လံာ်စီၤမိၤရှ့ခံဘ့ၣ်တဘ့ၣ်. ၅
၅
1လၢခံက့ၤဒီး, စီၤမိၤရှ့ဒီးစီၤအၤဟရိၣ် လဲၤနုာ်ဒီးစံး ဘၣ်ဖၤရိၤ, ယွၤပှၤအံၣ်စရ့လးဖိအကစၢ်စံးဒ်အံၤ, ပျၢ် ယပှၤဂီၢ်မုၢ် ဒ်သိးအကလဲၤမၤဘူၣ်တၢ်လၢယၤလၢပှၢ် လၢ်ကျါန့ၣ်တက့ၢ်.
2ဒီးဖၤရိၤစံးဝဲဒၣ်, ဒ်သိးယကကနၣ်အကလုၢ်, ဒီးပျၢ် ပှၤအံၣ်စရ့လးဖိန့ၣ်, ယွၤမ့ၢ်မတၤတဂၤလဲၣ်. ယတ သ့ၣ်ညါဘၣ်ယွၤဘၣ်, ဒီးယတပျၢ်စ့ၢ်ကီး ပှၤအံၣ်စရ့ လးဖိဘၣ်.
3ဒီးစံးဝဲဒၣ်, ပှၤဧ့ၤဘြံၤဖိအကစၢ်ဘၣ်သဃိာ်လံဒီးပှၤ လံ, ဒုးလဲၤလၢ်ပှၤသၢနံၤကျဲဆူပှၢ်လၢ်ကျါ, ဒီးဒုးလုၢ် ပှၤလၢယွၤပကစၢ်အတၢ်န့ၣ်တက့ၢ်. မ့တမ့ၢ်ဘၣ်ဒီး, ကဒုးဘၣ်ဘၣ်ဖုးပှၤလၢတၢ်ဆါသံသတြိာ်မ့ၢ်ဂ့ၤ, ဘီဧိၤ နးဧိၤမ့ၢ်ဂ့ၤန့ၣ်လီၤ.
4ဒီးအဲၤကူပတူးအစီၤပၤစံးဘၣ်အီၤ, ဘၣ်မနုၤလၢသု, စီၤမိၤရှ့ဒီးစီၤအၤဟရိၣ်, တြီပှၤဂီၢ်မုၢ်လၢအမၤတၢ်လဲၣ်. လဲၤတ့ၢ်ဆူသုဝံတၢ်ယိးတၢ်တက့ၢ်. 5ဒီးဖၤရိၤစံးဝဲဒၣ်, ကွၢ်ကွၢ်, ခဲကနံၣ်အံၤထံဧိၤကီၢ်ဧိၤ အပှၤဂီၢ်မုၢ်အိၣ်အါ အါကလဲာ်လီၤ. ဒီးသုဒုးအိၣ်ဘှံးအီၤလၢအဝံတၢ်ယိး တၢ်မးလဲၣ်.
6ဒီးတၢ်လၢမုၢ်နံၤတနံၤန့ၣ် ဖၤရိၤမၤလိာ် ပှၤဂီၢ်မုၢ်အ တၢ်ဝံတၢ်ယိးအကစၢ်တဖၣ်, ဒီးအပှၤကွဲးလံာ်တဖၣ်, ဒီးစံးဝဲဒၣ်, 7ဟ့ၣ်ဒံးလီၢ်ဧိၤဒံးဧိၤလၢပှၤဂီၢ်မုၢ်ဒ်သိးအ ကမၤအူးခဲတဖၣ်, ဒ်လၢမဟါမဟိအသိးန့ၣ် တဂ့ၤ. ကလဲၤထၢဖှိၣ်ဒၣ်ဝဲလီၢ်လၢအဂီၢ်တက့ၢ်. 8ဒီးအူးခဲတ ဖၣ်ပှဲၤသိးဒီး တၢ်စံၣ်ညီၣ်လၢအတ့ဝဲလၢမဟါမဟိန့ၣ်, မၢအတ့တက့ၢ်. မၤစှၤလီၤအီၤတဂ့ၤ. အဂ့ၢ်ဒ်အံၤ, အဝဲ သ့ၣ်တဖၣ်န့ၣ်ပာ်ကၢၣ်အသးလီၤ. မၤသးဒ်န့ၣ်ဒီးကိး ပသူထီၣ်ဝဲ, ဒီးစံးဝဲဒၣ်, ဒုးလဲၤပှၤ, ဒီးဒုးလုၢ်ပှၤလၢ ပကစၢ်အတၢ်န့ၣ်တက့ၢ်. 9မၤဃၢထီၣ်ပှၤတဖၣ်အတၢ် မၤ, ဒီးဒုးမၤအဝဲသ့ၣ်လၢအီၤတက့ၢ်. မ်အသုတပးကဲ တၢ်ကတိၤကလီကလီတဂ့ၤ.
