LUKA 9

Sangac Rokshiz rac Wanueyc Nvr tvkaz

(Mat 10:5-15; Mak 6:7-13)

1Yesu rueq sangac rokshiz rac wanueyc kuex tvtuimx gvl vtueq, htaungc htenc kuex yurc lot juing luimc vkawc nuiyc vthuiuz vsac jix htenc kuex tvhvlc lot juing vrangx vpangx kuex kuq tueq. 2Kvruex yimaq Tishox Mungtan lvmx tvluingc kuy tvkoc nuiyc vthuiuz vsac jix tvhvlc kuy tvkoc nvr tvkaz tueq. 3Vpiq rueq tsuingshiq muex, “Lvmx tvkoc ngvlhtulc, khak, lvmx svy, kuimphox nuiyc svmhung vnueyc nauk gurx kaz.#Luk 10:4-11; Kamx 13:51 4Nuimshiq mruex yuimx nuex lac duiz tuinx kvruex ghaq kvmaq kvtenc wvnc muit wawwawx kuex kvruex yuimx kvyuq lawx httax kuinz. 5Nuimshiq malc wvnc muq ngoz ruiux kuex kvruex ghaq kvmaq kvtenc wvnc tuinx yuq, tsuingshiq tvkoc hakhix m-yaungx kueq nuimshiq yaz nuex kop yaq bokkhuyx kuex nuiuc tvdvy shec shuinz,” ngoz tueq jungx tueq.

6Sangac hez kuex kaz wvnc vtueq ghaq ruip saz nuex Thuix Thaungx Vhvlx tvluing kuq ruiux vthuiuz vsac jix htenc muinz tvhvlc kuq tueq.

Herod Hokhvmx Thuinz Bvruik

(Mat 14:1-12; Mak 6:14-26)

7Kvkhoc yaungx wvnc tueq lvmx kuex Galile hong guimz jix mungx walaungx Herod rueq tay vtueq thuinz bvruik shauk tueq, yvmx khoc lac ngoz ruiux lec miq wvyvmc rueq Yuix Luip Yohan yuing kvtenc waung yek tueq ngoz yaq.#Mat 16:14; Mak 8:28; Luk 9:19 8Wvyvmc rueq Elia httuiuc kaz tueq ngoz yaq, kvmaq wvyvmc rueq kuex mvnnuex jauz wawc shvmmax washiz shiz dung tueq ngoz tueq rvjungc wuez koq tueq Herod kuex thuinz bvruik tueq. 9Herod rueq, “Ngaz rueq Yohan khux poz jumz gay tauk, yuq muinz ngaz rueq vruex tay vshaungx waz kuex ukhaq lac?” ngoz tueq Yesu kuex khic lvp tvkoc thuiyx tueq.

Miqhingc Bv-ngac muex Tv-phauk Saq

(Mat 14:13-21; Mak 6:30-44; Yoh 6:1-14)

10Kamx waz hez kuex yek waung vtueq tsuinghez rueq shuimx wvnc tueq lvmx htenc kuex vpiq muex jungx kuq tueq. Vpiq rueq tsuinghez kuex shvlx wvnc vtueq Betsaida ngoz yaq ghaqyungx nuex woz wvnc tueq. 11Nuk miqsaz htenc rueq kvruex tuiuz wuez vtueq, vpiq yix nuex phvnx wvnc naungx wuez tueq. Vpiq rueq tsuinghez kuex malc wvnc ruiux Tishox Mungtan lvmx jungphvnx kuq tueq, vthuiuz vsac jix muinz tvhvlc kuq tueq.

12Shalx shex yac wvnc koq tueq sangac rokshiz rac wanueyc kuex vpiq kox nuex kvnvp kaz vtueq, “Vruex nuk miqsaz htenc kuex tvroz wawc miqghaq htenc nuiyc wuik vyvmx htenc nuex nyuip vtueq phuiuz vsvy mthuiyx phauk saq shuex tvkaz shuiuz, yvmx khoc lac ngoz ruiux kuex vruex baung kuex lvmx luz baung rvtueq,” ngoz tueq vpiq muex jungx tueq.

