လံာ်စီၤမိၤရှ့အခီၣ်ထံးတဘ့ၣ်. ၄၂
၄၂
1ဒီးစီၤယၤကိာ်ထံၣ်ဘၣ်ဝဲလၢ ဘုဧိၤဟုဧိၤအိၣ်လၢအဲၤ ကူပတူးအပူၤ, ဒီးစီၤယၤကိာ်စံးဘၣ်အဖိခွါတဖၣ်, သု ကွၢ်လိာ်သုသးမ့ၢ်အဘၣ်မနုၤလဲၣ်. 2ကွၢ်ကွၢ်, ယနၢ် ဟူလၢဘုဧိၤဟုဧိၤအိၣ်လၢအဲၤကူပတူးအပူၤလီၤ. လဲၤ လီၤဖဲန့ၣ်, ဒီးပှ့ၤတၢ်လၢပဂီၢ်ဖဲန့ၣ်, ဒ်သိးပကမူဒံး,ဒီး ပသုတသံတဂ့ၤန့ၣ်တက့ၢ်.
3ဒီးစီၤယိၤသးအဒီပုၢ်ဝဲၢ်ဆံဆဲၣ်ဂၤ လဲၤလီၤဝဲဒ်သိးအ ကပှ့ၤဘုဧိၤဟုဧိၤလၢအဲၤကူပတူးအပူၤလီၤ. 4မ့မ့ၢ်စီၤ ယိၤသးအပုၢ်စီၤဘံၣ်ယၤမံၣ်တဂၤ, စီၤယၤကိာ်တမၢ ဘၣ်အလဲၤတၢ်ဒီးအဒီပုၢ်ဝဲၢ်ဘၣ်. အဂ့ၢ်ဒ်အံၤ, စံးဝဲဒၣ်, ကဘၣ်တၢ်အၢတၢ်နးဘၣ်ဖုးလီၤ.
5ဒီးစီၤအံၣ်စရ့လးအဖိခွါတဖၣ် ဟဲပှ့ၤတၢ်လၢပှၤလၢ အဟဲတဖၣ်အကျါလီၤ. အဂ့ၢ်ဒ်အံၤ, တၢ်သၣ်ဝံၤလီၤဒိ န့ၣ်အိၣ်လၢကီၢ်ကနၤဧၣ်အပူၤလီၤ.
6ဒီးစီၤယိၤသးမ့ၢ်တၢ်အခိၣ်လၢကီၢ်အဖီခိၣ်လီၤ. အ ဝဲဒၣ်ဆါတၢ်ဒီးပှၤကီၢ်ဖိခဲလၢာ်, ဒီးစီၤယိၤသးအဒီပုၢ် ဝဲၢ်ဟဲဝဲ, ဒီးတီၤလီၤကျးလီၤအမဲာ်ဆူအအိၣ်လၢ ဟီၣ် ခိၣ်လီၤ.
7ဒီးစီၤယိၤသးထံၣ်ဘၣ်အဒီပုၢ်ဝဲၢ်, ဒီးသ့ၣ်ညါနီၣ်အီၤ လီၤ. ဘၣ်ဆၣ်ဒီးပာ်အသးလၢ ပှၤတခီဘီမုၢ်ဖိလၢအ မဲာ်ညါ, ဒီးကတိၤတၢ်ဆူၣ်ဆူၣ်ဒီးအီၤ, ဒီးစံးဘၣ်အီၤ, သုဟဲလၢလဲၣ်. ဒီးစံးဝဲဒၣ်, လၢကီၢ်ကနၤဧၣ်ဒ်သိးပ ကပှ့ၤတၢ်အီၣ်တၢ်အီလီၤ.
8ဒီးစီၤယိၤသးသ့ၣ်ညါနီၣ်အဒီပုၢ်ဝဲၢ်လီၤ. မ့မ့ၢ်အဝဲ သ့ၣ်တဖၣ်န့ၣ်တသ့ၣ်ညါနီၣ်ဘၣ်အီၤဘၣ်. 9ဒီးစီၤယိၤ သးသ့ၣ်နီၣ်ထီၣ်က့ၤ တၢ်မံမီၢ်တဖၣ်လၢအမံမီၢ်လၢအ ဂ့ၢ်အကျိၤ, ဒီးစံးဘၣ်အီၤ, သုမ့ၢ်ပှၤဟးကွၢ်ဟုၣ်တၢ် လီၤ. ဒ်သိးသုကထံၣ်ဘၣ်ကီၢ်အအိၣ်ဘ့ၣ်ဆ့ဒီး, သု ဟဲလီၤ.
