PIENCILNA 7
7
Tuizinpi
(Luk 17:26-27)
1Tua ciengin Topa in Noah kungah, “Nangma le na innkuonpi zosie tembaw sungah lut un. Azieh pen tam khang mite sungah nang beh ka mai-ah a thumanin kang mu zo hi. 2Ganhing a sieng zosie nupa kop sagi le ganhing a sieng lo nupa kop khat la in. 3Tuale vana leng vate zong nupa kop sagi ma, leitungah a ci man lo nadingin kemcing in. 4Azieh pen ni sagi ciengin leitungah sun sawmli le zan sawmli sung guo ka zusah ding a, leitung maitang panin ka bawlsa hinna nei vannuoi ka sumang ding hi,” a ci hi. 5Tuale Noah in Topa’ thupiehsa zosie a un-in a bawl hi.
6Leitungah tuizin a tun lai-in Noah kum zaguh a pha hi. 7Tuale tuizin panin a suotah nadingun Noah, a tapate, a zi le a mote tawh tembaw sungah a lut uhi.#Mat 24:38-39; Luk 17:27 8Pasien in Noah a thupieh bangin ganhing a siengte, ganhing a sienglote, vate, lei-a a bawhva zosie lah panin 9a nupa kopin Noah tawh tembaw sungah a lut uhi. 10Ni sagi a cin zaw ciengin leitungah tuizin a tung hi.
11Noah’ khan a kum zaguhna kum, a hla nina, tua a hla ni sawm le ni sagi ni-in vantunga om a thuh mama tuinah zosie pawhkeh a, vantung tawlet zosie kihong hi.#2Pet 3:6 12Leitungah sun sawmli le zan sawmli guo zu hi. 13Khum ni ma-in Noah le a tapate, Shem, Ham, Japheth, le Noah’ zi le a mote thum, amate tawh tembaw sungah a lut uhi. 14Amate tawh gamsa zosie a nam ciet, innsa zosie a nam ciet, lei-a a bawhva poma a nam ciet, le va poma a nam ciet, va namkim, le hlanei zosie a nam cietin a lut uhi. 15Noah’ tembaw sungah hinna hu nei zosie kopni cietin a lut uhi. 16Pasien in Noah tunga a thupiehsa bangin hinna a nei zosie, a nupa-in tembaw sungah a lut uhi; tuale Topa in ama kot a khalu hi.
17Leitungah ni sawmli sung a kizomin gua a zuzu hi; tuale tui tam semsemin tembaw a lamto a, leitungah khangin a sangto lai hi. 18Leitungah tui khang valuhin tuitungah tembawpi a lamto hi. 19Leitungah tui nahpi tahin a khan ziehin vansin nei buppi-a a om muol sang zosie a hlummang hi; 20muolteng tungah tui letto lai a, tuate tungah tong sawm le tong nga thuhin hlummang hi. 21Leitungah hinna a nei zosie, vate, innsate, gamsate, lei-a a hon gamtat ganhing zosie le mi zosie a si sieng hi; 22leigaw lahah a nahvanga hinna hu a nei poma a si sieng uhi. 23Ama in mihing, ganhing, a bawhvate le vana leng vate, leitunga hinna a nei poma a sumaimang hi; Noah le tembaw sunga a ompite beh a suohta uhi. 24Ni za le ni sawmnga sung leitungah tui a khang hi.
Currently Selected:
PIENCILNA 7: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
