PIENCILNA 11

Babel Tausang

1Amasa-in leitung buppi in kamham khat le kamteng kibang a nei uhi. 2Nisuona lam panin a na lal vua,#11:2 Ahi sihle “nisuona lamah lal” Shinar gam sungah zanglei mun khat mu-in tua mun ah na teng uhi. 3Amate khatlekhat kiho-in, “Hing pei un, tehlei khengin halgaw vai,” kici uhi. Amate in suong tangin tehlei a zang vua, a tuhkip nadingin suongmeihol nai zang uhi. 4Tua ciengin amate in, “Hing pei un, eimahaw adingin khuopi khat le a khumvum in vantungte dong a ban ding tausangpi khat lam vai-in, i min than nadingin bawl vai; tua banga i bawl sih leh leitung buppi-ah i kithethang ta ding uhi,” a kici uhi. 5Mihingte’ lamsa khuopi le tausang en dingin Topa a kumsuh hi. 6Topa in, “En un, amate minam khat ahi vua, amate zosie in kamham khat a nei uhi; tam pen a sep ding uh a kipatna ahi nabo hi; amate adingin sep dinga a gelte uh bangma a pieng thei nawn sih ding hi. 7Hing pei un, kuonsuh vai-in khatlekhat a thugen uh a kithei lo nadingin khum munah a kamham uh va sawpawi ta vai,” a ci hi. 8Tuaci’n Topa in leitung muncin tengah amate thezah sieng a, a khuopi bawl uh a khawl ta uhi. 9Tua ahi ziehin tam khuopi pen Babel kici hi. Azieh pen Topa in khum munah leitung mi zosie’ kamham a sawpawipieh#11:9 Heb “balal”, “sawpawi ding” a cina ahi hi. hi; khum mun panin Topa in leitung muncin tengah amate a thezah hi.

Shem’ Suonlehlahte

(1Khg 1:17-27; Luk 3:34-36)

10Tam teng pen Shem’ suonlehlahte ahi uhi. Shem kum zakhat a cin, tuizin tun zaw kum ni ciengin ama in Arpachshad kici tapa khat a nei hi; 11Arpachshad pien nua-in Shem kum zakhat pha ta a, tapate le tanu dangte zong nei hi.

12Arpachshad kum sawmthum le kum nga a phah zaw-in, Shelah kici tapa khat nei hi; 13Shelah pien nua-in Arpachshad kum zali le kum thum dam lai a, tanute le tapa dangte zong nei hi.

14Shelah kum sawmthum a phah zaw-in, Eber kici tapa khat nei hi; 15Eber pien nua-in Shelah kum zali le kum sawmthum dam lai a, tanute le tapa dangte zong nei hi.

16Eber kum sawmthum le kum li a phah zaw-in, Peleg kici tapa khat nei hi; 17Peleg pien nua-in Eber kum zali le kum sawmthum dam lai a, tanute le tapa dangte zong nei hi.

18Peleg kum sawmthum a phah zaw-in, Reu kici tapa khat nei hi; 19Reu pien nua-in Peleg kum zani le kum kuo dam lai a, tanute le tapate zong nei hi.

20Reu kum sawmthum le ni a phah zaw-in, Serug kici tapa khat nei hi; 21Serug pien nua-in Reu kum zani le kum sagi dam lai a, tanute le tapa dangte zong nei hi.

22Serug kum sawmthum a phah zaw-in Nahor kici tapa khat nei hi; 23Nahor pien nua-in Serug kum zani dam lai a, tanute le tapa dangte zong nei hi.

24Nahor kum sawm ni le kum kuo a phah zaw-in Terah kici tapa khat nei hi; 25Terah pien nua-in Nahor kum za le sawm le kuo dam lai a, tanute le tapa dangte zong nei hi.

26Terah kum sawm sagi a phah zaw-in Abram, Nahor, le Haran te nei hi.

Terah’ Suonlehlahte

27Tu-in Terah’ suonlehlahte tam teng ahi hi. Terah in Abram, Nahor le Haran nei a, Haran in Lot nei hi. 28Haran pen a pienna Chaldea gam Ur khuo-ah a pa Tera a si masangin a si hi. 29Abram le Nahor in zi nei uhi; Abram’ zi min pen Sarai hi a, Nahor’ zi min pen Haran’ tanu Milcah ahi hi. Milcah le Iscah’ pa pen Haran ahi hi. 30Tu-in Sarai ciing a, ta a nei thei sih hi.

31Terah in a tapa Abram le Haran’ tapa, a tupa ahi Lot, le a tapa Abram’ zi ahi a monu Sarai zawpi a, Canaan gam lam zuonin Chaldea gam Ur khuo panin a peiton uhi. Ahi vangin Haran a tun ciengun khum munah a teng uhi. 32Terah’ khan sung kum zani le kum nga hi a, Haran-ah ama a si hi.

Currently Selected:

PIENCILNA 11: ZBOTF01

Highlight

Copy