LUKA 11

Yesu rueq Vjux Thoz Tvluing kuq

(Mat 6:9-13; 7:7-11)

1Raungnuiyq shiz Yesu kuex baungshiz nuex vjux thoz tueq. Vjux thoz lot tueq yix maq vpiq sangac hez wawc washiz rueq, “Taungjix lex, Yohan rueq piq sangac hez muex vjux thoz tvluing kuq tueq kvkhoc nuiyshiq muex muinz vjux thoz tvluing kuq koq,” ngoz tueq jungx tueq.

2Yesu rueq tsuinghez muex, “Nuimshiq rueq vjux thoz ruiux yuq vkhoc thoz shuinz.

‘Iwaz lex:

Mmuingc vsawc kuex mtvtsanc nganc wuez shueq;

Mmungtan kuex mhttuiuc wvnc kueq.

3Nuiyshiq muex rax yaq phuiuz vsvy, wvraungx nuiyq tek nuiyshiq muex kuq koq.

4Nuiyshiq muex yaq kuq phuex mvrax htenc nuiyshiq rueq dawc kuq gay vshix ikhoc

nuiyshiq mvrax muinz dawc kuq koq.

Tvshonx bawx rvyaq baung nuex nuiyshiq kuex nauk tvkaz vkueq,’” ngoz tueq jungx kuq tueq.

5Kvmaq Yesu rueq vpiq sangac hez muex, “Nuimshiq phungc wawc washiz shiz kuex kungjix waz yuimx nuex raungwvrx htungx nuex kaz vtueq, ‘Kungjix waz lex, ngaz muex wanx phux thuimx tvnvmc kuq koq. 6Ngvy yuimx nuex wuinz ghaq khuemc jix kungjix washiz httuiuc kaz ruex, piq muex kuy phuiuz svy juing yvmx muinz vguez!’ ngoz tueq. 7Yuimx jungx jix waz rueq, ‘Ngaz nauk shuik shauk vkueq! Kaluix muinz vshuiuz lot wuez shex, isahez muinz ngaz rulc woalchuing nuex kvtsoalx shex, ngaz kvtenc vtueq mnoz muex lvmc kuy kay tvkoc yoalx muq,’ ngoz tueq ngoz ruiux yuq yvmx khoc lac yaungx tvnx? 8Ngaz rueq nuimshiq muex jungx kuq ix, kungjix waz ngoz ruiux yuq muinz kvtenc vtueq wanx kuex lvmz kuq kaz tuex rvmuq, yuq muinz piq kuex yvlc sac muq maq rvwak shak thoz lvy ningkhvnc nuex kvruex waz kuex kvtenc kaz vtueq, piq muex rax yaq lotlaz kuex lvmz kuq kaz tueq.

9“Kvmaq ngaz rueq nuimshiq muex jungx kuq ix, thoz shuinz, kvkaq nuimshiq rueq lvp shuinx; thuiyx shuinz, kvkaq nuimshiq rueq humc shuinx; wung tvruingx shuinz, kvkaq nuimshiq tvkoc daz kuq kv-phuinx. 10Yvmx khoc lac ngoz ruiux lec vthoz jix waz rueq lvp wvnc shuex, vthuiyc jix waz rueq humc wvnc shuex, wungc tvruingc jix waz muex muinz daz kuq shuex. 11Nuimhez wawc vwaz yaungc jix uwaz rueq muinz vsaz rueq ngaq thoz ruiux yuq puiuc haz kuq shuinx? 12Rvmuq ngoz ruiux wutiz thoz ruiux kelthvp haz kuq yaq nguinx? 13Nuimshiq layx vbac jix rueq doc muinz miqmac saz muex vhvlx phvnx htenc kuq thenc ruiux yuq kuex, raungmungx wawc Vwaz rueq vpiq kox wawc thoz jix htenc muex Vsawc Siyac kuq shuex rvtueq!” ngoz tueq jungx tueq.