13Yuq muinz Yesu rueq tsuingshiq muex ngoc, “Nuimshiq rueq tsuinghez muex tv-phauk saq shuinz,” ngoz kuq tueq.

Tsuinghez rueq, “Miq vjuc vraq phuiuz svy juing kuex vrez kay juing haz? Nuiyhez kox nuex wanx phux bv-ngac rac ngaq vnueyc dvyx httax yaq,” ngoz tueq tvralc tueq. 14(Yvmx khoc lac ngoz ruiux lec nuk miqsaz miqwaz rulx dvyx 5,000 tanc rvtueq.)

Yesu rueq vpiq sangac hez muex, “Tsuinghez kuex phungc shiz nuex rok bv-ngac ngac maq tv-ngaungc shuinz,” ngoz tueq.

15Kvkaq sangac bix rueq muinz kvkhoc tv-ngaungc tueq. 16Yesu rueq wanx phux bv-ngac rac ngaq vnueyc kuex lvmz vtueq, raungkox nuex lawc yaq lvmx maq Tishox kejux kuex tvtsvmc ruiux wanx nuiyc ngaq kuex tvbunx vtueq nuk miqsaz htenc muex phvlc kuy tvkoc sangac bix muex kuq tueq. 17Miq lotlaz rueq phoay laz phuiuz svy lot yix, sangac bix rueq phuiuz bung tvjomx koq tueq boarx rokshiz rac vnueyc rvtueq.

Yesu nuex Seng vtueq Peter Kvjungc

(Mat 16:13-19; Mak 8:27-29)

18Laukshiz Yesu jvnjvnc vjux thoz yaq nuex, sangac bix kuex vpiq kox nuex kaz tueq. Vpiq rueq tsuinghez muex, “Nuk miqsaz htenc rueq ngaz ngoc ukhaq lac ngoz yaq nguinx?” ngoz tueq wiz tueq.

19Tsuinghez rueq, “Wvyvmc rueq yuix luip Yohan ngoz yaq, wvyvmc rueq Elia ngoz yaq, vbez rueq mvnnuex jauz wawc shvmmax washiz shiz yuing kvtenc wvnc tueq rvtueq, ngoz tueq rvjungc yaq,” ngoz tueq.#Mat 14:1-2; Mak 6:14-15; Luk 9:7-8

20Vpiq rueq, “Nuimshiq rueq hux ngaz kuex ukhaq ngoz tueq lac tvmaung vshuinx?” ngoz tueq tsuinghez muex wiz tueq.

Peter rueq, “Mnoz kuex Tishox Mesia rvtoq,” ngoz tueq tvralc tueq.#Yoh 6:68-69

Yesu Kuilc Daz nuiyc Vthueyc Rvhumc tuex lvmz Jungx

(Mat 16:20-28; Mak 8:30—9:1)

21Kvkaq Yesu rueq tsuingshiq muex vruex lvmx kuex ukhaq muex muinz nauk jungx kaz ngoz tueq bomc htuing kuq tueq. 22Vpiq rueq tsuingshiq muex jungx tueq kuex, “Miq Saz vruex kuex vkuilc vdaz phvnx ruip saz rvhumc vtueq walaungx bix nuiyc shomc waz bix, Tvrac tvluingc waz hez rueq tvdux gay vtueq thvt gay shuex. Vpiq kuex tvthueyc laz thvt gay shuex, yuq muinz raungnuiyq thuimx ngoc yaungc nuex yuing kvtenc wvnc tuex,” ngoz tueq.