10ဒီးပှၤဂီၢ်မုၢ်အတၢ်ဝံတၢ်ယိးအကစၢ်တဖၣ်, ဒီးအပှၤ ကွဲးလံာ်တဖၣ်ဟးထီၣ်ဝဲ, ဒီးကတိၤတၢ်ဒီးပှၤဂီၢ်မုၢ်, ဒီး စံးဝဲဒၣ်, ဖၤရိၤစံးဒ်အံၤ, ယတဟ့ၣ်လီၢ်ဧိၤဒံးဧိၤလၢသု ဘၣ်. 11လဲၤဟံးန့ၢ်လီၢ်ဖဲသုကထံၣ်န့ၢ်အီၤ တပူၤပူၤတ က့ၢ်. ဘၣ်ဆၣ်ဒီးတၢ်တမၤစှၤလီၤဘၣ်သုတၢ်မၤနီတစဲး ဘၣ်.
12ဒီးပှၤဂီၢ်မုၢ်လီၤပြံလီၤပြါလၢ ကီၢ်အဲၤကူပတူးဒီဘ့ၣ် ညါဒ်သိးအကထၢဖှိၣ်လီၢ်ခိၣ်ဆၢၣ်လၢ လီၢ်ဧိၤဒံးဧိၤ အလီၢ်လီၤ.
13ဒီးတၢ်ဝံတၢ်ယိးအကစၢ်တဖၣ်န့ၣ်မၢဆူၣ်အီၤ, ဒီးစံး ဝဲဒၣ်, မၤသုတၢ်မၤတုၤအဝံၤ, သုတၢ်မၤလၢတနံၤအ ဂီၢ်, ဒ်လၢလီၢ်ဧိၤဒံးဧိၤအိၣ်တ့ၢ်ဝဲအသိးန့ၣ်တက့ၢ်.
14ဒီးပှၤအံၣ်စရ့လးဖိအပှၤကွဲးလံာ်လၢ ဖၤရိၤအတၢ်ဝံ တၢ်ယိးအကစၢ်တဖၣ်ပာ်လၢအဖီခိၣ်တဖၣ်န့ၣ်, ဘၣ် တၢ်တီၢ်အီၤ, ဒီးတၢ်စံးဘၣ်အီၤ, လၢမုၢ်ဟါတနံၤဒီးလၢ မုၢ်ဆါတနံၤအံၤ, သုမၤအူးခဲတပှဲၤသိးသိးဒီးတၢ်မၤလိာ် သုဒ်မဟါမဟိအသိးန့ၣ်, မ့ၢ်အဘၣ်မနုၤလဲၣ်.
