note kang lamang ding hi.#2:3 Gk Syr tawh a kitekah Cn: Heb “tuale ama in note tuanah ang puo ding hi”
4Tua ciengin Levi tawh ka thuciemna a kip nadingin note tungah tam thupieh kang lah ahi lam thei un.#Gam 3:11-13 5Ama tawh ka kiciemna, ama ka pieh pen nuntah nading le nopsah nading thuciem ahi hi; tuami in zatah ding dei a, ama in kei ei giingin ka min a zatah mama hi.#Gam 25:12 6A kam sungah thuhilna man om a, a lei-ah bangma khielna kimu lo hi. Ama pen citahna le thutangin kei tawh kalsuon a, khielna panin mi tampi kiheisah hi. 7Bangzieh ahei cile siempu pa’ kam in theina a kep kul a, Vanglien Topa’ kamtaipa ahi ziehin mite in ama’ kam panin thuhilna a sui ding uh ahi hi. 8Ahi vangin lampi panin note na piel ta uhi; na thuhilna utawh mi tampi na kipalpua sah uhi; note in Levi thuciemna na siesah uhi, Vanglien Topa in ci hi. 9Tuaci’n ka lampi zui loin na thuhilna ah mi deidan na hi ziehin mi zosie mai-ah simmawna le maizumna kang thuohsah ding hi.
Judah in Thuciemna Niehsah
10I unpi-in pa khat nei hi lo i mah? Eite pen Pasien khat beh in ei piensah hi lo i mah? Tua ahile bang dinga eite khatlekhat kimuong loin i pu i pate’ thuciemna i buasah uh ahei? 11Judah a muonhuoi sih a, Israel le Jerusalem ah a kidahhuoi nate kisem zo hi; azieh pen Topa in a it mama a mun siengtho Judah in buasah zo a, a zi-in gamdang pasien khat nei hi. 12Tam banga a gamta mi poma koikoi hitale a theisah pa#2:12 Gk tawh a kitekah Cn: Heb “hantawh” ahi a, a dawng pa ahi sihle Vanglien Topa kunga biehna lui pa ahi zongin, Jacob’ puonbuh panin kisumaimang ding hi.
13Note in tam zong na sem uhi: Ama in note khut sung panin na biehnate uh lungkim tahin hing sang loin, zong hing thudon nawn lo ahi ziehin note in kaana le tauna hlitui tawh Topa’ maitam na khucip uhi. 14Note in, “Bang dinga ei san lo ahei?” ci-in na dong uhi. Azieh pen thuciemna tawh na lah le na kithuopi hi napi, ama tungah na muontah lona pen na senzi le nangma kikalah Topa teci ahi hi. 15Tua nu Pasien khat beh’ siem hi lo amah?#2:15 Ahi sihle “Ama in khat beh a siem hi lo amah? Tahsa le hla a nipi-in ama-a’ ahi hi.#2:15 Cn: Heb “tuale a omlai hla pen ama-a’ ahi hi” Tuale khat beh a siemna pen Pasien#2:15 Heb “ama” bang dei ahi diei? Pasien’ suonlehlahte a pien nading ahi hi. Tuaci’n noma le noma ki-en unlen, a senzi tungah koima muontah loin omsah sih un. 16Bangzieh ahei cile Israel Pasien Topa in, keima in zi khulna ka muda hi, a ci a, tuale tatsietna tawh a zi tunga a gamtatna a selcip mite ka muda#2:16 Cn: Heb “ama in muda hi” hi, Vanglien Topa in ci hi.
17Note in na thugennate utawh na Topa uh na gimsah uhi. Hinanle note in, “Bangci gimsah ka hi uh ahei?” na ci uhi. “Topa muna-ah gitlona a bawl zosie mi hoi ahi vua, ama in tuate a kipahpi hi,” ahi sihle, “Thutang Pasien hei-ah a om ahei?” cina tawh na gimsah uhi.
Currently Selected:
MALAKHI 2: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
