JOHN 3

Nicodemus Kungah Jesu Haw

1Nicodemus a kici Judah makai khat om a, ama pen Pharisee-te khat ahi hi. 2Zan lai-in Jesu kungah pei-in ama kungah, “Rabbi aw, nang pen Pasien kung pana ang pei siepa khat na hi lam kang thei uhi; azieh pen Pasien lo tawh na bawl tami limte koima in bawl thei lo hi,” a ci hi. 3Jesu in ama kungah, “A tahtah a kang ci-in, mi khatpo tunglam panin a suokia#3:3 Ahi sihle “thasuokia” sih leh Pasien’ manggam a mu thei sih ding hi,” a ci hi. 4Nicodemus in, “Mi khat a khangham zaw ciengin bangci suokia thei ding ahei? A nu gil sungah lutkia-in a suohkia thei ding amah?” a ci hi. 5Jesu in, “A tahtah a kang ci-in, koipo tui le hlagau tawh a suokia sih leh Pasien’ manggam a lut thei sih ding hi. 6Tahsa-a suona in tahsa hi a, Hlagau-a suona in hlagau#3:6 “hui” le “hlagau” tegel pen Greek ah a kammal kibang hi. ahi hi. 7‘Nang#3:7 Greek ah “Nang” ci kammal pen a tam genna (plural) ahi hi. na hi leh tunglam panin#3:7 Ahi sihle “a tha-in” na suohkia a ngai hi,’ kang ci ciengin lamdang sa sin. 8Hui zong a nopna popo-ah lang a, a gin na zah vangin hei pana hing lang hi a, hei lam zuon ahei, ci na thei sih hi. Hlagau-a suoh tapo zong tua ma bang ahi hi,” ci-in a dawng hi. 9Nicodemus in ama kungah, “Tami thu a bangci pien thei ding ahei?” a ci hi. 10Jesu in ama dawng a, “Nang Israel-te’ sie khat lawmlawm in tam thute na tel sih amah? 11“A tahtah a kang ci-in, kote in ka theisa thute kang gen vua, ka musa thute beh teci kang pang uhi; ahi vangin nang#3:11 Tam sunga”nang” a kici Greek kammal pen tang 12 ah a tam genna (plural) in kizang hi. in ka teci panna uh na sang zo sih hi. 12Note kungah leitung thu tawh kisai kang gen ciengin na up sih uleh vantung thu hing gen leng bang na ci up thei ding uh ahei? 13Vantung pana ang kumsuh Mihing Tapa simlo vantungah a kato koima om lo hi.#3:13 Adang tang laibute ah “vantunga om” ci-in kibelap hi. 14Moses in gamlahah gul a khai bangin Mihing Tapa kikhai ding a,#Gam 21:9 15tua khu ama a um tapo in kumtawn hinna a nga nading ahi hi.

16“Pasien in leitung a it seng ziehin a tapa a um mi zosie in kisie loin kumtawn hinna a nei thei nadingin a tapa neisun a pie hi.

17“A tahtahin Pasien in leitung mawsahna thukhen dingin a Tapa leitunga ang sawl ahi sih a, ama tungtawnin leitung in hutdamna a nga thei nading hizaw hi. 18Ama a umte in mawsahna thukhenna a thuoh sih ding uhi; ahi vangin ama a um lote in Pasien’ Tapa neisun’ min a up lo ziehun mawsahna thukhenna a thuoh zo ta uhi. 19Tuale thukhenna a thuohna uh a hang pen leitungah khuovah hing tung zo napi a gamtat uh a siet luot ziehin mihingte in khuovah sangin khuomiel deizaw uhi. 20Bangzieh ahei cile sietna a bawl mi zosie in amau’ gamtatnate a kilah lo nadingin khuovah a muda vua, khuovah sungah a pei sih uhi. 21Ahi vangin thuman-a a gamtate in amau’ gamtatna pen Pasien sunga gamta ahina uh kicien tahin a kimu thei nadingin khuovah sungah a pei uhi.

Jesu le Baptize-pa John

22Tua zaw ciengin Judah gamah Jesu le a nuazuite a pei vua, khum munah amate tawh bakhat sung hun zangin mite a baptize hi. 23Salim khuo gei-a Aenon munah tui a tam ziehin John in zong tuanah mite a baptize hi; tuale mite a kiphamatin pei-in a ki-baptize uhi, 24thong sungah John a kikhum nai sih hi.#Mat 14:3; Mrk 6:17; Luk 3:19-20

25Tu-in kisiensuona tungtang thu tawh kisai-in John’ nuazuite le Jew#3:25 Adang tang laibute ah “Judah mite” mi khat kikalah thu kikupna khat a om hi. 26John kungah amate pei-in, “Sie aw, Jordan gun galkhatah nang tawh a omton ngai, ama’ thu teci na panna pa pen tu-in tanah omin mite a baptize a, mi zosie in ama a zuon uhi,” a ci uhi. 27John in, “Vantung panin a kipieh sih leh koima in bangma nga thei lo hi. 28‘Kei, Messiah#3:28 Ahi sihle “Khris” ka hi sih a, a masanga ei kisawl pa ka hi bo hi,’ ci-a ka gen khu nomate mama ka teci na hi uhi.#Jhn 1:20 29Monei pa pen zinei pa ahi hi. Zinei pa kungah dingin ama’ thu ngai-a om a guolpa in zinei pa’ aw a zah ziehin a kipah mama hi. Tua thu ziehin ka lungdamna a bukim ta hi. 30Ama in khanlam manaw ding a, kei ka hile kiemlam ka manaw ding hi,” a ci hi.

Vantung Pan ang Pei pa

31Tunglam pana ang peipa khu mi zosie tungah a om hi; lei pana piengpa pen lei-a’ ahi a, leitung thute a gen hi. Vantung pana ang peipa ahile mi zosie’ tungah a om hi. 32Ama in mu-in a zahsa thute teci pang a, hizongle koima in a teci panna a sang sih hi. 33Ama’ teci panna a sang poma in Pasien pen a thuman hi, ci-in a kipsah#3:33 “seal tum” uhi. 34Pasien’ sawl mi in Pasien’ thu a gen hi, azieh pen ama in tua mipa tungah ciengtan om loin Hlagau a pie hi. 35Pa in Tapa it a, ama’ khut sungah na zosie a koi zo hi.#Mat 11:27; Luk 10:22 36Tapa a um mi poma in kumtawn hinna a nei hi; Tapa’ thu a mang lo mi poma in hinna mu lo ding a, Pasien’ lungthahna a thuohzaw lai ding hi,” a ci hi.

Currently Selected:

JOHN 3: ZBOTF01

Highlight

Copy