मर्कूस 8
8
येशूजी हजार प्लि म्हिमैं चल् पिंब
(मत्ती १५:३२-३९)
1च त्हे लिउँइँ धबै म्हिए हुल येशू ङाँर खागु तखइ। दिलेया चमैंने चबै सै तोइ आरेमा येशूजी चेलामैं खी ङाँर हुइसि बिइ, 2“चु म्हिए हुल म्रोंसि ङ ल्हयो खम्, तलेबिस्याँ चुमैं ङने बालु मुँब तिंयाँ सोंरो तइ। चुमैंने चबै सै तोइ आरे। 3चुमैं छलेन् तोइ आचल्ले धिंर कुलइ बिस्याँ घ्याँर्न फो ख्रेंसि मुर्छा तब्मुँ। तलेबिस्याँ को-कोइम् ह्रेंगोउँइँले खबै म्हिमैं मुँ।”
4चेलामैंइ खीने बिइ, “चु म्हि आटिबै क्ल्ह्योर चुमैंलाइ खैले चल् पिंल् खाँमुँ?”
5येशूजी चमैंने “क्हेमैंने क्हें कति पो मुँ?” बिसि ङ्योएमा चमैंइ “क्हें ङिपो मुँ,” बिइ।
6येशूजी म्हिए हुल सर क्हुँबर ल्हैदिइ। धै क्हें ङिपो किंसि परमेश्वरलाइ धन्यबाद पिंसि क्हें लुँइ। धै “म्हिमैं चुमिंन्” बिसि चेलामैंने पिंइ। येशूजी बिब् धोंले चमैंइ म्हिमैंलाइ चुमिंइ। 7चमैंने च्युगुदे ताँग या मुँल। छतसि परमेश्वरलाइ धन्यबाद पिंसि येशूजी चेलामैंने चुमिंबर ल्हैदिइ। 8झाइले म्हिमैंइ म्रेंन्ले चइ। चमैंइ चल् खाँबै लिउँइँ चेलामैंइ क्हें लुँठेमैं खागु लमा ड्हलो ङि प्लिंइ। 9चर हजार प्लिदे म्हिमैं मुँल। झाइले येशूजी चमैं खेंमैंए धिंर कुलइ। 10च तोदोंन् येशू खीए चेलामैंने डुँङ्गार क्रेसि दलमनुथा बिबै क्ल्ह्योर ह्याइ।
फरिसीमैंइ येशूने “औदिबै चिनु उँइँन्” बिब
(मत्ती १६:१-४)
11फरिसीमैं येशू ङाँर खसि “क्ह्रोंसंन क्हि स्वर्गउँइँले युब् ग बिस्याँ औदिबै चिनु लसि उँइँन्,” बिसि प्होंबर होंइ।#मत्ती १२:३८; लूक ११:१६
12दिलेया खीए सैं नसि येशूजी बिइ, “तिंजोरोबै म्हिमैंइ तले औदिबै चिनु म्हैम्? क्ह्रोंसेंन् ङ क्हेमैंने बिमुँ, तिंजोरोबै म्हिमैंलाइ ङइ तोइ चिनु उँइँरिब् आरे।”#मत्ती १२:३९; लूक ११:२९
फरिसीमैं नेरो हेरोदए आछ्याँबै बानिउँइँले न्ह क्रों मि क्रोंले टिद्
(मत्ती १६:५-१२)
13छ बिसि येशू चमैं वाथेंसि डुँङ्गार क्रेसि धबै तालए क्योंजा ह्याइ। 14येशूए चेलामैंइ डुँङ्गार ह्यामा चबै सै बोब म्लेयान चमैंने क्हें घ्रि मत्त्रे मुँल। 15छले ह्यारिमा येशूजी खीए चेलामैंने लोदा सैंदा लसि बिइ, “फरिसीमैं नेरो हेरोद म्रुँए क्हेंर झोंबै प्लेढाउँइँले न्ह क्रों मि क्रोंले टिद्।”#लूक १२:१
16छबिमा “ङ्योने क्हें आरेमा प्रभुजी छ बिइ उ तो?” बिसि चमैंइ खें-खेंमैं ताँ लबर होंइ।
17येशूजी चमैंए ताँ था सेसि चमैंने बिइ, “क्हेमैंने चबै सै आरे बिसि तले ताँ लल? ङ खाब् जा बिसि क्हेमैंइ अझै आसे वा? अझै आक्हो वा? क्हेमैंए सैं अझै सारोन् मुँ वा? 18क्हेमैंए मि मुँलेया तले आम्रों? क्हेमैंए न्ह मुँलेया तले आथे? क्हेमैंइ तोइ आचि वा?#यर ५:२१; इज १२:२; मर्क ४:१२ 19ङइ क्हें ङ्हपोइ हजार ङ्ह म्हिमैंलाइ म्रेंन्ले चल् पिंमा क्हेमैंइ ङैबै क्हें लुँठेमैं खुमा कति ट्हलो प्लिंल?”