23Kvmaq vpiq rueq tsuingshiq lotlaz muex jungx tueq kuex, “Ngvy yix nuex phvnc naungc roc jix ukhaq yuq muinz miqmac shauk gvnz tvkoc lvlc gay ruiux, miqmac yauk juinc bulx kuex wvraungx nuiyq tek pix vtueq ngvy yix nuex mphvnx naungx phueq.#Mat 10:38; Luk 14:27 24Miqmac rullungx kvpalc wvnc roc jix waz kuex rullungx momaq wvnc rvhumc tuex. Ngvy tvkoc nuex miqmac rullungx tvmoz maq gay jix waz kuex rullungx kvpalc wvnc rvhumc tuex.#Mat 10:39; Luk 17:33; Yoh 12:25 25Miq kuex mungkawx lotlaz guimz lvp vtueq miqmac kuex bac wvnc ruiux yuq, piq tvkoc yvmx vjux lac httax tvnx? Vsuing khuec guez dvyx rvtueq! 26Miq washiz shiz kuex ngaz muex nuiyc ngaz rueq tvluing shaungx kvjaz kvmac yvlc sac ruiux yuq, Miq Saz vruex kuex vpiq ngauz vngax maq muinz, Vwaz ngauz vngax maq muinz, vsawc raungkamx bix ngauz vngax maq muinz httuiuc kaz tuex nuex, kvruex waz ningkhvnc nuex yvlc sac tuex. 27Nuimshiq muex ngaz rueq vsuing jungx kuq ix, vruex yuq jvp jix wvyvmc kuex Tishox Mungtan max khiz lvp wawwawx thueyc wuez muq rvtuex,” ngoz tueq.

Yesu Shvmx Kv-phelc Kaz tueq

(Mat 17:1-8; Mak 9:2-8)

28Kvruex lvmz htenc jungphvnx kuq tueq jepat shiz tanc httvmx tueq yix maq, Yesu rueq Peter, Yohan nuiyc Yaku hez kuex shvlx wvnc vtueq vjux thoz tvkoc kanx nuex waung wvnc tueq.#2Pet 1:17-18 29Piq rueq vjux thoz yaq baunglaung, vpiq htvlx phawc shvmx kv-phelc wvnc tueq nuiyc vpiq svmhung kvmuinz luic hvlc phelez wvnc tueq. 30Miq wanueyc kuex huingc rvhek laz dung kaz vtueq vpiq rulc kvjak yaq, kvruex nueyc kuex Moshe nuiyc Elia ngoz yaq. 31Tsuinghez kuex ngauz vngax rulc vdvmz dung kaz vtueq, Tishox thuinroc rulc rv-ngvlc mtanc httax muq nuex Yerusalem ghaq maq vpiq vthueyc rvhumc tuex lvmx kuex vpiq rulc rvjungc phvnc yaq. 32Peter nuiyc piq kungjix kuex kvtsoalx rvlauk wvnc tueq, yuq muinz tsuinghez kvsvmc wvnc koq tueq Yesu ngauz vngax muinz, vpiq rulc vdvmz nuex jvp yaq miq wanueyc muinz khiz tueq. 33Kvruex nueyc kuex Yesu kox wawc rv-phvlc wvnc yaq nuex Peter rueq, “Taungjix lex, vruex yuq naunghez httaz muex vhvlx rvtuex! Mnoz tvkoc vshiz, Moshe tvkoc vshiz, Elia tvkoc vshiz tap vthuimx guirx phix,” ngoz tueq Yesu muex jungx tueq. (Piq rueq jungx tueq kvjaz kuex piq rueq tuiuz muq.)

34Vpiq rueq kvkhoc jungx yaq baunglaung, phuemx rueq tsuingthuimx kuex puingc wvnc tueq, phuemx mungx nuex lomx wvnc tueq nuex sangac bix kuex hiz wuez tueq. 35Phuemx mungx maq, “Vruex waz kuex Isaz rvtueq, vpiq kuex ngaz rueq vthvlc tvy wuez shex, vpiq kvjaz kuex tay wuez shuinz!” ngoz tueq kvjak tueq.#Esa 42:1; Mat 3:17; 12:18; Mak 1:11; Luk 3:22

36Kvjaz thuic bomc thauk kay yix Yesu kuex vpiq jvnjvnc dvyx shex tsuinghez rueq tueq. Sangac bix rueq kvruex lvmz lotlaz nuex seng vtueq kuiyqshuik dvyx httax ruiux, tsuinghez rueq khiz tueq lvmz htenc kuex kvruex baunglaung ukhaq muex muinz jungx muq.