Yesu nuiyc Beelzebul

(Mat 12:22-30; Mak 3:20-27)

14Yesu rueq nuix tuingx htaungc kuex yurc gay tueq. Htaungc dung wvnc tueq yix maq nuix tuingx waz kuex vkvjaz dung wvnc tueq; nuk miqsaz htenc muinz vwangc rvwuez tueq, 15yuq muinz tsuinghez wawc miq wvyvmc rueq, “Vruex kuex htaungc walaungx Beelzebul hungc vlaungc maq vpiq rueq htaungc htenc kuex yurc gay yaq,” ngoz tueq.#Mat 9:34; 10:25

16Miq vganc rueq Yesu httoarc helc muex ngoz tueq, Tishox lomx yaq shuex lomx muq lac tvkhic tvkoc raungmungx wawc romzyac phvnx shiz thoz tueq.#Mat 12:38; 16:1; Mak 8:11 17Yuq muinz tsuingshiq rueq yvmx lac tvmaung yaq nguinx lvmx kuex Yesu rueq tuiuz vtueq, vpiq rueq tsuingshiq muex, “Mungtan vshiz wawc miq kuex raz tsaz muq maq vdvmz dvmz rvkhvt ruiux yuq, kvruex mungtan kuex mtanc httax muq nuex bac wvnc tuex; yuimx shiz jix muinz raz tsaz muq ngoz ruiux kuex kvruex yuimx kuex vbac rvwvnc tuex. 18Kvkhoc rvtueq Satan mungtan nuex raz tsaz muq maq vdvmz dvmz rvkhvt ruiux yuq, yvmx khoc lac phaungx ngaungx tvnx? Ngaz rueq Beelzebul hungc vlaungc maq htaungc htenc yurc gay yaq ngoz tueq nuimshiq rueq jungx wuez vshuinx. 19Mkhoc shoc maq ngaz rueq Beelzebul hungc vlaungc maq htaungc htenc yurc gay vshaungx ngoz ruiux yuq, nuimshiq kungjix bix rueq ukhaq hungc vlaungc maq lac htaungc htenc kuex yurc gay yaq nguinx? Tsuingshiq rueq doc muinz nuimshiq yaq vtuinx lvmx hakhix muex yaungx wuez yaq! 20Yuq muinz ngaz rueq Tishox ngauz vngax maq htaungc htenc yurc gay vshaungx ningkhvnc nuex Tishox Mungtan kuex nuimshiq kox nuex vhttuiuc wuez shex hakhix rvtueq.

21“Hungc vlaungc vhttax waz rueq wvyaung wvpaq maq vyuimx kuex bvmc ruiux yuq piq hup vsvmx htenc kuex vhvlx waq tvkhup wungx taq shuex. 22Yuq muinz piq htauk nuex hungc vlaungc httaz hvlc washiz kaz vtueq piq kuex taungx gay lot ruiux jix piq kvmluimx yaq yaung vpaq htenc nyvlc gay wvnc shuex, piq rueq kungkhux nuex vnyvlc lvp wvnc hup vsvmx htenc kuex rv-phvlc wvnc tuex.

23“Ngvy kox nuex httax muq waz kuex ngaz muex ralx yaungc jix waz rvtueq, ngaz rulc roc nuex tvtuimx yuimx naungx muq waz kuex rv-nyanc rvshix rvtueq.#Mak 9:40

Htaungc Yek Waung tueq

(Mat 12:43-45)

24“Htaungc vshiz kuex miq vshiz gvnz wawc dung wvnc vtueq httuiz rawk yaq baung nuex khuemx ruiux nyec tvkuiyq juing baung kuex thuiyx yaq, yuq muinz humc muq ningkhvnc nuex, ‘Ngvy httaz juing yuimx nuex hulawx yek waung yek khaungx,’ ngoz tueq. 25Kvkhoc rvtueq piq kuex kvruex yuq yek waung yek koq tueq, yuimx kuex sawc ruiyruiyc hvlc tvsawc nawc vtueq vtvmarc taq kuex khiz waung vtueq, 26piq htauk nuex muinz bac hvlc htaungc waz mvshix kuex shvlx wvnc ruiux raz tueq kvruex yuq httax waung tueq, kvkhoc rvtueq htaungc kvpumz jix waz kuex kungkhux wawc htauk nuex muinz vtvsuip kox nuex kuex bac hvlc shex bac wvnc tueq,” ngoz tueq jungx tueq.

Tsuingrux Thuinhvlc lvmz

27Yesu rueq kvruex kvjaz htenc kuex jungc lot yix, nuk miqsaz phungc mungx wawc yalxjuik nyuiuz shiz rueq kvjaz tvyungc vtueq, “Mnoz kuex jawx vtueq puix tvnuingc jix nyuiuz kuex mtanc thuinhvlc wuez!” ngoz tueq vpiq muex jungx tueq.

28Yuq muinz Yesu rueq, “Tishox bomjungc tay vtueq phvnc jix kuex mtanc thuinhvlc wuez!” ngoz tueq tvralc tueq.