10ဒီးအဝဲသ့ၣ်စံးဘၣ်အီၤ, တမ့ၢ်ဘၣ်ကစၢ်ဧၢ, မ့ၢ်ဒ် သိးပကပှ့ၤတၢ်အီၣ်တၢ်အီဒီး, နကုၢ်နပှၤဟဲလီၤ. 11ပဝဲ ဒၣ်ခဲလၢာ်အံၤပမ့ၢ်ပှၤတဂၤဃီအဖိခွါလီၤ. ပမ့ၢ်ပှၤအ တီလီၤ. နကုၢ်နပှၤတမ့ၢ်ဘၣ်ပှၤဟးကွၢ်ဟုၣ်တၢ်ဘၣ်.
12ဒီးစံးဘၣ်အီၤ, တမ့ၢ်ဘၣ်, မ့ၢ်ဒ်သိးသုကထံၣ်ဘၣ် ကီၢ်အအိၣ်ဘ့ၣ်ဆ့ဒီး, သုဟဲလီၤ.
13ဒီးစံးဝဲဒၣ်, နကုၢ်နပှၤမ့ၢ်ဒီပုၢ်ဝဲၢ်တဆံခံဂၤ, ပှၤတဂၤ ဃီအိၣ်လၢကီၢ်ကနၤဧၣ်တဂၤအဖိခွါတဖၣ်လီၤ. ဒီးကွၢ် ကွၢ်,အဆံးတဂၤအိၣ်ဒီးပပၢ်လၢမုၢ်မဆါတနံၤအံၤလီၤ. ဒီးအဝဲတဂၤတအိၣ်လၢၤဘၣ်.
14ဒီးစီၤယိၤသး စံးဘၣ်အီၤ, တၢ်န့ၣ်မ့ၢ်တၢ်လၢယစံး ဘၣ်သုလီၤ. ယစံး, သုမ့ၢ်ပှၤဟးကွၢ်ဟုၣ်တၢ်လီၤ. 15တၢ် ကမၤကွၢ်သုလၢတၢ်အံၤ, လၢဖၤရိၤအသးသမူအမဲာ်ညါ န့ၣ် သုပုၢ်သဒါမ့ၢ်တဟဲဘၣ်ဖဲအံၤဘၣ်ဒီး, သုတဟး ထီၣ်ဘၣ်ဖဲအံၤဘၣ်. 16မၢပှၤလၢသုကျါတဂၤလဲၤဒီးဟဲ က့ၤစိာ်သုပုၢ်တဂၤန့ၣ်တက့ၢ်. ဒီးသုကအိၣ်စၢဃာ်သု သး, ဒ်သိးတၢ်တီအိၣ်လၢသုပူၤဧါန့ၣ်, သုတၢ်ကတိၤက ဘၣ်တၢ်မၤကွၢ်အီၤလီၤ. မ့တမ့ၢ်ဘၣ်ဒ်န့ၣ်ဒီးလၢဖၤရိၤ အသးသမူအမဲာ်ညါန့ၣ်သုမ့ၢ်ပှၤဟးကွၢ်ဟုၣ်တၢ်လီၤ.
17ဒီးစီၤယိၤသးပာ်ဃုာ်အီၤခဲလၢာ် လၢပၢၤတၢ်အလီၢ် သၢနံၤလီၤ. 18ဒီးသၢနံၤတနံၤန့ၣ်စီၤယိၤသးစံးဘၣ်အီၤ, မၤတၢ်အံၤ, ဒီးမူတက့ၢ်. ယပျံၤယွၤလီၤ. 19သုမ့ၢ်တီဒီး, မ်ပှၤလၢသုဒီပုၢ်ဝဲၢ်အကျါတဂၤဘၣ်တၢ်စၢဃာ်အီၤလၢ တၢ်ပၢၤသုအဟံၣ်ပူၤ, ဒီးလဲၤစိာ်သုဘုဧိၤဟုဧိၤလၢတၢ် သၣ်ဝံၤလီၤဒိအိၣ်လၢသုဟံၣ်တဖၣ်အဂီၢ်န့ၣ်, 20ဒီးဟဲ က့ၤစိာ်သုပုၢ်သဒါဆူယအိၣ်တက့ၢ်. ဒီးသုကမၤတီသု ကလုၢ်,ဒီးသုတသံဘၣ်လီၤ.ဒီးအဝဲသ့ၣ်မၤဝဲဒ်န့ၣ်လီၤ.