च चेलामैंइ येशूने बिइ, “च्युसे ङ्हिं ट्हलो।”
20छलेन “क्हें ङिपोइ हजार प्लि म्हिमैं म्रेंन्ले चल् पिमा क्हेमैंइ कति ट्हलो खागु लल?”
चमैंइ बिइ, “ट्हलो ङि प्लिंल।”
21येशूजी चमैंने बिइ, “क्हेमैंइ अझै आक्हो वा?”
येशूजी मि आम्रोंबै म्हि घ्रि म्रोंल् लमिंब
22च लिउँइँ खेंमैं बेथसेदा बिबै क्ल्ह्योर फेखमा चर म्हिमैंइ मि आम्रोंबै म्हि घ्रि येशू ङाँर पखसि “चुए मि म्रोंबै ल्हागिर क्हिजी छुइमिंन्,” बिसि यो छ्युँ लइ। 23छलमा येशूजी च मि आम्रोंबै म्हिए योर क्हासि नाँसउँइँले बैरु बोइ। झाइले चए मिर तु फोमिंसि चए मिर ह्रोंसए यो थेंसि “क्हिइ म्रोंल् खाँम् उ आखाँ?” बिसि चने ङ्योएइ।
24झाइले ताइ ङ्ह्योसि चइ बिइ, “ङइ म्हिमैं म्रोंल् खाँम्, दिलेया चमैं सिं धुँ धोंले प्ररिब् म्रोंम्।”
25छबिमा येशूजी धबै च म्हिए मिर छुइमा च म्हिइ ङ्ह्योइ,धै छेनाले म्रोंल् खाँब् तइ। 26च लिउँइँ येशूजी च म्हिने “नाँ-नाँसर खनिरै आहोंल्ले सरासर धिंर ह्याद्,” बिसि कुलइ।
पत्रुसइ येशू “परमेश्वरजी कुल्मिंबै म्रुँ ग” बिब
(मत्ती १६:१३-२०; लूका ९:१८-२१)
27झाइले येशू नेरो खीए चेलामैं कैसरिया फिलिप्पी ह्युलर्बै नाँस नाँसउँइँ ह्याइ। छले घ्याँर ह्यारिमा येशूजी खीए चेलामैंने “म्हिमैंइ ङलाइ खाब् बिम्?” बिसि ङ्योएइ।
28चेलामैंइ बिइ, “कोइ ‘बप्तिस्मा पिंबै यूहन्ना’ बिम्, कोइ ‘स्योंम्बै एलिया ग,’ बिम्, कोइ ‘स्योंम्बै अर्को अगमबक्ता घ्रि ग’ बिम्।”#मर्क ६:१४-15; लूक 9:7-8
29येशूजी चमैंने “क्हेमैंइ ङलाइ खाब् बिम्दि?” बिसि ङ्योएमा।
पत्रुसइ येशूने बिइ, “क्हिम् परमेश्वरजी कुल्मिंबै म्रुँ ख्रीष्ट ग।”#यूह ६:६८-६९
30झाइले येशूजी चमैंने “चु ताँ खाबलाज्यै या आबिद्,” बिइ।
येशूजी खीए दुःख नेरो सिसि धबै सोगों तखम् बिबै ताँ ओंसोंन् बिब
(मत्ती १६:२१-२८; लूका ९:२२-२७)
31झाइले येशूजी चेलामैंने “म्हिए च्हजी ल्हें दुःख सैदिल् त्हुम्। चिबनाँब्मैं, ख्रो पिंबै खेगि चिब्मैं नेरो शास्त्रिमैंइ ङ म्हि आच्हिसि सैबर ल्हैदिम्। दिलेया सिबै सोंरोर ङ धबै सोगों तसि रेखब्मुँ बिसि लोमिंबर होंइ।” 32येशूजी चु ताँ छेनाले क्होल्ले बिमिंइ।