Romzyac Tvkhic Thoz tueq

(Mat 12:39-42)

29Miq htenc rueq Yesu kuex tvroz tuimx wvnc koq tueq, vpiq rueq jungx tueq kuex, “Vruex pat wawc miq kuex vtanc khvnc layx bac yaq nyix! Tsuingshiq rueq romzyac thoz wuez yaq, yuq muinz Yona vwangc juing maq lvy vtueq vganc yvmx vwangc juing romzyac yvmx muinz tsuingshiq muex tvkhic kuq shuex rvmuq.#Mat 12:38-39; 16:4; Mak 8:12 30Yona kuex Ninewe miqsaz tvkoc romzyac muex yaungx wvnc tueq kvkhoc Miq Saz vruex muinz majuiuc pat wawc miq htenc tvkoc romzyac muex yaungx wvnc tuex.#Jon 1:17; 2:10; 3:4 31Khac phox shuex Raungnuiyq Sheba mungx wawc Hokhvmx nyuiuz kuex jvt vtueq vruex pat wawc miq htenc muex mvrax tvgurc shuex, yvmx khoc lac ngoz ruiux lec Hokhvmx Solomon rueq taksux tharc vhttax maq tvluingc bomc kuex tay kay tvkoc lvmx luz mungx maq httuiuc kaz tueq; kvkhoc rvtueq ngaz rueq nuimshiq muex jungx kuq ix, vruex yuq Solomon htauk nuex muinz vyungx httax yaq.#1Hokh 10:1-10; 2Tvts 9:1-12 32Khac phox shuex Raungnuiyq Ninewe ghaq jix kuex kvtenc jvp vtueq nuimshiq muex mvrax tvgurc shuex, yvmx khoc lac ngoz ruiux lec tsuingshiq kuex Yona rueq jungphvnc tueq kvjaz kuex tay vtueq, tsuingshiq mvrax vhttax wawc thuinz kvlayc wvnc wuez tueq; lawc shuinz, vyuq Yona htauk nuex muinz vyungx httax yaq!#Jon 3:5

Gvnngvmx Raungwuic

(Mat 5:15; 6:22-23)

33“Wvrkok kuex tvluic vtueq vpuingc httuiyq tvy gay, rvmuq ngoz ruiux tvmtuiuc maq puingc tvy jix kuex ukhaq muinz vguez, kvkhoc ruec tvraung yuimx nuex nyuip waungc jix miq rueq vwuic khiz lvp laz juing wvrkok tochuing nuex tux taq yaq.#Mat 5:15; Mak 4:21; Luk 8:16 34Muik kuex gvnngvmx tvkoc wvrkok ikhoc rvtueq, muik hvlx ruiux jix gvnpumz wuix wvnc tuex, muik vbac ngoz ruiux kuex gvnpumz raungnyauk muex yaungx wvnc tuex. 35Kvkhoc rvtueq nuimshiq nuex httax yaq vwuic kuex vnyauk yaungx kaz muq tvkoc honc lvmx shuinz. 36Mkhoc shoc maq m-gvnz wvpumz tuimx nuex vnyauk raungluingx muinz vguez wuix ruiux yuq, wvrkok luic rueq mhtauk nuex tvwuic kuq yaq ikhoc m-gvnpumz muinz wuix wvnc tuex,” ngoz tueq jungx tueq.

Pharise nuiyc Tvrac Tvluingc waz Hez muex Mvrax tvgurc

(Mat 23:1-36; Mak 12:8-40)

37Yesu rueq bomjungc lot yix, Pharise washiz rueq raungyac phuiuz svy tvkoc vpiq kuex gvl tueq; kvkaq vpiq kaz vtueq phuiuz svy muex ngaungc tueq.

38Phuiuz vsvy max phauk saq nuex Yesu kuex kvhoalc vhtungx httax yaq rulc rv-ngvlc kvhoalc muq kuex Pharise rueq khiz vtueq vwangc rvtueq. 39Kvkhoc rvtueq Taungjix rueq tsuingshiq muex, “Nuimshiq Pharise nuk rueq panx nuiyc kok htenc kuex vtsec kox dvyx tvsawc vshuinx, yuq muinz nuimshiq vmungx kox nuex kuex yauk laungc yalawx, kvkax kvwax vnyvlc thuinz, honc vbac thuinz dvyx mvrc vtuinx. 40Miqyaq hez lex! Vtsec kox tvdungc sungc jix waz rueq vmungx kox muinz tvdung sung tueq rvmuq haz? 41Yuq muinz nuimshiq panx nuiyc kok nuex httax yaq kuex htemc saz jix muex kuq shuinz, kvkhoc ngoz ruiux yuq jix httax yaq lotlaz kuex nuimshiq tvkoc vsawc rvtuex.