Htaungc Kvpumz yaq Miqwaz Saz Yesu rueq tvhvlc

(Mat 17:14-18; Mak 9:14-27)

37Raungnvp kvyix Yesu nuiyc sangac wathuimx kuex ghaq luimx maq svt wvnc tueq nuex, nuk miqsaz htenc paunghvlc rueq Yesu kuex humc wvnc wuez tueq. 38Miq phungc mungx kvwawc washiz rueq, “Tvluingc waz lex! Isaz vruex lawc kuy tvkoc m-yauk wawc thoz vphaungx, piq kuex isaz salauk saz rvtueq! 39Htaungc kvpumz wvnc ruiux yuq vhuingc rvhek laz guyc yaq, vyauk vyaz kungc wvnc vtueq vnuix maq htobomx dung yaq, htaungc rueq piq tvkuilc daz tvthuiuz sac kauk vtueq laungc maq jix dung wvnc ruiux yaq. 40Htaungc yurc gay tvkoc msangac hez muex ngaz rueq kvmenc jenc thoz tauk, yuq muinz tsuingshiq rueq ruez lot muq,” ngoz tueq jungx tueq.

41Yesu rueq, “Kvmluimx thuinz vguez nuiyc vyaq nuk lex! Ngaz kuex nuimshiq rulc vdvmz mtanc khvnc nuex httuiuc laz httax vtueq nanx kuy juing lac?” ngoz tueq. Kvruex yimaq piq muex, “Msaz kuex vnuex shvlx wvnc loq,” ngoz tueq.

42Kvruex nox kuex shvlx wvnc yaq nuex htaungc kvraq tvrul kauk vtueq vyauk vyaz htenc kuex kungc wvnc tueq. Yuq muinz Yesu rueq htaungc muex ngoc miqwaz saz kox wawc dungc wvnc tvkoc nvr ruiux nox kuex tvhvlc vtueq vwaz muex lekuq tueq. 43Miq htenc lotlaz kuex Tishox luimc vkawc hungc vlaungc ningkhvnc nuex wangc wuez tueq.

Yesu Thueyc lvmz Tvkhic kuq

(Mat 17:22-23; Mak 9:30-32)

Miq htenc kuex Yesu rueq shuimx wvnc tueq yauk shuimc htenc kvruex mac wangc wuez koq tueq, Yesu rueq vpiq sangac bix muex vkhoc jungx kuq tueq, 44“Ngaz rueq nuimshiq jungx phaungx kvjaz kuex nauk lauk gay kaz! Miq Saz vruex kuex miq yauk nuex lekuy gay rvhumc tuex,” ngoz tueq jungx tueq. 45Yuq muinz sangac bix rueq kvruex kvjaz kuex yvmx wuez ngoz yaq nguinx tuiuz muq, tsuingshiq rueq tuiuz lot muq juing vhttuiyq vruez shec rvtueq, kvruex vlvmz muinz tsuingshiq rueq wiz khvmc muq.

Ukhaq lac Vyungx Pinhtumc rvtvnx?

(Mat 18:1-5; Mak 9:33-37)

46Sangac bix kuex tsuinghez phungc kvyuq mruex jix lac vyungx pinhtumc ngoz tueq vdvmz dvmz thuirx tvruingx wuez tueq.#Luk 22:24 47Yesu rueq tsuingshiq kvkhoc thuirx tvruingx yaq kuex helc vtueq nosaz washiz gvl ruiux vhep nuex tvjvp vtueq, 48“Ngvy muingc maq vruex nosaz saz kuex malc lvy jix waz kuex ngvy malc lvy jix waz rvtueq. Kvmaq ngvy malc lvy jix waz kuex ngvy nvrc jix waz kvruex malc lvy rvtueq. Nuimshiq phungc wawc vruinx pinhtumc waz kuex vyungx muex yaungx tuex,” ngoz tueq.#Mat 10:40; Luk 10:16; Yoh 13:20