दिलेया पत्रुसइ येशू दे क्याइ बोसि “तले छाबै ताँ लल?” बिसि हौदिबर होंइ।
33दिलेया येशू लिग्याँ तुसि चेलामैंउँइँ ङ्ह्योसि पत्रुसने “ओ दुष्ट, ङ ङाँइँले स्योह्याद्! तलेबिस्याँ क्हि परमेश्वरए ताँ आङिं, दिलेया म्हिइ मैंब् धोंले मैंमना,” बिसि हौदिइ।
34झाइले येशूजी खीए चेलामैं नेरो म्हिए हुल खी ङाँर हुइसि बिइ, “खाब् मुँलेया ङने बालु प्रबै सैं मुँ बिस्याँ चइ ज्युए म्हाँया आलरिगे बरु क्रूस#8:34 क्रूस क्रूस रोमी म्रुँए सैवाबै सै मुँल। सैवाबै म्हिए यो प्हलि चर च्योवासि काँटि क्योसि च म्हिलाइ वाथेंसि बल्ल सियामल। क्रूसर च्योवाल् त्हुबै म्हिइ ह्रोंसए क्रूस नोसि सैवाबै क्ल्ह्योर समा क्रूस बोल् त्हुमल। छतसि क्रूस नोबै म्हि म्रोंस्याँ च म्हि सिबर खोंइ बिसि था सेम्। म्हि घ्रिलाइ क्रूसर च्योवासि सैवाब बेल्ले इजेद-बिजेद लबै दण्ड मुँल। छतसि फ्रभु येशूजी “क्रूस नोसि ङने प्रि प्ररिगे” बिमा खीजी बिइ, “इजेद ह्याबै दुःख नेरो सिबै दुःख नोल् त्हुलेया ङने प्रि प्ररिगे।” नोसि ङने बालु प्ररिगे।#मत्ती १०:३८; लूक १४:२७ 35तलेबिस्याँ खाबइ ह्रोंसए ज्युए म्हाँया लमुँ, चइ खोंयोंइ आखाँबै छ्ह आयों, छलेन ङउँइँले खबै सैं तोंबै ताँ बिप्रमा ह्रोंसए ज्यु नास तयालेया चइ खोंयोंइ आखाँबै छ्ह योंब्मुँ।#मत्ती १०:३९; लूक १७:३३; यूह १२:२५ 36तलेबिस्याँ म्हिइ ह्युलर्बै तोन्दोंरि सैं योंलेया खोंयोंइ आखाँबै छह् योंल् आखाँ बिस्याँ चलाइ तोए फायदा तम्? फायदा आरे! 37म्हिइ धबै खोंयोंइ आखाँबै छह् योंबै ल्हागिर तो पिंल् खाँमुँ? 38छतसि खाबइ चु आछ्याँबै पापि जुगरि ङ नेरो ङए ताँ थेसि फापिमुँ, ङ म्हिए च्ह या ह्रोंसए आबाजी पिंबै मान नेरो पबित्र स्वर्गदूतमैंने बालु चु ह्युलए निसाफ लबर युमा च म्हि म्रोंसि ङै या फा पिब्मुँ।”#दान ७
Currently Selected:
मर्कूस 8: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.