21ဒီးကတိၤလိာ်အသးသကိးသကိးဒီးစံးဝဲဒၣ်, ပတၢ် ဒဲးဘးအိၣ်မးလၢပဒီပုၢ်ဝဲၢ်တဂၤအဃိ, လၢပထံၣ်ဘၣ် အသူၣ်ကိၢ်အသးဂီၤ, လၢအဃ့ကညးပှၤ, ဒီးပတက နၣ်ဘၣ်.မၤသးဒ်န့ၣ်ဒီးတၢ်ကိၢ်တၢ်ဂီၤအံၤဘၣ်ပှၤလီၤ.
22ဒီးစီၤရူၤဘ့ၣ်စံးဆၢအီၤဒီးစံးဝဲဒၣ်, ယစံးဘၣ်သု,မၤ ကမၣ်ဘၣ်ဖိသၣ်တဂ့ၤ, ဒီးသုတကနၣ်ဘၣ်တမ့ၢ်ဘၣ် ဧါ. မၤသးဒ်န့ၣ်ဒီး, ကွၢ်ကွၢ်, တၢ်ဃုန့ၢ်အသွံၣ်စ့ၢ် ကီးလီၤ.
23ဒီးစီၤယိၤသးနၢ်ပၢၢ်တၢ်န့ၣ်, အဝဲသ့ၣ် တသ့ၣ်ညါ ဘၣ်. အဂ့ၢ်ဒ်အံၤ, ပှၤကတိၤကျိးတၢ်တဂၤအိၣ်ဝဲလၢ အဘၢၣ်စၢၤလီၤ. 24ဒီးဃၣ်ကဒါကွံာ်အသးလၢအီၤဒီး အမဲာ်ထံလီၤ, ဒီးဟဲက့ၤကဒီးဆူအအိၣ်, ဒီးကတိၤတၢ် ဒီးအီၤ, ဒီးဟံးန့ၢ်ကွံာ်စီၤစူၤမ့းအိၣ်လၢအကျါ, ဒီးစၢ ဃာ်အီၤလၢအမဲာ်ညါလီၤ.
25ဒီးစီၤယိၤသးမၤလိာ်ဝဲလၢ ပှၤကမၤပှဲၤအထၢၣ်တဖၣ် ဒီးဘု, ဒီးဒၢနုာ်က့ၤအစ့လၢအထၢၣ်ပူၤ, တဂၤလၢအ ထၢၣ်ဒၣ်ဝဲ, တဂၤလၢအထၢၣ်ဒၣ်ဝဲ, ဒီးဟ့ၣ်အီၤလၢ တၢ်အီၣ်တၢ်အီလၢကျဲဧိၤကပူၤဧိၤအဂီၢ်လီၤ. ဒီးမၤအီၤ ဒ်န့ၣ်လီၤ.
26ဒီးပဒၢးထီၣ်ဘုဧိၤဟုဧိၤလၢကသ့ၣ်ယီၤ, ဒီးဟးထီၣ် ဖဲန့ၣ်လီၤ. 27ဒီးဖဲအမံဝဲအလီၢ်န့ၣ်, ပှၤတဂၤအိးထီၣ်အ ထၢၣ် ဒ်သိးအကဟ့ၣ်အကသ့ၣ်ယီၤအဆၣ်, ဒီးထံၣ် ဘၣ်ဝဲအစ့လီၤ.ဒီးကွၢ်ကွၢ်,အိၣ်ဝဲလၢထၢၣ်အခိၣ်လီၤ.-
28ဒီးစံးဘၣ်အဒီပုၢ်ဝဲၢ်, တၢ်ဟ့ၣ်က့ၤလံယစ့လံ. ဒီးကွၢ် ကွၢ်, အိၣ်လၢယထၢၣ်ပူၤမးလဲၣ်. ဒီးအသးလီၤဘှါဝဲ, ဒီးပျံၤတၢ်, ဒီးစံးလိာ်အသးသကိးသကိး, တၢ်အံၤလၢ ယွၤမၤပှၤန့ၣ်, မ့ၢ်မနုၤတမံၤလဲၣ်.
29ဒီးဟဲဝဲဆူအပၢ်စီၤယၤကိာ်အအိၣ်လၢ ကီၢ်ကနၤဧၣ် အပူၤ, ဒီးစံးဘၣ်တဲဘၣ်အီၤလၢကယဲၢ်တၢ်လၢအဘၣ် အီၤ, ဒီးစံးဝဲဒၣ်, 30ကီၢ်အကစၢ်တဂၤကတိၤတၢ်ဒီးပှၤ ဆူၣ်ဆူၣ်, ဒီးပာ်ပှၤလၢပှၤဟးကွၢ်ဟုၣ်တၢ်လၢကီၢ်ပူၤ လီၤ. 31ဒီးပစံးဘၣ်အီၤ, ပမ့ၢ်ပှၤအတီလီၤ. ပတမ့ၢ်ဘၣ် ပှၤကွၢ်ဟုၣ်ကွၢ်စုာ်ဘၣ်. 32ပမ့ၢ်ဒီပုၢ်ဝဲၢ်တဆံခံဂၤ, ပပၢ် အဖိခွါတဖၣ်လီၤ. တဂၤတအိၣ်လၢၤဘၣ်, ဒီးအဆံး တဂၤအိၣ်ဒီး ပပၢ်လၢကီၢ်ကနၤဧၣ်အပူၤလၢ မုၢ်မဆါ တနံၤအံၤလီၤ.