Nuimshiq muex Ralx Yaungx muq jix kuex Nuimshiq Kungjix

(Mak 9:38-40)

49Yohan rueq, “Taungjix lex, mmuingc maq htaungc yurc jix miq washiz nuiyhez rueq khiz tiq, piq kuex nuiyhez yix nuex phvnx naungx muq ningkhvnc nuex nuiyhez rueq piq tvthauk gay shec tiq,” ngoz tueq.

50Yesu rueq, “Piq kuex nauk tuingshaung kaz, yvmx khoc lac ngoz ruiux lec nuimshiq muex tuingshaung muq waz kuex nuimshiq rulc rungx raz naungc jix rvtueq,” ngoz tueq sangac bix vganc muex jungx kuq tueq.

Samaria Ghaq jix rueq Yesu Lvlc gay

51Raungmungx nuex duic wvnc vkhing httuiuc wvnc koq tueq Yesu kuex Yerusalem ghaq nuex kay tvkoc vthuinz maq htvp htaz tueq. 52Vpiq rueq vpiq max nuex kamx waz hez kuex tvkaz tueq, tsuingshiq kuex vpiq tvkoc tvyoalc muex ngoz tueq Samaria miqsaz phvnx ghaq ghaqshiz nuex nyuip wvnc tueq. 53Yuq muinz Yesu kuex Yerusalem ghaq nuex kay dvnc yaq ningkhvnc nuex ghaq miqsaz htenc rueq vpiq kuex lvp wvnc muq. 54Sangac Yaku nuiyc Yohan rueq khiz vtueq, “Taungjix lex, tsuingshiq kuex tvbac gay muex nvnueyc rueq raungmungx wawc wvr gvl ruiux mnoz rueq roc shuiux haz?” ngoz tueq wiz tueq.#2Hokh 1:9-16

55Yesu kuex nyelauk raz tueq tsuingnueyc kuex httonx tueq.

56Kvruex yimaq Yesu nuiyc vpiq sangac bix kuex ghaq ganc nuex kaz wvnc tueq.

Yesu yix Phvnc Aungx yaq Bix

(Mat 8:19-22)

57Tsuingshiq lvmx nuex kaz thuiyc yaq nuex miq washiz rueq, “Mnoz khuemx tuiux baung ruip saz kvyuq ngaz phvnx naungx phaungx,” ngoz tueq Yesu muex jungx tueq.

58Yesu rueq, “Shoalx htenc kuex vbumc juing ghaq luix vhttax, wushawx htenc muinz vdaungc juing httax yaq, yuq muinz Miq Saz vruex kuex khux tvdvl juing doc muinz lvp muq,” ngoz tueq jungx tueq.

59Yesu rueq vganc washiz muex, “Ngvy yix nuex phvnx koq,” ngoz tueq.

Yuq muinz kvruex waz rueq, “Taungjix lex, iwaz maungx kuex kungkhux luip waungc tvkoc tvyek koq,” ngoz tueq.

60Yesu rueq, “Miq vmaungx jix vdvmz dvmz mrvshuz luip kueq. Mnoz kaz vtueq Tishox Mungtan lvmx jungphvnx kaz kuiuz,” ngoz tueq.

61Kvmaq vganc washiz rueq muinz, “Taungjix lex, ngaz rueq muinz m-yix nuex phvnx naungx phaungx, yuq muinz iyuimx wuinz rulc gvnhttuingc ngoz tueq kungkhux rvbomc waung phaungx,” ngoz tueq.#1Hokh 19:20

62Yesu rueq, “Nax htvyc shuimx vtueq yix kox nuex kvroz lawc jix waz kuex Tishox Mungtan yauk shuimc tvkoc aungx muq,” ngoz tueq jungx kuq tueq.

Currently Selected:

LUKA 9: HNOT01

Highlight

Copy