42“Pharise nuk lex, nuimshiq kuex kvhiz juing lvp tuit! Yvmx khoc lac ngoz ruiux lec nuimshiq rueq suiuzsaz tsothuingx yauk, shvkauc nvyshuinx yauk nuiyc vbez phvnx ruip saz wawc mvnrok shiz wawc mvnshiz kuex Tishox muex htawc vshuinx, yuq muinz nuimshiq rueq tvrac vlvmz nuiyc Tishox muex lungwawc lvmx kuex tvlvlc gay vshuinx. Nuimshiq rueq mvnrok shiz wawc mvnshiz kuq vshuinx kvdvyx rvmuq tvrac vlvmz nuiyc Tishox muex lungwawc lvmx kuex phvnc aungx yaq.#Lew 27:30; Mat 23:23

43“Pharise nuk lex, nuimshiq kuex kvhiz juing lvp tuit! Vjux thoz yuimx htenc wawc raungc hvlc ngaungc chuing nuiyc boyat htenc maq miq rueq tvtsanc nganc kuy kvruex raungc raq vshuinx.

44Nuimshiq kuex kvhiz juing lvp tuit! Nuimshiq kuex vtvtsuingc juing vguez, miq rueq tuiuz muq rvtueq vkhuemc juing lvmx muex tvyaungc gay yaq luip ruiuz khux rulc rv-ngvlc rvtuinx.”

45Tvrac tvluingc waz washiz rueq, “Tvluingc waz lex, kvkhoc ngoz vshuiux kuex nuiyshiq muinz yomnamc naungx vphux!” ngoz tueq vpiq muex ngoz tueq.

46Yesu rueq, “Nuimshiq Tvrac tvluingc waz hez rueq muinz kvhiz juing lvp tuit! Nuimshiq rueq miq htenc muex vgurc juing gvrc hvlc htenc kuex tvgurc ruiux nuimshiq rueq yaukshix thawx maq doc muinz htuinc kaz muit. 47Nuimshiq rueq kvhiz juing lvp tuit! Nuimshiq jix vwaz tamx rueq vthvt gay shvmmax bix tvkoc luip ruiux khux kuex nuimshiq rueq tvsvp rvp tvhungx vshuinx. 48Nuimshiq jix vwaz tamx yaq wvnc tueq khuec vkhac nuex nuimshiq muinz thuinz raz tsaz lomx wuez vtuinx, yvmx khoc lac ngoz ruiux lec tsuingshiq rueq shvmmax bix thvt gay ruiux, nuimshiq rueq kvruex hez luip ruiuz khux kuex tvhungx vshuinx. 49Kvkhoc rvtueq Tishox Taksux Tharc jungx tueq kuex, ‘Shvmmax bix nuiyc kamx waz hez kuex ngaz rueq tsuingshiq kox nuex nvr tvkaz shaungx, wvyvmc kuex vguirc vguenc rvshuex.’ 50Kvkhoc ghaq phaungc tueq maq phuex thvy gay rvhumc tueq shvmmax bix lotlaz thvt gay tueq khac laung nuex, majuiuc pat wawc hez rueq murx gurc rvhumc tuex. 51Abel thvt gay tueq maq shomrawx nuiyc Vsawc Baung hvlwvl nuex thvy gay rvhumc tueq Zecharia nuex httuiuc laz, rvtueq lvmz ngaz rueq nuimshiq muex jungx kuq ix, kvruex hez lotlaz khac nuex majuiuc pat wawc miq muex murx tvgurc shuex rvtueq!#V.V 4:8; 2Tvts 24:20-21

52“Tvrac tvluingc waz hez nuimshiq rueq kvhiz juing lvp tuit! Phaqjic yuimx daz juing saqpix kuex nuimshiq rueq taq gay ruiux, nuimshiq muinz nyuip muit, vnyuip roc jix htenc muinz tuingshaung gay vshuinx!” ngoz tueq.

53Kvruex wawc Yesu kvtenc waung wvnc koq tueq Tvrac tvluingc waz bix nuiyc Pharise nuk rueq vpiq muex daungdaungx vkhuip vkhaq ngoz ngax wvnc tueq. 54Vnuix maq vdung kvjaz kvmaq mvrax tvgurc lvp laz juing ngoz tueq phvnx ruip saz wisoz wvnc tueq.

Currently Selected:

LUKA 11: HNOT01

Highlight

Copy