33ဒီးပှၤတဂၤန့ၣ်, ကီၢ်အကစၢ်တဂၤစံးဘၣ်ပှၤ, ယက သ့ၣ်ညါလၢသုမ့ၢ်ပှၤတီလၢတၢ်အံၤ, ပာ်လီၤတဲာ်သုဒီ ပုၢ်ဝဲၢ်တဂၤဒီးယၤ, ဒီးဟံးန့ၢ်တၢ်လၢသုဟံၣ်တဖၣ်အ တၢ်သၣ်ဝံၤလီၤဒိအဂီၢ်, ဒီးဟးထီၣ်တက့ၢ်. 34ဒီးသုပုၢ် သဒါန့ၣ်ဟဲစိာ်ဆူယအိၣ်တက့ၢ်. ဒီးယကသ့ၣ်ညါလၢ သုတမ့ၢ်ဘၣ်ပှၤကွၢ်ဟုၣ်ကွၢ်စုာ်ဘၣ်, လၢသုမ့ၢ်ပှၤအ တီလီၤ. ယကဟ့ၣ်က့ၤသုဒီပုၢ်ဝဲၢ်, ဒီးသုကကၤတၢ် လၢကီၢ်ပူၤလီၤ.
35ဒီးတုၤအမၤခီအထၢၣ်တဖၣ်ဒီး, ကွၢ်ကွၢ်, တၢ်မၤအ သးလၢပှၤအစ့ဘိၣ်န့ၣ်အိၣ်ဝဲလၢ အထၢၣ်ပူၤကိးဘိၣ်ဒဲး လီၤ. ဒီးတုၤအဝဲသ့ၣ်ဒီးအပၢ်ထံၣ်ဘၣ်အစ့ဘိၣ်တဖၣ် ဒီးဘၣ်ယိၣ်ဘၣ်ဘီတၢ်လီၤ. 36ဒီးအပၢ်စီၤယၤကိာ်စံး ဘၣ်အီၤ, သုဒုးဟါမၢ်သဒၣ်ကွံာ်ယဖိဒီးယၤလီၤ. စီၤ ယိၤသးတအိၣ်ဘၣ်, စီၤစူၤမ့းအိၣ်တအိၣ်ဘၣ်, ဒီးသု သါကဟံးန့ၢ်ကွံာ်စီၤဘံၣ်ယၤမံၣ်လီၤ. တၢ်တဖၣ်န့ၣ် ထီဒုၣ်ထီဒါယၤခဲလၢာ်လီၤ.
37ဒီးစီၤရူၤဘ့ၣ်ကတိၤတၢ်ဒီးအပၢ်, ဒီးစံးဘၣ်အီၤ, ယ မ့ၢ်တဟဲက့ၤစိာ်ဘၣ်အီၤဆူနအိၣ်ဘၣ်ဒီး, မၤသံကွံာ်ယ ဖိခွါခံဂၤတက့ၢ်. ပာ်အီၤလၢယစုပူၤတက့ၢ်, ဒီးယက ဟဲက့ၤစိာ်အီၤဆူနအိၣ်လီၤ.
38ဒီးစံးဝဲဒၣ်, ယဖိခွါတလဲၤလီၤဘၣ်ဒီးသုဘၣ်. အဂ့ၢ် ဒ်အံၤ, အဝဲၢ်တဂၤသံလံ, ဒီးအဝဲဒၣ်န့ၣ်အိၣ်ဝဲတဂၤဃီ လီၤ. မ့ၢ်ဘၣ်တၢ်အၢတၢ်နးလၢ ကျဲလၢသုလဲၤန့ၣ်ဒီး, သုကဒုးလဲၤလီၤယခိၣ်ဝါဆူပျုၤပူၤအိၣ်ဒီး ယသူၣ်အုး သးအုးလီၤ.
Currently Selected:
လံာ်စီၤမိၤရှ့အခီၣ်ထံးတဘ့ၣ်. ၄၂: KSWM
Highlight
Share
Copy
Want to have your highlights saved across all your devices? Sign up or sign in
Sgaw Mason Bible © Bible Society of Myanmar, 1853.