15ဒီးပှၤအံၣ်စရ့လးဖိအပှၤကွဲးလံာ် ဟဲဆူဖၤရိၤအအိၣ်, ဒီးကိးထီၣ်, ဒီးစံးဝဲဒၣ်, နမၤနကုၢ်နပှၤတဖၣ်ဒ်အံၤ, ဘၣ်မနုၤလဲၣ်. 16တဟ့ၣ်ဘၣ်လီၢ်လၢနကုၢ်နပှၤ, ဒီးစံး ဘၣ်ပှၤ, တ့အူးခဲတက့ၢ်. ဒီးကွၢ်ကွၢ်, နကုၢ်နပှၤဘၣ် တၢ်တီၢ်အီၤ, ဒီးတၢ်ဒဲးဘးအိၣ်ဒီးနပှၤဂီၢ်မုၢ်ဒၣ်နဲလီၤ.
17ဒီးစံးဝဲဒၣ်, တၢ်ကၢၣ်သုသးသုဝဲ, တၢ်ကၢၣ်သုသး လီၤ. မ့ၢ်အဂ့ၢ်ဒ်န့ၣ်ဒီးသုစံး, ဒုးလဲၤလုၢ်ပှၤလၢယွၤအ တၢ်တက့ၢ်. 18ဒီးခဲကနံၣ်အံၤလဲၤမၤတၢ်တက့ၢ်. ဒီးပှၤ တဘၣ်ဟ့ၣ်ဘၣ်လီၢ်ဧိၤဒံးဧိၤလၢသုဘၣ်, ဘၣ်ဆၣ်ဒီး သုဘၣ်ဟ့ၣ်အူးခဲပှဲၤသိးဒီးအတၢ်စံၣ်ညီၣ်လီၤ.
19ဒီးပှၤစံးဝဲ, သုအူးခဲတဖၣ်ဘၣ်ဃးဒီးသုမၤတၢ်တနံၤ အဂီၢ်တနံၤအဂီၢ်တစှၤလီၤဘၣ်န့ၣ်သတးဒီး, ပှၤအံၣ်စ ရ့လးဖိအပှၤကွဲးလံာ်တဖၣ် ထံၣ်ဘၣ်ဝဲလၢအအိၣ်လၢ တၢ်နးတၢ်ဖှီၣ်အပူၤလီၤ.
20ဒီးလၢအဟးထီၣ်လၢဖၤရိၤအအိၣ်န့ၣ် ဘၣ်သဃိာ် ဒီးစီၤမိၤရှ့ဒီးစီၤအၤဟရိၣ်အိၣ်ခိးအကျဲ, 21ဒီးစံးဘၣ်အီၤ, မ်ယွၤကွၢ်သု, ဒီးစံၣ်ညီၣ်တၢ်တက့ၢ်. အဂ့ၢ်ဒ်အံၤ, သု ဒုးသးဘၣ်အၢပနၢပဆှီလၢဖၤရိၤအမဲာ်ညါ, ဒီးအခ့အ ပှၤအမဲာ်ညါ, ဒီးဟ့ၣ်နးတဘ့ၣ်လၢအစုပူၤဒ်သိးအက မၤသံပှၤလီၤ.
22ဒီးစီၤမိၤရှ့က့ၤက့ၤဆူယွၤအအိၣ်, ဒီးစံးဝဲဒၣ်, ကစၢ် ဧၢ, နမၤအၢပှၤဂီၢ်မုၢ်အံၤမ့ၢ်အဘၣ်မနုၤလဲၣ်. တၢ်အံၤ နမၢလီၤယခံမ့ၢ်အဘၣ်မနုၤလဲၣ်. 23လၢယဟဲကတိၤတၢ် လၢနမံၤဆူဖၤရိၤအအိၣ်လံၤလံၤန့ၣ်, အဝဲဒၣ်မၤအၢပှၤ ဂီၢ်မုၢ်န့ၣ်ဒီးနတမၤပူၤမၤဖျဲးဘၣ်အီၤလ့ၤတက့ၤဘၣ်လီၤ.
Currently Selected:
လံာ်စီၤမိၤရှ့ခံဘ့ၣ်တဘ့ၣ်. ၅: KSWM
Highlight
Share
Copy
Want to have your highlights saved across all your devices? Sign up or sign in
Sgaw Mason Bible © Bible Society of Myanmar, 1853.